الجزء 9

الاسبوع التاني من شغلي في الوحدة مر نفس السيناريو بتاع الاسبوع الاول العمليات و المحولة والنبطشية و الرواند ..ونفس المعاملة لي من مستر طارق..

ايوة بشرح لي و اذا سألته بجاوب لكن تعامله معاي مختلف تماما من تعامله مع باقي ناس الوحدة.... كلهم اندمجوا معاي وبنادوني باسمي يا امل ...الا هو بس يا دكتورة دة ويا دكتورة داك...و لو قاعد يضحك ولا مبتسم و اتلفت علي طوالي الضحكة و الابتسامة يختفوا...بالجد اتعقدت...

الرجال الفي الوحدة ما عارفاهم ملاحظين للحاجة دي ولا لا ...لكن ابتسام عرفتها لاحظت انه معاملته معاي مختلفة...يوم كدة قاعدين كلنا في المكتب انا حكيت ليهم موقف مضحك عمله معاي واحد العيانين ...بعد انتهيت كلهم ضحكوا على الحكاية و قعدوا يعلقوا الا مستر طارق ساكت و متلفت على جهة تانية كأني ما قاعدة اتكلم ...

انا اظن القهرة ظهرت علي في وشي لانه ابتسام بعد شوية قالت لي ( امل ...انا ماشة على الكافتيريا عايزة لي كباية قهوة ارح معاي...)

مستر امير قال ليها (ما ياها دي النسكافية قاعدة هنا نازلين تحت ليه؟)

قالت ليه ( ما عايزة نسكافيه ..عايزة قهوة راسها عديل بجنزبيل و قرفة وباقي الرصة... تعدل لي راسي دة..)

في الكافتيريا ساقتني تربيزة وراء مطرفة بعيدة من الناس، بعد جابوا لينا القهوة قالت لي ( عايني يا امل ...انا ما ح الف وادور ..بالنسبة لمعاملة مستر طارق ليك انا ما عايزاك تاخديها بصورة شخصية ,,,ولا تتعقدي وتفتكري انك زولة فيك مشكلة.... ولا تفتكري انك مقصرة في شغلك وكدة...المعاملة دي سببها حاجة تانية..) وسكتت كدة شوية ودنقرت وقالت (والله ما عارفة ذاته اقول ليك شنو...)

انا قلت اسهل عليها، قلت ليها ( عارفة السبب..عشان انا بت..) رفعت راسها تعاين لي..انا واصلت ( لكن بالجد ما عارفة سبب مشكلته مع البنات شنو..) سكت شوية واترددت لكن واصلت كلامي( خاصة يعني...يعني ..انا شايفاك انتي...)

ابتسام اتنهدت وقالت لي ( ااي ..شايفاني انا بت وشغالة معاه عادي و معاملته لي عادية...لكن انا مختلفة...انا بعرفني من زمان... و انا متزوجة و زوجي صاحبه...)

سكتت شوية قالت لي ( انا ح احكي ليك القصة من البداية لكن توعديني انها تفضل سر ..مافي زول يعرفها..انا والله لو ما شايفاك متأزمة و خايفاك تتعقدي ما كنت ح اكلمك ...لكن بعد تعرفي الحكاية يمكن تلقي ليه عذر للبعمل فيه دة..)

قلت ليها ( اتاكدي انه الكلام الح تقوليه لي ما يطلع مني لاي زول تاني...) انا طبعا اصلا الشمار قاتلني...

ابتسام بدت تحكي( مستر طارق طبعا جاء من بريطانيا يادوب ليه سنتين ولا 3 سنوات..اول ما اتعين هنا كان خاطب ..لكن قبل سنة كدة تقريبا خطوبته دي فرتقت..انا ما ح ادخل في تفاصيل كان خاطب منو وفرتق ليه دي حاجة خاصة بيه هو ..المهم انه المشاكل بدت تظهر بعد فسخ الخطوبة دي..البنات عرفوا انه خلاص بقى حر و ما مرتبط و بدوا يعملوا في الحركات الما ياها...براك شايفة المستر كيف ما شاء الله عليه و انسان تعامله راقي جدا ..جنتلمان بالجد...) انا بس سكت ما علقت قال جنتلمان قال!!!

