الجزء 8

وصلتي كده للمكتب ، اشوف نفس الراجل واقف تحت العمارة ، لما ركز معاي ساق موترو ومشا ، انا هنا صرااااااحه كده اتوترتا شديييييييد والله ، طلعتا سريع ونفسي مكتوم ، لقيت ليك هيفاء قاعده معا احمد بتحنس فيهو يمسك القضيه وهو مابي ،،، " يا احمد انا اهو اديتا الشيك علي بياض عشان تكتب فيهو الحاجه الدايرا " ،،، " هيفاء انا ماحامسك قضية اخوكي لانها قضيه فاشلة " ... " انتي شغلتك شنو امسك قروشك واعمل اللازم " "... عايني احترمي نفسك اذا سمحتي وانا مابمسك لي اي قروش ولا قضية ، ثم ثانيا تعالي اسالك مالكم معلقين معاي شديد كده ؟ ! في غيري الف وخمسمية واحد ، واشهر مني شوفيهم مادام امكانياتكم المادية تمام " ،،، " عاوذ تعرف السبب يا احمد ، صراحه كده في واحده اسمها خولة كانت مرة ابو سكينه ، صحبت امي الروح بالروح ، ومواصله امي في البيت ولمن عرست ابو سكينه كانت متابعاهو وعرفت عنو كل حاجه ، يعني بالمختصر المفيد يا استاذ ما جاية حبا فيك ، قالت لينا زول طرورة كده وعوير بس امسكو بيهو زمن ، وبعداك لمن يستعصي عليهو الموضوع ، وروهم الكاش بيوكلو احسن واحد عندهم بدل تدفعوا قروش ساي ، يعني انتي كبري فهمتا وماعاوزينهم يركزوا معانا ... " هنا انا دخلتا عليهم " السلام عليكم " هيفاء قبلت علي بدون ماترد السلام وطوالي جات مارقه وضربتني بكتفا كده وهي طالعه " اووووبس سوري ، بس حبيت اذكرك امس جيتك عشان كنتا دايراكي تدخلي لي واسطه لاستاذ احمد بتاعك ده ، لكن انتي بوريكم لي ... " ولبست نضارتا وطلعت الكلبة ،، عاينتا لاستاذ احمد لقيتو ممحن وزهجان " كيفك يا احمد ان شالله بخير ؟ "! اتكل علي الكرسي وبقا بهزو وختا يدينو فوق راسو " يا سكينه الناس ديل زباله وما حاخلي التافه ده وما بتهددني الواطيه دي ، وخولة دي زاتا نصابة شكلو ، وحاتماطل في موضوع العقودات ده لحدي ما اكشف لعبتا "..." قصدك يعني احتمال تكون نصبت علينا يا احمد "..." ما احتمال ، ده اكييييد ، والله انتي مسكينه يا سكينه ..." سكتا وسرحتا ، بعداك بديت شغلي وماشاء الله اليوم كان زحمه زحمة زحمة شديييييييييد ، واحمد شغال تلفونات كتيرة معا ناس من المخابرات والقضائية لمن خفتا واتوترتا ،،،

يلا لمن اليوم انتهي ، جاني في المكتب وانا برتب في الفايلات وبمسح في التربيزة ،، " سكينه انتي ابوك ده ما عندو وصية كاتبا براهو ، او شاكه في حته يمكن يكون خاتي حاجه بتهمو ؟ "... " ماعارفه والله يا احمد ، مالك داير تشككني ياخ ..." " كدي اسمعيني صلي علي النبي " "... اللهم صلي علي سيدنا محمد عليه افضل الصلاه والسلام " ".... امشي البيت وفتشي كوووووويس يا سكينه ، عندك 3 ايام كان مالقيتي حاجه بتخص الوصايا ماحاقدر تاني اساعدك في موضوع حقكم ده براي فهمتي " "... طيب يا احمد حافتش ... "

