الفصل العشرون

امنة بت خالد بقت حاسة .. بي احساس غريب في جمال .. جمال مع انو ارتاح وقروشو .. ملت

الدنيا .. بس برضو ما ظاهرة فوقو سعادة واضحة .. وماحصل يوم جاب ليها سيرة العرس .. واهو

جهز ماجدة وماجدة اتزوجت .. وبعد اسبوعين ح يتزوج يونس .. وامونة عارفة انو اي تعريفة صرفها

يونس على عرسو .. هي من جمال .. جمال هو اللماهو .. جمال هو الشغلو .. جمال هو البديهو من

غير حساب .. يونس بعد ماكان شغوف بي جمع المال .. بقت القروش مابتعني ليهو شي .. لانو جمال

ماحوجه لي حاجة ..

وخلاهو امين المال .. وقال ليهو القروش دي .. كلها حقتنا نحن ماحقتي براي .. يعني حقة عمي

العبيد .. وحقة ياسين .. والتاية .. وامنة بت خالد .. وانا وانت .. اي حاجة احتجت ليها ماتشاورني ..

شيل البكفيك وخلاص ..

ومن اليوم داك .. بقي يونس حريص على حق جمال .. اكتر منو .. وبقى بحاسب العمال محاسبة

عسيرة ..

المهم الزول ده حالتو بقت احسن كتير ..

اها امنة بت خالد يوم نادت جمال .. قالت ليهو جمال .. كدي تعال جاي انا دايرة اسألك ..

انت مالك شايل هم الدنيا زي العندك مشكلة في حياتك .. انت بتحب وانا ماني جايبة خبر ..

قال ليها مافي حاجة يمة .. بس شايل هم اخواتي وامي .. تاني ماعندي هم ..

قالت ليهو اها والعرس؟ .. قال ليها العرس هسع مافي .. الا ادخل نجوى اختي في بيتها .. واطمن

عليها زي ما اطمنت على ماجده ..

والهدف التاني في الحياة انا داير احججك .. واكون بي كدا اديت جزء بسيط من البر ..

انتي عانيتي بي سببي كتير .. أأأأ .. اقصد بي سببنا انا واخواتي ..

قالت ليهو .. انا دايرة اسألك سؤال ياجمال .. وما تكضب علي .. عمك العبيد ده حكا ليك شي من

سبب العداوة البيني وبينو ..؟ قال ليها يا امي انتي عارفة العبيد ده ما بحكي لي زول .. ماشاء الله

زول غتيت زيك واحد .. كلكم صعبين وكتومين ..

طبعا زي ما ملاحظين امنة حست بي نفسيات ولدها ماكويسة .. وخافت يكون عرف حاجة من تاريخ

حياتو ..

اها يازول اسبوع كمان .. يونس كان راكب مع جمال .. وماشين على شندي .. قال ليهو انت ياجمال

البت لقيتها مالها في المدرسة؟ ماكلمتني ..

قال ليهو لالا مافي حاجة ..

البت كان عندها علاقة مع واحد من اولاد شندي فوق. ولمن تطلع من المدرسة بتلاقيهو .. جنب

البقالة الفاتحة على السكة حديد دي. حتى بعداك تمشي البيت .. والاساتذة راقبوها .. ورسلو لي

ابوها ..

وقالت لي ابوها ده محمد ودخالة امي .. وابوها اقتنع بالقصة .. ووصاني عليها ..

وبرضو ما خلت مقابلة الولد ده. والاساتذة والاستاذات بقو متضايقين ..

يوم في استاذ كان ماشي مع ولدو .. لاقاهم الولد البقيف مع نهاد .. وطلع صاحب ود الاستاذ ..

واسمو معز .. يعني مامحمد ود خالة امها ..

والاستاذ قال ليها ترسلي لي ولي امرك يجي .. ومنعوها تطلع لانو عندها امتحانات ,, وهي جاتني

عشان اطلعها من المشكلة ,, والحمد لله طلعتها ..

