الجزء 23
:
By : Ashgan ALjaaly ~
كل مغرب روتين ثابت بنتلم نحن وخالتي واولاد خالي مع حبوبه نشرب الشاي كل يوم ... يوم مشينا لقينا في راجل في الصالون حبوبه قالت جبتو يقرأ لينا كلنا القران بدل نقعد ساااي مع انو كلامها ده ما عاجبني وما مقتنعه بس قلت مالو احضر معاهم لم دخلت لقيتو بالجد راجل وقور ظاهر الصلاح في وشو بدأ يقرأ كنت عاديه ودخل في سورة البقره بديت احس باختناق ودموعي جاريه من غير سبب وهو لسه مواصل في القرايه قلت لـ ماما خلي يسكت نفسي كتم ودموعي عشره عشره بعد انتهي وانا طلعت بره قال لـ ماما بتكم دي مسحوره في زول عايز يفرق بينها هي وراجلها ماما وحبوبه فضلو مخلوعين من الخبر قال ليهم والله دي الحقيقه ولو حبيتوها تتعالج افتحو ليها سورة البقره يومي وانا بجي اقرأ ليها ماما متردده بس حبوبه بدون تردد وافقت وفعلا بقي يجي يتلو لي وانا كل مره كنت بتخنق وببكي وماما دايما بتفتح لي سورة البقره في البيت في الاول كنت بتضايق وبمشي اقفلها بس بعد رقية الشيخ بالقرآن حبه حبه بقيت ارتاح نفسيا لسماع تلاوة القرآن ومرات افتح سورة البقره اقراها براااي وخالتو نوره كانت بتجي تحضر معاااي الرقيه حتي هي ما كانت مستوعبه الحصل ...
في يوم بتكلم مع ماما قالت لي شجن يا بتي بعد ده كفاك قعاد هنا ارجعي لبيتك وراجلك قلت ليها يا ماما لو ما عايزاني بمشي بقعد مع حبوبه و راجلي زاتو شكلو مستغني عني ما حصل جاني ولا اتصل علي قالت لي والله يومي بتصل عندي يطمن عليك وبعدين مش انتي طلبتي الطلاق عايزه يجيك لشنو قلت ليها متين طلبت الطلاق قالت لي شجن بالجد ما متزكره قلت ليها والله ما حصل وبعدين هو لو عايزني كان جاني قالت لي يا بتي لو ما عايزك ما كان ضحي بـ طفلو عشان ينقذ حياتك قلت ليها دقيقه دقيقه كيف يعني قالت لي لم كنتي في غرفة الولاده الدكتور جا طالع قال في خطر عليكم الاتنين وح يضطر يفقد واحد يا الام اللهو انتي يا الجنين و وائل قال للدكتور اهم حاجه حياة الام لو حصلت ليها حاجه ح اشيلك المسؤوليه انت وانت كيف تستشيرنا في حاجه زي دي مش طوالي تنقذها وكان طول ما انتي جوه كان خايف عليك وكان بدعي ليك قلت ليها يعني ولدي ما مات بنقص اوكسجين ولا كان في الحضانه قالت لي لا من ولدتيهو متوفي بس حالتك ما كانت بتسمح نكلمك ولو انتي اتجرستي عليهو وائل اتجرس اكتر منك بس كان حابس دموعو منك عشان ما تتأثري اكتر وبعد ده كلو تقولي ما خايف عليك خليتها ودخلت غرفتي ابكي جاتني ماما قالت لي ارح ناس امي (حبوبه) قلت ليها امشي انتي انا بلحقك ماما طلعت وانا لبست العبايه واقرب امجاد مشيت لـ وائل في البيت
وطول الطريق كنت بتزكر في كلام ماما انو الدكتور خير بين حياتي والطفل وصلت الشقه وضربت الجرس بطريقه جنونيه وائل جا فتح بخلعه ولم شافني اتخلع زياده قال لي شجن من شوفتو دموعي اصلا في الطرف نزلت عشرميه عشرميه قال لي مالك قلت ليهو لييه تقتل طفلنا الاول لييه تختارني انا بدلو ذنبو شنو هو يموت وشغاله اضرب فيهو من غير ما اشعر وهو بس حاضني عليهو ويقول لي خلاااص هسسسس تاني مسكت من قميصو قوي وبكيت ابكي يعني انا السبب في موت ولدي بس انت برضو السبب كان تختارو هو وتخليني اموت وهو فضل حاضني عليهو شديييد دخلني الغرفه وجاب لي كبايه عصير وبقي يهدي فيني قال لي هسه لو اخترت الولد الـ كان ح يربي منو طيب لو افرضنا مات بعد اتولد كده اكون خسرتكم الاتنين وبعدين حتي لو قلت اخترت الطفل موقف اهلك ح يكون شنو طيب خلي اهلك ضميري انا ح يكون كيف ياااخ خلي ده كلو لو اتخليت عنك في زول بعيش من غير قلب كلااامو ريحني حبه قال لي الدكتور زاتو غبي بسأل سؤال زي ده المفروض طوااالي ينقذ المنتج والانتاج هين وغمز لي حيوااان خلااااص قلت ليهو قليل ادب قال لي يا بنت مالك بتحسسيني اني غريب منك وبعدين انتي الكلمك منو قلت ليهو ماما وفضل يلعب لي في شعري لحدي ما نمت تلفونو ضرب طلع بيهو بره الغرفه عشان ما اصحي اهلا خالتو ساميه شجن اي معاااي جاتني قبيل ماما قالت ليهو ما كنت عارفاها جاياك طلعت من غير ما تقول لي عشان كده اتصلت عليك جيت لقيتها ماف قال ليها بس انتي لييه كلمتيها بالحقيقه مش اتفقنا نقول ليها مات عن طريق نقص الاوكسجين عشان ما تشيل الذنب وده الحصل جاتني منهاره بس هسه الحمد لله قالت ليهو يا ولدي انا كلمتها عشان ترجع لبيتها ما اكتر قال ليها تسلمي يا خاله هسه فعلا جاتني وان شاء الله تاني ما تجيكم الا زياره قالت ليهو ان شاء الله وقفلو الخط جا داخل الغرفه ...