اليوم داك رجعتا البيت وانا سررررحاااانه بس دخلتي علي البيت ودايرة اقفل باب الشارع ، اشوف ليكم من بعيد الزول المراقبني داك قاعد قصاد بيت ناس هيفاء وبتكلم في التلفون وبوصف ، قفلتا الباب سريع سريع قبل يشوفني " بسم الله ده مالو ده كمان .... " عديت فترة بعد جهزتا الغداء واكلنا ،،، امي جاتني في الاوضه وتهرج " خولة المعفنه ابوكي ما عرس دي ابليس دي ماعندها احساس " وتشيل وتبكي ،، " يا امي في شنو مالك بسم الله كدي احكي لي " جات الكلبة المعفنه جادعه حاجات ابوكي برة ، ودقت الباب فتح ليها عامر ، قالت ليهو تعال لم وسخ ابوك ، الله يهدك ياخولة ....." انا بقيت ببكي " شنوووو دي حيوانه دي كيف الكلام ده يا امي يعني جدعتم في الشارع هسي " "... اااي يابتي هسي مجدوعات واخوانك زعلانين " ... خليت امي وجريت علي الشارع ؟ القي ليكم عمر وعامر يبكوا وقاعدين في الواطه خاتين ليهم ملاية وبطبقوا في هدوم ابوي ، والاوراق مجدعه والشنط الهاند باق دي مفرزعه التقول اعصار بس جاهم ،،، لبستا توبي ومسحتا دموعي ، وبقيت بنقل الحاجات معاهم لي جوة ،، واخواني ديل دموعهم عشرة عشرة وساكتين ،،،

بعد ساعه كده من دخلنا الحاجات اوضه امي ، مشيت ليها واتونستا معاها شوية قلتا كدي النطلعا من الجو ده ،، " امي حبيبتي انتي كويسه ؟؟؟ "! .... " ااااي يابتي ، بس سبحان الله " وسرحت بعييييييد ،،، " مالك يا امي ان شالله خير حبيبتي ؟ "! .. " حلمانه بي ابوكي الليله وهو برضو خجلان مني ماقادر يعاين لي وبمددا لي في صندوق لونو اسود بدهبي كده قديييييييم ، كان ما كذبتا يشبه الدخلتو معا الحاجات دي ،،، " ... " سبحان الله ، يا امي عليكي الله ابوي ده اعفي ليهو ياخي ، اترحمي عليهو واقري ليهو الفاتحه طوالي ، اذا كاتمة حاجه يا امي ومزعلاكي منو عليكي الله يا امي ابكي براكي ان شالله بس ما تكتميها ، الميتين دي عايشين بين الناس وبحسوا بيهم " ... امي قعد تبكي من اول وجديد بصوت لمن العبرة وقفت لي وبقيت ماسكه دموعي بالغصب ، " يابتي انا اي شي من الحاجات القلتيها لي ديل انا عملتهم والله ، بس الا الكاتما جواي ، كتيييير ياسكينه وجع سنين ، الحمد لله ،،، كاتما سنين ي

ا بتي وبتعبني مرات ، استغفر الله " ... جيت قعدتا جمب امي ، وحضنتها وسلمتا عليها شديددددد ، واتونستا معاها وحاولتا اغير ليها نفسيتا شوية ، وقمتا عملتا ليها الكيكه البتحبها ، وظبطتا ليها جبنة ، وفي ظرف ساعات جو البيت من كئيب اتحول لجو رايق وحلوووو ..

بالليل وانا نايمه كده حلمانه بابوي ماشي علي اوضه امي ، وانا زي خفتا كده منو وبقيت واقفه برة براااااي ، فجاة دخل وطلع نفس الصندوق الحلمت بيهو امي وجا ، وقف كده حسا بي خايفه ، قام ختا الصندوق في اقرب مكان لي وابتسم لي وقال لي ده حقكم محفوظ ، وانا ابتسمتا ليهو وعيوني ملياااانه دمووووع لاني شايفاهو بمشي ، وانا من قمتا ابوي كان مقعد ما بتحرك الا بكرسي ،،، ...

