الجزء 7

طبعا اتخلللعتا شدددديد 😱 ... وبقيت برررجف ، قلتي شنو ياخالتي !😳 عقد منو وشنو !! 😳... بقت تضحك ومسكت يدي لقتهم متلجات شديد ، والساعه القالت لي سيداحمد خطبك ، واهلك ادوهو ... وبكرة شايفاهم اتفاهموا مع بعض علي العقد طوالي !

طبعا بقيت مخلوعه شديد وبببكي ! بس انا مادايرة عرس ومادايرة عقد ومادايرة خطوبة !!! وخالتي بقت حاضناني وبتقول لي قولي بسم الله يابت ! بقيت ماسكة قميصها وبمسح في دموعي 😂وببكي شديد وبقول ليها :شكلو مؤهلاتي القلتي شافا دي خلتو يجي يخطبني 😭! ياريت كان ما التوب اتعلق في الباب ، وياريت وياريت 💔 ! .. وخالتي تشيل وتضحك بصوت عالي 😂😂😂😂 وتقول لي : الله يجازي محنك يا مني ، ضحكتيني ضحك ! وانالسه مخلوووعه وبقرص فيها ، انتي ليييه بتضحكي كده 😒 ! خالتي بقت تضحك وتسكت فيني ،،، وقالت لي ، مافي حاجه ، بس قومي جهزي حاجاتك !

طبعا انا بعداك جاتني هستريا عدييييل 😅 وجرييييت كده لوالدي العزيز ، لقيتو راقد في الحوش ، بس جريت علي حضنو وبقيت ابكي ! طبعا ابوي حنيييين شديد ، بس طوالي قام قعدني جمبو وبقي حاضني عليهو ويشيل ويقول لي في شنو يابتي ؟! وانا ابكي واقول ليهو عقد شنو الدايرين تعقدوهو لي كمان " واشيل وابكي ! وابوي شبكني ليك ، دي امك دي ، امشي شوفيها واتكلمي معاها ! طبعا امي بعد الدقة القبيل ، اشوف سيداحمد ولا اجي مارة بي جمبها !

طوالي ابوي مشا هاااايج لي امي ، انتي عاوذة تجيبي للبت نفسيات ، انا قلتا ليكي يجو يتقدموا مامشكلة ، واذا هي رضت وعاوذين يعملو خطوبة برضو مامشكلة ! لكن عقد ياسعاد مرة واحده ، بالغتي ياااخ ؟!

المهم امي حدرت لي ابوي كدا 😒 وعاينت لي كداااا😒😒😪 ،،، وطوالي نشلت التلفون من ابوي واتصلت علي سيداحمد ،،، وانا اعاين ليها ونفسي اعضيها 💔😈 ،، وزعلانه منها شديد 💔 ليه يا امي كدا ياخ 💔...

الساعه الاسمعها ليكم بتقول " عاين يا سيداحمد ، بكرة ما دايرين عقد ، تعالو اتقدموا بس العقد شوية اجلوهو ! وشكلو كده سيداحمد قال ليها تمام ! بعد قفلت الخط عاينت بالجمبة كده وقالت لي : كده ارتحتي ! ومشت خلتني 👊😒 حقارة ياماما 👊😅...

ابوي طبعا طواالي طلع خلاني ،،، وطوالي جيت لي خالتي قلتا ليها ، دايرة تلفونك اتصل علي عمر اخوي ،،، بقت تشاكل فيني ، انتي جنيتي ؟ اخوكي في شهر العسل !!!😳... وانا شابكاها ،،، يعني شنو اذا في شهر العسل ، ، ، موش فسحة في النهاية 😒👊!! خليني عليكي الله اتصل عليهو !!! كلو كلو ابت تخلينيةالشينه دي اتصل علي عمر .. ماعارفه ليه مصرة ما اتصل عليهو وهو في شهر العسل 😒.. غايتو جنس غيرة ياخالتو 😌!

مشيت من اللخبطة العلي نمتااااااا !! تاني يوم صحيت ،عاد البيت ده يسوي كدي 👋 .. ولقيت خالت جهزت لي فستات ظريف !! المهم اليوم كللو انا راقدة وقلبي مييييت ! ولا شغاله بي زول فيهم ! وهم هاك يا المسيح والسريح ولف الشعر ،،، لي حبوبتي اتجيييهت 😒 !

بالعصر كده جاتني خالتي قالت لي ، امك دايراكي تقومي تلبسي ! مشييييت كده واستحميت ولبستا الفستان ! واتسررررحتا !! وجااات حبوبتي ريحتني بالصندل 👊 وانا اشيل واقول ليها شايفاني بيبي وريحتي لبن لبن !😂😂😂 .. وهي تسكت فيني !!!

والساعه الاسمع ليكم خالتو فتحية دخلت وبتزغرد ،،، طبعا اللمه كانت بسيطه ، بس سيداحمد وعمتو فتحية ، جابو معاهم علبة حلاوة وبارد " ماعارفه جابوها ليه ، التقول وافقتا 😒" المهم كللنا قعدنا في حوش الرجال ! وسلممتا عليهم وقعدتا ،، وانا طبعا مطرررمة لمن وشي داير يقع مني ،، وكلما ارفع راسي ، القا سيداحمد دااااك بعاين لي ومبسووووط ، ويشيل ويغمز لي عيونو ويشاغل فيني 😒 عوير 👊...وانا دايرة اتفقع من الغيظ وكأني قاعده لي في دبابيس 💔! وحبوبتي تعاين لي ساااااي ، وتشيل وتقول ليهم " عاد مني زينة البنات لاااااا حدهن "(ااااجي ياحبوبة 😂 عاد تمام !!!👊😅)...

شويتين كده المغرب دخل وامي وخالتي جابو شاي احمر ومعاهو لبن بدرة ، وكيك ♡ وبقوا يكبوا في الشاي ، طوالي فتحية قالت ليهم " سيداحمد مابيشرب الشاي باللبن ، بشرب شاي ساده بس !" امي قالت ليها " كيف الكلام ده لكن يا حاجه فتحية !" خالتو فتحية قالت لي سيداحم " اشرب حبيبة ، بس طوالي سيداحمد قال لي امي : انا مابشرب حليب نهائي من انا وصغير ! " وانا بيني وبين نفسي ، ياربي بقيت عملاق كده كيف !😂👊" .. طبعا سررحااانه مع نفسي ، اسمع ليكم امي بتقول لي ،،، الشاي ده تقيل ، وسيداحمد بشربوا خفيف ، امشي يا مني اعملي واحد خفيف ! " طبعا وانا ماشة علي المطبخ شغاله اقول في نفسي ، امي دي نست عرض امبارح وللا شنو 😂"ماعلينا ، انا اصلا كارهاهو وما دايراهو ، وحاطفشوا حأطفشوا 😈😈،،،

مشييييت كدا ، ولعتا داك يا البوتجاز ! وهاك يا الكفتيرا والموية ، خليتا تغلي وختيت الشاي ،، وزينتها بي حبيبة شطة حمراء حبشية تلهلب👋👋👋 😈😈 ومشيت وانا مبسووووووطة اني حاتفكي من العملاق 😫😂👊..

يتبع 😘