الجزء 3

فجاة اشوف ليكم المحامي منطط عيونو .. وطلع النضارة وبقا مخلوع .. وبعاين لي وبتمتم " ياسكينه الوصية دي صاح . يهدا زاتو توقيع ابوكي المابيغباني ، انا طبعا صبت فيني مطرة واتخلعتا شديد " كيف كيف يعني يا استاذ احمد ، ده كلام شنو " .. المحامي مددا لي الورقة اقراها ، ويدو بترجف شديد ،،، مسكتا الوصية وبقيت بقرا حرف حرف ... ومعا كل حرف انا دموعي نازلة .. ياخي انا قادرة اصدق الكلام البقرا فيهو ده ... وللا الجفا في طريقه الكتابة كانو انا واخواني الاتنين وامي ما موجودين اصلا ،،، قعدتا في الكرسي وبقيت ببكي .. استاذ احمد قام علي حيلو وجاني ،،، " سكينه ماتبكي انا حاساعدك يا اختي " طووالي نطت خولة افندي ، اها يا استاذ احمد صدقتا وللا محتاج اثبات تاني ، .. المحامي قام علي حيلو وهو مهزوز من طريقه البكا بتاعتي " انتي يا استاذة خولة معليش يعني ماعندك احساس ، ماعندك قلب ، ياخي قولي اي شي حقك ، عطف ماعندك ياخي ، البت بتبكي شايل هم الكبير قبل الصغير " قبل استاذ احمد يكمل كلامو خولة سكتتو " شنو يا استاذ ، بتعلي صوتك علي ؟ انتا مامحترم وللا شنو ؟ " طوالي استاذ احمد ضرب يدو في التربيزة وكورك فيها " احترمي نفسك انتي ياعديمه الاحساس واطلعي برة سريع " طبعا خولة عاينت بالجمبة كده وضحكت ضحكة سخرية ، وهبشتو كده في يدو " انا بندمك تمام " وقبلت علي " اشتغلي ليكي شغلانيه شريفه اكلي منها امك وابوك واخوانك ،،، آااااااااااخ نسيت ، ابوكي مات ، كتر خير امك واخوانك المعاكي ، مابتجيكم عوجه ، يلا سلام ،،،

