الجزء 4

اثناء ما انا في المطبخ ، سمعت امي زي الحلمانه ليها بكابوس كده وتقول " مالك في شنو ؟ اتكلم معاي ياحسين " بس لمن سمعتها خليت الفي يدي وطفيت النار ،،، " امي امي في شنو ، كدي قولي بسم الله " شلتا لي موية شوية في يدي ومسحتا ليها وشها لحدي ماصحت ، " في شنو يا امي ؟ " .. امي قامت من رقدتا ، بسم الله كدي ارفعيني يابتي ، ااااخ راسي داير ينفجر ، كدي جيبي لي الموية النشربا ،، مشيت سريع جبتا ليها موية من الماسورة من شده ما انا مخلوعه ،،، شربت الموية وعاينت لي بالجمبة كده ،، دي شنو الموية الزي الحنضل دي يابت ؟؟؟ .. قعدتا اضحك " يا امي عليك الله خلينا من حنضل وللا حنظلة ... ناس حنظلة كيف تمام ؟ ! ،،،، اها نرجع لقصتنا .... امي قالت لي " يابت خليكي من عوارتك دي ، ان شالله خير واللهم اجعله خير ، حلمانه بي ابوكي يابتي ؟ ! ،،،، انا طبعا اتوترتا " ان شالله خير يا امي ؟ ... ! امي اخدت نفس كده " عايني ياسكينه ، زي الابوكي ده غضبان شديد ، وقدر ما اجي قدامو يقبل مني زي الخجلان ، وقهران ويبكي ، يابتي قطع لي قلبي " ... هنا انا سرحتا ودموعي نزلت وبدون ما اوعي ' اكيد بكون من العملتو خولة " امي طوالي قبلت علي ' آاااااا قلتي شنو ياسكينه ؟ ... ' في البداية قلتا ليها مافي حاجه وقمتا ،،، لكن طوالي رجعتا ليها ، قعدتا جمبها ، ويديني بقت ترجف شديد وبردن ،،، " امي حضنتني ' سجمي يابتي اصلو الحاصل شنو مالك ؟ ! ' بقيت مدنقرة وبحكي ليها بالتفصيل ، وخايفة ارفع راسي اشوف انها مصدومه ولا انها بتبكي ،، بعد خلصتا وحكيت ليها كل التفاصيل حسيت بايدها بارده وهي ماسكاني رفعت لي وشي وبقيت بعاين ليها جووووة عيونا ' شفتا دموع بااااارده وكتومه غالبا تطلع ، شفتا فيها شوق لي ابوي وحنية كبيرة شديده وفيها حزن بس شفتا لي قوة من جواها طالعه بي عيونا ، سللمت علي وقالت لي الله كريم يابتي ،،، ابدي شغلك طوالي تمام ... وحسبي الله ونعم الوكيل عليك ياخولة ... قلتا وهي موجوعه من جوة ... وقامت اتوضت وصلت ليها ركعتين وبقت تدعي وتدعي ... مشبت ختيت الفطور ، ياجماعه سمعتا صوت آهاتا ووجعا في بكاها ، ماسكا خشما بالتوب وتبكي من جوة ... دموعا شلال ... الوحه حقت نار القلب وجعتني وانا جوة دون ما اشوفا ... بقيت متسمرة في مكاني .