ابتسام واصلت ( انا من ما اشتغلت معاهم حضرت كم دكتورة امتياز معاهم هنا ، طبعا ما كلهم بعملوا حركات الرومانسات دي.. لكن في 2 ولا 3 كدة بالغوا..وزي ما بقولوا انا ما جابوه لي..شفت بعيني و لو ما كدة ما كنت صدقت ابدأ....الدكتورة القبل الاخيرة الرجعوها دي ما خلت حاجة ما عملتها...سك عديل كدة و هدايا و وقصص عجيبة.. والله بالجد كانت حاجة محرجة للمستر و لينا نحن الشغالين معاه... المهم ما صدقنا انه الشفت بتاعتها انتهت ومشت ..اها قامت جاتنا الدكتورة الاخيرة دي ..دي كمان حكايتها حكاية.. زادت في الطاق زيادة .. شكلها دي وقعت بالجد وهو طبعا ما عنده ليها حاجة و هي الحكاية دي باين ازمتها شديد ..لحدي ما جاء اليوم الكارثة الرجعوها فيه الوزارة...يوم عجيب داك غايتو...جاته في المكتب وقعدت تبكي ليه و انها بتحبه و ما بتقدر تعيش من غيره ووووو...وكلام كتير ما بتحكي ذاته....طوالي رجعها الوزارة....طبعا مافي زول عارف الحكاية دي غير مستر امير و انا و عمار ...انا وعمار جينا داخلين المكتب التاني بالصدفة وهي كانت جوة معاه في مكتبه و طبعا سمعنا الكلام...عمار طوالي طلع مشى ...انا والله قعدت تميت باقي الموضوع ...لكن بالجد كان موقف عجيب ...مستر طارق بس كلم مستر امير ..لكن باقي ناس الوحدة ما في زول فيهم عارف الدكتورة رجعوها ليه...اها مستر طارق كان حالته حالة غايتو... لما اتصل على ناس الوزارة كلمهم قال ليهم توزعوا لي دكتور ولد ..)

قلت ليها ( وناس الوزارة بدل يوزعوا ولد قاموا رسلوني ليه انا....)

ابتسام ضحكت وقالت ( وكان مصر يرجعك لو ما مستر امير ضغطه...)

انا قعدت اهز في راسي وقلت ليها( ولما قعدت قرر انه يقطعه معاي ناشف مرة واحدة وما يديني وش عشان ما تجيني اي افكار شيطانية رومانسية تجاهه..)

ابتسام ضحكت ( بس ياهو جبتي الزيت زي ما بقولوا...من ناحية تدريس و تعليم ما ح يقصر معاك ...لكن غير كدة ياهو القطع الناشف دة زي ما قلتي)

قلت ليها ( والله ما عارفة اقول ليك شنو..لكن هو كمان ما يحكم انه اي بنت ح تعمل معاه كدة ..الناس ما كلها واحد ..والبعجب واحدة ما ضروري يعجب الباقيات حتى لو كان منو داك...)

قالت لي ( ااي انا معاك ..وفي دكتورات جوا اشتغلوا معانا ومشوا بادبهم والله ...وانتي بالذات يا امل و ما عشان قدامك.. انا قايلاني جبتك الليلة عشان اتكلم معاك ليه؟ لاني عرفتك ياتو نوع من البنات ..زولة ماشاء الله دغرية وبتاعة شغل ما عندك حركات كدة ولا كدة..انا قيمتك من اول يوم جيتي فيه بطرحتك الليمونية ديك...)

و ضحكنا الاتنين وقلت ليها ( ياخ دي كانت غلطة مطبعية..ان شاء الله ما تتكرر تاني رأفة بيكم وبعيونكم...وشكرا ليك اخجلتي تواضعي)

ابتسام قالت لي ( بالجد كلامي دة ما مجاملة...ولانك زولة فاهمة عايزاك تعذري طارق.. بالجد الاربعة شهور الاخيرة دي المستر كان في موقف صعب شديد ...اتخيلي زول مندلق عليك اليوم كله ما مديك اي فرصة خالص...)

طبعا انا ما قادرة اخت نفسي في موقفه دة ..اصلا ما كان في زول مندلق علي كدة...لكن صحي لما اتخليت الموقف زي ما قالت ابتسام بديت اديه العذر ...الله يجازيكن يا علياء و الدكتورة التانية القبلها دي... قلبتنه على جنس البنات...

اتنهدت وقلت لابتسام (والله بس الله يكون في عونه ...ويا ستي ما تتحسسي وتاخدي في بالك هو من حقه يعامل اي زول بالحاجة البتريحه...وانا من ناحيتي ح اتبع معاه نفس السياسة بتاعته في المعاملة وزي ما بقولوا الخواجات two can play at that game يعني اللعبة دي ممكن يلعبوها اتنين..تعاملي معاه ح اخليه بس في حدود الشغل ما اكتر...عشان باله يرتاح من ناحيتي ..وكلها شهرين ونص واتخارج...)

ابتسام شكرتني على تفهمي للموضوع ..باين انه هي وزوجها مستر طارق دة صاحبهم شديد و عندهم ليه معزة خاصة.

يتبـــــــــــــــــــــــــــع