الجزء 3

مستر طارق عايز يرجعني الوزارة؟

ما عايزني؟

ليه انا عملت ليه شنو؟ حتى قبل ما يديني فرصة ويشوف شغلي كيف ؟ عشان لبستي المشاترة يا ربي؟ بصراحة انا اتخلعت ومخي ذاته وقف غلبه يفكر ..

الراجل التاني القاعد مع مستر طارق شكله اصغر منه شوية و هو ذاته طويل ووجيه وقيافة ..طوالي قال ليه( طارق..كدة دقيقة روق ...يرجعها كيف يعني؟...)

مستر طارق قال ليه بانفعال( ايوة يرجعها ...يا امير انا كلامي كان واضح لدكتور عبد السلام ...كيف يعني يـ..)

امير دة قاطعه ما خلاه تم كلامه ( دقيقة يا طارق كدة روق شوية...) واتلفت على الولد الجابني وقال ليه ( عمار كدة سوقها انتظروا برة دقائق...)

عمار عاين لي ودنقر سريع كأنه محروج واتحرك... وانا اديت مستر طارق و التاني الاسمه امير نظرة وطلعت وراء عمار..برة البنت القاعدة عاينت لعمار و وهزوا راسهم الاتنين..تاني اتلفتوا علي و عمار قال لي( اقعدي يا دكتورة...)

اليوم بعد ما اتعدل اتقلب تاااني !!!!!!!

اول ما قعدت كدة قربت انط من الكرسي تاني لانه جاني صوت مستر طارق من جوة هو بكورك( انا كلامي كان واضح لعبد السلام ...قلت ليه ما عايز دكتورة ..قلت ليه يوزع لي دكتور ولد..ولد...) اجي يادكتور ولد !!!!

انا اتخلعت وقعدت اعاين لعمار و الدكتورة التانية.. الاتنين كانوا ساكتين و مدنقرين...الراجل دة ما نصيح؟ يعني كيف ما عايز دكتورة بنت؟ قايل نفسه في القرن الكم هو؟؟

صوت امير من جوة قطع افكاري (يا طارق عليك الله كدي استهدى بالله...) بعد داك بقى يتكلم بصوت واطي ما سمعته...

جاني تاني صوت مستر طارق( يعني خلاص الدكاترة الرجال كملوا من البلد؟ معقولة؟؟؟؟)

الراجل دة جادي ؟ الليلة ما سمعوه ناس حقوق المرأة و ناس الجندر..حقو الزول يمشي يشتكيه ليهم...يعني قصده شنو؟ البنات ما بشتغلوا كويس زي الاولاد؟ بالعكس والله البنات هميمات وبياخدوا شغلهم جد ..والاولاد غير التسيب واللعب ما عندهم حاجة..والله انا محل ما اشتغلت الاخصائيين الاشتغلت معاهم كانوا مبسوطين مني و من شغلي واجتهادي و كم واحد قالوا لي بعد تخلصي امتياز تعالي لينا راجعة...

جاني صوت دكتور امير من جوة (يا طارق نحن بعد يومين عندنا لستة عمليات طويلة عريضة والعيانين عايزين تجهيز..والعنابر ملانة عيانين...ما بنقدر ننتظر تاني اسبوع عشان يوزعوا لينا دكتور ولد...كدة انت جرب ح تخسر شنو؟ )

مستر طارق رد عليه بانفعال ( تاني يا امير؟ ..تاني انا اخش في المواقف دي؟..انا ما عندي وقت للكلام الفارغ دة..)

دكتور امير قاطعه لكن براحة ما سمعته قال شنو...قعدوا يتكلموا تاني مسافة ما سامعاهم كويس..مرة مرة تجيني كلمة طايرة...

المهم بعد 10 دقايق كدة دكتور امير جاء طالع لينا برة.وجاء علي..انا وقفت على حيلي ..هو ابتسم وقال لي ( معليش يا دكتورة ...اعذرينا على الاستقبال العجيب دة..انا بعتذر ليك نيابة عن مستر طارق...وبرحب بيك في الوحدة حقتنا...)

