الجزء 11
:
By : Ashgan ALjaaly ~
المسا تلفوني ضرب عاينت للرقم لقيتو غريب بعد اترددت ما افتحو رديت الوو قال لي امسيتي كيف قلت ليهو الحمد لله لقيت الصوت ما غريب علي قال لي معاك وائل قلت اطمن عليك طبعا اتخلعت ومن سمعت اسمو قلبي طلع من مكانو قلت ليهو تمام الحمد لله وتسلم علي السؤال قال لي العفو ده الواجب بقلبي قلت سبحان الله جاب الذوق ده من وين قال لي بكره ما تجي الشركه اخدي راحه قلت ليهو حاضر قال لي طيب في امان الله قلت ليهو الله يخليك وقفلنا الخط علي كده قلت يا ربي انا بحلم طيب دقيقه اتأكد دعكت عيوني بيدي وفتحت سجلات المكالمه لقيت فعلا استلمت مكالمه من رقم غريب طواااالي ما كضبت دخلت في حفظ الرقم قلت حقو الواحد يحلم احلام اليغظه ويسجلو بي حبيبي 😅 غايتو استغفرت ربي وسجلتو بـ وائل وتاني اتذكرت انو بكره اداني اجازه وفرحت تاني قلت يا بنت احتمال ده شرك منو عشان يطفشك من الشركه ويقول انتي الرفضتي تجي وكده اكون خالفت قانون الشركه ومكتبني تعهد الحيوان يكون عايزني ما امشي عشان يخصم مني قروش عشان كده قررت اني امشي قبل ما انوم ضبطه المنبه اصبحنا الصباح اتحممت واتجهزت ومشيت صحيت سامر قال لي مالك يا بت من الصباح شايفاني في الحلم ولأ حاجه قلت ليهو قوم اجهز عشان توصلني الشغل قال لي شجن انتي الليله مش اجازه قلت ليهو لااا قال لي يا بنت مش وائل قدامي قال ليك بكره اديتك اذن ما تجي بس شكلها كده الوقعه لحست زاكرتك قلت ليهو سامر ح توصلني ولا أأجر امجاد قال لي طيب اديني نص ساعه اجهز فيها قلت ليهو نص ساعه كتيره بتأخر قال لي طيب ربع ساعه وما بنقصها قلت ليهو خلاااص اسرع بنتظرك تحت قال لي تمااام بعد تلت ساعه جا قال لي غلطان انا الوقفت منك بتاع الترحيل قلت ليهو يلااا استحمل نتيجه غلطك وصلني الشركه دخلت كلهم جوني كفرو لي بعديها واصلت اشتغل في الملفات سماح قالت لي جيبي النشتغلها ليك قلت ليها تسلمي سموحه بس بتمها بنتكلم كده وائل جا لافي علي المكاتب اتخلع لم شافني قال لي حمد الله علي السلامه للمره التانيه قلت ليهو الله يسلمك وطلع بعد شويه تلفون المكتب ضرب فتحت الخط قال لي جيبي الملفات وتعالي حتي لو ما مكتمله قلت ليهو حاااضر قلت لـ سماااح قال لي جيبي الملفات حتي لو ما اشتغلتها قالت لي وديها ليهو شلتها وانا ماشه علي المكتب قلت خلاااص ناوي يطردني وقت لقاني جيت ح يعمل الملفات السبب انها ما مكتمله يا حليلك يا بابا كسرت ثقتك فيني دقيت الباب دخلت قال لي اتفضلي اشر لي علي الكرسي قال لي لييه جيتي انا مش قلت ليك ترتاحي قلت ليهو والله الملفات فضل فيها بسيط واخلصها بس ساعه وتخلص قال لي انا ما سألتك من الملفات سؤالي محدد ليه جيتي قلت ليهو بقيت كويسه ما في داعي اغيب قال لي تمام صاح انا بقول الشغل اهم حاجه بس عندها هنا صحة الموظفين اهم من الشغل وبعدين ما تقولي بس انتي الكلام ده بالنسبه للموظفين بصوره عامه 😊 الحيوان ده كل مره ح يقعد يزكرني بمكانتي هنا اني زيي وزي الموظفيت و واحد. 😒 قلت ليهو عارفه النقطه دي قال لي طيب تمااام ده المهم بعد ده ممكن تتفضلي علي مكتبك جيت اشيل الملفات قال لي خليها طلعت وانا مغيوظه منو ما عارفه لم يتكلم معاااي بقيت احس انو قاصد يستفزني ودايما بحسسني اني زيي زي اقل موظف في الشركه مع انو بتعامل الموظفين احسن معامله
