الجزء 13

اتلفتا ليهو 😳 ادهم ! الجابك شنو ؟؟ عرفتني هنا كيف؟

ادهم : كل سنة وانتي طيبه ..

انا : عرفتا كيف كمان .. ادهم 😳

ادهم : 😂😂😂 ياخ انتي مالك متضايقه كده يا آليتي 😂

انا : ادهم ما تقول لي آليتي ولا غيرو .. انت بتعرفني من وين اصلا 😒

ادهم : على فكرة الطين القاعدة فيهو ده بااارد ❤

انا : ادهم .. اقوم اخلي ليك المكان ولا كييف !!

ادهم : سندس .. ليه انتي عصبيه كده !! انا بس حبيت اقعد جنبك هنا ما اكتر اعتبريني ما موجوود !!

انا : طيب اسكت مني ياخ 😒 ..

" قعدتا اعاين للبحر وساااكته .. وادهم قااعد ويعاين لي سااكته ومافتح خشمو بكلمة .. وماقدر يسكت كتير طبعا وقال لي :

انتي عارفه ياسندس .. البحر ده عميييق كده ليه ! عشان بيسمع اسرار الناس وبحفظها جوواهو .. اي زول بجي برتاح عندو وبيحكي ليهو .. بس هو ما حصل شكى لي زول .. "

انا : اااي .. كلامك صح 💔

ادهم : سندس .. انتي عارفه .. انا زيي البحر ده الناس شايفين حاجه وانا حاجه تانيه خالص من جواااي .. ولد عثمان في اي مكان .. دخلتا الرباط وانا ماعايزها .. قريت مجال انا ما عايزو .. خطبت بت انا ما عيزها ولما فسختا خطوبتنا .. الناس زعلت .. عملتا حاجات كتيييرة ماعندي رغبه فيها .. قربتا اتخرج من حاجه انا مابحبها ..

انا : انت قريت شنو ؟؟

ادهم : طب اسنان ..

انا : ايواا دكتور يعني

ادهم : شبه كده ..

انا : طيب كان نفسك تعمل شنو ..

ادهم : ههههه .. كان نفسي اقرا فنون ..

انا : سبحان الله .. ناس في يدهم النعمه وماعايزنها 😪😪

ادهم : طيب انتي قريتي شنو ؟؟

انا : هسي الله يسالك ده شكل وحدة قرت جامعه 👊😒

ادهم : اهاا .. معليش .. طيب .. طلعتي رقاااصه لكن يا الوية 💃👏

انا : رقاااصه 😡😡

ادهم : ما قصدتا حاجه كعبه .. بس قصدي عندك مووهبه ..

انا : اهاا .. اي برقص من زماان ومن صغيرة .. انتا اسست الصاله دي لييه ؟؟

ادهم : عشان انا زااتي بحب اغني ... ويعني صوتي بقولو سمح غايتو .. وبالنسبه للتمرين وكده انا بحب الرياضه شديد عشان كده اسست الصاله دي .. ودي الحاجه الوحيدة الما اعتمدتا على ابوي فيها .. من مجهودي الخاص، 👌 اسستها رغم انو كان راافض الحاجه دي بس عملتها .. طبعا سمعتو ومكانتو اهم شي عندو

انا : ايواا .. ابوك من الكيزان وكده ؟

ادهم : بالضبط كده !

انا : وهو الخطب ليك .. وطبعا وحدة من مستواكم ..

ادهم : ايوااا .. والحمد لله ارتحتا منها .. كانت خنقه

انا : بس انت صغير ليه كان عايزك تعرس

ادهم : لاني في نظرو واحد فاشل وبحب حاجات ماعندها لازمة .. منعني من الغنا ومن اي حاجه بحبها 💔

انا : انا . اسفه 💔

ادهم : ولا يهمك ياخ .. اها احكي لي عنك شويه ..

