الجزء 27
:
By : Ashgan ALjaaly ~
يوم العصر وانا طالعه من المطبخ فجأه اشوف ليك كراسي الصاله تتحرك وبقيت شايفه الحاجات قدامي عشره عشره تاني ما شعرت بحاجه الأ وانا في السرير قلت لـ وائل الحصل شنو و في شنو قال لي في ده وشال يدي ختاها لي في بطني قلت ليهو قصدك شنو قال لي مش ربنا عوضنا قلت ليهو وائل احلف قال لي وغلاوتك عندي وباسني قلت ليهو وائل قال لي حياتو قلت ليهو ح يموت تاني قال لي حبيبي ده كلام شنو استغفري وان شاء الله يعيش بس خلي ايمانك بربنا كبير قلت ليهو ونعم بالله مشي عمل لي عصير وجا قلت ليهو ما عندي نفس قال لي بالمناسبه ده ما ليك ده لطفلي قلت ليهو خلاص خلي طفلك يجي يشرب براهو قال لي انتي زي الآله ح توصلي ليهو ح تشربي ولأ اتصرف معاك بطريقتي مسكت الكبايه شربتها وجات فترة الوحم يوم صحيت وائل نص الليل عايزه زيتون مشي التلاجه جاب لي 5 زيتونات قال لي لقيت ديل في التلاجه قلت ليهو بس ديل هسه اعمل بيهم شنو قال لي اديهم طفلك وانتي بشتري لك الصباح بس الله يرضي عليك خليني انوم انتي يومك كلو نايمه بس انا بكون شغال عملت روحي بتكلم مع البيبي شوفت بابا بخيل كيف زيتون ما عايز يجيبو ليك قال لي تعالي وحضني عليهو قال لي والله بكره قبل امشي الشغل يكون عندك الحقيقه وائل ما قصر والله استحمل معاااي كل التغيرات الكان بتحصل لي وعدت فترة الوحم في الشهر الـ 8 كان عندي مواعيد مع الدكتور بعد كشفت وجينا طالعين الدكتور قال لـ وائل وصل المدام العربيه وتعال اكتب ليك الادويه دي وائل وصلني العربيه ورجع للدكتور ولم جا شكلو كان متضايق قلت ليهو وائل الدكتور قال ليك شنو قال لي قال تتغزي كويس وتشربي عصاير وابتسم لي بس ظاهر انو ابتسامتو دي مجامله ما من قلبو قلت ليهو وائل ما تكضب علي قال ليك برضو ح يموت صح حك فرمله لم اتخلعته ونزل من الظلط قال لي حبيبي اتفقنا علي شنو وبعدين هو بعلم الغيب عشان يقول كده وتاني ما اسمعك تقولي الكلام ده وان شاء الله طفلنا ح يعيش وح ناخدو في حضننا ونعيشو احلي عيشه فكري بس في كده حاضر هزيت ليهو راسي طيب قال لي تسلمو لي انتو ( انتو دي قاصد بيها انا والبيبي )
وصلنا البيت قاعدين نتفرج في التلفزيون وانا راقده في رجلين وائل قلت ليهو وائل قال لي حياتي انتو طبعا بقي يتكلم بصيغة الجمع قلت ليهو عليك الله الدكتور قال شنو قال لي قال مرتك ح تجلطك يوم بأسإلتها دي ...