بس الغربيه مسك مني الملفات الـ ما مكتمله واليوم ده عدا من غير ما يديني شغل اتونست مع محمود وعمر وسماح جا داخل قال الشغل ماشي كيف قالو ليهو تمام اداني نظره وطلع قلت لـ سماح جيت تعب ساااي ماف شغل قالت لي الحمد لله انك جيتي ونستنا دي ما عاجباك عمر قال لي عليك الله عايزه شنو اكتر من الوجوه الحسنه دي وبقي يأشر علي روحو قعدنا نضحك قلت ليهو الوجهه الحسن دي غيرها وانا ما عارفه 😂 قال لي قصفتي ام الجبهه زاته 😒 عديت اليوم كلو ونسه وضحك رجعت البيت ونفس الروتين اليومي لحدي ما اصبحنا الصباح وجيت الشغل بس المره دي الملفات كانت ماليه المكتب 😭 والشغل كان كتير وضاغط انتقم مني يوم امس قلت لـ سماح معقول ديل كلهم انهيهم اليوم قالت لي بنتهي من شغلي وبجي اساعدك جا ماري سلم علينا ودخل مكتبو الضهر جا شايل طفله قال جبت ليكم دان بتي قال ليها سلمي علي خالاتو وخيلانو انا عملت روحي طرشه كأني ما سامعه ما اشتغلت بالموضوع كتير مع انو بحب الاطفال بس عشان شايلها الحيوان ده الشمار حرقني قلت طلع متزوج وبي بنتو كمان عاينت ليها بقعر عيني اشوف شكلها ما شاء الله حلااااته ♡ الموظفين شالوها يسلمو عليها شكلم بعرفوها تكون طوالي بتجيهو هنا بس يا ربي جات مع منو بتكلم كده قطعت افكاري وحده قالت سلام عليكم قالو ليها منوره يا هبه جات سلمت علينا بالدور وبرضو بعرفوها ماشاء الله عليها جميييله جات سلمت علي قالت لي انتي الموظفه الجديده قلت ليها اي قالت لي المكتب نور تشرفنا انا هبه قلت ليها وانا شجن والشرف لي قالت لي الله اسمك حلووو قلت ليها من ذوقك والحيوان داك شغال يكشف
بس بنتو ومرتو حلويييين ياااخ ما اكضب هو زاتو مز بس تعاملو مستفز
وهبه ظريفه والله قعدت اتونست معانا تاني وائل قال ليها بعد ده نمشي عشان يقدرو يكملو شغلهم بعد طلعو قلت لـ سماح عليك الله القمر دي قاعده معاهو كيف في البيت قالت لي والله حرام عليك والله انتي بتهاجمي وائل ساااي بس وائل ده عسسسل يااااخ قلت ليها بيني وبينك عسل شكلاً بس الطبع زفت قالت لي هي زاته ما قاعده معاهم بتجيهم زيارات قلت ليها يعني هي قاعده في مكان و وائل راجلها قاعد في مكان وبتلاقو بس زيارات قعدت تضحك قالت لي وائل منو الراجلها يا بنت وائل اخوها متزوجه وقاعده مع راجلها في السعوديه وبتجي هنا لاهلها زيارات قلت ليها يا بنت قال للشافعه بتي قال لي عادي لانو هو وهبه روحهم في بعض عاملين زي التوأم قلت ليها يعني متأكده اختو قالت لي اكييييد قلت ليها طيب وائل ما مرتبط قالت لي خاااالص بعديها ما عارفه لييه حسيت براااحه نفسيه مع انو ما عندي علاقه مع وائل انتهيت من الملفات كلها والدوام انتهي رجعت البيت بالرغم من التعب والارهاق بس كنت حاسه بروحي مبسوووطه ما عارفه السبب شنو وعدا اسبوع ونفس الروتين بين الشغل والبيت بس ضغط الشغل كان زايد حبوبه جابت لي عصير قالت لي انتي يا شجن من يوم نزلتي الشغل لا بتاكلي لا بتشربي عصاير تعوضي بيها قلت ليها والله يا حبوبه بكون تعبانه وما عندي نفس ما بصدق اصلك السرير عشان انوم قالت لي الله يعينك وفعلا شربت منها العصير ونمت
اصبحنا اليوم التاني مشيت الشغل كالعاده والشغل كان ضااااغط لدرجه انو اليوم ده ما لقيت وقت فطرته بعد انتهيت من الملفات شلتها وديتها مكتب وائل ختيتها في التربيزه وجيت طالعه حسيت برجلي هوت من الارض وقعت وسامعه صوت وائل من بعيييد يقول لي شجن انتي كويسه شجن ردي علي تاني ما وعيت الا في المستشفي للمره التانيه بس المره دي لم فتحت الغرفه كانت فاضيه .. ووائل كان بتكلم في التلفون بره قال والله يا ابوي بعد ده بكلمها بالحقيقه ابوهو قال ليهو اوعك تتهور