الفصل الثالث عشر

جمال سايق العربية وبتكلم مع عمو .. سلامة سلامة ياعمي .. شد حيلك قربنا .. وكل مرة بختف

نظرة يعاين ليهو. ويواصل في السواقة .. وعمك حسا فعلا " انو الولد ده شفقان عليهو. اكتر من

اللازم .. المهم يازول وصلو شندي زي 8 مساء .. ومشو المستشفى على طول.

ودخلو على الطبيب المناوب .. وعمك حكى ليهو الاعراض. كلها وهي ذاتها ماكانت محتاجة لحكاية ..

من حالتو العليهو .. الدكتور فهم انو الزول ده عندو مشكلة في القلب .. بس هي بالضبط شنو؟

غايتو عمل ليهو الاجراءات المتاحة في المدينة المهملة .. قياس الضغط .. نبضات القلب .. ماعارف

شنو؟ .. وعمل ليهو الاسعافات الاولية .. واداهو حبة .. قاليهو ختها تحت لسانك. وشوية غايتو

الراجل ارتاح ..

العبيد قاليهو يادكتور انا عندي شنو.؟

قال ليهو والله ياحاج انا ماعايز اشفقك .. لكن مشكلتك في القلب .. ونحن لازم نحولك بي سرعة.

تمشي الخرطوم تشوف الحاصل شنو .. لانو احتمال تحتاج لي عملية .. قال ليهو والله هسع ماعندي

طريقة عملية .. الا ارجع الحلة ويومين تلاتة كدي حتى امشي الخرطوم ..

الدكتور قال ليهو والله اي تاخير مافي صالحك .. بس الظروف اقوى من السيوف. على كل حال انا

بديك الحبوب دي كل ماتضايق تحتها تحت لسانك ..

هنا جمال اتكلم .. قال ليهو يادكتور ماتسمع كلامو .. نحن ظروفنا كويسة .. ولابنرجع الحلة

ولاحاجة .. بس انت اكتب لينا التحويل وهسع بنسافر .. ده عمي الوحيد وفي مقام ابوي .. ما بخليهو

على رايو ..

هسع بس رقدو لي في العنبر .. انا ماشي هنا قريب وبجي بعد ساعة بس بسوقو وبنمشي ..

عمك العبيد قال ليهو ياجمال .. الموضوع ده ما بالسهولة دي. ماتاخد الامور بي تهاون ..

جمال قال ليهو ياعمي لو سمحت اسمع الكلام .. وقوم اخد راحتك في العنبر.

المهم غايتو ضغط عليهو .. ومشى على العنبر .. وجمال طلع دور عربيتو ومشى مشوار .. مشى

وين ماعارف .. المهم جا شايل ليهو قروش .. كمية .. في كيس ورق اصفر.

وقال لي العبيد نحن جاهزين ياعمي .. عملية ولاقيامة .. ماتشيل هم .. صحتك عندنا بالدنيا ..

ومما دخل المستشفى لامن طلع عمك العبيد مادخل ايدو في جيبو ..

ركب عمو معاهو قدام .. وفتح الطبلون خت كيس القروش ربط ربط ملفوفات في الكيس ..

عمك العبيد قال ليهو انا سمعت كلامك ياجمال .. وبسوي اي شي تقولو لي .. بس عندي شرط .. اي

قرش تصرفو تسجلو ..

جمال قال ليهو ماعندك مشكلة ياعمي .. حاااضر بس انت تبقى كويس .. وشكلو مامهتم بي كلام عمو

وشرطو ده ..

اها هم طالعين بي شارع المستشفى .. عشان يمسكو الشارع الرئيسي بتاع الخرطوم .. اتلقوهم

جماعة من الحلة .. معاهم ياسين ود العبيد راكبين بوكسي. جو محصلينهم .. ولو اتاخرو دقايق

ماكانو لمو فيهم ..

ضربو بوري لي جمال .. جمال عرفهم .. مع انو الواطة ليل .. بس اتعارفو ..

جمال وقف ليهم وسلم عليهم .. قالو ليهو ياسين كلمنا. وركبنا طوالي جينا جارين .. يازول الناس ديل

شدة ماسريعين نهمة .. فيهم ناس راكبين بي عراريق البيت .. والزراعة ..

جمال قال ليهم .. نفرين تلاتة منكم يركبو معانا .. الناس الجاهزين .. والباقين يرجعو يطمنو الناس ..

