الجزء 12
:
By : Ashgan ALjaaly ~
دخلت البيت حبوبه قالت لي مالك يا بت الليله جايه قبل زمنك قلت ليها حبوبه طارداني يعني ما اجي بدري وانا الحاله جيت عشان اتونس معاك قالت لي اجييي يا بتي في زول بطردو من بيتو انا لاقياك وين بس استغربته قلت ليها لا بس الليله مافي شغل اشتغلو عشان كده قالت لي اها كان كده كويس قلت ليها سامر جا قالت لي لسه قلت ليها دقيقه اتصل اكلمو ما يغشاني اتصلت عليهو اول ما قلت الو قال لي اختصري وريني ودوك ياتو مستشفي عشان اجيك قلت ليهو حيوان انا في البيت ضربت اقول ليك بعدين ما تجيني بقلبي قلت ليهو المره دي وداني سيد الناس ♡ قال لي ومالك جيتي بدري قلت ليهو شلت اذن عشان سلمي جاياني قال لي شجن احلفي قلت ليهو وانا من متين بكضب وهسه ماشه اجيب باسطه لبعدين نشرب بيها الشاي قال لي لا خليها انا بجيبها معاي اصلا جايي بدري ♡ قلت ليهو تمااام وقفل الخط قعدت اضحك حبوبه قالت لي مالك قلت ليها خرفنته ولد ولدك قالت لي شنوووو قلت ليها خرفنتو خرفنتو قالت لي يعني شنو قلت ليها يعني كضبت عليهو غايتو النلحق اكتب وصيتي الاخيره قبل ما يصلك لانو ح يقتلني ح يقتلني حبوبه متحيره في كلامي قالت لي سجميي يا شجن عقلك زاغ جنيتي يا بتي ولسه صغيره وجاهله قلت ليها حبوبه مالك علي لسه صغيره وما انجزته وما عرسته قعدت تضحك قلت ليها بس الليله سامر ح يصبح قاتل مجرم متوحش وانا الضحيه قالت لي يطرشني كان فهمت كلامك قلت ليها خليك كده لحدي ما تشوفي بعينك وتفهمي
العصر جا داخل سامر وشايل كرتونه الباسطه والله كتمته الضحكه بالجلاله قال لي ان شاء الله ما اكون اتأخرت قلت ليهو لسه الوقت بدري شلتها منو دخل اتحمم وقشر والريحه ماشه قدامو وجا نازل وانا خلاص غالبني اصارحو بالحقيقه وغالبني افك الضحكه قال لي شجن قلت ليهو نعم قال لي سلمي ما اتأخرت طيب فيها حاجه لو مشيت جبتها بدل تجي بالمواصلات بقلبي قلت واااي يا شجن موضوعك انتهي قلت ليهو لا ما تمشي تجيبها بتجي بـ ترحال هسه بتجي تاني قلت اصارحو قبل ما الوضع يتأزم بس غلبني سكته وهو طلع ينتظرها جنب الباب انا براحه فتحت التلاجه شلت الكرتونه جيت طالعه بسرعه في السلم ناداني شجن دي مودياها وين ما شعرت بروحي الا وانا جاريه دخلت غرفتي وقفلتها بالمفتاح جا يفتح الباب لقاهو مقفول قال لي شجن انتي غشيتي علي صاح افتحي الزفت ده قلت ليهو كنت بهظر معاك ياااخ وبعدين كان الهدف انك تجيب الباسطه دي 😅 قال لي طيب افتحي الباب النتفاهم ومتين طلبتي مني حاجه ما جبتها عشان تكضبي علي قلت ليهو لا وبعدين انت زعلان مالك عشان رشه العطر دي ولا عشان القميص المكوي خلاص دور العربيه لف بيها وتعال قال لي والله يا شجن ما اعديها ليك والله لو كان لميت في الباسطه بعد عرفتك كضابه كان جدعتها في الوسخ وما اديتك ليها قلت ليهو عشان كده اول أمنت مستقبلي قال لي علي العموم اعرفي اني ما ح اعديها وليك يوم وانا هنا شغاله اكل في الباسطه بمزااااج واخدت معاها سيلفي ورسلتها لـ سمر في قطر قالت لي خاينه انتظريني لم نجي عشان نغنج سوا قلت ليها اسكتي الليله مغنجه نتيجه كذبه مع سامر وحكيت ليها الحصل قالت لي يا حليلك يا شجن كنتي طيبه قلت ليها حيوانه خلاص قتلتيني اتونسنا مسافه وقفلنا من بعض ....
