الجزء 20
:
By : Ashgan aLjaaly ~
يوم وائل جا راجع من الشغل قال لي المسا خليك جاهزه طالعين قلت ليهو ماشين وين قال لي صفاء بت عمي وضعت ح اوديك ليها حظهم جابو ليهم بيبي وغمز لي عملت روحي ما سمعتو .. المسا اتظبطه و وائل كل مره بنبرش فيهو ما شاء الله عليهو ربنا يحفظو لي
طلعنا وصلنا سلمنا عليهم ما شاء الله جايبه بنوته حلاااته صغنووونه يااااخ لم شفتها بالمنظر ده وجنبها البيبي بالجد اتمنيت اكون مكانها جينا طالعين بعد ركبنا العربيه بديت احكي لـ وائل وااااي يا وائل ما شوفت البيبي حلوووو كيف وكمااان صغنوووني وانا اشيل واوصف في الطفل من غير ما أشعر و وائل سااااكت يعاين لي ويضحك 😀
وصلنا البيت وانا خلاااص بقيت افكر في البيبي واتخيل انو عندي بنوته حلوووه مع انو ما حصل فكرت في الموضوع ده الأ بعد زرت صفاء بقيت متعلقه بالطفل شديييد و وائل زاتو ما قصر كل ما نقعد في التلفزيون يفتح قناة الاطفال ويعمل روحو ما منتبهه وشغال بالتلفون وانا كنت بعاين ليهو بلقي كل فتره يعاين لي بقعر عينو بس عمرو ما فاتحني في الموضوع ده بعد اسبوع المسا قاعدين نتونس كده تلفوني ضرب لقيتو رقم غريب فتحت الخط لقيتها دي صفاء بعد سلمت علي سألتها من الطفل قالت لي تمااام الحمد لله قلت ليها الحمد لله قالت لي بكره السمايه عليك الله شرفونا من الصباح قلت ليها ان شاء الله وقفلت الخط وائل قال لي دي منو قلت ليهو دي صفاء قالت السمايه قال لي اي ضرب لي راجلها انا في المكتب يا ربي ح يسموها منو لو كنت ابوها كان سميتها شجن بعد شويه قلت ليهو بصوت خجووول وائل خلااص انا عايزه شجن 🙈 بعديها عم الصمت شكلو ما متوقعني اقول كده وانا جري دخلت الغرفه وندمته علي كلامي سمعت صوتو جاااي الغرفه جري هربت دخلت الحمام و وقفت بجوه مسااااافه لم رجلي وجعتني لم جيت طالعه لقيت وائل منتظرني جنب الباب عملت روحي ما شايفاهو وجيت ماشه مدنقه راسي في الارض جراني من يدي عليهو وااااي وانا اتمنيت لو اموت في اللحظه دي رفع راسي قال لي شجوني انا عايني لي هنا حلاتو الخجلااان بس ما في حاجه تخجلي منها ده حق من حقوقك وانا من زمان منتظر اللحظه التطلبي فيها انتي لأنو ما حبيت اضغط عليك وباسني في راسي وخلاني اهدأ وبعدها قطعت جهينه قول كل خطيب 🙈 ...