انا : لا 😒 .. وممكن تمشي لو سمحتا وتخليني اركز في همومي

ادهم : سندس، 😂😂 همووم شنو وانتي بت صغيرووونة وحلات الدنيا عليييكي ..

انا : ادهم ماتستهزاء .. لو سمحتا

ادهم : خلاص معليش حاسكت 😷

" سكتنا .. بس برااي اتكلمتا تاني لانو حسيت برااحه لما حكى لي عنو . كنتا محتاجه زول غرييب عني احكي ليهو المزعلني بدون ما يقول لي ليه ؟ وكيف؟ وبتين؟ "

انا : ادهم ..

ادهم : نعم .. احكي ..

انا : انا ماعصبيه يا ادهم والله 😔 .. انا من جوااي ما كده .. بس الحياة ضغطتني شديييد وبقيت ما مستحمله اااي شي .. انا ما زيك .. رغم الضغط الانتا شايفو ضغط .. بالنسبه لي حياتك مريحه .. ادهم انا بنوم وبصحى بكون بفكر بكرة حناكل شنو ! الكهرباء حتخلص ! والايجار ! والموية والمدرسه ! ده كلووو بفكر فيهو ..

ادهم : ابوك وين ؟

انا : هه .. ابوي .. مابعرفو ومابعرف شي عنو .. خلاني وانا عمري سبعه سنيين " والدموع نزلت طواالي مني "😭😭 خلاني ومشى اتزوج .. وتاني مارجع ولا سال .. واخواتي صغار .. كسر قلب امي عادي 💔 مشى ولا سال يوم وراهو تلاته بنات حيعيشو كييف .. كنتا بشوف امي بتتقطع عشان ناكل .. بتشتغل صباح ومسا .. عشان كده قطعتا ابمدرسه وبقيت بشتغل معاها 💔 مرة ابيع ومرة اقعد .. لحدي ماكبرتا شويه وعرفتا كيف اشوف الرزق وين وبقيت بشتغل في المطاعم 💔 .. عشان كده شخصيتي كانت بتتعصب يوم بعد يوم .. ما قدرتا اكون لطيفه وناعمه زي باقي البنات .. ماجربتا اعيش يوم واحد اني بت وادلع نفسي 💔💔 والزول الكنتا محتاجه حنانو ورعايتو وحضنو ... خلاني 💔 وانا صغيرة وفي امس الحاجه ليهو .. خلاني ابقى اخو واخت لي اخواتي عشان نقدر نحافظ على روحنا .. انا ما سيئه يا ادهم ولما تقول لي انتي عصبية بزعل لاني ما كده 💔

ادهم : سندووسة .. خلاص ما تبكي 💔 .. انتي مابت صاح انتي ست البنات ❤ .. بالعكس .. القوة العندك والجرأة وعدم الخوف خلوني اشوفك فرييدة عن كل الناس .. انا هسي اتاكدتا انك ما بتشبهي زوول .. شايفه البنات الانتي شايفاهم عايشيين حياة حلووة ومريحه وترف .. والله ما مرتاحيين .. جاريين ورا الاولاد عشان يعبروهم .. دايرين زول يهتما بيهم .. ما قادرين يعيشو على طبيعتهم .. نفسهم يكونو زييك .. اي زيييك كده .. عفوية وعلى طبييعتك الحلوة

ادهم كان بتكلم وانا ببكي .. وادهم نظرتو لي ❤ نظرات حب واحترام ما نظرات شفقه ..❤ كيف بت زي دي قدرت تحافظ على نفسها في ابدنيا الصعبه دي .. ادهم زاد اعجابو بي وده كان ظااهر من عيونو .. اخدتا بكيتي وسكتا .. "

ادهم : طيب .. اها بايرة برضو زي باقي الامه 😂😂😂

انا : بورة التخنقك 😡

ادهم : بس لسانك ده كان قدرتي عليه حلااتك

انا : ما تشاغل احسن ليك 😡

ادهم : اهاا عشان حبيبك يوسف بزعل ولا شنو؟

" اسالتو واضحه انو داير يصل لي اني مرتبطة ولا لا "😂😂💔

انا : يوسف ما حبييبي .. يوسف حبييب جنان 😔

ادهم : وليه بتقوليها بزعل كده ..