يونس قال ليهو طلعتها كيف يا الشقي؟

قال ليهو قلت ليهم انا خالها .. والزولة دي ابوها صعب .. ولو سمع بالكلام ده .. ممكن يضبحها .. لكن

انا بتعهد ليكم .. تاني ما ح تقابل الزول ده نهائي ..

طبعا " يايونس البت دي ممتازة .. يعني انا متأكد انو الولد ماعندها معاهو علاقة سيئة .. اهو بس

بتلاقيهو .. وتقريبا واعدها بي زواج بعد تخلص .. لكن بس العيب انها كذبت على الاساتذة .. وعلى

ابوها ..

المهم هسي عاهدتني تاني ما ح تلاقيهو وانا صدقتها ...

وانا لاقيت الولد قبل يومين .. واتكلمت معاهو .. قلت ليهو انت لو داير نهاد .. على كتاب الله وسنة

رسوله .. اصبر لغاية ماالبت تخلص. وامشي اطلبها من ابوها ..

لكن ملاقاتك ليها دي بتسبب ليها مشكلة كبيرة .. والولد شكله ود ممتاز والله .. ومهذب جدا .. ده كل

الحاصل يا يونس ..

يونس قعد يعاين ليهو كدا .. قال ليهو اسع داير تقنعني يا جمال .. انو البت دي ماحركت فيك

شعرة ..

قال ليهو كيف ماحركت يازول .. والله انا اول يوم شفتها لامن جاتني خلعة .. لكن وكت بقت امانة

الموضوع بقى فيهو خطورة .. الامانة دي يازول كان فكرت فيها ساي .. ربنا بكتبك خاين .. عشان

كدي بقيت منها بعيد بعيد .. وهسع كمان وكت لقيتها قلبها مع زول تاني .. يبقى الموضوع بقى

موضوع تاني ههه

يونس قال ليهو والله ياجمال انت براك اتجابنت .. البت دي كان حست بيك احساس انك عندك ليها

شي .. كانت باعت العالم كلو خلي معز ود شندي فوق ..

قال ليهو يعني تبيعو عشان شنو؟ عشان القروش ولا شنو؟ لو عشان القروش بتبيع العُشرة .. يبقى

دي ما مرة سعاية .. بعدين يا معلم انا اعيش معاها كيف ضميري مرتاح. وانا ظلمت معز .. بس

عشان هو ماعندو. وانا عندي ..

يا يونس الراحة والسعادة ما كدا ياحبوب .. الراحة والسعادة سلام داخلي وتصالح مع النفس

ياحبيب ..

كدي خلي الموضوع ده .. كملت الغرفة الورانية بتاعتك .. كملت ليها البوماستك؟

قال ليهو والله اي شي جاهز .. بس بعد كدي المراة تجي لي بيتها ..

والمواعيد قربت وانا قلبي بدا يخاف ..

جمال فقعها ضحكة .. قال ليهو تخاف يا اب دربا " ماكن .. الونسة كانت حلوة شديد بينهم الاتنين ..

بعد وصلو جمال قال لي يونس دقيقة اوصلك .. واسلم على عمي مرة واحدة .. جمال اتاخر برة

ويونس نزل. يونس دخل .. وابوهو ساله من الشغل ماشي كيف؟.

قال ليهو والله شغالين زي الفل .. والحمد لله .. نحن اكتر ناس شغالين في السوق .. والليلة في

عطأء .. جانا في الجريدة .. وجمال رسل يقدمو ليهو فيهو. قول ان شاء الله يظبط .. لانو ده بريحنا

تب ..

العبيد قال ليهو. (بريحنا) .. ؟؟ .. تنضم زي التقول القروش حقتك .. وينو عمارك مع الرجال

آالخايس.؟ يونس قال ليهو انا وجمال واحد .. ..

قال اوس كفى .. خشم التحشاهو واطا .. متين بقيتو واحد؟ .. يونس دمو فار .. وكان داير ينفصم في

ابوهو .. اتذكر كلام جمال .. وكت قال ليهو (الكبار تخليهم ينضمو زي ما دايرين ونحن ماعلينا الا

نحاول نرضيهم) ..

