الجزء 21

تاني يوم صحيت وانا لسة حاسة بالارتباك واللخبطة ... كان عندنا العيادة المحولة الليلة ومشيت اقدم رجل وأأخر رجل لما اتلمينا في العيادة جاء مستر امير... و قال لينا مستر طارق الليلة ما جاي وهو ح يغطي بدله ...

انا انتابتني مشاعر متضاربة ..الارتياح اني ما اتخت في موقف الارتباك الخايفة منه ..لكن المشاعر الكانت غالبة علي هي مشاعر الاحباط اني ما ح اشوفه...اليوم داك حسيت بيه ماشي بطئ يتجرجر لانه طارق مافيش...

على اخر اليوم قبل ما اطلع على البيت قلت اغشى مكتب الوحدة .اشوف لو جاء.....و انا ماشة من بعيد في زول جاء طالع من المكتب و مشى على الاتجاه عكس الانا جاية منه...قلبي ضرب شديد... طارق ...

لمحته سريع قبل ما يقبل مني ويديني ضهره.. في البداية ما عرفته لانه شكله كان مختلف..لابس قميص وبنطلون لكن ما شاكي القميص زي عادته..و دقنه قايمة باين انه ما حلق الصباح... كان ماشي سريع و مسافة ما انا وصلت قصاد المكتب هو كان خلاص نزل من الصالة واختفى من انظاري...

انا وقفت لحظات قدام باب المكتب ...في اللحظة الشفت فيها وشه سريع قبل ما يقبل جاني احساس كدة انه مكتئب و حزين و مهموم ...دخلت المكتب لقيت عمار و عبد اللطيف قاعدين ...قلبي قال اسأليهم منه لكن سكت...خفت يقولوا دي مالها بتسأل ...الفي قلبه حرقص !!!!...

قعدت زي 10 دقائق كدة مترددة اتصل عليه ولا لا؟...بالجد بقيت ما قادرة اصبر خاصة بعد شفت حالته قبل شوية ..قمت من مكاني طلعت من المكتب ... ماشة من غير هدف..تلفوني ضرب ...عاينت..مستر طارق اذ كالنق يو ...قلبي ضرب وسريع فتحت ..من غير مقدمات قال لي (امل...انتي في المستشفى ولا طلعتي؟؟)

قلت ليه ( لا موجودة يا مستر ...)

قال لي (ممكن تجيني في العناية المكثفة بتاعة الشعب؟؟) العناية المكثفة؟؟؟

قال سريع بلهفة (في شنو يا مستر ؟؟ ان شاء الله خير؟؟)

قال لي (خير...لو بتقدري تجي طوالي تعالي..)

مع انه قال لي خير لكن صوته كان لا يدل ابدا على انه الموضوع خير ...قلبي دة بس يضرب زي الهبابة ..يا ربي الحاصل شنو؟

جريت على مستشفى الشعب .. قسم العناية المكثفة

طارق كان قاعد هناك في كرسي قدام العناية...

كان مدنقر و تاكل وشه على يدينه...صورة مجسدة للبؤس...قلبي حسيت بيه اتقطع و مشيت وقفت قدامه وقلت براحة (مستر طارق؟؟؟)

رفع رأسه براحة يعاين لي ..كان باين عليه الارهاق الشديد و عيونه دي لونها احمر..قال (امل..) وقام على حيله...

قلت ليه ( ان شاء الله خير يا مستر ...في شنو؟...)

عاين لي لحظات من غير ما يجاوب بعدين اتنهد ومسح وشه بيده وقال لي ( امي...امي..مرقدة في ال ICU ) (وحدة العناية المكثفة))

قلبي شححححة... قلت ليه ( سلامتها مالها؟...)

قال لي ( جاتها stroke (سكتة دماغية) .. امس بالمساء ...وهي حسع في coma (غيبوية))

انا في اللحظات ديك ما عرفت اقول شنو..حسيت الكلمات قاصرة ...قلت ليه ( سلامتها ...ربنا يرفعها ان شاء الله ...)

