الجزء 13
By : Ashgan ALjaaly ~
نزلت من العربيه وفضلنا ماشين قلت خلاااص ح يحكي لـ سامر وسامر ح يتم الناقصه ويشاكلني تاني وكده بدل اقربهم هو وسلمي ح اكون خربت ليهم المود حقهم قلت لـ وائل خليني بمشي براااي عاين لي وجر لي نور وما رد علي لم قربنا من الاولاد مسك لي يدي لم اتخلعت واحد من الاولاد قال للباقين بأعلي صوت لو عارفها من النوع البمسك اليد كان مسكتها قبل ما يصطادوها وحياتكم وائل في ثانيه اختفي ما شوفتو الا بضرب في الولد قال ليهو انا خطيبها يا تافهه في النهايه حجزوهم و وائل جا معصب قلت ليهو لييه تقول ليهم خطيبي قال لي تحبي ارجع اقول ليهم مدير وموظفتو عشان يسمعوك فارغه تاني ولأ شكلك كلامهم عاجبك وهسه لو ما كنت قاعد جنبهم وسمعتهم موقفك كان ح يكون شنو ومد لي يدو مسكتو من غير ما اتكلم بس دموعي جرت مسحتها قال لي سامر قاعد وين أشرت ليهو بيدي وعصافير الحب وحياتكم ما جايبين خبر للدنيا 😅 وانا ماشه عليهم وبرجف وصلناهم سامر قام سلم علي وائل و وائل سلم عليهو كأنو ما حصل حاجه قال بعد ده استأذن سامر قال ليهو اقعد معانا قال ليهو شكرا جيت هنا مع الشباب اصحابي ومنتظرني لقيت شجن بالصدفه وقالت لي الا تجي تسلم علي سامر .. واتلفت حمر لي وجيت معاها سامر قال ليهو تسلم بعد ودعهم جا يودعني في يدي قال لي بصوت براااحه بكره لم اصل الشركه القاك قاعده ولو حاولتي تغيبي ما تنسي التعهد 😊 حيوان خلااااص وبعد ده كلو حجلي عندو ما اداني ليهو 😭
بقيت قاعده مع سامر وسلمي بس عقلي في مكان تاني قلت لـ سامر خلاص ارح بعد ده وصلنا سلمي بيتهم بعد نزلت سامر قال لي بيني وبينك وائل صدفه ولأ عزومه قلت ليهو كيف يعني قال لي يعني قابلتيهو صدفه ولأ عزمتيهو وغمز لي قلت ليهو حيوان والله صدفه بقلبي قلت ليهو وازفت صدفه قال لي طيب برااااحه هسه مالك اتنرفزتي
وصلنا البيت دخلت الغرفه رقدته في السرير وبديت استرجع الحصل من لحظه مسك لي يدي لحدي ما اتفارقنا حاولت افسر تصرفو ده شنو بس ما قدرت اصبحت الصباح شايله هم اقابلو كيف تاني وصلت المكتب و وائل لسه ما جا ما كضبت طوااالي مشيت قعدت في المكتب مع سماح قالت لي مالك زهجانه غلبني احكي ليها قلت ليها مصدعه طلبت لي شاي بنشرب كده وائل جا داخل سلم علي الموظفين وحمر لي وطلع انا من الخوف خليت باقي الشاي سماح قالت لي المدير يا دووووب جا تمي كبايتك وامشي قلت ليها لااا كده كفايه وطلعت جري علي مكتبي قبل ما اقعد تلفون المكتب ضرب رفعت الخط الو قال لي تعالي منتظرك وقفت جنب الباب قريت ايه الكرسي 3 مرات وفتحت الباب دخلت قال لي اول حاجه قبل ما تدخلي المفروض تدقي الباب وتانيا المقعدك في مكتب الموظفين شنو وانتي عندك مكتب عندك حاجه هاربه منها ولأ خايفه من حاجه هزيت ليهو براسي لااا وانا دموعي خلاص رقرقت حبستها بالعافيه و واصل كلامو بعدين اي حاجه تحصل خارج الشركه ما تأثر علي الشغل في الشركه تمااام هزيت ليهو براسي حاضر قال لي بعد ده ممكن تتفضلي علي مكتبك بقلبي قلت الله يقتلك حيوان مستفذ وما زكر لي الحجل وغلبني اسألو منو قلت الحيوان ده ما يكون جدعو وهو دهب بس الحمد لله اخر الدوام وهو طالع ختاهو لي في التربيزه قال لي بتمني تحتفظي بيهو في شنطتك ما في رجلك واداني ابتسامه وطلع 😊 الغربيه سامر كان طول الوقت بشاكلني في لبس الحجل وبقول لي طلعي بس كنت بعاند ما عارفه لييه ما زعلت من وائل لم قال لي كده ونفذت كلامو طبعا السكرتيره نزلت من الاجازه بس وائل حولها لـ مكتب تاني وفضلت انا مواصله معاهو وما اكضب عليكم اتعلقت بيهو شديييد يومي ما بكتمل من غير ما اشوفو بالرغم من استفزازو لي