اصبحنا الصباح وائل قال لي احلي صباح لـ ست الناس قلت ليهو صباح الخير قال لي يلااا اجهزي عشان نمشي قلت ليهو نمشي وين قال لي نسيتي الليله كرامه صفاء قلت ليهو وائل انا عيانه ما بقدر جا علي بخلعه هبش راسي قال لي الغريبه ما عندك حمي حاسه بشنو قلت ليهو جسمي مكسر ما قادره اقوم قال لي خلاااص ارتاحي وبتبقي كويسه قلت ليهو بحده وائل ما شافعه انا عشان تغشني قعد يضحك قال لي بعتزر بس اعمل شنو اوديك الدكتور اقول ليهو بالليل عايشين حياتنا وصحت عيانه وقعد يضحك قلت ليهو لااا خلااص بس اقعد معاي حبه ونمشي سوا قال لي بس عازمننا فطور ما غدا خلاااص ح نلغي المشي قلت ليهو لااا ما ظريفه ما نمشي الاتنين انت امشي انا بقعد قال لي متأكده قلت ليهو اااي طيب لو سألوك ح تقول ليهم شنو قال لي اقول ليهم كنا مساهرين مع بعض واصبحت عيانه وقعد يضحك قلت ليهو وائل قال لي قلبو لـ وائل قلت ليهو جاااده معاك قال لي اهدي حبيبه بقول ليهم مصدعه والله ما قدرت تجي يلااا بعد ده ح امشي اسجل حضوري واجي سريييع قلت ليهو ما تتأخر قال لي وانا اقدر اتأخر شجوني انا باسني وطلع انا اخدته لي نومه وقممت اتحممت ودخلت المطبخ اعمل لي فطور مع انو الوقت اتأخر وانا في المطبخ جا وائل بـ ورا قال لي شجوني انا اتخلعت لم نطيت قال لي اسف حبيبي خلعتك قلت ليهو جيت متين قال لي هسه وبعدين مالك فاطره متأخره قلت ليهو كنت نايمه قال لي اهااا عشان عيانه وانا الحاله جايي اوديك الدكتور وقعد يضحك صريت ليهو وشي قال لي خلاااص خلاااص طيب هسه بقيتي كيف سكت غلبني ارد من الخجل
المسا قلت ليهو وائل ماشه ناس ماما قال لي وبالنسبه لانك عيانه قلت ليهو وائل والله تاني تجيب لي السيرة دي ما اتكلم معاك قعد يضحك قال لي خلاص اجهزي مشينا اتونسنا وجينا راجعين وفضلنا علي الروتين ده ولي فتره كنت طوااالي زهجااانه وجسمي مكسر وحتي لو وائل كاواني ساااي بقعد ابكي حتي وائل استغرب في تصرفاتي يوم ماشين ناس ماما نوره وائل وقف جنب المستشفي قلت ليهو وقفت هنا لييه قال لي شجوني انا رايك شنو نعمل ليك فحص شامل نشوف التعب المستمر ده من شنو قلت ليهو لااا نزل جا فتح لي الباب قال لي بطلي دلع وانزلي اتزهجته فيهو هسه امشي اقول للدكتور شنو اديني علاج للزهج والتعب مثلا قعد يضحك قال لي ح نعمل فحص شاامل وهو ح يدينا العلاج عايز اطمن علي صحتك بس والله مسك يدي نزلني من العربيه دخلنا للدكتور .. الدكتور سألني بتشكي من شنو وانا بعاين لـ وائل وفعلا هو الرد ليهو قال ليهو دايما بتقول تعبانه وبقت نيرفز اقل حاجه بتتزهج منها الدكتور كتب لينا فحوصات بعد طلعنا قلت لـ وائل نرجع ما ح نعملها بس
وائل اصره علي وبعد جر لي نور وحمر لي حتي عملتها ودخلت النتائج الدكتور عاين ليها قال لـ وائل دي اعراض عاديه وائل قال ليهو كيف يعني قال ليهو مبروووك المدام حااامل والتصرفات دي عاااديه نظرا لتغيرات هرمونات الجسم قلت ليهو شنووو الدكتور قعد يضحك قال لي طلعتي بتتكلمي ومن قبيل ساكته كنت فاكرك بكماء عشان كده كنت بتكلم مع راجلك 😅 وائل قعد يضحك صريت ليهو طلنا من الدكتور وائل قال لي شجوني انا مبرووك لينا النونو وبصراااحه انا كنت شاكي بس حبيت اتأكد فتح لي باب العربيه قبل ما نتحرك قلت ليهو وائل قال لي روحو قلت ليهو ما تكلم ناس ماما نوره هسه 🙈 قال لي لييه معقول نكتم الخبر الحلو ده قلت ليهو خلينا بعد نطلع منهم ونصل بيتنا نتصل عليهم هسه بخجل ياااخ قال لي مع انو مافي حاجه تخجلي منها بس حااااضر وتسلمي لي دي احلي هديه وباسني في راسي ...
اتحركنا وصلنا ناس ماما نوره دان من شافتنا جات جاريه علينا شلتها اسلم عليها وائل شالها مني قال لي ما تسلمي عليها علي حساب طفلي وبعدين ما عشان سمحت ليك تدسي وجودو معناتو تهملي لي سلمنا علي ماما نوره قالت لي مالو وشك شاحب كده قلت ليها مصدعه قالت لي سلامتك عندي حبوب صداع قالت لـهبه جيبيها ليها نط وائل قال ليها لااا هسه بلعت حبتين قبل نجي وشغال يتبسم شويه كده ويفضحنا الحيوان ....
