الفصل الثاني والعشرون

يوم الجمعة الصباح .. وصبحان السبت .. جمال جاء يصبح على عمو .. قال ليهو ياعمي انا جيت

اودعك .. باكر الصباح انا مسافر .. عندي مأمورية في بورسودان .. يومين تلاتة وبرجع ان شاء

الله .. عمك العبيد .. قال ليهو ان شاء الله ربنا يكتب سلامتك .. الشارع الماشي بيهو ده كعب

شديد .. خلي بالك من نفسك .. وسوق على مهلك .. وكان حسيت بي نفسك تعبت .. اقيف في اقرب

استراحة اخد راحتك وواصل ..

وعمك العبيد شكلو ما حس باي ربط بين سفرة جمال .. ومدينة بورسودان .. وما حصل فيها من

الاحداث في الماضي .. غايتو شكلو ما ركز .. وللا يكون عارف وعام رايح العلم عند الله ..

قام العبيد قال لي جمال .. انا بعدين جاي اتغدا معاك في البيت .. لازم اودعك من اهلك ..

طبعا دي كانت مفاجأة لي جمال .. لانو العبيد ماحصل دخل بيت ناس امنة .. الا لي الشي البدخل

الناس .. ومن يوم مات اخوه تاني مادخل الا يوم عزومة عبدالماجد ابو نهاد ..

جمال الفرحة بدت فوق وشو وقال ليهو .. جد يا عمي الليلة غداك معاي؟؟ ..

قال ليهو عشان الفرحة الفوق وشيك دي ياجمال .. انا بعمل المستحيل ..

جهز لي غدا مايكون فيهو تحريمات الحكيم القالن ..

جمال قال ليهو لالا. انا حريص عليك .. بنزبط ليك غدوة مافيها اي اضرار ..

وعمك العبيد عندو هدف كبير من الغدوة دي .. وكت جا بعد صلاة الجمعة مباشرة يعني قبل الغدا ..

جاهم في البيت.

وقبل مايقعد كويس. قال لي جمال نادي لي امك وتعال ..

جمال وقت قال لي امو عمي العبيد دايرك .. قالت امسينا بي الله واصبحنا بي الله يارب سترك ..

جاتو قالت ليهو حبابو العبيد ..

قال ليها امنة بت خالد اقعدي .. أقعد انت برضو ياجمال .. قال ليها يا امنة بت خالد انا بقيت عقاب

عمر .. وايامي بقت معدودة .. وجمال ولدي بقا لي زي نور عماي .. وعكازة كبري. وانا والله يا

امنة .. بي سبب جمال. عرفت انو الدنيا دي ماها زي ما نحن فاهمنها .. وربنا عندو تصاريف في

القدر .. تخلي الزول بس يسكت .. يقول سبحان الله ..

انا يا امنة بت خالد جاي اطلب منك العفو والسماح .. واموت وانا مافي شايل مني ..

يا امنة بت خالد الدنيا دي دار زول .. ومافيها خير الا العمل الصالح .. والقلب الطيب .. انا عشان

ارضي ربنا .. وافرح ولدي جمال .. واخليهو يسافر وبالو فاضي .. جيتك بي نفسي عشان تقبليني ..

وتديني العفو .. اعفي مني يا ام جمال. اعفي مني وعافي منك ..

امنة دي اول حاجة قلعت عيونا دي ... وقالت العبيد ده الليلة الا شارب ليهو مريسة مسخسة ليهو

راسو ده ..

لكن وكت لقتو بتكلم بي صحو ونصاحو .. قالت ليهو ياحاج العبيد. انا ماني شايلة منك في

قلبي .. وكت ربنا براهو انصفني. مافي داعي لي نبش القديم .. عافية منك دنيا واخرة .. وان شاء

الله عمرك يطول وتقعد لي وليداتك ولاد اخوك .. وتبقالن تاية وشاية ..

انا ذاتي يا حاج العبيد طالباك العفو .. انا والله اظني ماكنت فاهماك كويس .. انت اتاريك زول حنين

وقلبك طيب .. لكن قوة الراس عليك بس .. تراك ماقصرتا. جبدتا لي نجوى طالعة زيك انت بس ..

تسلم يا الحاج خلاص اقعد مع جمال .. جهزنا ليك الغدا الصحي.

والله ياجماعة جمال ده اتكيف كيف لامن دمع ..

وجواهو بقول ياربي انا ماعارف اشكرك كيف .. والله ماعارف اشكرك كيف ..

سبحان الله ربنا قال .. لئن شكرتم لازيدنكم .. وجمال ماشي على الطريق الصحيح .. كل ما تحصل

ليهو نعمة بشكر ربنا من جواهو ..

والنعم ماشة زايدة عليهو بفضل الله ..

