الجزء 15

مشيت مكتب مستر طارق لقيته قاعد في مكتبه جوة قدامه ورق ..اول ما شافني قال ( امل...دي الكتب عشان ما تمشي تنسيها...)

وطلع لي مجموعة الكتب بتاعة علاقات الطبيب بالمريض.. ومداها لي ..انا شلت الكتب وقلت ليه (شكرا يا بوص)

دخلت الكتب في شنطتي وقلت ليه ( في حاجة تاني يا بوص..)متعودين طبعا اليوم البعد النبطشية نطلع بدري..

قال لي ( مافي حاجة...) وقام وقف على حيله وقال لي ( لو ماشة البيت انا برضه طالع ..ممكن اوصلك معاي...)

انا سريع قلت ليه ( ما في داعي يا بوص...ما خلاص وصلتني المرة الفاتت..)

قال لي ( ما اصلا في طريقي ما مشكلة يعني...) في سري قلت يا ربي طريقه دة وين هو؟

وكأنه هو قرأ افكاري قال لي (دة طريقي للبيت ... انا ساكن قريب ليكم..في بري اللاماب ) صحي بري اللاماب قريبة لينا في المسافة...لكن بعيدة جدا في حاجات تانية... امتداد ناصر وين و بري اللاماب وين ؟...

بصوت عالي قلت ليه (معناها برضه بزحك من طريقك شوية ..)

قال لي ( ...ابدا انا اصلا ح اغشى شارع المشتل اشتري حاجات لامي...) قربت اقول ليه والله ولد السرور انت البتترسل لامك...لكن سكت...

طلعنا سواء مشينا على عربيته وانا افكر سبحان مغير الاحوال من حال الى حال..منو الكان بفكر انه انا ومستر طارق نجي ماشين كدة مع بعض زي الاصحاب في يوم من الايام..وصلنا للميرسيدس الما تغباني وركبت واحتوتني الفخامة و الريحة الحلوة زي المرة الفاتت...

الليلة سبحان الله المشوار الاخد دهور المرة الفاتت انتهى في لمح البصر...شوف بالله تاثير الحالة النفسية للانسان على المسافات!!!..

ولقيته ليك حافظ شارع بيتنا ياتو واحد و حافظ بيتنا ياتو ...قبل ما افتح خشمي لقيته اشر لف و مشى على البيت...

عيني لمحمد اخوي واقف جنب الباب... و من ماشاف الميرسيدس داخلة الشارع خلى البسوي فيه وركز معاها...الليلة البحلني شنو؟..الجابه شنو بدري من المدرسة تاني؟ ناس مدرستهم ديل بس لو لميت فيهم...حسبي الله ونعم الوكيل ...اكيد بكون متذكر المرسيدس القلت ليه عاجباني و عايزة اشتريها ...

العربية وقفت جنب الباب و نزلت منها و محمد متابعني بعيونه ..قلت الحق اعمل هجوم كخير وسيلة للدفاع ..اناديه عشان يسلم على مستر طارق ناديته ( محمد ...محمد ..)

ما اشتغل بي الشغلة ولا رد علي كأني ما بتكلم معاه.... قبلت وشي من البوص و كرجت سنوني و جريته من يده (محمممممد..)

قال لي بصوت عالي ( انا ما اسمي محمد بس...اسمي محمد اسماعيل ..)

انا ضحكت واعاين لمستر طارق بقعر عيني ..طبعا ح يقول عيلة كلها مجانين..كرجت سنوني تاني وقلت ليه من بين اسناني ( تعال يا محمد اسماعيل سلم على مستر طارق ...مديري)

اتفاجات بمستر طارق نزل من العربية و محمد مشى سلم عليه وطوالي اتلفت علي وقال لي ( اها اشتريتيها يعني؟...)

انا سريع جريته عايزة ادخله البيت و اتجنب المزيد من الفضائح (اشتريت شنو؟؟؟)

قعد يقاوي فيني وانا بلز فيه عشان يدخل البيت و باعلى صوته قال لي ( شنو يعني؟..المرسيدس القلتي لي المرة الفاتت عايزة تشتريها ..طلعت بتاعة مديرك..ي..)

لزيته جوة وقفلت الباب و مسكته شديد و قطعت سيل الكلام المنهمر من محمد... اتلفت على مستر طارق كان واقف يعاين لينا بابتسامة عريضة..

قلت ليه وانا بضحك باحراج ( شكرا يا بوص ..كتر خيرك ..) عايزاه يمشي سريع وانا ماسكة الباب و محمد يقاوي فيني بجوة عايز يفتحه..

مستر طارق قال لي ( العفو ..على شنو) وركب العربية دور واتحرك وعلى وشه ضحكة كبيرة ..

طوالي انا فتحت الباب و دخلت لمحمد ( يا ولد انت فضيحة كدة ليه؟..)

داير يجري على الباب يطلع الشارع مسكته جريته لجوة وهو بكورك ( انا الفضيحة ولا انتي ...المرة الفاتت تقولي لي عربية عجبتني عايزة اشتريها وتطلع بتاعة مديرك؟ ..)