قال لي (امين..امين يا رب....الدكاترة هنا متفائلين ...) وسكت كدة شوية ومسح وشه تاني بيده وقال بطريقة كدة قطعت قلبي( ربنا يلطف بينا...)

انا في اللحظة ديك ما فاضل لي الا اضمه علي و احضنه و اربت على ليه واخفف عليه ...لكن ما كان قدامي غير الكلمات اخفف بيها

قلت ليه ( ربنا كريم يا مستر طارق ..ربنا كريم ..ما دام الدكاترة متفائلين خلاص ..)

قال لي (تعالي ..) وفتح باب غرفة العناية و دخل وانا بوراه ...مشينا على السرير الراقدة فيه امه ...طبعا كانت في غيبوبة وقفنا جنبها دقايق...كان بعاين ليها بشفقة ولهفة خوف...خت يده في جبهتها شوية بعدين مسك يدها عصرها و...انا بس ماسكة نفسي بالقوة !!!

قال لي ( الحمد لله في الصور النزيف ماشديد ..و الكشف المبدئي حقها كان كويس )

قلت ليه (ان شاء الله تقوم بالسلامة ...وربنا يجعله ليها اجر وعافية..) بالجد الكلمات كانت قاصرة ...

سكت شوية كدة وقال لي ( عندك حاجة حسة؟...)

قلت ليه (ابدا مافي شئ خلصنا العيادة المحولة و مريت على العيانين)

قال لي (ممكن تقعدي معاي شوية؟.)

قلت ليه (ايوة طوالي ...)

طلعنا برة ..كان في كرسي تاني جنب الكرسي الكان هو قاعد فيه ..جراه و قال لي اقعد فيه

بعد قعدنا قال لي ( انا قلت لامير ما يكلم ناس الوحدة بحكاية امي دي ...ما عايز اشغل الناس معاي ...لما اشوف البحصل شنو...) سكت شوية وقال (لكن انتي... انا من قبيل عايز اتصل بيك ..لكن قلت بتكونوا في المحولة ...قبل شوية مشيت اشوفك في المكتب ما لقيتك ...كنت عايز اقابلك وجه لوجه ما بالتلفون ...لكن في الاخر لما ما لقيتك اضطريت اتصل ..عارفك بتتخلعي ...)

فاهمني تمااااام...

قلت ليه ( كلمة العناية المكثفة صعبة شوية...)

ابتسم ابتسامة صغيرة وقال لي ( اهتمامك و تعاطفك و احساسك بالعيانين ومرافقنهم ..انا محتاج ليه شديد...)

انا انتابتني عواطف مختلفة ..شعرت بشعور جميل انه عايزني جنبه في اللحظات دي ...لكن برضه شعرت برهبة ...العيانين الكنت بتكلم معاهم معرفتهم الطبية محدودة ...بيطمئنوا من كلامي البقوله ليهم ..لكن طارق دكتور وعارف اي شئ انا ح اقول ليه شنو؟؟؟

اظنه شاف حيرتي ..قال لي (ما ضروري تقولي حاجة يا امل ...كونك تكوني بس جنبي ..تشاركيني ..تسمعيني ..دة بس كفاية علي..)

الاحساس الجميل الحاسة بيه زاد زيادة ..

قلت ليه ( يا ريت اقدر بالجد اساعدك...)

قال لي ( صدقيني ..انا اولريدي خلاص بقيت كويس ...)

وااااي ..انا ما بقدر على الكلام دة

سكت شوية و اتلفت علي بابتسامة وقال ( معليش ح أأخرك شوية...بس شاعر اني عايز...) وسكت كأنه ما قادر يعبر ...

انا قلت ليه ( ما عندك اي مشكلة يا مستر طارق......)

اتلفت مني ودنقر وقعد ساكت مسافة بعدين من غير ما يعاين لي بدأ يتكلم

يتبـــــــــــــــــــــــــــع