اصبحنا الصباح طلعت من الغرفه لقيتو قاعد في الصاله قال لي صباحو قلت ليهو يسعد صباحك وين الشاي قال لي منتظرك تعملي قلت ليهو شنووو طبعا من يوم عرفنا البيبي وائل بعمل اي شي الشاي الاكل .. والنضافه كان في بنت بتجي تنضف لينا يعني انا ما كنت بعمل حاجه خاااالص قال لي ما سمعتيني ح تعمليهو انتي تاني انا ما ح اعمل حاجه قلت ليهو لـ شنو قال لي مش ده واجبك قلت ليهو بس انا هسه معزوره قال لي الحمل ما عزر وهسه انا منتظر الشاي دخلت المطبخ عملتو جبتو وانا يا الله شايله نفسي ختيتو في التربيزه بعد شويه قال لي الشاي برد قومي سخني قلت ليهو وائل انا هسه بشرب فيهو حار قال لي بالنسبه لي برد قلت ليهو قوم سخنو براك انا ما بقدر والله عاين لي وجر لي نور وهو عارف انا بخاف لم يحمر لي شلتو سخنتو وجبتو ليهو قال لي بالمناسبه انا وقفت الشغاله تاني ح تشتغلي براك قلت ليهو كيف توقفها وانا بالحاله دي قال لي ما عندي قروش ليها قلت ليهو بكلم بابا قال لي بحده حزارك ثم حزارك تحكي مشاكلنا الماديه لأبوك ونضفي البيت ده زي الناس جايني ضيوف قلت ليهو خلاص جيبها الليله تنضف عشان الضيوف قال لي لا تنضفي انتي وانا الليله قاعد ما ماشي الشغل قمت يا الله نضفت الصاله وهو شغال يعاين لي جيت اقعد قال لي قاعده وين والغرف قلت ليهو وائل انت ناسي الفي بطني ده ولدك قال لي لاااا ما ناسي بس ما بيمنعك النضافه وكذلك حمر لي قمت نضفت الغرف ورقدته منتهيه وائل جا شايل لي عصير قال لي بالمناسبه ده ح يكون الروتين اليومي قلت ليهو والله بموت كده قال لي مافي شغل قتل زول قلت خلاااص احتمال لبكره ينسي بس لقيتو في نفس قرارو وكمان لقيتو زايد فيهو مره يقول لي عايز شاي اعملو ليهو يقول لي لااا انا قلت ليك اعملي قهوه ولأ يقول لي الشااي برد سخني ولأ يقول لي كعب غيري وبقيت اتعب في الحركه قلت ليهو وائل ماشه اقعد عند ناس ماما قال لي جداً وداني لم جا يطلع قلت ليهو يلاااا شوف ليك زول يخدمك قعد يضحك وباسني في خدي قال لي خلي بالك من نفسك ومن البيبي وطلع ...
الصباح صحيت وائل اتصل علي قال لي اصبحتو كيف قلت ليهو اصبحت مرتااااحه من خدمتك ماما عملت لي الشاي انت شوف زول يعمل ليك الشاي وطبعا مبسوووطه وبغيظ فيهو قال لي يعني تاني ما جاياني قلت ليهو نهاااائي انت عايز تقتل طفلي بالشغل الاّ تشوفو في المستشفي قال لي راااحتك بس وقت ما حبيتي تجي راجعه اتصلي علي في لحظه بكون معاك قلت ليهو تمااام وقفلت الخط شربت الشاي فتحت التلفزيون ماما جات قالت لي شجن قومي ساعديني
نضفي البيت ده حتي تجي للتلفزيون قلت ليها نععععععم قالت لي قلت ليك نضفي لي البيت قلت ليها يعني انا اجي هاربه من وائل تجي إنتي تقولي لي نضفي والله حرااام عليكم الفي بطني ده روووح ما كفايه خسرت الاول عايزني اخسر التاني قالت لي انتي قايله روحك قاعده في فندق قومي نضفي بعد نضفت قالت لي ارح ناس امي نتونس قلت ليها ما بقدر قالت لي ما بخليك وراي الأ تمشي مشينا قالت لي قومي سوي لينا الشاي قلت ليها والله يا ماما حرااام عليك قالت لي ما عايزه نقاش بعد سويت الشاي وجيت قعدته شويه كده قالت لي يلااا يا شجن منتظرين القهوه حبوبه قالت ليها ساميه يا بتي انتي جنيتي البنت حامل ما تشغليها كده قلت ليها والله يا حبوبه انتي الحاسه بي ماما قالت ليها كلنا قبل كده حملنا و ولدنا ما خلينا شغلتنا قومي سريع مشيت عملتها ودموعي نازله بعد جينا راجعين البيت ضربت لـ وائل قال لي اشتقتي لي بالسرعه دي قلت ليهو تعال سوقني قال لي مش قلتي تاني ما جايه وح تقعدي مع امك لحدي ما تلدي الحصل شنو قلت ليهو ما عارفه بس تعال سوقني قعد يضحك قال لي خلاااص بجيك المسا وقفل الخط ماما قالت لي زهجتي مننا بالسرعه دي قلت ليها اي انتي عاملاني زي الحبشيه اشتغل هنا وعند ناس حبوبه اخير اشتغل في بيتي علي الاقل بيت واحد بدل بيتين وح اخبر الله بكل شي ليك انتي و وائل قعدت تضحك قالت لي ده اخر ما اتوصلتي ليهو قلت ليها اي وح أطلع بعد الولاده عند ماما نوره علي الاقل قاعده تهتم بي قالت لي طيب يا شجن المسا وائل جا ساقني ..