طوالي قال ليهو يا ابوي انت ما رضيان انا اشتغل مع جمال؟

قال ليهو ماقلنا حاجة .. لكن ما تتكلم زي التكنها القروش هيلك.

قال ليهو يعني اشتغل معاهو بي احساس اني شغال مع زول غريب ولا شنو؟

العبيد قال ليهو اسكت انت عمرك مابتفهم .. يلا ..

وللاسف جمال كان سامع الكلام ده كلللو .. لانو اتأخر بشرب في المزيرة برة ..

جاء داخل سلم .. وقال لي للعبيد .. ده كلام شنو البتقول فيهو ده يا عمي؟

عمك قال ليهو حبابك ياجمال .. كيف الصحة والاحوال .. لالا مافي حاجة

اها اخبار ناس ماجدة شنو؟ ما سألت منهم تاني؟

قال ليهو الحمد لله احمد بلاقيني في السوق لكن ان شاء الله الخميس الجاي بمشي ليهم بالغرب ..

عشان نزور منزلها الجديد .. ونطمن عليها شوية ..

قال ليهو ايوة عليك الله .. انا والله من يومها الراحت بقيت زي الرايحة لي حاجة .. نعمنها كل يومين

تلاتة بتجي مع عاتكة .. وتسلم علي ..

هسع فقدها تب والله .. والصغيرة ديك طالعة زي امك .. بي جيهتي ساي مابتجي ..

جمال حسا انو عمو زايغ من كلامو .. وشكلو العبيد اتحرج لامن عرف انو جمال سمع كلامو مع

يونس ..

قام جمال غمت عينو لي يونس .. قال ليهو اطلع برة ..

يونس اتخارج براحه .. وجمال جاء قعد جم عمو .. وبسأل فيهو ..

قال ليهو ياعمي انت يونس مو ولدك؟ .. انت ليه بتتعامل معاهو كدي؟

ياخي الزول ده ماشاء الله ماشي كويس ..

وشغال معاي بي نية واحدة .. وانا براي القلت ليهو الحق ده مو حقي براي حقنا كلنا .. عمك قعد

يضحك وبحاول يغترش في الكلام .. لالا يا جمال انا بس موجعاني كلمتو ..

جمال وكت لقى عمو بارد .. وحيلو ميت .. قال يستغل الفرصة دي ويرمي ليهو قنبلة ..

قال ليهو ياعمي انا داير اسألك سؤال .. انت القصة الحكيتها لي عن ابوي .. طبعا قلت لي تاني

ماتفتح سيرتها .. لكن مافي كلام ناقص نسيتو داير تقولو لي .. ولا في حاجة يعني .. ما كنت

متذكرها كويس ..

قال ليهو اسمع ياجمال ..

انا يمكن كنت زول طائش في جهلتي .. وسفيت وسجرت وشربت العرقي ..

لكن مستحيل ابهت لي زول واكضب فيهو .. بي كلام ماياهو .. وانا والله .. واقسم بي جلالة الله

العظيمة .. اي كلمة حكيتها ليك دي الحقيقة السمعتها من ابوك .. وشفتها بي عيوني .. لازدت كلمة

ولانقصت كلمة

وانت كان ما واثق في كلامي ..

ولا عندك شكك ولو بسيط .. امشي قعد امك وخليها تحلف ليك .. على المصحف .. انها تقول ليك

الحقيقة كاملة ..

بس يا ولدي الكلام ده مافي داعي تفتحو تاني .. يعني انت بي يدك شنو؟

وح تقدر تعالج شنو .. دي كلها حاجات في الماضي .. ومافي يدك ترجع الماضي وتعيد الكان ..

وانا ذاتي والله ندمت ندامة .. اني قصيت لك القصة دي .. وانا وقت قت لك الكلام ده .. ماكت

دايرك تناسبني ..

لكن انا واولادي هسع ترانا عايشين في خيرك ومالك .. وقالو تأباها بي ملاحها تكوس لها قروض ..

وياهدي التاية .. قالت عاتكة حالفة بي دينها وايمانها .. ماتعرس غير جمال .. لو قعدت عمرها كلو بلا

عرس .. انسى الموضوع ده ياولدي .. الله يرضى عليك ..