الجزء 25
:
By : Ashgan ALjaaly ~
قلت ألفت إنتباهو بالفستان عشان ما يلاحظ لشعري قلت ليهو وائل تعال اوريك ده ودخلنا الغرفه قلت ليهو غمض لحدي ما اقول ليك فتح طبعا مافي مصداقيه عشااان كده حلفتو ما يفتح عيونو 😅 ولبست الفستان طلع مع الحنه عجييييب طبعا الفستان قصير بقدام لحدي الركبه وعندو زيل طويل بورا وكمو عريان انا وهبه خلينا الحنانه تنقش لينا في معصم يدنا فوق عشااان الفستان عريان الفستان صاح تقليدي بس كان خورافي مع الحنه كان لونو كبدي واشترينا شبط كبدي بعد انتهيت قلت لوائل فتح لم شافني نط من السرير وجايي علي ويصفر قلت ليهو حلو حضني بورا قال لي ما حلو ده يجنن ح ياكل منك حته وفضلنا الاتنين واقفين في المرايه قال لي القمر ده يسمح لي اطقم معاهو في الحفله واشر علي روحي في المرايا قلت ليهو لو سمحت احترم نفسك وما تعاكس وبعدين انا ح اطقم مع راجلي قال لي لو ما طقمتي معاااي ح اخطفك من راجلك وبعدين انا بحسدو عندو الجمال ده كلو قال لي طيب لبستك حقت الجرتق وين قلت ليهو وائل انت بتهظر من قبيل بوري فيك في شنو طوااالي ملااامح وشو اتقلبت ونبرة صوتو اتغيرت قال لي نععععم ولفاني عليهو قال لي قصدك ح تمشي بي دي قلت ليهو اي مالها قال لي تبقي بتحلمي يا روحي قلت ليهو هسه انت مش قلت لي حلو قال لي اي حلو داخل البيت لكن بره البيت استحااااله قلت ليهو الرقيص بس نسوان وللجرتق بغير بالتوب قال لي حبيبي افهميني في حالة مختلطه اسها حرام وفي حاله بس نسوان اسمها عين وبرضو حرام وانتي مفاتنك كلها بره حتي لو اطرينا خلينا العرس بس الفستان ده لااا قلت ليهو عليك الله قال لي قلت لااااا يعني لاااا قلت ليهو انت انسان معقد ما اكتر من كده قال ليك فيك انتي ابقي شيخ عديييل طبعا دموعي نزلت بعد خلاااص أملت فيهو وعاجبني يجي يمنعني ليهو مسح لي دموعي قال لي حبيبي انا الدموع ما بتحل مشكله الحل بسيط بكره ننزل السوق تشتري احلي فستان قلت ليهو وده اعمل بيهو شنو قال لي اي زمن نفسك تدخل فيهو تقومي تلبسي بس داخل البيت قلت ليهو خسرانه فيهو القروش دي كلها عشان ألبسو في البيت قال لي بالنسبه لي القروش ما خساره كوني اشوفك بيهو انا وكونو تطلعي نفسك منو داير اكتر من كده شنو انا هنا لم شوفتك بهرتيني بس قلت ما شاء الله بس ما بضمن القاعدين يزكرو اسم الله صدمني طبعا وزعلت منو مشيت اتصلت علي هبه من الغرفه التانيه غلبني اصبر للصباح قلت ليها هبه ما شوفت الصدمه وائل منعني الفستان قالت لي احلفي قلت ليها وربي قالت لي اقفلي بتصل عليهو هسه اقنعو قفلت منها تلفونو رنه قال ليها هبويه ازيك تاني قال ليها لحقت كلمتك اي منعتها ليهو وانتي زاتك لو راجلك كان مسافر كان منعتك قالت ليهو الرقيص نسوان بس قال ليها عارف قبل كده كنا عايزين نتطلق بسبب منو مش بسبب بنت ولأ مره يعني ما راجل عشان كده ما بخاطر بيها تاني كفايه كانت ح تضيع مني قبل كده قالت ليهو تضيع شنو نحن سايقنها الحرب قال ليها الحرب اهون علي من العين هسه بكره ح اسوقها السوق تشتري الفستان العايزاهو قالت ليهو ده اخر كلامك قال ليها واكتر قرار متأكد من انو صاح قفلت الخط وهي زعلانه ...
جاني في الغرفه التانيه قال لي قاعده هنا نظام زعلانه ما رديت عليهو قال لي طيب تاني غير هبه شكيتيني لمنو شجوني انا خليك عارفه لو ما انتي اقنعتيني مافي زول غيرك بقدر يغير رايي بس في الفستان ده ما تحاولي عايز يفك لي شعري نطيت في نص السرير بقلبي قلت ليهو اي شي ولا الشعر قلت ليهو وائل زح مني ما تلمسني طبعا صدمة الفستان نستني مشكلة شعري 😅 جا قعد قصادي قال لي حبيبي والله ده كلو لمصلحتك يعني انا عايز ليك حاجه شينه ولأ تفتكري منعتك عشان ما عايزك تلبسي حلو ردي علي هزيت ليهو براسي لاااا قال لي طيب بهموك اكتر الناس ولأ انا اها البهمك اكتر منو قلت ليهو بصوت مكسور انت قال لي والله انا لو مافكرت لمصلحتك ما منعتك ليهو وبعدين يكفي انو الوش قمر نعمل بالمظهر شنو صح
والله انا بحاول بقدر الامكان نخلي علاقتنا مستمره ما تهتز زي المره الفاتت بس انتي ساعديني انك تسمعي الكلام طيب هزيت ليهو راسي اااي قام ومد لي يدو قال لي بعد ده النوم وجب نمشي غرفتنا وفضل مادي لي يدو مسكتو قال لي حياتي انتي دخلنا الغرفه ونمنا ...