المهم اتغدو فضلة خيركم .. وشربو الشاي .. وجمال وصل حاج العبيد لغاية البيت بالبوكسي .. مع انو

البيت مابعيد يعني ..

ودخل جوة سلم على التاية .. وقال ليها جيت اودعكم .. انا باكر مسافر .. طوالي عاتكة جات مارقة

من الاوضة .. واتضارت كدي في ركيزة البرندة .. وبتعاين ليهو مغتية وشها .. وعليها تعابير غريبة ..

وشها بقول .. انا دايرة اودعك وماقادرة .. انا دايرة اقول ليك ماتسافر وماقادرة .. جمال لاحظ

ليها .. قال ليها تعالي ياعاتكة .. مالك متضارية بي ورا كدا.؟

التاية قالت ليهو .. عاتكة دي بتتعاور كدي طوالي ياجمال ..

قال ليها ياخالتي عاتكة زولة صغيرة وبريئة .. وزولة صالحة عديل ..

طوالي عاتكة قالت ليهو خلاص ماتسافر ياجمال .. التاية قالت ليهو اها شفت العوارة دي؟

جمال قعد يضحك .. قال ليها لالا ياعاتكة .. انا لازم اسافر لكن ان شاء الله مابتأخر ..

على كل اصبحت الواطة .. وجمال اخد من امو وصف المنطقة الفيها اهلها .. وقام الصباح بدري

صلي .. وامو سوت ليهو الشاي .. وودعن. وقام سافر برااهو .. ومسك شارع الخرطوم .. ومشي بي

طريق مدني القضارف كسلا بوسودان كدا .. وكل منطقة يجي فيها يغشاها ويحوم

يتفرج ويتشمر. لانو اول مرة كان عمرو خمس سنة وكت جا منها مع ابوهو .. المهم في الطريق ده

اخد اكتر من 24 ساعة. بي كترة الغشوات .. ووبات في كسلا ..

بعد ما فات كسلا بدا يسأل .. عن مدخل اي منطقة تلاقيهو .. لاقي نفرين قال ليهم بسأل من منطقة

مدينة اروما .. قالو ليهو ليهو نحن بنركب معاك وننزل منك في اروما ذاتها ..

سألهم من اسم منطقة بتقع بعد اورما .. بي عشرات الكيلو مترات .. بعد ما وصل الوصف نزل من

الزلط .. طوالي وفعلا المنطقة فيها طبيعة صعبة شديد .. وحجار وخلا ووغش .. وبعيدة شوية من

الزلط بس درب البكاسي ماشي ...

ودروب بكاسي الرشايدة. مشختة في الخلا زي سطور كراس الاتقليزي.

امكن بعد تلت الساعة من الزلط الرئيسي بدأت تلوح له البيوت .. والبيوت بنيانها مابشبه

المنطقة .. غايتو عجايب في سودان العجايب.

المهم ياجماعة وصل الحلة سأل من بيت ناس خالد. ود منو كدا ماعارف .. اول زول قال ليهو ..

ناس نصر الدين وعمر .. امشي قدام هناك الجامع ده الشارع التالت منو ..

طوالي مشى وصل الشارع .. لاقتو شافعة عمر 9 سنوات .. قال ليها يابت .. وين بيت ناس خالد؟.

قالت ليهو يهوداك بيتنا .. هو جدي ..

مشى طوالي وقف العربية قدام خشم الباب الكبي .. ر ودق الباب .. الباب تلات ضلفة. اسود بي

ابيض. فاتح شرق في سيح كبيرة ..

فتح ليهو الباب ولد في عمر 17 سنة كدا .. ورحب بيهو .. اتفضل اتفضل دخل جوة والوكت كان زي

الساعة ..

وخش جوه. لقى الديوان ماشاء الله عامر بالناس .. وفي راجل كبير في السن اظنو ده خالد ابو امنة

ذاتو ..

واحد في الجماعة قال قوم يا ولد جيب الفطور .. وان شاء الله كويس .. ومن وين يازول؟. شكلك

جاي من منطقة بعيدة؟ ..

قال ليهو والله جاي من شندي .. عمك الحاج الكبير امكن اكتر من 75 تمانين سنة. لكن زول جابر

تب وجسمو شاد حيلو .. قعد على حيلو وقال ليهو من شندي؟

قال ليهو نعم الحمد لله .. اسمك منو يازول؟ قال ليهو انا جمال ود محمد الجعلي امي امن بت

خالد ..

الناس ديل كلهم قامو سلمو عليهو مرة تانية ..

جدو خالد لامن عيونو رقرقن. ماشاء الله ياولدي كبرت .. وبقيت راجل تب .. والله انا لاهسع متخيل

امنة الشافعة الطايشة .. وكيف امك واخوانك؟ .. والوالد كيف؟ والله نحن طبعا ماعرفناكم سكنتو

وين؟ والظروف والبلد البعيدة قطعت الناس كلو كلو ..