اليوم التاني عدا في الونسه مع حبوبه المسا وانا ماسكه التلفون في يدي فجأه ظهر لي وائل يتصل بك من الخلعه التلفون وقع مني في السرير فتحت الخط وانا بتبسم برااااي زي المجنونه قال لي اصبحتي وامسيتي كيف قلت ليهو الحمد لله قال لي كان عايز اديك راحه تاني لكن صوتك ما شاء الله ما عندك حاجه بكره تنزلي الشغل قلت ليهو اكيييد الصباح بكون في المكتب قفلت الخط وبعديها عشت في عالم تاني بس بسرعه رجعت للواقع قلت يا بت مدير وبطمن علي موظفتو وخايف علي شغلو يتأخر ما اكتر
اصبحنا الصباح وكالعاده اتظبطه وطلعت الشغل وصلت المكتب سلمت علي الموظفين عمر قال لي المدير جا وسأل منك قال لم تصلي تجيهو في المكتب ختيت شنطتي مشيت دقيت الباب قال اتفضل دخلت أشر لي علي الكرسي نظام اقعد قال لي نورتي قلت ليهو تسلم عاين لـ ساعة يدو قال لي بس متأخره ربع ساعه قلت ليهو اسفه قال لي تاني ما تكرريها ده بعتبرو انزار هزيت ليهو راسي حاضر بقلبي قلت لو ما مجبوره علي الشغل كان .... بس احسن اسكت قال لي طبعا المكتب الشغاله فيهو حاليا لقيت الموظفين الفيهو بيفو بالغرض قلت ليهو كيف يعني خلاااص استغنيتو عن خدماتي امس انا كنت عارفه من اديتني الاجازه انك ح ..... وقبل اتم كلامي ضرب التربيزه قال لي لم اكون بتكلم ما تقاطعيني بعد اخلص كلامي واسمح ليك تتكلمي حتي تتكلمي قلت ليهو حاضر ما عندي حل غير استحمل اهانتو عشان خاطر اهلي قال لي بما انو هناك ما محتاجين ليك ومكتبي هنا فيهو نقص والسكرتيره اخدت اجازتها السنويه فـ بالتالي ح ننقل مكتبك في مكانها ح تكوني السكرتيره الخاصه لي اها عندك اي تعليق قلت ليهو طيب ما تجب سماح وانا خليني هناك قال لي طيب
وقت بتعرفي اكتر مني ما تجي تقعدي مكاني هنا وتمشي الشغل انتي وبعدين انا ما بستشيرك دي اوامر تنفذ قلت ليهو حاضر قال لي انقلي حاجات طواالي طلعت منو دخلت مكتبي شلت الشنطه وانا زهجانه سماح قالت لي علي وين قلت ليها ماشه الجحيم قالت لي شنو قلت ليها مديركم حولني لسكرتيره قالت لي حظك قلت ليها اي صاح حظي منيل بستين نيله هنا معزبني فما بالك لم اكون في وشو طول اليوم الله يلزمني الصبر بس .. قالت لي والله حرام عليك ما للدرجه دي لويت ليها خشمي وطلعت بس الميزه في المكتب الجديد اني قاعده فيهو براااي مكتب مكتمل والشغل فيهو ما ضاااغط
في يوم قاعده افطر في الكافتريا في الشركه جا عمر قال لي ممكن اقعد معاك قلت ليهو اتفضل بعد فطرنا وانتهينا بقينا نتونس ونضحك و وائل كان عندو شغل خارج الشركه يعني ما موجود و استحاله الواحد يقعد مع عمر وما يضحك شخصيه فكاهيه واثناء ما نحن بنضحك فجأه ألمح ليك وائل داخل الكفتريا اصلا ما عارفه الجابو الكافتيريا شنو كل القدرته اعملو اني قطعت الضحكه وبقيت ساكته جا سلم علي عمر وقال لي لو انتهيتي حصليني في المكتب قلت ليهو حاضر وطلع لم قرب علي الباب اتلفت لقاني لسه قاعده جر لي نور ومشي وانا جري طلعت وراهو دخل مكتبو دقيت ليهو الباب قال لي اتفضل دخلت قال لي رايك شنو نقفل الشركه ونفتحها محل قهوه طال ما الموظفين خلو شغلهم وقاعدين يتونسو قلت ليهو بس كنت بفطر قال لي ااها بـ أمارة لم جيت انا كنتي ماسه السندويتش في يدك علي العموم ده ممكن تعتبريهو انزار قلت ليهو حاضر وطلعت مكتبي غايتو بيني وبين نفسي في سري باخد حقي وبنبزو 😅
وده الروتين اليومي صاح ضغط الشغل خفه ما زي الاول بس كانت بتواجهني مشكله مع وائل لو لقى واحد من الموظفين قاعد معاااي كان طواااالي بحمر لي واول ما الواحد يمشي مني كان الونسه بتقع في راسي وبهزئني بسببها حتي لو مشيت اتونست معاهم في مكتبهم برضو نفس القصه يعني كان مضيقها علي شدييييد ومع باقي البنات بعاملهم عااادي حيوان خلاااص
