الفصل السابع عشر

جمال لمن سمع كلام عمو .. جاهو احساس متعاكس .. اولا اندهش من موافقة عمو على الاختلاط

بي امو واخواتو .. ودي حسستو بي فرحة .. انو هم قد يصبحو جزء من النسيج الاسري للعائلة

الكبيرة .. بعد ما كانو ممكن يفقدو الهوية .. الحاجو التانية الحسا بيها .. احساس بي انو العم عايز

يعاكس بس .. وهو عارف انو لاهو ولاولدو يونس مافي زول جاهز .. بس احتمال عمي عايز يفشل

الموضوع ده وخلاص .. والله انا ذاتي ماعارف الصح شنو؟

عمك العبيد قاليهو مالك ياجمال؟ ساكت متبوم كدي؟ ..

قال ليهو جدا .. خلاص ياعمي .. يعني ح اقول ليك شنو؟ انا باكر بمشي اكلم احمد .. اقول ليهو

ماعندنا ليك مراة .. وبقول ليهو اختي دايرها ود عمها بس في حاجة مهمة ياعمي .. لازم تحاول

تصلح العلاقة مع امي. لانو بالطريقة دي الموضوع مابتم ..

العبيد قال ليهو .. والله كمان خبر. نحن متين بقى عندنا راي عند الحريم ..

قال ليهو خلاص ماتزعل نفسك .. انت موش عارف الزعل مابنفع معاك؟

الموضوع ده خلو علي انا براي بحلو .. وبخليك هادئ البال ومرتاح .. بس هسي نحن اول حاجة

المفروض نقوم بيها .. نمشي نطلع يونس من السجن .. ونشوف رايو هو ذاتو في الموضوع شنو؟ ..

بعد داك نشوف راي ماجدة.

قال ليهو ماجدة ماعندها راي معانا. الراي راي انا .. وولدي مابتعدا كلامي.

. جمال ماحب يتناقش معاهو كتير ... مشى من جمبو .. وهو مستغرب في القرار الاخدو العبيد

ده؟ .. وبراهو بقول ياربي عمي هدفو شنو في الموضوع؟.

بعدين ياجماعة عاتكة بت العبيد. قبيل وكت كان ابوها بتكلم مع جمال .. جات على الديوان .. والحقيقة

هي ماكانت عارفة جمال مع ابوها .. وجات تغرف ازيار الديوان .. عشان تكب فيهن موية جديدة ..

بس لمن سمعت ابوها بتكلم مع جمال رجعت طوالي .. عشان ابوها مايحس بيها يقوم يطربق فوقها

الدنيا ..

مشت قالت لي امها يا امي انا سامعة جمال بتكلم مع ابوي .. بس مافهمت المووضوع عن شنو.

قالت ليها ماسمعتي ولاكلمة؟ قالت ليها سمعت كلمتين بس .. لكن مافاهمها باقي الكلام ..

قالت ليها اها قولي لي الكلمتين ..

قالت ليها جمال كان بقول لي ابوي .. انت لازم تصلح علاقتك مع امي لانو الموضوع ده بالطريقة دي

مابتم ..

ابوي قال ليهو .. والله كمان خبر. نحن متين بقى عندنا راي عند الحريم ..

قالت ليها بختك يا عاتكة معناها ابوك وجمال متفقين على عرسك من جمال. لكن امنة بت خالد

رافضة. لانهم بتكارهو هي وابوك ..

الموضوع بعد كدي بقى عليك انتي يا عاتكة .. لازم تصلحي العلاقة بين ابوك ومراة عمك ..

اول حاجة لازم تخلي امنة بت خالد تريدك .. انتي عارفة كان عرستي جمال .. بتسعدي في عمرك

ده .. وترتاحي وتبقى من نسوان الراحات والدهب والزينة .. يسويها عليك الله يابتي ..

وعاتكة سرحت بعيد .. وقالت ليها يا امي القروش تطير .. انا شايل قلبي الغالي براااهو ... انا كنت

ميتة بيهو من وكتو الكان مفلس .. وهسع لو فلس تاني .. ياهو في قلبي جمال ..

لكن اقول لك من الليلة انا تاني بسوي بيت ناس امنة ساساقة .. واخليها تريدني زي عيونها ..

اها بالنسبة لي جمال مشى عمو على البيت .. وماقال اي حاجة ولاجاب سيرة عمو .. لا لي امو ولا

لي اختو. وكأنه ما كلمه ..