الحمد لله عمي كويس .. بس محتاج لي زيادة فحوصات .. وانت يا ياسين ارجع وخليك في العقاب ..

لامن يجي يونس من الدامر خلو يجي لاحقنا.

المهم اتفقو على كدا ..

عمك العبيد نادي واحد من ناس الحلة البثق فيهم .. اسمو عثمان. قال ليهو عليك الله باكر. تسوق

البقرات الاربعة توديهن سوق كبوشية .. وتبعهن ووكت يجي يونس تديهو القروش يجي لاحقنا ..

اها في ناس ركبو معاهو .. والباقين رجعو الحلة وماهم رضيانين. وقالو ليهو يا العبيد نحن باكر ولا

بعد باكر بنجي لاحقنك هناك. بنسعل منك التوم في السجانة وبنخبر بكانك ..

وديل قبلو جنوب على الخرطوم .. وديل قبلو شمال على الحلة .. العبيد راكب براهو قدام مع

جمال .. وبتونسو ..

العبيد قال ليهو والله ياجمال انا هسع حاس بي نفسي كويس .. بس ساكت ماك داير تسمع كلامي ..

هسع اكان خليتنا مشينا الحلة ودبرنا امورنا وجينا. ونشوف ذاتو خبر يونس ده شنو اللاهسع ماجا

ده .. والله انا قلبي ماكلني تب ..

جمال قال ليهو ياحاج قول بسم الله. يونس كويس وبجيك .. بعدين انت كان مشيت الحلة .. والله

(سلامتك وماك طيب) دي براها مابتخليك ترقد على صفحتك .. هسع عاين ليهم جرينا منهم ..

ولاكلمنا زول .. جو محصليننا في اقل من ساعة ..

عمك العبيد قالهو. والله ياولدي الله يبارك فيك .. ياخي انا قبيل التقول مدخلين راسي في كيس ..

حاميني النفس .. الله يريحك في الدنيا والاخرة .. ويزيدك راحة على راحتك.

قال ليهو .. وين الراحة لي ياعمي .. لاراحة في الجسم ولاراحة في البال .. ولاراحة في

النفسيات .. احمد الله على كل حال .. الزول لازم يحمد الله على القسمة مهما كانت قاسية ..

من عجب القدر مهما وجع ترسيمو ..

تبلع من مرارتو وترضى بي تقسيمو ..

وعمك العبيد ساكت سااااي .. اصلو مافتح خشمو بي كلمة .. وسكتو الاتنين صننن .. بس تسمع

صوت اللساتك مع الزلط .. يمكن قريب العشرة دقايق مافي زول فتح خشمو مع التاني ..

فجأة جمال سأل عمو العبيد .. قال ليهو ماقلتي لي ياعمي .. الحصل على الامين ود المرضي شنو.

اخو بابكر الكان ممارضو ابوي في المستشفى؟

قال ليهو اتوفى بعد الكلام داك بي 15 يوم .. الله يرحمو .. قاليهو - الله يرحمو ويرحمنا ويرحم

موتى المسلمين ..

المهم المقصود هنا .. كانت الونسة مقتضبة ومامرتبة. وفي توجس في الجو من جيهة عمك العبيد ..

لكن جمال كان طبيعي اكتر من اللازم ..

وكت وصلو الخرطوم زي الساعة 12 ونص واحدة الا كدا بالليل ..

في واحد من الجماعة الراكبين ورا .. مد راسو لي جمال .. قال ليهو ياجمال هسع ماتمشي

المستشفى ... مابتلقى ولا دكتور .. والبتلقاهو بتلقاهو زهجان ومتكفرن .. امشي السجانة طوالي

لي ناس التوم. وصباحات الله بي خيرا ..

جمال قال ليهو رايك شنو ياعمي؟ .. قال ليهو فيها خير ان شاء الله ..

اها وكت وصلو السجانة .. عمو قال ليهو هسع انت شغلك سويت فيهو شنو ياجمال ..؟

قال ليهو ماتشيل هم ياعمي .. انا وكت مشيت اجيب القريشات ديل .. وصيت .. ودبرت اموري

تمام .. كلو حاجة في محلها ..

غايتو ياجماعة. بي اختصار صبحت الواطة ومشو المستشفى قابلو الدكتور .. و لقو عمك العبيد عندو

تصلب في الشرايين .. ومشكلة في الشريان التاجي وضعف في عضلة القلب .. وقالو بحتاج لي

عملية عاجلة ..