في يوم كان عندنا اجتماع مهم مع مستثمرين وبما اني السكرتيره كنت مسؤوله من تقديم العرض وكنت حزره تماما من حدوث اي غلط لانو الصفقه دي كانت مهمه للشركه بعد العدد اكتمل والمستثمرين وصلو وائل أشر لي افتح البروجكتر واشرح العرض لم فتحت الجهاز لقيت العرض ما موجود فتشت الجهاز كلو ما لقيتو و وائل شغال يحمر لي نظام سرعه وانا ما فضل لي الا ابكي 😭 والمستثمرين منتظرني في النهايه وائل جاني قال لي المشكله شنو قلت ليهو بصوت مكسور الملف ما لقيتو في الجهاز ما ناقشني رجع تربيزه الاجتماع وادارك الموقف قال للمستثمرين شكلو في عطل في الجهاز بس ادونا فرصه يومين ونقدم ليكم العرض اتفقو علي كده وطلعو وبعديها وقع الفاس في الراس وبدأ ينفعل فيني قال لي يلااا تعالي اشرحي لي الملف اختفي كيف قلت ليهو بصوت مكسور والله ما عارفه لحدي اخر لحظه كان موجود واتأكدته منو قال لي يكون لبس طاقيه اخفي ولأ احتمال مسحتو انا 😠 من الاول قلت ليك اي شي ولا الاستهتار في الشغل ومن الاول ما قدر الشغل ومتعوده اي شي تلقي جاهز ما علي حسابي عندك فرصة يومين والعرض يكون جاهز 😠 قلت ليهو حااااضر مشيت المكتب بكييييت ومسحت دموعي وبقيت احضر في العرض وانا ببكي جا داخل مكتبو مسحت دموعي عاين لي وفتح الباب دخل وانا شغاله اصبر في نفسي است
حملي يا شجن كلو يهون عشااان خاطر بابا
وبعد يومين المشروع اتعرض علي المستثمرين والصفقه تمت والشركه كسبت ارباح هايله واليوم التاني كان في اجتماع لكل موظفين الشركه بعد العدد اكتمل في تربيزه الاجتماع طبعا وائل بقعد في راس التربيزه وانا بكون قاعده بـ يمينو قال لي في ملف في تربيزة المكتب امشي جيبي قمت خطوتين قال لي تعالي قلت ليهو نعم قال لي قلت ليك تعالي راجعه خليتو جيت قعدته بعد شويه قام جابو براهو قلت من الاول مقومني مالو المنفسن ده جا قعد واصل الاجتماع بعد الاجتماع انتهي قال ليهم بعد ده ممكن اي واحد يمشي مكتبو اتلفت علي قال لي الأ انتي لسه شغلنا هنا ما خلص قلت الحيوان ده شكلو الليله عايز ينتقم مني بعد الموظفين طلعو عايزه اطلع قال لي شكلك ما سمعتيني لم قلت ح نتم شغلنا هنا قلت ليهو سمعتك بس ماشه اجيب الملفات من مكتبي قال لي خليك بجيبها معاي قلت ليهو لااا بمشي اجيبها قال لي بحده انا لم اقول كلام معناتو تنفذي ما تجادلي فيهو حيوان خلاااص عديم الرحمه مشي جاب الملفات وجا بديت اشتغل فيها قلت هسه الفرق شنو بدل اقعد اشتغل في خلقتو مش احسن كان اشتغل في مكتبي وهو كل فتره يديني نظره وزمن الدوام خلص بس كل ما انتهي من ملف يلحقني ملف تاني بقيت كل مره اعاين للساعه قال لي مالك عندك موعد ولأ حاجه قلت ليهو لاااا بس الزمن انتهي قال لي دي بحددها انا ما انتي 😊 بعد شويه جات سماح دقت الباب قال اتفضل دخلت قالت لي شجن عليك بدري الموظفين كلهم طلعو قبل ما ارد قال ليها انتي امشي عندنا شغل بعد ننتهي بوصلها قالت لي خلاااص يلا يا شوشو لبكره قلت ليها ان شاء الله قال اها قلتو لي شوشو واداني ابتسامه مستفذ خلاااص قلت سجمك يا شجن عايز يعمل فيك شنو وانتظر لحدي ما الشركه بقت فاضيه بعد ربع ساعه قال لي خلاااص كده كفايه بعد ده ارح قلت ليهو ارح وين قال لي البيت ولأ ناويه تبيتي هنا ما ناقشتو شلت شنطتي وطلعت لقيت فعلا الشركه فاضيه قال لي اركبي العربيه قلت ليهو شكرا بوقف امجاد 😊 ما فتح خشمو معاي بس حمر لي وفتح لي باب العربيه نظام اركبي يااااخ عندو صره احييييي منها بس ما بتعرفي تخافي ولا تنبرشي طوااالي ركبت من سكات وفضلنا ساكتين لحدي ما وصلنا البيت وقف جنب باب حبوبه قلت ليهو لا ما هنا الباب التاني عملتو زي السواق يستاهل مش قال الا يوصلني قال لي تقريبا المره الفاتت وقفتك هنا قلت ليهو يب كنت قاعده عن ناس حبوبه بس ماما جات الاجازه وقاعدين في بيتنا قال لي اها ماما قلتي لي ومعاها نفس الابتسامه ما اشتغلت بيهو نزلت
قال لي بكره ما عايز تأخير قلت ليهو ان شاء الله وقفلت الباب دخلت سلمت علي ماما وانا داخله غرفتي لفتتني قالت لي شجن انتي جيتي بالمواصلات كده 😳 .....
⏪⏪⏪⏪