الصباح لم صحيت لقيت روحي نايمه في صدرو وهو لسه نايم فضلت اتأمل فيهو كان نفسي اطبع ليهو بوسه في خدو لم يصحي بس تاني فكرت اصحيهو بطريقه جنونيه حبه مع انها مخاااطره لم فتح عيونو انا غمضته وفتحته نظام يا دوووب صاحيه قلت ليهو انت منو وانا الجابني هنا شنو وراقد جنبي مالك قال لي خطفتك انا وقعد يضحك الحيوان داير يفشل لي خطتي حاولت انزل الدموع المره دي غريبه ابت تنزل بس واصلت في التمثيليه
و زحيت من جنبو وبقيت اكورك يا ماما يا بابا اتخلع جا علي مسكني من خدي بـ يدي الاتنين قال لي شجن انتي جااااده زحيت يدو مني قلت ليهو ما تلمسني وبتعرف اسمي من وين يا بابا يا ماما قال لي شجن اهدي انا وائل قلت ليهو انا عايزه ماما ما بعرفك انت خطفتني عايز تعمل فيني شنو والدموع الهبله ابت تنزل قال لي شجن قولي بسم الله انا راجلك ما خاطفك قلت ليهو شنووو كمان عملتني متزوجه بس وديني لـ ماما قال لي خلاااص اهدي والله هسه اوديك ليها بس اتحمم فتح الدولاب شال غيار وجا داخل الحمام ناديتو وائل اتلفت قال لي نعم قلت ليهو انا شجن ولأ شجوني من الخلعه وقع الهدوم في الارض ما ناقشني جا قعد في السرير وخت يدو في راسو جيت قعدت جنبو قلت ليهو وائل ما رد لي قلت ليهو انت زعلت مني برضو ما رد قلت ليهو وائل الله يرضي عليك رد علي ومسكتو من معصم يدو ورقدت في كتفو ودموعي ملت عيوني اتلفت علي قال لي الله يرضي عليك انتي الله يخليك تاني ما تهظري معاااي كده هظري معاااي في اي شي حبيبي الا حاجه متعلقه بصحتك هزيت ليهو راسي كويس قال لي يعني ما لحقت اتهنيت بوجودك تجي تمثلي فيني الدور ده بس ليك يوم وقفني علي حيلي وجراني عليهو ومسكني من نصي قال لي عقاب ليك ما في مشي ناس ماما وقعد يحاكيني ضربتو في كتفو قلت ليهو انا ما بتكلم كده وبعدين اصلا ما ماشه ليهم قال لي طيب العقاب التاني قلت ليهو وائل كفايه واحد قال لي مش عملتي فيني كده تستحملي النتائج التاني ما في طلعه من هنا الأ لعرس سماح قلت ليهو واااي سماح حددت العرس وما كلمتني الكلبه قال لي يا شيخهه شهر كااامل وانتي في عالم براااك وكنتي عايزه تجنيني معاااك قلت ليهو وائل بالجد انا طلبت منك الطلاق قعد يضحك قال لي شكلو العقاب ده ما أثر فيك عايزه تمثلي لي تاني انك ناسيه قلت ليهو والله بالجد ما متزكره قال لي هسه ورقة الطلاق في الدولاب لو ما كان جيتي امس الليله كنت ح ارسلها ليك اتفكيت منو قلت ليهو في ياتو ضلفه جراني عليهو قال لي تعالي يا مجنوونه عايزه تعملي شنو قلت ليهو عايزه اشرطها قال لي وانتي فاكره لم تشرطيها كده خلاص يعني حليتي مشكله قلت ليهو بصوت مكسور يعني شنو يعني طلقتني هزة لي راسو اااي طبع لي بوسه في خدي قال لي نفسي اصورك بتعبير وشك ده بديني براءه الاطفال زحيت منو قلت ليهو هيي انت بقيت محرم علي قعد يضحك لم دمع قال لي من امس نايمه معاااي سوف تدخلي النار قلت ليهو بس انا ما كنت عارفه بس انت الـ ح تتحاسب وفضل جايي علي قال لي حاليا ما معانا زول قلت ليهو وائل ربنا شايفنا وح ... وقبل اتم كلامي جراني عليهو مجنووونه متوقعه انا اعمل كده شجوني انا تعجبني فيك براءتك دي قال لي لو فضلنا كده لا ح اتحمم لا ح نشرب شاي لا ح نفطر