قلت ليه ( اها ويعني شنو حقة مديري وعاجباني عايزة اشتري زيها...)

امي جات طالعة من المطبخ على كواريكنا ..وقالت ( في شنو؟...مالكم ؟)

قبل ما الحق اتكلم محمد كورك ( مدير امل وصلها بعربية مرسيدس وقالت عايزة تشتري زيها...)

امي عاينت لي ..ما متعودة اني اركب عربات ويوصلوني البيت ..كان زملاء كان مدراء ..قلت ليها ( دة مستر طارق رئيس الوحدة حقتنا ساكن في بري بيجاي قريب لينا...و عشان انا في طريقه وصلني معاه...)

رغم انه دي اول مرة يمكن زول يوصلني بعربية للبيت امي ما عملت منها موضوع ..عارفاني وواثقة مني... اتلفتت على محمد وقالت ليه( خلاص امشي خليها...جاية تعبانة امس مساهرة في المستشفى..) الله يخليك لي يا امي ...

مشيت غيرت ومشيت المطبخ شفت لي حاجة اكلتها ومشيت رقدت ..على قول امي تعبااانة..مع اني يعني ما قعدت معاهم في الحوادث ومشيت الاستراحة نمت... لكن نوم الاستراحة بس سهر الجداد ولا نومه ..كل ما تلفون واحدة يضرب كلنا نقوم معاها...نوم مقطع يعني...

بالليل طلعت الكتب الاداني ليها مستر طارق و قعدت اتصفح فيها واشوف ابدا بياتو واحد...نهى جات لقتني فارشاهم قدامي قالت لي (من اين لك هذا؟؟؟)

قلت ليها ( دة مستر طارق سلفني ليهم ..)

وماعارفة ليه شعرت بارتباك وانا بكلم في نهى ...وهي طبعا تعجبك محامية شاطرة بتلقط انفعالات الناس وتفاعلاتهم طوالي...قعدت جنبي في السرير و مسكت واحد من الكتب تعاين فيه وسألتني ( والمناسبة شنو يعني يديك كتب قدر دة؟؟)

خلاص تحقيق المحكمة بدأ وعارفة نفسي مافي طريقة عندي غير اقول الحقيقة ولا شئ غير الحقيقة...رصيت قصة البكاء الفي الحوادث كلها من طقطق لسلامو عليكم بما فيها الجلسة مع مستر طارق في غرفة الغيارات و الكلام القاله لي...بعد انتهيت عاينت لي مسافة من غير كلام وعرفت مخها شغال يحلل في الكلام ...قامت سألتني طوالي(مستر طارق قدر شنو ؟؟) اهاا التحقيق الجد جد بدأ!!!

قلت ليها ( يعني يكون كم وتلاتين كدة..؟؟)

لحقتني بالسؤال البعده طوالي ( معرس؟؟؟)

قلت ليها ( نهى بتسألي ليه؟؟؟)

قالت لي ( بس انتي وريني ...معرس؟)

عارفة نفسي لو ما جاوبت ماح تريحني قلت(لا..)

السؤال البعده ( خاطب؟...)

الله؟ نهى دي مالها ؟؟ غيرت رأيها فيما يخص علاقتي الغرامية وعايزة تعمل لي فيها ماتش ميكر (match maker)؟ ومع منو؟؟... مع مستر طارق من دون الناس؟

المهم رديت قلت ليها ( العارفاه كان خاطب وفسخ الخطوبة .....)

لسة مافي حلل... سألتني (مرتبط؟؟؟)

قلت ليها ( والله ما عارفة ...)

ما ادتني فرصة وقالت ( يعني مافي كلام المستشفى؟ مافي واحدة قاعدة تجيه طوالي؟ ما بتجيه مكالمات في التلفون يتبسم ويزح منكم.؟؟؟..حاجات زي دي يعني ...) الليلة البحلني شنو انا؟؟؟

قلت ليها ( والله ما عارفة يا نهى...) وعشان احسم ليها الحكاية قلت ليها (لكن الحاجة العارفاها ومتاكدة منها انو جنه وجن واحدة من ناس الامتياز تقعد تعمل ليه غراميات و حبكانيات ..ولو ما عجبك في واحدة عدييييل رجعها الوزارة عشان الموضوع دة...)

و قعدت حكيت ليها قصة علياء..وريتها اني من اول يوم انا جيت الوحدة وكان عايز يرجعني و طريقة معاملته لي الكانت في البداية... قلت ليها ( الا بس بعد اتاكد اني ما عندي ليه حاجة حتى اتعدل بقى يعاملني زي بقية خلق الله...)

عاينت لي كدة وقالت (همممم..واتكلم معاك وروقك في الحوادث و اداك الكتب ...ما بطال) ..طيب لو عرفتي وصلني بالعربية كنتي عملتي شنو؟؟

قلت ليها بغيظ( هو شنو الما بطال؟... يعني قايلة انه مستر طارق ممكن يكون عنده لي شئ؟ ...انتي بتحلمي..)

قالت لي ببرود (نشوف...)ومشت على سريرها...انا عاينت ليها بغيظ و لميت الكتب و قفلت النور ورقدت ...

يتبـــــــــــــــــــــــــــع