الاربعة ديل اخوالك اخوان امك .. نصر وعمر والسيد وفرح.

والحمد لله متزوجين وبي وليداتهم .. والخيلان ذاتهم شكلهم فرحو بي جية جمال .. وفارو فوقو فروة

شديدة .. ناس اشكالهم عرب لكن متوجسين من شنو مامعروف.

قاليهم اخواتي اتنين ماجدة ونجوى. وماجدة اتزوجت. ز والوالد عليعو رحمة الله اتوفى .. قبل 4

سنة وشوية.

في اثناء التعارف ده الفطور جا .. جدو قال ليهو افطر وقوم سلم على حبوبتك .. عيانة .. ان شاء الله

بي شوفتك تبقى طيبة .. فطر وفطرو معاهو نفرين كد شكلهم غربا او حاجة. شكلهم ما من ناس

البلد ..

بعد غسل ايديهو وشرب الشاي .. جدو قال للولد عليك الله دخلو على حبوبتك جوة .. قول ليها ده

جمال ود بتك امنة ..

دخل على حبوبتو .. ولقاها قاعدة على حيلها تبكى راجياهو .. من شافتو قامت خضنتو .. قالت ليهو

مالك اتاخرت .. الولد كلمني من قبيل. انا راجياك .. كانت فوقي حمى محل ماطارت ماعرفتها ..

وتسلللم عليهو وتشم فيهو وتبكي .. وتاني تسلم عليهو .. الحجة بتشبه امنة امو شبه مبالغ فيهو ..

بس مشلخة ..

وشلالفها مدقوقات ..

(دق الشلوفة. دي طبعا عادة قديمة .. قبل ما يكتشفو احمر الشفايف كانو بدقو للمراة شفايفها

بالابار ويحشوها بالكحل .. بتبقى لونها اخضر مايل على السواد .. وبتكون كدا دايمة لابتتغسل

ولابتحتاج لي اعادة ..)

على كل حال المراة دي بكت فوق جمال ده بكا ماتتخيلو .. وجمال ذاتو وكت شاف المراة دمع ..

واتخيل حرمان الام دي من بتها .. كل السنوات .. وكيف امو اتحرمت من امها .. وكيف عملت الايام

مع جمال وامو .. الحكاية دي زادت من دموعو ..

لكن برضو فرحان كونو شاف اهل امو .. المراة دي بتسأل عن بتها سؤال عجيب خلاص .. كيفنها

وكيف صحتها .. وكيف اخوانك .. وعندك كم اخو وكم اخت ..

والله انا قلبي محروق على بتي .. لكن ياولدي مابيدي حيلة ..

الناس ديل شكلهم قايلين انو جمال امو حكت ليهو الحصل عليها .. عشان كدا دايرين يبررو

مواقفهم ..

جمال طبعا اغتنمها فرصة .. وقال ليها ياحبوبة البركة اني شفتك وشفت جدي .. براها خير كتير من

الله .. انا بمشي اتونس مع جدي شوية

وبعدين بجيك نلقا لينا وكت .. واجي احكي ليك وتحكي لي ..

البيت بتاعهم ده كبير كبر ماطبيعي. يعني الناس ديل اقل حاجة ساكنين في مساحة 4 الف متر.

والحوش بتاع الديوان ده براهو ممكن يعملوفيهو سباق الحيل .. والاولاد الاربعة كل واحد عندو بيت

واولاد .. والحريم بتاعاتهم قاعدات في البيت الكبير .. وناس شكلهم كدا عمد في البلد .. واغنياء

وكدا ..

الكلام ده بالضبط يوم الاحد الواقع يوم اربعة وعشرين اكتوبر 1993

اها جمال بعد ما سلم على حبوبتو .. وقايم ماشي قالت ليهو ماتتأخر علي. وعندك خالتين تاني ..

متزوجات وساكنات في كسلا .. احتمال يجننا في الايام الجايات ديل .. عشان انا كنت عيانة ..

قال ليها نعم امي حكت لي عنكم كلكم .. ان شاء الله الاقيهن ..

اها مشى على جدو كدا .. وقعد قريب منو .. وبسأل فيهو من صحتو ..

جدو قال ليهو والله ياولدي .. انت لايمنا تب .. وليك الحق .. انا شايف اللوم فوق عيونك ..

جمال قال ليهو ابدا والله ياجدي .. كلها اقدار مسطرة من رب العالمين العبد مافي يدو حاجة ..

جدو قال ليهو الجماعة ديل مارقين ليهم على مناسبة .. في حلة كدي لاقدام .. اصبر يمشو وعندي معاك

ونسة طويلة مابتكمل ولابتنتهي .. وحكايات .. امك ذاتها ماحكتها ليك ..

قال ليهو وانا جاييك عشان اسمع منك ياجدي ..