يعني خلاص رضى بي صاحب الجلالة مستر طارق؟ اريتني لو بقدر اقول ليه ما عايزة شغل معاك..لكن ما في طريقة ..نحن ناس الامتياز ديل بس يانا المستضعفون في الارض... الله يكون في عوننا ..امشوا يمين نمشي... امشوا شمال نمشي...

دكتور امير مد لي يده شال مني الورق حقي..وقرأ وقال( امل اسماعيل..مرحب بيك..انا مستر امير ..اخصائي جراحة جديد عندي فترة تدريب هنا في الوحدة...) واتلفت على الاتنين التانين وقال لي ( ديل دكتور عمار نائب اخصائي في الوحدة ودي دكتورة ابتسام طبيبة عامة في الوحدة برضه ..)

الاتنين عمار و ابتسام ابتسموا لي و شكلهم كدة ارتاحوا شوية والاحراج الشديد راح منهم شوية...وانا بيني وبين نفسي قلت ما ياها دي ابتسام دكتورة بنت شغالة في الوحدة..اشمعنى يعني انا يرفضني؟

مستر امير واصل كلامه ( في معانا برضه نائب اخصائي تاني اسمه عبد اللطيف و اتنين اطباء امتياز ..حسن و عثمان لكن حسة في العنابر لكن بتلاقيهم ان شاء الله...) يعني الوحدة كلها رجال لو ما ابتسام ....مستر امير قال لي (اشتغلتي نساء وولادة؟...)

قلت ليه (ااي..الجراحة دي اخر شفت لي...)

قال لي ( اشتغلتي عملية قيصرية؟؟)

قلت ليه ( ااي عملت 4 قيصرية..وساعدت في كم واحدة و خيطت و عملت عمليات نضافة وكحت كتير ...)

قال لي( طيب كويس تمام والله...يعني غرفة العمليات ما غريبة عليك...معناها ما ح تحتاجي يعلموك غسيل ولا خياطة ولا كدة...)

اتلفت على ابتسام وقال ليها ( ابتسام ...عليك الله لو سمحتي وريها جدولنا حق الشغل كيف و خليها تشوف العيانين الفي العنابر والعيانين الداخلين عمليات بعد بكرة ديل عشان تتأكد من التجهيز ...)

ابتسام قالت ليه (تمام يا بوص ) وقامت علي حيلها...

تاني مستر امير اتلفت علي وقال ( معليش يا دكتورة امل ح تباشري الشغل معانا من حسع طوالي ....لاننا مضغوطين ضغطة شديدة نحن والله ...)

قلت ليه ( ما عندي اي مشكلة يا مستر ...اصلا انا جاية اشتغل ..) في سري فكرت اذا اصلا مضغوطين كدة رئيسهم دة ماله بقعد يعزل منو يشتغل معاه ومنو ما يشتغل؟؟...

طلعنا انا وابتسام ماشين على العنابر وطوالي قعدت تشرح لي في جدولهم بتاع الشغل ..ما جابت سيرة المشكلة الحصلت جوة مع مستر طارق دي ومع اني الشمار عايز يقتلني عشان اعرف ليه المستر رجع الدكتورة ورافض يشغل بنات معاه؟؟... سكت قلت خليها شوية شوية اكيد ح اعرف...

ابتسام قالت لي (...نحن في الوحدة تقريبا مقسومين على مجموعتين ..كل مجموعة مشرف عليها نائب اخصائي ..عمار معاه انا و حسن..... وعبد اللطيف معاه عثمان و..و..) سكتت شوية كدة وقالت ( كانت معاه دكتورة رجعت الوزارة...)

انا شعرت انها ما عايزة تقول اسم الدكتورة الرجعوها (ما رجعت) الوزارة دي...ما عايزاني اعرفها منو..دة كله طبعا زاد الفضول حقي و الشمار بقى عايز يقتلني عشان اعرف الدكتورة دي اسمها منو وعملت شنو عشان يرجعوها وتقلب مستر طارق على جنس الحريم كدة....ابتسام قالت لي ( انتي ح تكوني بدل الدكتورة دي ..ح تمسكي العيانين الكانت هي ماسكاهم.)

يتبـــــــــــــــــــــــــــع