يا وائل كده ح تهدم كل الابوها عملو قال ليهو بس دي المره التانيه يغمي عليها من ضغوطات الشغل قال ليهو خلاص خفف عليها الشغل بس اوعك تقول ليها الحقيقه وما تنسي نحن وعدنا ابوها انو نساعدها ونوقف جنبها وده كلو لمصلحتها قال ليهو تمااام طيب ما تنسي تمشي بدلي الشركه قال ليهو اوك وائل قال ليهو خلاااص ح اقفل عشان ادخل اشوفها صحت نتلاقي بعدين وانا هنا شغاله اتذكر في الحصل لي اتزكرت لحدي ما كنت في مكتب وائل تاني ما اتزكرت حاجه وائل جا داخل الغرفه انا اتخلعته 😳 قال لي شكلك بتحبي المستشفيات عشان كده بتجيها كتييير بقلبي قلت خلاااص يا شجن ده اخر يوم ليك في الشركه المدير ح يقول انتي ما نافعه للشغل وقعادك في المستشفي اكتر من الشغل هسه اقول لـ بابا شنو 😭 بتكلم كده وائل طرقع لي اصابعو قصاد وشي قال لي ما رديتي علي قلت ليهو لا ما بحب المستشفي قعد يضحك قال لي يعني ما سمعتي الكلام القلتو ليك بعد سؤال المستشفي ده كلو يا شيخهه سرحااانه وين 😅 قلت ليهو ما سمعتك قال لي خلاااص انسي الباب دق قال اتفضل دخل الدكتور قال لي شجن ما ناويه تفارقينا لو اشتقتي لينا تعالي لينا زياره ما تجينا مريضه ابتسمت ليهو طبعا ده الدكتور العالجني من صدمة مجتبي قال لي المرتين ديل كان هبوط شكلك هامله نفسك اشربي عصاير كتيره واتغزي ده كل علاجك و حمد لله علي سلامتك بعد ده ممكن تطلعو وزي ما قلت ليك تاني سجلي لينا زياره تكوني ماشه بـ رجلك ما شايلنك طبعا قال لي قدام وائل احرجني ياااااااخ 😒 وطلع خلانا انا و وائل جيت اقوم وائل جا علي قال لي بتقدري تمشي ولأ انادي الممرضه تسندك قلت ليهو لا بقدر نزلت من السرير بقيت ماشه وهو ماشي جنبي ما فضل الا يمسكني وصلنا العربيه فتح لي الباب لقيتو مرجع الكرسي ورا بقي عامل زي السرير جا ركب العربيه قال لي اتكلي في الكرسي ورا بقلبي قلت ليهو ده بقي سرير عدييييل 😅 وااااي يا شجن لم جابك مغبيه كنتي راقده كده خجلت ليك يا روحي 🙈 قلت ليهو لا كده مرتاحه قال لي طيب النصلح ليك الكرسي لم قرب مني يصلحو وشميت عطرو حسيت بقلبي يدق في حلقي خوفي هو زاااتو يكون سمع دقاتو 😅 صلحو ودور العربيه اتحركنا وقف جنب مطعم قال لي عن اذنك ونزل جا شايل كيس ناولني ليهو قلت ليهو بس انا ما جعانه قال لي تقريبا نحن الاتنين سمعنا كلام الدكتور وبعدين ما تموتي لي في شركتي تجيب لي مصيبه وقعد يضحك قلت ليهو والله دي اخر مره اقع في الشغل ولو حبيت بكتب ليك تعهد بس عليك الله ما تطردني قال لي يا بنت الجاب سيرة الطرد منو ولأ اقول لو ما اكلتي وكملتي الـ مازا دي اعتبري روحك مطروده ولو حابه تواصلي في شغلك الكيس في يدك بسرعه فتحت الكيس لانو بالجد كنت محتاجه للشغل عشان مصير اهلي بقي يعاين لي ويتبسم وصلنا الشركه جيت انزل قال لي دقيقه نازله وين قلت ليهو نازله اتم شغلي قال لي يا شيخهه مصره تلبسيني جريمه طلع التلفون واتصل الو سماح نحن واقفين بره جيبي شنطه شجن و
تعالي سماح جات قالت لي شجن سلامتك قلت ليها الله يسلم وائل قال ليها ابوي جا الشركه قالت ليهو اي قاعد جوه قال ليها خلاص بوصل شجن وبحصلو قلت ليهو نزلني انا بمشي بـ امجاد عاين لي ودور العربيه وفي الطريق مره نتونس ومره اوصف ليهو ومره نسكت لحدي ما وصلنا البيت قلت ليهو اتفضل قال لي مره تانيه محصل الحاج والله وبالمناسبه بكره ما عايز اشوفك في الشركه اتخلعت ونططت عيوني قال لي اجازه ليوم واحد وما تخافي ما بخصم منك قلت ليهو تمااام ودعتو ودخلت البيت ....
⏪⏪⏪⏪