الجزء 3

وصلتا مطعم بسييط عشان اقابل فيهو العريس اسمو اسامه ..

سلمتا عليهو وقعدتا .. طبعا مدياهو اسم غير اسمي .. " نورة "

اسامه : يانورة كيف صحتك واحوالك

انا : الحمد لله بخير .. انت كيفك ؟

اسامه : الحمد لله تماام .. ما شاء الله حلاتك والله على الطبيعه ..

انا : ☺☺ من زوقك شكرا ..

اسامه : ماقلتي لي يا نورة تشربي شنو؟

انا : قهوة ☺

اسامه : طيب .. اهلك كيف .. ؟ !

انا : الحمد لله كويسييين والله

اسامه : الشغل الجديد كييف .. الشركة كيف معاك؟

انا : كويسه والله يعني بسلي روحي شوية كده احسن من قعدت البيت

اسامه : اي احسن لييك .. شكلك بتحبي الشغل

انا : ههه ايووة .. وانت كيف المكتب بتاعكم ..

اسامه : كوويس والله .. الزحمه كتيييرة الايام دي .. والسفر كتيير لكن نقول شنو الدنيا دايره درش ..

انا : الله يعيينك ☺

اسامه انا اتاخرتا لازم امشي هسي . ناس البيت بقلقو

اسامه : طيب ممكن بكرة الاقيك تاني ؟ ! اذا في طريقه ؟

انا : طيب برسل ليك عنوان الشركه ..

" طلعتا وقلتا اخييييرا نفدتا .. 😪 هسي انا حاقعد اكذب على العرسان كده لمتيين .. طيب لو يوم اتكشفتا .. 😪 .. يلا لحدي ما اعرس ما حاوريهو وضعنا عشان ما يسيبني .. "

وصلتا البيت .. وغشيت يوسف ..

انا : يوسف تعال اقعد هنا ده 💔

يوسف : مااالك مااده بوزك مترييين 😕😕 منو الزعلك ؟

انا : لقيت عريس 💔

يوسف 😂😂😂😂😂😂: كانها حاجه جدييدة عليك 😂😂

انا : ياخ ما تتساخف هسي 😒

يوسف : اها والمشكله وين !

انا : كذبتا عليهو في اي شي حتى اسمي

يوسف : سندس 😡😡😡

انا : يوسف لو ماكذبتا ماحاعرس ... لازم اصطاد عريس بي اي طرييقه كانت 💔💔

يوسف : الكذب حبلو قصير وانتي عارفه

انا : يوسف انتا ماشايف وضع ناس البيت 💔💔

يوسف : ده مابعني انك تكذبي وماعندك الحق تلعبي بالناس .. بعدين ياسندس الزول الدايرك بتقبلك بي وضعك .. بتقبلك زي ما انتي بي اي صفه حلوة فييكي .. واي صفه كعبه برضو 😊 سندس انتي حلااتك والكل يتمنااكي .. انا مابهظر بس بجد اي زول بحلم بيكي ..

انا 😂😂😂:

يوسف انت عبيط ياولدي .. يحلمو بي شنو 😂😂 بيتنا العماارة ولا شغاله في كابو ولا عندي توسان ولا نضيفه زي البنات 😂😂 يوسف كدي زح من خلقتي دي بالله ..😂😂

يوسف : غلطان انا زاتو 😒 .. ليهم حق مايعاينو في خلقتك .. انا لو لافيتك بره بتف ليك في خلقتك دي وبمشي 😒

انا : يوسف اصبر ماشي وين 😂😂😂 زعلان مالك طيب ..

تعال ياخ لاقي بت اسامة داود ويين انتا 😂😂 تعال دي فرصه ياخ ..

ومشى ولا اشتغل بي 💔💔 وبعديهو سرحت افكر في قروش سمر وسونة وانو مفروض تدفع قرييب .. وايجار البيت وده كلوو هم كبيير في راسي .. دخلتا بيتنا نمتا وانا في راسي مليون هم وصحيت وانا برضو بفكر مليون هم ومليون حاجه مفروض تدفع .. الايجار والانبوبه والكهرباء والمويه 💔💔 والحاله صعبه براها .. وده غير المدرسه وامي البقت بتتعب من اقل مجهود تعملو 💔 .. مشيت الشغل وانا في همي .. وشغاله وولاء تعاين لي وتسالني مالك . حكيت ليها والناس كلها ظروفها صعبه ومامتحمله حاجه زيادة اي زول في همو ..

اليوم ده ما اتكلمتا مع زول ولا هظرتا ولا شاغلتا زول حتى ادهم .. جا داخل وقعد وطلب قهوة ومشت ليهو ولاء .. وانا ولا شغاله بيهو راسي جايط والفيني مكفيني ... وكملت معاي اليوم دا 💔 جا اسامه داخل المطعم ولقاني بتحاوم وبقدم في الطلبات .. وطبعا اتخلع شديييد 😳😳 ومافهم حاجه .. وانا جيت اجيب ليهو العصير بقيت بتراااجف لما شفتو ... خلاص اكيد اي شي وضح .. ادهم كان قاعد في التربيزة الجنب اسامه وسمع كلامنا ..

اسامه : نورة 😳 الجابك شنو 😳😳

انا : اسامه انا ' بقيت بتمتم "💔💔

اسامه : انتي شغاله هنا؟ !