اتخييييييلو طلعت وخلت استاذ احمد قاعد وهو لونو اخدر وشو بقا محممممممر داير يطرشق ، وانا بقيت ببكي بحرقة لمن بتنخج ، جا قعد قصادي " سكينه انتي هسي المبكيك شنو ؟ .. ! ماقلتا حاجه بقيت ببكي زياده ، كمل كلامو " الكلام ده دينيا كده ما داخل لي راسي ، بس قانونيا يا سكينه جد مابقدر اعمل شي ،، وصية مطبوعه ، والتوقيع ياهو توقيع ابوكي ، بس ما حاخليك حاساعدك بالبقدر عليهو " ... انا قمتا مسحتا دموعي بعد وقفت البكا بالغصب ، " يا استاذ احمد مابتقصر بس انا لازم امشي " طلعتا من المكتب وانا ببكي من اول وجديد وبطقش في الناس ، لقيت استاذ احمد جاري وراي " ياسكينه اقيفي ، يا اختي اقيفي " جا مسكني من يدي وقعدني جمب ست الشاي ،،، مشا جاب موية وشربتها وغسلتا وشي ،،، بعداك قال لي " قولي بسم الله " انا " بسم الله الرحمن الرحيم وحسبي الله ونعم الوكيل " ايوة حسبي الله ونعم الوكيل ،،، بس ممكن ياسكينه الله يرضي عليكي يا اختي تهدي شوية عشان اقدر اتفاهم معاكي ، هداتا نفسي بالغصب " طيب سامعاك " وبقيت قاعده ممحنه وبعاين في الارض وبستغفر ربي ، " شوفي ياسكينه انا حاسي بيكي ما قادرة تاخدي وتدي معاي ، بس سؤال ممكن ! انتو عندكم حاجه تعيشوا بيها ؟ " ... بقيت بعاين ليهو وبضحك ضحكة حزن ضحكه حسرة " انحنا كان عندنا حاجه نعيش بيها ، كنتا بخت يدي فوق راسي يا استاذ احمد ؟ " ... طوالي قال لي " اول حاجه ما تقولي لي استاذ احمد دي ، قولي احمد بس بتكبريني وانا لسه ماعرستا "' قعدتا اضحك طبعا .... طوالي ابتسم لي وقال لي " يا سكينه طيب رايك شنو تجي تشتغلي معاي سكرتيرة عشان يكون عندك راتب ؟؟؟ " ... اتخلعتا من كلامو ، وبيني وبينكم ماصدقتا القي لي حاجه اجيب بيها قروش ،، طيب يا استاذ احمد .. معليش يا احمد بس انا قريت فنون جميلة ... علاقتي بالقانون شنو ؟ ... ! طوالي طمني " حاشغلك سكرتيرة تسجلي لي الناس وتحفظي لي ملفات البجوني ، ومنها تترزقي وربنا يفتحا عليك ،،،، ابتسمتا ليهو " لكن بس ".... هو طوالي قاطعني " مابس ياسكينه ، انتي بس ابدي وبعداك مانفع معاكي طوالي اطلعي وبعد ده حاساعدك وافتش ليكي شغل تمام ؟ ... ! طيب يا احمد موافقة مبدئيا وبيناتنا تلفونات ان شاء الله ... بعداك سلمتا عليهو ، ومشيت ... بقيت بعاين في الشارع وانا مسهية ووقفتا للمواصلات ، بقيت موجوعه من الحصل ، واذا علي دايرة اتحفر في حفرة ولا ارجع البيت واكلم امي وتتعب ، تاني اقول اذا ماكلمتها وعرفت لقدام حتموت لي " اخير اقول ليها بس والرحيم ربنا " وقف البص وركبتا المواصلات ، اول ما قعدتا في الكرسي ، جاتني رسالة من احمد " سكينه انا اتأثرتا بالحصل ليكم شديد ، وبتمني ماتاخدي العملتو معاكي ده شفقة لأ ، انا بقدم مساعده لبت زول كان صديقي وزي ابوي " .... طوالي ابتسمتا ودمعتي نزلت مسحتا سريع قبل يشوفني زول ...

لمن وصلتا شارع البيت ، وقفتا الباص ونزلتا ،، اول ما دخلتا علي بيتنا لاقوني اخواني التوأم عمر وعامر ، جو سلموا علي بالحضن " اووووووو سكسكانية بالسمنه ياااااا ... شوق الشوق يا اختي " قعدتا اضحك لمن شرحوت لي قلبي ،،، " انتو مالكم مامشيتو المدرسة؟ " طوالي مسكني عامر من يدي " شنو يا اصلية انتي يا اخت مابتريدي الخير لاخوانك ليه ؟ ماسمعتي الحديث ،، حب لاخيك ماتحب لنفسك ،،، شكلك ماسمعتيهو يافردة والا ما كنتي قلتي كده .. " قعدتا اضحك شديد " ياعمورة ياخي ياحبيبي ماقصدي انتو ممتحنين و

بس استغربتا " عمر رددا لي " والله ياخوة قالو يدونا اجازة اسبوووووع كده وبعداك نبدي المعسكر " طوالي اعتزرتا ليهم " ايوااااا خلاص حبايبي معليش اعفو لي ، امي وينا ؟ وانتو هسي ماشين وين ؟ " ... عمر قال لي ماشين نلعب كووورة دافووووري يا اصلية ،،، امي قاعده في الراكوبة بي ورة نايمه ، يلا خلو بالكم لحدي مانجي " ... سلمتا عليهم ودخلتا لقيت امي مجدوعه جدعه يحليلا تعبانه شديد ، غتيتا بالتوب ودخلتا بقيت بجهز في الفطور ،،،