انا : عشان انا كنتا دايرة يوسف 💔😔

ادهم 😒: يعني انا قاعد مع وحدة مشوكشه حاليا 😏

انا 👊😒😒:

ادهم : 😂😂 خلاص خلاص احسن يازولة انو مرتبط

" سكتنا شوووية .. وتاني ادهم اتكلم "

ادهم : سندس على فكرة .. لما تبكي عيونك بتلمع 😍 فيها لمعه غرييبة ... بتبقي حلووة اكتر 😍 ..

انا : ادهم 😒 جيت تقعد عشلن تقول كده؟

ادهم : لا والله دي ما مشاغله ياخ .. انا بتكلم عشان ما تصيبك عين مني . . انتي حلووة كده لييه ياخ ❤😍 .. لما تصري حلوة ولما تحاكي زول حلوة .. ولما تنبذي زول بضحكيني 😂😂 والعجب كان دعيتيهو يومو اسود معاك 😂😂😂 .. تفاصيلك كلها حلوة

" ادهم بتكلم ولاول مرة زول يقول لي كده 😔 جفااف شدييد 👏💔😂😂 .. لكن بالجد اوول مرة كنتا اخجل فيها رغم اني مابعرف الخجل اصلا .. لكن كلامو خجلني وبقيت منزله راسي وبسمع .. لانو الكلام كيفني شدييد "❤❤

ادهم : والاحلى فيك .. انك حنيينة وحساااسه لابعد حد .. شفتا دموعك لما بكيتي من يوسف .. وشفتك زعلتي كيف لما افنان حاولت تزلك .. دمووعك طررف عيوونك الحلوة ❤

انا : هييي شايفااك قعدتا وبتشاغل كمان 😒😒

ادهم : مالك هسي .. كنا كويسييين يا الوية ياخ

انا : ادهم 😏 اسممي سندس

ادهم : لالا انا سميتك آليتي ❤ .. خلاص انتهينا على كده

انا : وانت تسميني ليه .. انا اصلا مابعرفك

ادهم : بعد ده كلوو 😂😂 عايزة تعرفي شنو تاني ..

انا : ولا شي وخليني في حالي .. ✋

ادهم : والله انتي غريبة 😂😂😂 ومنفسنه كمان 😂😂

انا : ااي انت قاعد مع وحدة مجنونه على فكرة

ادهم : ايواا .. 😂😂😂 طيب يا مجنوونه .. الليله عيد ميلادك اهدي اهدي

انا : يعني هو حيفرق 😔 زي كل سنه .. 💔

ادهم : يعني ماحصل احتفلو بييك .. ؟؟

انا : لا ماحصل .. يوسف بس بجيب لي هديه وجنان برضو

ادهم : ياااه انا منو يوسف ' ياخ انا بغيير ..

" قالها بطريقه مضحكه .. ضحكني من جوووة 😂😂😂😂😂😂 "

انا : ادهم .. انت كده ليه .. الدكاترة دمهم ثقيل .. الا انتا

ادهم : دمي خفييف يعني 😜 ياخ قولي انك مكسرة 😏

انا : هههاي 😒 ولا خفييف ولا شي .. لكن انت زااتك الخفييف ولفييف

ادهم : انتي كلام الحبوبات ده علموا ليك منو يا السمحه 😂😂😂

انا : براااي ✋😆 شفتا المزة الجنبك دي .. كونت نفسها برااها .. من تربيه و من قله ادب وكلوو .. انتج نفسك بنفسك ...