وحددو ليهم بعد اربعة يوم .. والعبيد اصر انها تكون بعد اسبوع

وعمل جوطة مع الدكاترة .. غايتو في النهاية اجلوها ليهو اسبوع .. وهدفو الاساسي انو البقر

ينباعن .. ويسدد قروش العملية بقروشن.

لكن اصيب بي احباط لمن لقى رسوم العملية اكتر من تمن البقر بي كتير ..

وقروش جمال زاتها مابتكفي. لكن ناقصة شوية ..

المهم جمال قال للدكتور نحن جاهزين يادكتور .. خلاص اعتمدنا المواعيد .. عمك العبيد عاين ليهو كدا

قال ليهو انت بتتكلم كيف ياجمال .. قال ليهو ياعمي الموضوع في استطاعتنا وما بنتاخر. وبعدين

نتحاسب بس انت تبقى كويس .. سكت ..

اها رجعو البيت .. وبكرة طوالي جمال طلع على السوق العربي .. ودق تلفون .. حولو ليهو قروش.

في حوالة اسمها حوالة البحر الاحمر. وكمل قروش العملية وزيادة ..

وعمك العبيد منتظر يونس يجي .. ويجيب قروش البقرات. ومرت يوم ويومين وتلاتة واربعة ويونس

ماجا.

اها في ناس جو من الحلة يزورو. وقالو عثمان باع البقر .. وسلم يونس القروش ليهو يومين ..

ويونس قال ماشي الخرطوم. بس يونس ماوصل لسع ..

ومامعروف الحاصل ليهو شنو .. جمال قال يونس بيوصل ان شاء الله ويوصل متى مايوصل بي

راحتو .. لكن نحن رسوم العملية جهزناها خلاص ..

وعمك العبيد بقى مقلق جدا " من الشي الخلا يونس يتأخر قدر ده شنو؟ يعني المسافة من شندي

للخرطوم ما اكتر من ساعتين ساعتين ونص. لو بالغت. البخليهو يتأخر يومين شنو؟ وبس مسك نقة

ونقنقة. انا والله غلطان القلت لي عثمان ادي القروش لي يونس .. اريتني كان وصيتو يديهن اي زول

غير يونس ..

جمال قال ليهو زول منو ياعمي .. يونس ده مو زول غريب. ده ولدك ..

قال ليهو خابرو .. ما نضهبان منو ..

باكر الصباح جاء ياسين اخوهو بالباصات .. وصل الساعة 11 ونص. والعملية مواعيدها بعد بكرة ..

وقال لي ابوهو ابوي انا داير اقول لك كلام براك ..

دخل معاهو على غرفة في بيت ناس التوم ديل .. وقال ليهو يونس اخوي مقبوض في قروش كتيرة ..

وكان مقفول يومين. في سجن الدامر .. وعبدالحفيظ ود النور. الفي الدامر داك ضمنو .. وفكوهو

لمدة يومين .. وكت جاء لقاك سفروك .. وسمع انو عثمان داير يبيع البقر .. وانتظره لامن باعن.

وهسع شال القروش من عثمان ينحلا بيهن ..

ابوهو قال ليهو الله يقطعو ويقطع اليوم الجابو .. ولدة السجم والرماد

الزول ده اصلو مابمشي لي قدام ..

هسع نحن احوج مانكون للقريشات دي .. غايتو سبحان الله. شوف عليك الامتحان الانا فيهو ده ..

جمال ينفعني ويونس يضرني .. اللهم لا اعتراض في حكمك ..

جمال لاحظ انو عمو طلع من الغرفة .. مهموم ومغموم من الكلام القالو ليهو ياسين .. لكن ماكان

عارفو قال ليهو شنو؟

وبقى كل مرة يجي يقعد جم عمو .. عشان يحكي ليهو في شنو؟ .. لانو جمال قلق فعلا على عمو ..

وحسا انو في مشكلة .. بس ماقادر يسأل عمو عن الحاصل ..

وعمك مفتكر انو جمال داير يعرف خبر قروش البقر .. قال ليهو ياجمال ياولدي ماتنتظر قريشات

البقر .. أكان ماعندك قروش بتكفي رسوم العملية .. نقوم نسافر .. قروش البقر ضيعن يونس

خلاص ..

انا ماقلت لك عثمان اريتني كان ما وصيت عثمان يديهن ليهو ..

جمال قال ليهو ياعمي انا قلت ليك رسوم العملية جهزناها .. بس يونس ضيعها كيفن قروش قدر دي؟

قال ليهو امشي يا ياسين احكي ليهو الحصل