وكذبتي علي .. ابوي شغال في مصنع وبيتنا في بحري وعندنا وعندنا .. واشتغلتي في شركه تسليه بس

انا : اسامه لو سمحتا ما تعلي صوتك

" بقى بحمر والغضب ظااهر عليهو 😡😡 وادهم كان مركز معانا وانتبه ليهو كان معصب شديييد "💔😡 وانا كنتا بترجاه ما يجوط فيني عشان ما اتطرد من الشغل تااني ...

اسامه : انتي وحدة كذااابه 😡

انا : اسامه خليني اشرح ليك بس بعيد من هنا عليك الله ..

اسامه 😡😡: ماتشرحي لي وماداير اعرف عنك شي يا منافقه .. كنتي دايرة تصلي لي شنو .. تسرقيني صح؟

انا : اسامه 😡 لحدي هنا وكفايه مابسمح ليك تقول عني حراميه

اسامه : لا حراميه وستين حراميه 😡 واللعب والغش ده اسمو شنو

انا : اسامه 😡😡

" وقام طوالي من المطعم وطلع .. انا بعدو اتلفتا ولقيت ادهم بعاين لي بخلعه .. ما اشتغلتا بيهو ودخلتا كملتا شغلي .. وطلعتا المساء .. ولما جيت طالعه وزعلااانه من الحصل .. لاقيت ادهم بي عرييتو .. كان مافي مواصلات .. وقف لي بعربيتو .. وهو ما بتكلم كتير .. قال لي اركبي .. وماا اشتغلتا بيهو كتير ..

تاني كررها اركبي .. وفتح باب العربيه .. قمتا مشيت واتلفتا الجهه التانيه .. بقى ماشي وراي بالعربييه ولما شفتو مصر اني اركب وقفتا وكوركتا فيهو ".. ياخ انا ما حاركب ريح نفسك وغور من وشي 😡😒

ادهم 😳😕 اتحير طبعا .. البت دي لسانها طويل كده على شنو ..

اتغاظ من ردي ومشى .. وانا بقيت متمشيه واعاين مافي لاباص والي ولا حافله وبيتنا في نهايه الدنيا وامي تشيل وتضرب وابيت ارد عليها لاني . كنتا زعلانه شديييد .. تاني ظهر قدامي ادهم .. والمرة دي فرمل ووقف العرييه قدامي طوالي 😳 ..

انا : 😳😳 داير شنو مني انتا ؟؟

" اول مرة كان اخااف بالجد لانو الليل جا وانا براي في الشارع .. خفتا منو يعمل حاجه ومافي زول يلحقني ..💔 " وعشان انا خايفه ما لازم اظهر ليهو كده .. فهاجمتو طوالي بالكلام ..

انت مالك معاي ياود الناس ..✋😡 ادهم قرب وقرب وسالني .. اسمك منو انتي؟ !

انا : ماشغلتك بي

ادهم : انا بسال من اسمك .. اسمك الحقيقي .. منو؟؟

انا : الاء 😆 يلا زح من وشي الواطه براها اتاخرت 😡

ادهم : استني استني يا الاء ..

انتي مش محتاجه لقروش ؟

انا : قلتا ليك زح من وشي 😡😡 ما محتاجه لي شي الحمد لله ..

ادهم : ولا شغل

انا : لا شكرا .. ومشيت قدامو

تاني لحقني بخطواتو وبقى بنادي فيني الاء الاء 😂😂 طبعا الاسم غريب علي انا زاتي 😂😂 وما اتلفتا لحدي ماوقف في وشي تاااني 😏 ..

طيب يا الاء محتاجه لي شغل؟؟

انا : قلتا ليييك مادااايره شي منك .. زح من طريقي

ادهم : بس انا عندي لييكي شغل وقروشو كتييييره .. ممكن تحلي مشاكلك كلها بالقروش دي ولي يوم وااحد

" انا استغربتا طبعا 😳 ده شغل . شنو اليوم الواحد ده 😳 وقروشو كتيييره ..😳 قمتا سالتو الشغل شنو؟ !

ادهم : ليله وااحدة بس ☺

" طبعا لما قال كده واستفزاني .. خلاص بطني طمت منو وكرهتو وقرفتا شديييد .. مسكتا اعصابي وسالتو . مع منو؟ !

ادهم : معاي انا

انا : ايوااا كده يعني

قربت منو وما اترددتتا واديتو كف 👋.. احرى كف كان يمر عليهو .. كف قوتو نزلت من وين ماعارفه .. بس غضبي كلو طلع في كف واااحد ما نسااهو الاء دي ابدا 👋 .. وبعدها سمعتو ..

انتا قايلني وحدة من بنات الليل؟؟

ولا عشان شايفني متقطعه في القروش معناها حاعمل اي شي ليك

انت واحد قليل ادب وحيوان .. والله ياخد حقي منك ..

الغريبه انو

ادهم ابتسم ☺ بعد الكف 😳 وسمع كلامي وما ردا لي بحرف .. زعلتا شديييد من كلامو وحرقني جووه قلبي .. جريت ركبتا الحافله وانا ببكي لحدي ما وصلتا .. ادهم الرسمتا ليهو شخصيه طلع ولاا شي طلع حيوان و واطي .. كرهتو شديييد ..

نمتا وانا غضبانه .. وصحيت عشان امشي الشغل .. وفي الطريق اتذكرتا ادهم وقلتا خلاص الليله حيرفدوني من الشغل .. ادهم حيقول سندس عملت شنو فيهو .. وبقيت بفكر هسي حلقى شغل وين تاني وده هم جدييد جاني ..

لحدي ما وصلتا الشغل والمفاجأة كانت هناك ...