رجعنا البيت و وائل عايز يطير من الفرح وانا خلاااص اتخيلت روحي ماسكاهو في يدي تاني يوم الخبر انتشر في الاسره طبعا وائل بقي من يصحي الصباح يصبح علي طفلو قبل ما يصبح علي حيوااان وانا شغاله اتدلع وازيد في الدلع في البيت هنا اتدلع علي وائل وكل طلباتي تنفذ وامشي بيتنا اتدلع علي ماما بس لما امشي ناس ماما نوره ما كنت بتصنع الدلع لانو هي البتدلعني والله زوله عسسسل ياااخ ما تكون عسسسل كيف وجايبه وائل طبعا من الفرحه وائل كل يوم يجي شايل حاجه للبيبي لحدي ما اكتمل الجهاز لحدي السرير
وعدت الـ 9 شهور وانا كل يوم الدلع كان زايد وقشه ما برفعها من الارض والله وائل استحملني كتير كنت زي الواحد العندو نفسيات مره اشاكلو ومره اتنرفز فيهو ومره ابكي من غير سبب لحدي ما جا اليوم المنتظر وكنت خااايفه وماما و وائل كانو بطمنو فيني بس في نفس الوقت كنت مبسووووطه لحدي ما دخلت غرفة الولاده وطلعت منها بالسلامه ♡ لم فتحت عيوني لقيت في الغرفه بس وائل وكان خاتي راسو في يدو ومدنقر وانا كنت لسه تعبااانه قلت ليهو بصوت شبهه رايح وائل رفع راسو وجا علي باسني في راسي ومسك يدي قال لي حمد لله علي السلامه بس عيونو كانت حمرا زي الجمر قلت ليهو ماما وين قال لي قاعده بره هسه بتجي قلت ليهو طيب ولدي وينو قال لي في الحضانه بس انتي ارتاحي قلت ليهو انت كنت بتبكي هز لي راسو لااا وفي اللحظه دي دموعو جرت مسحت ليهو دموعو وقلت ليهو ودي شنو وائل ما تكضب علي في شنو انت بتبكي قال لي ما في حاجه بس دي دموع الفرح حبيبي قلت ليهو عايز اشوف البيبي جيبو لي قال لي هسه ما في طريقه قلت ليهو وائل عليك الله خلاص وديني ليهو قال لي بجيبو ليك بس انتي ارتاحي اول قلت ليهو لا ما برتاح الا اشوفو قال لي طيب ح امشي اجيب اذن من الدكتور بعد طلع جات ماما قالت لي شجن حبيبه ماما حمد لله علي السلامه قلت ليها ماما وائل اتأخر ما جا وديني لي ولدي انتي قالت لي يا بتي ما في طريقه تشوفي هسه قلت ليها هو لي خاتنو في الحضانه قالت لي عشان ناقص اكسجين برضو لاحظته لعيون ماما حمر بس قلت زي ما وائل قال من دموع الفرح بنتكلم كده وائل جا داخل قلت ليهو الدكتور قال شنو قال لي قال ما في طريقه تشوفي هسه عشان انتو الاتنين يادوووب طلعتو من الولاده الا بكره قلت ليهو وائل وديني ليهو من غير ما الدكتور يعرف قال لي حبيبي دي مخاطره قلنا الصباح خلاااص الصباح ماما طلعت و وائل فضل قاعد جنبي وماسك يدي جات الممرضه تفك الدرب قلت ليها انتو لييه مانعني اشوف ولدي الممرضه استغربت وعاين لـ وائل وائل أشر ليها براسو نظام لااا وقبل ما هي ترد قال لي مش قنا بكره ح تشوفي يعني ح تتصرفي كده زي الاطفال وتمسكي في الحاجه قلت ليهو بس انا طلبت اشوفو ان شاء الله من بعيد قال لي بكره تشوفي لم تزهجي منو بس هسه ارتاحي عشان بكره تمشي ليهو برجلك قلت ليهو طيب وين ماما نوره ما شوفتها قال لي رجعت البيت قبل شويه ما قدرت تقعد وممكن بعد ده تبطلي كلااام كتير وتنومي
قلت ليهو بكره من اصحي توديني ليهو قال لي مش لم تنومي الاول وباسني في راسي قال لي يلااا تصبحي علي خير بعد ده ما عايز اشوف عيونك مفتحه نمت اصبحنا الصباح وانا كنت حاسه انهم داسين مني حاجه بس ما اتوقعت الخبر ده لحدي ما جا الدكتور ....
⏪⏪⏪⏪