يوم الجمعه سامر قال لي الا تعوضيني حق الباسطه وتضربي لـ سلمي تجينا قلت ليهو بس بشرط قال لي موافق قلت ليهو تعزمنا بره ما في البيت قال لي انتي ما ملاحظه انك بتستنزفيني قلت ليهو يا زول خلاص يفتح الله ما بضرب ليها قال لي خلاص موافق ضربت لـ سلمي بعد اتونسنا قلت ليها طولنا ما اتقابلنا ياااخ قالت لي اي والله بس انتي عملتي شغل وما فاضيه لينا قلت ليها حقك علي هسه عازماك اسكريم قالت لي يا بنت انتي مجنونه البطلعني المسا شنو قلت ليها اديني امك استاذن منها وبنجي انا وسامر نسوقك وبنرجعك لحدي الباب شكلها هي زاته شباكها وقعت في سامر من سمعت اسمو دابت فعلا استأذنت من امها و وافقت قلت ليها خلاص بنجي غاشنك سامر لم سمعني الضرس الاخير ظهر من الابتسامه قال لي يلا نتلاقي بعدين يا بت عمتي الغاليه قلت ليهو وقت المصالح ابقي بنت عمتك الغاليه و في الايام العاديه ابقي شجن ام لسان طويل قال لي هسه ما فاضي ليك ماشي اتجهز وبعدين ما تأخرينا قلت ليهو يا ولد اتقل يا دوب الساعه 3 خساره الدكتره فيك خفيف زي كيس النايلون والهوا شايلو اول مره يلاقيني دكتور كده قعد يضحك المغرب قشرته باسكرتي اسود وقميص كبدي وشبط كبدي والحجل اهم شي وكالعاده الاسكرتي مع حد الحجل وجيت طالعه سامر بقي يعاين لي من فوق لـ تحت قلت ليهو لو ما عاجبك بقعد والله حمر لي قال لي غوري ارح طلعنا غشينا سلمي ومشينا محل اسكريم سامر نزل جاب الاسكريم واتحركنا مشينا شارع المطار نزلنا قعدت معاهم حبه وهم الاتنين خجلانين من بعض كل واحد فيهم بتونس معاااي وما بتونسو مع بعض قلت مافي حل غير اخليهم براهم قلت ليهم القعده معاكم تزهج سامر حمر لي من غير ما يفهمني .. غمزت ليهو قلت ليهو ماشه اشم هوا وجايه قال لي لااا قلت ليهو ما بمشي بعيد والله قال لي خلاص حدك العربيه بس قلت ليهو تمااام قمت منهم ركبت سماعتي وشغلت الاغاني وجيت ماشه بعدته منهم مسااااافه كان في شلة اولاد واحد قال ماشه تكشكش من تحت خلخال فوق زمام برقش التاني قال ليهو لكن ناقصه الزمام بس مستعد ابقي ليها زمام وقعدو يضحكو اتلفت صريت ليهم وشي وقبلت منهم ما أشعر ليك الا بواحد مسك يدي بقوه قلت ليهو انت حيوان فك يدي اتلفت عليهو لقيتو ده وائل بعد شوفتو لساني اتبلع وغلبني تاني اتكلم وهو ماسكني من يدي قوي وسايقني وصلنا عربيتو فتح الباب محل السواق قال لي اقعدي قلت ليهو اقعد وين بس ما بعرف اسوق اداني ابتسامه مستفذه قال لي لكن بتعرفي تسوقي الاولاد صح اقعدي في الكرسي ده وامرقي الزفت ده من رجلك قلت ليهو شنوووو طبعا الحجل عني اهم حاجه قال لي سمعتيني ما بكرر كلامي قلت ليهو بس انا ما غلطانه هم براهم الـ عاكسوني قال لي انت اديتيهم فيك فرصه وانا ما بقدر امنعهم ما يعلقو لانو من حقهم بس بقدر احسم المصدر هسه ما عايز كلام كتير طلعي ولأ اقول ليك دقيقه جلس علي رجليهو ورفع رجلي في العربيه وطلعو قال لي بحده وجيتي هنا مع منو قلت لي
هو مع سامر قال لي وسامر كيف يخليك تلفي زي المواعيد دي براك في اللحظه دي دموعي نزلت اتناول منديل من العربيه وناولني ليهو قشيت دموعي قال لي ارح اوصلك لـ سامر نزلت من العربيه وفضلنا ماشين قلت خلااص ح يحكي لـ سامر و وسامر ح يتم الناقصه ويشاكلني تاني وكده بدل اقربهم هو وسلمي ح اكون خربت ليهم المود حقهم قلت لـ وائل بمشي براي جر لي نور وما رد علي لم قربنا من الاولاد مسك لي يدي لم اتخلعت واحد من الاولاد قال بأعلي صوت للباقين لو عارفها بتمسك اليد كان مسكتها انا قبل ما تطير مني وحياتكم وائل في ثانيه اختفي ما شوفتو الا بضرب في الولد قال ليهو انا خطيبها يا تافهه ......
⏪⏪⏪⏪