اصبحنا الصباح بقلبي قلت مش منعني الفستان يسمو شاااي جا مرر لحيتو في خدي قلت ليهو وائل بطل ما دايره معاااك قال لي خلاص قومي اعملي الشاي عشان نمشي السوق قلت ليهو ما ماشه واتغطيت راجعه بالبطانيه حتي وشي قال لي يا سلااام شجوني العاقله عايزه توفر لي القروش وح تمشي بالقديم قلت ليهو انا قصدي العرس زاتو ما ماشه قال لي يا سلااام يااااخ تكوني عملتي معاااي احلي واجب الواحد هناك علي الاقل يلقي حريتو ويصطاد ليهو وحده وجا نزل البطانيه من وشي وباسني قال لي وياريت لو تتمي جميلك وتزكريني اقلع الدبله من اصبعي قبل ما اطلع عشان يقولو ما مرتبط حيوان خلاااص ولا فكر يحنسني لا وكمان قال لي قومي
اعملي الشاي قلت ليهو مافي شاااي قال لي بحده ده فهم جديد كمان نسيتي انو ده واجبك وجر لي نور في ثانيه لقيت روحي اتحممت و واقفه في المطبخ بعمل في الشاي جا داخل قال ناس تعرف الخوف وقعد يضحك اثناء ما بنشرب في الشاي قال لي اكتر لون قميص ممكن ألبسو بجذب البنات شنو قلت ليهو بنطلون اسود وقميص اسود 😊 قال لي حرام عليك زي اللابس عبايه ياااخ العبايات ملونه بس ما مشكله بلقي وحده في السوق تساعدني وقام يتجهز للسوق من غير ما يقول لي ارح شكلو جادي الحيوان ده لااا وكمان شغال يغني داخل وطالع بس وحياتكم مسافه فتح الباب طلع انا دخلت في اقرب عبايه وحصلتو قال لي ما قلتي ما ماشه واداني معاها ابتسامه اديتو نفس الابتسامه وركبت العربيه ...
وصلنا السوق وانا اعجبكم خليتو يلف معاااي لم راسو زاتو لف ما خليت حاجه ما اشتريتها اول بديت بالفستان وكل ما اختار لي فستان يهز لي براسو لاااا معقد خلاااص في الاخر اشتريت فستان فوشي علي الجسم وفيهو خطوه بقدام واشتريت معاهو الشبط والشنطه واشتريت تاني توب وطقمتو ندمتو علي اليوم القال نمشي فيهو السوق قال لي بالمناسبه يا شجن انا بتزكر اني منعتك بس فستان ما دولاب كااامل 😒 قلت ليهو يعني قصدك عايزني امشي مبهدله عشان يقولو مرت وائل ما بتعرف تلبس 😏 قال لي العفو بس ما بالطريقه دي اخر حاجه عجبني اكسسوار قلت ليهو عايزه ده قال لي والله فضل معاااي بس 20 جنيه لو بديك ليهو بالـ 20 دي شيلي وقعد يضحك صريت ليهو وشي قلت ليهو بس قول لي ما عايز اشتريهو ليك وخلاااص بس ما تكضب علي قال لي اصلك زي الشافعه ما ح تصدقي الا تشوفي بعينك طلع الجزلان من جييو وفتحو لي فعلا لقيت في بس 20 جنيه يا دوووب اتكيفت انو نهيت قروشو كلها عشان تاني يعمل لي فيها شهم ويمنعني حاااجه يلا خلي الشهامه تنفعو 😅 مع انو زعلااانه علي الاكسسوار بس ما مشكله ...
وصلنا البيت قال لي داخل انوم ما عايز اي ازعاااج زي التقول في زول غيرنا وما تحاولي تصحيني لاي سبب شوفتي لو ما صحيت للعرس زاتو اضربي لـ هبه امشي معاها بس ما تصحيني ونفسي اعرف طاقه السوق دي بتجيبوها من وين وفي البيت تعملو عيانين قلت ليهو بحده وائل 😠 قال لي هسه بقيت وائل وساعة دفع القروش ما خليتي لي دلع شي حبيبي وشي روحي 😅 دخل الغرفه وانا شغاله البس واطلع في الهدوم الفستان طلع ظابط بس خسارة الحنه الـ في المعصم
انتهزته فرصة وائل نايم وضربت لـ هبه قلت ليها بـ أي طريقه شوفي لي حل لشعري قالت لي يا بنت اهدي في شنو شعرك مالو قلت ليها عايزه ارجعو زي ما كان قعدت تضحك قالت لي وائل هرشك قلت ليها غلبي اكلمو عشااان كده شوفي لي حل قالت لي انا مش من الاول حزرتك تستاهلي قلت ليها كلمتك عشااان تساعديني ما عشان تشمتي فيني قالت لي طيب أساعدك كيف اجيب ليك باروكه ولأ اجيب ليك شعرك تلصقي راجع قلت ليها غلطااانه انا البضرب ليك قالت لي خلاااص دقيقه دقيقه هو لسه ما شافو يعني قلت ليها لاااا طواااالي لافاهو وبسرحو في الحمام المشكله العرس قالت لي تعالي امشي معاااي واتسرحي من هنا وفكي واصلا الرقيص بنات ولم الجرتق يجي لفي راجع واصلا ح تكوني لابسه توب قلت ليها تمااام فكره برضو خلاااص بكلم وائل يوصلني عندك واتفقنا علي كده .....
⏪⏪⏪⏪