عصرتا علي نفسي شديد وطلعتا سريع ودخلتا علي الاوضه وانا كانو ما شايفاها عشان ما تحس بي عارفاها مهمومه ومغمومة شديد ... ختيت الصينية في التربيزة وفتحتا المروحه ورقدتا في السرير وقبلتا علي الحيطه ، اتمنيت اغمض عيوني اكون في حتة تانية ، حسيت ضربات قلبي ماشة منخفضة لحظتا تاني ماحسيت باي شي الا وشايلني بي ركشه اخواني معا بعض وامي تبكي وتنوح والركشه ماشه ... كنتا واعية بيهم ، لكن ماقادرة اتحرك ماقادرة اقول اي شي ، نفسي اقوم من رقدتي واكلم امي واقول ليها انا كويسة يا امي ما قدرتا " تاني بعديها من الاحساس والحروبات الشغاله جواي برضو دختا فترة وما فتحتا الا وانا في البيت ، وبيتنا اتملي ناس ، كان بعد صلاة العشاء كده ، سمعتا صوت هيفاء بتسكت في امي وبتقول ليها " ياخالتو بس قالو توتر وانتي عارفه كده ، وصراحه هي مرت بي ضغوطات كتييييرة يا خالتو ، مابتتحمل """ سمعتا امي ردت ليها " الدكتور قال لي بتك دي قلبها ضعف بالكتمات الجواها والضغوطات العايشاها عقلها وقلبها ماخدين لود عالي من الضغط ، لازم ترتاح " .. انا ده كلو بسمع فيهو وبحاول ارفع يدي واحركا وانا ماقادرة ، قعدتا ابكي وصرختا صرخه كبيرة من جواي " امييييييييي " جو لاحقني قوموني وسريع هيفاء جابت لي موية شربتني ليها وشمموني ريحه ، وامي رقدتني في صدرها " يابتي كللو بهون ياحبيبتي الله في ،ربنا ده لمن يحب العبد ببتليهو ، وببتليهو عشان يجازيهو خير ♡ يابتي ربنا بقوينا وربنا يمهل ولا يهمل ، اصبري وخليكي قوية ، يابتي انا كبرتا وماعندي زولا بلاكم فهمتي ، بيكي انتي بقوي ياسكينة ،،، حضنتها شديد وقعدتا ابكي من جووووووة اعماق دواخلي واصرررخ آااااااخ يا امي قلبي ، انا تعباااانه ، ادعي لي ربنا يقويني يا امي " امي تبكي وهيوف تبكي ويشيلو ويدعو لي ' ربنا يقويكي يا سكينه ... """ بعدها حنسوني واكلوني بالغصب ، شي برجع الاكلتو " الا هرسو لي الاكل بالمعلقة ، وبرضو العصير ، حتي نمتا وانا مطمنة امي جمبي ،،، نمتا وماسكه يد امي ، وقدر ما امي تزح يدها بصحي ، في النهاية دخلتني لجوة السرير ، وحضنتني ،،، " انا اول مرة في حياتي انوم مطمنة .. حسيت بامان فظيع ،،، حسيت براحه واول مرة انوم نوم عمييييييييق ♡

صحيت تاني يوم لقيت البيت نضيف والبخور طاقي ،،، وسامعه صوت ضيف قاعد برة بتكلم معا امي واخواني وبضحكو وبتونسوا ،،، مشيت استحميت وصليت وجيت عليهم ، كللهم " ماشاء الله ماشاء الله يا سكينة بقيتي فل الفل ،، فجاة اشوف ليكم استاذ احمد جا وسلم علي ... وطوالي استأذن طلع ،، امي قالت لي المحامي ده محترم شديد ، وحساس شديد يبكي من قبيل والله قطع قلبي ، استأذني قال لي يا خالتي دايرة اشغل

بتك دي معاي عشان يكون عندها راتب يريحكم شوية ، وانا قلتا ليهو خير ! انتي رايك شنو ؟ .. طوالي رديت ليها انتي الراي رايك يا امي ،،،، قالت لي ' علي بركه الله ♡ .. قعدتا اضحك قلتا ليها هو عقد ؟ ! .... طوالي ضحكت وقالت لي " يسمك قال عرس قال اديكي واحد قدرك مرتين ؟؟ ! .... اخواني قعدو يضحكوا مالو يا حاجه ياخي ، الاتنين اضنينهم كباااااار والنخرة مطفوجه بس حقت سكينة صغوووويرة وحقت صاحبنا دي كبيرة ،،، طبعا بقيت مخلوعه وبضحك شديد ههههه يخسي عليكم ياخي ،،، يعرس روكبيكم الاتنين يا سغيلين ♡