ياخي صحيت الصباح مخلوووووووووعه ومبسوطه في نفس الوقت ، اول حاجه قبل اعمل اي شي ، مشيت شلتا الصندوق طلعتو من اوضه امي ، خليتا بتصلي وجيت علي اوضتي ، قدر ما احاول افتح الصندوق ماقادرة افتحو ، مشيت جبتا يد الفندق من المطبخ ، وامي شافتني " يابتي اصبحنا بس الله ، مالك في شنو انتي مجنونه؟ " وقامت كده علي حيلها وجات وراي علي اوضتي ، " في شنو يابت ؟ " وانا اشيل وكشو وشو كرو بكسر في الطبلة ، والصندوق متين شديد ، غايتو لحدي ما انا فتحتا الصندوق صحيت اخواني والجيران ، والله جاده ،،، جوني مخلعين عمر وعامر ، في شنو ياخي ؟، ... امي " بري ما عارفا يابت ما تتكلمي "! ... وانا اللحظه ديكي فاتحه داااااك يا الصندوق واشوف ليك وصية ابوي بخط يدو واي حاجه مملكا لي انا واخواني واخواتي من ابوي بس ، وخولة ماخاتي ليها شي ، لانو كان كاتب ليها البيت باسمها وكانب تفاصيل كل املاكو ونصيبها في الميراث طلع حق البيت المسجلو ليها وزياده كمان ،،، ومسجل اي عقارات بي اسم امي والمستفيدين من بعدها انا وعمر وعامر واخواتي الاتنين ،،، ياخي انا لمن قريت الكلام لمن قعدتا ابكي وامي جات بقت تكورك " يابت في شنو ماتجنيني بتجلط ليك هسي دي " وعامر يهرج " ياحيوانه انتي ملاحظه مصحيانه صباحات الله الملايكه حايمه ياخي رزق ما حيوزوهو علينا بسببك " ..... طوالي عاينتا ليهم " يهدا رزقكم ، دي وصيه ابوي يا امي وعمر وعامر خطفوا الورقة وابوي كان مغلفا عشان ماتتشرط وللا تتلف ، عمر " اااااي يا امي اهو ده كاتب وكاتب وكاتب ، وامي تبكي وتحمد في ربنا ، تبكي وتشكر ربنا ، وتبكي شديد طوالي جابت المصلاية وقعد تصلي وتدعي ربنا وتحمدوا ، وانا من كترة الفرحه عيوني بقو حممممر واخواني اتأثروا واتبسطوا شديد ،،،، " ياسكينه عرفتي كيف انو ابوي خاتي الاوراق دي هنا ؟ " ... ، " والله ياعمر وعامر حلمانه بي ابوي " وحكيت ليهم كل الحلمتا وعدتا الحلم تاني لي امي ، وكللهم " سبحان الله سبحان الله " وكللنا اترحمنا عليهو وقرينا ليهو الفاتحه ، بعدها طوالي امي بدل تشد اللبن شدت البليله في نص الحوش ، ورمت الزلابية ،،، وانا مشيت عشان اجهز ومتحمسسسسة متييييين اصل واوري استاذ احمد الوصية الاصلية ...

وفعلا طلعتا وانا اليوم داك سعادتي ملت الكون اظنو نور ،،، في الشارع قبل اصل الزلط ، لاقاني ادهم " سكينه انتي واحمد ما حتسلموا مني ، جيتكم باللتي هي احسن مالقيت منكم وش ، جيتك دايرك تتوسطي لي ليهو ، عشان عرفتا من هيفاء انك شغاله معاهو ، ما اديتيني وش ، وهو كفاية الحكتو لي هيفاء ، ماتلوموني تمام ، سلام ... " مشا مني وخلاني مخلوعه وبقيت منططه عيوني وبعاين ليهو وهو ماشي راجع علي بيتهم ، وماوعيت الا بصوت بوري حق ترحيل روضه وقرررب يطقشني