الجزء 4
انا وابتسام مشينا اول عنبر الحريم ومشينا على مكتب السستر ابتسام سلمت عليها وعرفتني بيها( دي دكتورة امل نزلت معانا الليلة امتياز...)
السستر سلمت علي و قالت لابتسام ( جبتوها بدل عـ...)
ابتسام قاطعتها سريع قبل ما تقول الاسم وقالت ليها ( اااي..وح تمسك العيانات بتاعنها...كدة اديني الملفات بتاعتهم وكمان ملف العيانة الداخلة عملية بعد بكرة...)..
علوية جابت الملفات و ابتسام قعدت معاي توري فيني في ملفات العيانات حقات الدكتورة الفاتت و الحامسكهم بدلها ..
مسكناهم ملف ملف ..والله ابتسام ما قصرت معاي... شرحت لي حالاتهم كلها و العمليات المفروض تتعمل ليهم شنو...بعد داك ورتني ملف العيانة الداخلة عملية بعد بكرة..
قالت لي (في 3 رجال في عنبر الرجال برضه داخلين عمليات معاها...في لستة فحوصات مفروض تتعمل ليهم بكرة ..لازم تتابعي مع الممرضات و الممرضين الفي العنابر عشان تتأكدي انه كلهم اتعملت ليهم و نتائجها جات...وكمان لازم الدم حقهم يكون جاهز ..زي ما عارفة تحضير الدم دة اصعب شئ ..ناس بنك الدم ما بدوك دم لو ما اهل العيان مشوا اتبرعوا ..غايتو شدي حيلك معاهم ...)
الحاجات دي كلها انا متعودة عليها من فترة النساء و الولادة ..لكن الفترة ديك اشتغتلها في مستشفى بحري... ولسة مستشفى الخرطوم دي ما عارفة فيها حاجة ..لكن ما ح اقول كدة لابتسام ..قررت ابذل جهدي اقصى حد عشان اوري مستر طارق دة اني ما اقل من اي ولد!!!!!
بعد داك ابتسام لفت معاي في العنابر ورتني العيانات واحدة واحدة و منها مشينا عنبر الرجال عملنا نفس الحكاية ..
بعد داك ابتسام قالت لي ( انا بعد دة راجعة المكتب ...هاك اكتبي رقمي لو احتجت لا شئ بس اتصلي علي طوالي...برضه هاك رقم مستر طارق هو طوالي بقول نتصل بيه في اي وقت لو احتجنا )
ان شاء الله ما احتاج ليه انا؟؟؟ المهم شكرتها و سجلت الارقام و هي سجلت رقمي وبعد داك مشت ...
انا قلت احسن شئ ابدا بالعيانين العمليتهم بعد بكرة..اظبطهم و اتاكد انهم جاهزين ...مشيت عليهم و شفت التعليمات المكتوبة في ملفاتهم و الفحوصات المطلوبة شنو..الحمدلله لقيت انه فحوصاتهم كلها مفروض تتعمل بكرة وما محتاجة اعمل حاجة الليلة...
شفت فصيلتهم حقة الدم شنو...مشيت عليهم تاني....شرحت ليهم كلهم انو لازم ناس من اهلهم يتبرعوا بالدم ضروري عشان العملية ما تتاجل ..و عشان الضمان قلت للمرأة العيانة تديني رقم تلفون راجل من اهلها .. ادتني رقم ولدها اتصلت عليه طوالي و اتكلمت معاه ما قفلت منه الا لما اكد لي انه ح يجي بكرة يتبرع و ح يجي الساعة كم ..برضه مشيت لمرافقين الرجال عملت معاهم نفس الشئ ..قلت ليهم عشان ح اكون منتظراكم في بنك الدم..
بعد داك قلت برضه امشي احاول مع ناس بنك الدم يمكن عسى ولعل اطلع منهم بشئ...مشيت أسال لغاية ما وصلت بنك الدم ..ودخلت براحة اتسحب واتلفت ..طبعا بنك الدم دة حاجة كدة ما بتتوصف في اي مستشفى ..مملكة قائمة بذاتها.. زول بقدر عليهم مافي...يتحكموا في الناس زي ما عايزين...