وباكر برضو مشى السوق .. وما لاقى احمد. ومامعروف هدفو شنو.

المهم بعد كم يوم .. العبيد رسل ياسين ولدو يمشي الدامر .. ويسأل عن القروش المطلوبة من يونس

كمها.

وياسين ركب البرينسات البمشن الدامر من شندي .. (البرينسة بوكسي مسقوف) ..

ونزل في سوق الدامر .. ومشى لي صاحب ابوهو .. الاسمو عبد الحفيظ ود النور. الكان ضمن يونس

المرة الفاتت .. وسأله من الجيهة الممكن يلقى فيها يونس اخوهو ..

قال ليهو اصبر لغاية العصر انا بوديك زيارة للسجن تقابلو .. لكن والله يا ياسين ياولدي انا مانعارف

اخوك ده ودا القروش دي وين .. غايتو القروش كتيرة تب .. اظنها اكتر من ال 8 مليون .. والطالبنو

اكتر من 7 تنفار. الداير مليون والداير خمسمية. والداير تلاتة

طبعا ياجماعة ال (8 مليون دي كانت بتجيب ليها اربعة بكاسي زي بوكسي جمال السايقو) .. < اللهو

موديل 83 سيوبر > ..

ياسين كان واقف على حيلو .. قعد في الواطة .. وخت ايديهو في راسو.

قال ليهو اصلو مابصدق .. هسي دي ابوي يجيبها من وين؟

والله ان بعنا واطاتنا ما بتسددها .. الله يخوزقك يايونس .. كان داير تخلينا نشحد ..

والله ياعم عبدالحفيظ .. ابوي يسمع بالمبلغ ده احتمال قلبو يقيف .. اصلو عقاب عمر ..

والعصر قام ياسين مع عبد الحفيظ السجن. وقابلو يونس. وياسين قال ليهو رسلني ابوي .. وداير

يعرف القروش كم؟

قال ليهو قول لي ابوي ما في زول يدفع لي قرش .. انا بقعد في السجن ده .. انا تاني مابقدر

اقابل ناس البلد بعد الحالة دي ..

قال ليهو هي القروش كم؟ .. انا على اوصل لي ابوي الحاصل .. تاني انت مخير ..

قال ليهو 8 مليون وميتين وخمسين.

قال ليهو والله حرام عليك .. تدخلنا في حتة زي دي .. هسع ابوي ح يبع الوراهو والقدامو .. وكمان

عندو عملية قريبة بي مبلغ وقدرو واحتمال يسافر ليها مصر.

والله انتقمت فينا انتقام يايونس .. غايتو انا ماعارف .. لكن ده عقاب رباني ..

المهم ياسين الرتجة قال لي يونس كلام زي الرصاص .. واداهو مصاريف زي الف جنية وسافر ..

وجا هنا طبعا كلم ابوهو ..

وقال ليهو القروش المطلوبة من يونس 8.250000 .. عمك العبيد قال ليهو وانا مالي؟

امشي جوة انا جاييكم .. امك في؟

قال ليهو ايوة قاعدة .. قال ليهو بس قول لي امك واخواتك ابوي جاي يتكلم معاكم ..

جاهم جوة قعد والبنات التلاتة وامهن .. وياسين كلهن قاعدين ..

العبيد قالهم طبعا ياجماعة انتو عارفين يونس والعمايل العملا ..

انا طبعا عارف نفسي ماعندي ايام لا قدام في الدنيا دي. لاني مابقدر اسوي العملية وادفع قروش

يونس ..

هسع انا عندي فكرة ابيع الواطة .. واحلو بيها .. ده لو انتو موافقين اصلا الواطة بعد ده بقت من

حقكم .. ولو عندكم مانع نخليهو يعفن في السجن ..

الام قالت ليهو بيعها الواطة شنو يعني؟. المهم نمرق يونس .. ويونس بي صحتو وعافيتو .. يشوف

ليهو شغل هو وياسين .. ويعيشونا في امن وامان .. وربنا كريم ..

عمك العبيد عاين للبنات قاليهن موافقات بيكلام امكن؟ قالن ايوة وانت ياياسين وياسين وافق ..

كلهم وافقو ... العبيد فعلا شكلو قنع من الحياة ..