ادهم : ياخ انتي عسل 😂😂😂 على فكرة كمان ماشاء الله بتدقي دق عجييب .. ياخ افنان من يوم دقيتها ما بتجي الجامعه .. وشها مضرب وخايفه على منظرها قدام الناس 😂😂😂

انا : 😂😂😂😂 احلللف بس .. تستاهل قلليله الادب ...

ادهم : اااخ انا .. والله فرقتي عني ياسندس .. والطين ده زاتو ❤ باارد ياخ .. ماحصل قعدتا قعدة ترد الرووح بسييطه كده الا معاك ..

انا : ☺☺☺

ادهم : سندس ... عايز اسالك سوال

انا : اسال !

ادهم : انتي اسمك سندس ولا برضو كذبه 😏

انا : 😂😂😂 كررر علي .. للدرجه دي بقيت ما بتثق .. اسممي سندس يا ادهوومي

ادهم : ادهومي كمان 😂😂 طيب خلاص حاقول ليك آليتي ❤

انا : المشكله انو الدلع كععب كععععب ..

ادهم : خلاص ..😔

انا : خلاص قوول آليتي حاستحملها بس .. لانك مديري في الصاله

ادهم : ايواا صحبة مصاالح 💔😂😂

انا : منو القال اننا اصحاب ؟؟

ادهم : بعد الرغي ده كلو والونسه وما اصحاب 😳😳

انا : خلاص اصحاب ..

ادهم : طيب .. ☺☺ ممكن رقمك يا صحبتي؟

انا : ايووا عارفه انا حركات الاولاد دي ..

" قمتا على حيلي حفياانه وهو قام وراي يكورك لي سندس سندس .. بحدي ماوقفتا ليهو وقلتا ليهو نعم !

ادهم : طيب ما تديني رقمك ... انا حاديك هدية عيد ميلادك ..

انا : هدية؟؟

ادهم : ايوووة .. وطلع لي كرت الصاله مكتوب فيهو رقمو .. وقال لي دي الهدية البتحلم بيها اي بت 😂😂

انا : 👊😒😒😒 اقسم بالله نفسي افهم مفتري كده ليه انتا ياخ

ادهم : 😂😂😂 ياخ حلوووة شديييد لما تصري

انا : انت ما حتخليني الليله اقعد مرتاحه صح ..

وقبلتا منو ومشيت وهو وقف في مكانو بعاين لي من بعيد .. في نفسو قال يااارييت لو مامشيتي ياخ 💔 يارييتك لوقعدتي معاي شووويه بس 💔💔 ..

....

بالليل بعد استحميت وقعدتا في السرير اتذكرتا الرقم بتاعو .. مشيت جبتو واشاور في نفسي ساااعه 😂😂😂 اضرب ولا ما اضرب 😂😂😂 ماعنو الخفه قتلتني ومتشوووقه اضرب ياخ الزول سمح وعطرو السمح داك ولبيس وكلو 😍😍😍 .. يعني بتحسي براااحه وانتي جنبو 😍 وكلامو حلووو .. ولسه بشاور في نفسي .. حيقول خفييفه اوووعك تضربي .. واتذكرتا يوسف 💔 .. هسي ياسندس لو كنتي سمعتي كلام ولاء الوقت داك كان عرستي يوسف 💔💔 .. واتشجعتا وقلتا خلاص اضرب واعمل فيها الرقم غلط 😂😂😂💔😂 .. ضربتا واول ما قال الو .. قفلتا 💔 قلبي بدا يدق زي العامله حاجه ماتمام وخفتا ..

رجع لي وما رديت . قلتا انوم وانسى الموضوع 💔💔 .. طبعا ادهم نقشني طوالي ورسل لي ..

" آليتي العامله فيها تقيله .. الحركات دي خلوها زمان 💔😂😂😂 .. وعلى فكرة نورتي التلفون بعيونك الحلوة 😉

انا : الولد ده قليل ادب ياخ 😂😂😂😂