بس ربك رب الخير اسمع ليك زول قال اسمي ( امل اسماعيل؟...الجابك هنا شنو؟...)
اتلفت القى ليك منو..صلاح ابراهيم..واحد كان دفعتي زمان ومن شلتي ..وكان جاري وراي في الجامعة كمان..ما عارفة ذاته الكان عاجبه فيني شنو؟؟؟.....لكن انا وريته اني ما بفكر في الارتباط حسع وبس مركزة على قرايتي لغاية ما اتخرج...
دة طبعا كله من نصائح نهى اختي..طبعا هي دخلت الجامعة قبلي و لما جيت داخلة الجامعة قعدتني وحذرتني وقالت لي ( اسمعي الجكس و الكيس بتاع الجامعة دة كله كلام فارغ...الاولاد عايزين بس يقضوا وقت ..الواحد لسة طالب ما حيلته اي شئ حب شنو وعرس شنو ليه؟؟ شوفي قرايتك و اتخرجي و خلصي الامتياز حتى بعداك شوفي الحاجات دي ...)
طبعا كلامها دة لو صحي ولا غلط المهم انا التزمت بيه تماما في الجامعة وقفلت السكة على اي زول حاول معاي...الغريبة صلاح دة لما حسمته ما زعل مني ولا اتعقد وواصل علاقته معاي عادي ..اصله كان زول بتاع حركات و هظار وكدة...
حسع ما صدقت اني لقيته هنا ومشيت سلمت عليه ( صلاح ابراهيم..انت الجابك هنا شنو؟؟؟ الخرطوم دي ما حقتنا نحن و نحن اهلها...)
قعد يضحك وقال لي( حقتكم شنو؟ انا الامتياز كله اشتغلته هنا في الخرطوم و لا يوم واحد ما شفتك حايمة بيجاي...كيف الاحوال ..اها بتعملي في شنو حسع؟)
قلت ليه ( والله وزعوني جراحة هنا ...مع مستر طارق عبد الحميد ..دي اخر شفت لي..)
قال لي ( اوووو البوص الكبير مستر طارق...ودي لميتي فيها كيف دي؟...)
قلت ليه ( والله وزعوني ليها من الوزارة عديل كدة من غير لف ودوران...) بسري قلت ليه ما عارف ساكت الدرامات الحصلت ..الدكتورة الرجعوها والجابوني انا بدلها بالصدفة...
قلت ليه ( اها و انت وين حسع؟)
قال لي ( انا خلصت الامتياز و لقيت فرصة خدمة وطنية في بنك الدم هنا...)
قلت ليه ( ياخي؟ عليك الله ...انت دة الكيف لميت في حاجة زي دي؟)
قال لي ( دة كلامك؟...قايلاني هين انا...)
قلت ليه ( المهم دة حظي انا ...جاية الليلة اول يوم و دايشة ما عارفة شئ.. مسكوني لستة العمليات و تجهيز الدم البركة اللقيتك هنا ..اها عشان خاطر العشرة القديمة شوف لي دمي دة..)
عاين لي وبيضحك ( عشرة؟ انتي عندك عشرة ؟ ما قفلتي علي كل السبل ؟؟)
شال مني الورقة الفيها فصائل الدم وقال لي ( مستر طارق كمان بلعب ..ما عنده اول يوم ولا تاني يوم ..طوالي درش شديد من البداية..)
سألته ( انت اشتغلت معاه الجراحة؟..)
قال لي ( للاسف لا ..اشتغلت في الوحدة التانية..لكن كنت شايف ناس وحدته مدروشين كيف...لكن طبعا في الاخر بطلعوا تمام التمام...)
عاين للورقة وقال لي ( طبعا الفصائل النادرة...)
انا سريع قلت ليه ( انا بكرة بلتزم اجيب ليك المتبرعين بتاعنهم...بس عايزة من حسع اضمن الدم حقهم وانزل الهم دة من كتفي...)
قال لي (يا زولة معقولة انا اتلوم معاك ...تعالي بيجاي)
بعد نص ساعة طلعت من بنك الدم و صلاح وامور الدم بتاع العيانين مظبطة ...
يتبـــــــــــــــــــــــــــع