مشى طوالي رسل. لي جعفر .. وعبد الهادي .. وعمك الطاهر وعثمان. ناسو المقربين في

الحلة .. وقال ليهم الداير فيكم واطاتي وقروشو جاهزة يقول انا .. انا داير ابيع واطاتي واحل الديون

الفوق ولدي .. بس انا ماببيع اقل من 8 مليون ونص ..

كلهم سكتو وبقو يعاين لي بعضهم .. وبي كل كلمة واحدة قالو ليهو والله ياحاج ماعندنا مبلغ قدر

ده ..

حاج الطاهر قال ليهو شوف جمال يا العبيد .. بكون بي قروشو ...

قال ليهو شوفو انت .. انا مابقدر اقول لي جمال كلام زي ده يا حاج الطاهر .. قال ليهو خايفو يتأثر

صح؟ ..

قال ليهو لالا انت عارف .. جمال راجل كلس .. بدفع القروش بلا واطة .. وانا مادايرو ينضر ويخسر بي

سبب يونس ..

حاج الطاهر قال ليهو والله صدقت .. جمال بقا ليك انفع من ولادك ..

وكلنا شاهدين على وقفتو فوق علاجك .. وصرفو الصرفو عليك ..

قال ليهو خلاص ياحاج الطاهر. كلو عارفو ومانشاحدو .. كلو برجعو ليهو .. احمد الله لا عدمان ولا

محتاج ..

جعفر قال ليهم ياجماعة خلاص الكلام ده انتهى. ولا باكر امشي لي ود اب قرن يجي ياخد الواطة ..

زولن لي .. من جنوب شندي .. قروشو النار ماتاكلن. وجنو اراضي ..

العبيد قال ليهو والله ود اب قرن ده اخير لنا من جمال .. عشان كلام الناس مايكتر ..

الطاهر قال ليهو ده كلام شنو ياحاج العبيد؟. انت يادوب داير تخلي الناس تنضم فيك .. اكان مرقت

الارض من ولادك وولاد اخوك ..

العبيد مارد على الطاهر .. وقال لي جعفر باكر امشي كلم زولك ده ياجعفر ..

والجماعة ودعو العبيد وقامو ينقنقو ..

لكن حاج الطاهر مشى العصر انتظر جمال في البيت .. وقال ليهو حصل عمك داير يبع واطاتو لي زول

غريب ..

جمال قال ليهو يبعها ليه؟

قال ليهو انت ماسمعت؟ ود عمك البهيمة داك مقبوض في في تمانية مليون وكسر ..

قال ليهو اصلو ما ممكن؟ قاليو امشي على عمك سريع .. وقفو قبل الراجل مايجي بكرة .. ياخد

الواطة .. لا انت ولا ولاد عمك ماتلمو فيها ..

جمال قال ليهو قلت لي كم؟ .. قال ليهو تمانية مليون وميتين وخمسين قت لك ..

جمال بالليل داك مشى للعبيد .. لانو ود اب قرن بجي بكرة يشتريها ..

قال ليهو ياعمي .. انت حاسبني زول غريب منك ولا شنو؟

ليه ماكلمتني بمطالبة يونس .. يونس مو أخوي؟

قال ليهو ياجمال والله ياكا ولدي .. واحسن من ولادي كمان .. لكن ماداير اكلفك .. كفى الكلفتك ليهو

في الاسبتالية. (المستشفى) ..

قال ليهو طيب ما تبيع الواطة .. اصبر انا بلملم اطرافي ونفك يونس .. القروش في الحمد لله ..

العبيد قال ليهو ابدا .. والله العظيم قرش واحد مابشيلو منك تاني ..

قال ليهو طيب انا بشتري الواطة ..

العبيد قال ليهو انا ربطت لساني مع جعفر .. عندو زول جايبو باكر كان ما اتفقنا بعدين تعال ..

قال ليهو ياعمي انت مالك كدي بتتعاند علي وعلى اولادك .. ياعمي خليك ساهل معانا .. الدنيا

مابتستاهل ده كلو ..

لكن اقول لك ..؟ انا ذاتي عنيد زيك .. والواطة دي مافي زول غريب بياخدها .. وانا باكر مابمشي

شندي .. وبجي هنا ده .. والحشاش يملا شبكتو .. العبيد قعد يعاين لي جمال كدي ودموعو دفقن ..

الراجل ده ببكي مالو كمان؟؟ .. شي عجيب ..