بعد شربنا الشاي كنا قاعدين نتفرج في التلفزيون كان خاتي يدو وراي وانا متكله فيها قلت ليهو وائل قال لي روحو قلت ليهو تفتكر ده منو العايز يعمل فينا كده قال لي يعمل كده كيف قلت ليهو العايز يفرقنا عن بعض قال لي شجوني انا ما بفتكر زول وياريت انتي كمان ما تخمني زول المهم انو حاليا مع بعض وح نفضل طوول العمر مع بعض وده يكفي وبعدين شوفتي ده نتيجة عدم التحصين تاني مافي نوم من غير ما تتحصني سااامعه قلت ليهو نشوف قال لي ما اسمها نشوف اسمها طيب حاضر سامعه واتلفت صر لي وشو قلت ليهو وائل ما تصر لي كده قال لي لييه قلت ليهو لانو بخاف منك كده قعد يضحك قال لي حاااضر اوووو نسيت اتصل علي ناس البيت اديهم خبر رجوعك دقيقه اتصل علي امي من تلفوني واتكلمي معاها انتي عشان نعمل ليها مفاجأه اتصل عليها وناولني التفون فتحت الخط اهلييين ولدي الحبيب قلت ليها ماما نوره دي انا بتك الحبيبه ما ولدك قالت لي شجن دي انتي الحمد لله عليك الله يا بتي ارجعي مع وائل بيتك والله وائل من يوم مشيتي انتي قاعد براهو في البيت ما رضي يجي يقعد معانا قلت ليها ماما نوره انا هسه قاعده في بيتي وائل همس لي في اضاني قولي ليها وفي حضن راجلي ضربتو في كتفو وحمرت ليهو قالت لي الف الف حمدلله علي السلامه يا بتي وان شاء الله دايما مع بعض وعين العدو ما تعاين ليكم وربنا يبعد عنكم بنات واولاد الحرام قلت ليها اميييين يا ماما قالت لي خلاااص ما تعملو غدا بنجيب الغدا ونجي نتغدا معاكم قلت ليها تشرفو ♡ قفلت الخط قلت ليهو بصره وائل ده شنو هسه لو سمعتك قال لي عاااادي راجل مع مرتو وبعدين صرتك ما حلوه زي حقتي عايني دي حلوه كيف وصر لي وشو قلت ليهو وائل لااا ياااخ وحضنتو قال لي لو بتكوني كده اصر ليك طواااالي 😅 ضربتو في كتفو وزحيت قلت ليهو بالجد كنت قاعد هنا شهر كامل براك قال لي اي لانو كان عندي قناعه انك تجي واملي ما اتقطع من جيتك بس انتي طولتي في الجيه والمهم ما خيبتي ظني
الضهر اتظبطه واستقبلت نسابتي وماما كان يوم حلو والمسا طلعو بعد ما ادونا دعوات حلوه ♡
بعد خلاااص جينا ننوم وانا التعب هالكني بعد غمضته وائل قال لي ما اتحصنتي صاااح قلت ليهو ببدأ من بكره هسه عايزه
انوم قال لي لو ما اتحصنتي ما في نوم وبقي يشيل طرف شعري يدخلو في اضاني عشان اصحصح واتحصن وفضلنا علي الحال ده كل يوم لو ما اتحصنا مافي نوم ... عرس سماح قـرب واتفقنا انا وهبه نلبس سوا في الرقيص طبعا سماح كانت عاقده عشان كده عملت الجرتق والرقيص قبل حفل الزفاف والرقيص كان بس نسوان في صالة وبعد الرقيص كان في الجرتق مختلط فيهو اصحاب العريس المهم كنا بنمشي انا وهبه السوق مع بعض واشترينا فساتين الرقيص زي بعض بس لم جيت راجعه البيت وائل صدمني .....
⏪⏪⏪⏪