اليوم التاني الصباح نفس الروتين عملت الشاي قلت ليهو وائل زهجانه ما عايزه اقعد براااي قبل ما تطلع الشغل وديني ناس ماما نوره قال لي بس اول نضفي البيت حتي نمشي قلت ليهو والله حرام عليكم الله ما امر بالهلاك والله الله ح يعاقبكم في البتعملو معاااي ده طبعا ولا شغال بي بس يعاين لي ويتبسم وصلني ناس ماما نوره ومشي الشغل طبعا عندهم برتاااح راااحه تاااامه كل ما اجي اعمل حاجه تقول لي لا يا بتي انتي حامل كفايه العليك مش زي ماما و وائل وكل دقيقه يجيبو لي العصير ويجو يشيلو مني الكبايه ما بخلوني اتحرك من مكاني وهبه تونس فيني عسسسل ياااخ وائل جا من الشغل قلت لـ هبه كلمي وائل يخليني اقعد معاكم قالت لي يعني هو مانعك تجينا قلت ليها لا ياااخ بس انا عايزه اقعد معاكم بس نظام انتو العازمني إني أقعد قالت لي طيب بعد المغرب ونحن في غرفة هبه بنتونس جا وائل دق الباب قال لينا لو انتهيتو من القطيعه في الناس عشان نمشي بعد ده قلت ليهو والله ما بنقطع في زول بنتونس ساااي قال لي طيب يلااا هبه قالت ليهو وائل خلي شوشو تتقعد معانا قال ليها مشكلتها ما بتقدر تقعد من غيري قالت ليهو خلاااص بس الليله قال ليها لو بتقعد انا ما عندي مانع واتلفت قال لي بتقعدي وحمر لي طوااالي ما كضبت قلت ليهو لااا ماشه معاك طبعا هبه استغربت بعد وائل طلع هبه قالت لي ده شنو العملتي ده قلت ليها بقعد مره تانيه اتزكرت حاجه في البيت هناك عايزه احضرها للولاده وطلعت في العربيه وائل قال لي فكره انك تقعدي عند ناس امي متأكده من هبه قلت ليهو اي انا زاتي ما عايزه اقعد قال لي يا شيخه وقف العربيه في بدايه الكبري قال لي انزلي قلت ليهو كيف يعني انزل هنا قال لي يعني تفتحي الباب وتنزلي رجليك وتقفلي الباب وراك قلت ليهو وائل انت عارف انا قصدي لييه انزل قال لي عشان العربيه خسرت وهنا ما بتقيف عربات ح نطره نقطع الكبري برجلينا ونشوف امجاد توصلنا قلت ليهو بخلعه لااا انا ما بقدر اقطع الكبري امشي انت وجيب العربيه وتعال قال لي لااا بتقدري وجا مسكني من نصي وبقينا ماشين وانا خلاااص عايزه اموت مره نمشي ومره نقيف قلت ليهو زح يدك دي ده شارع قال لي خلاص امشي عشان ما اطره امسكك واخيرا وصلنا نص الكبري وقفنا نتفرج في البحر قلت ليهو حقو الزول ينط هنا ويرتاح قال لي يا زوله اديني طفلي وبعدين نطي ضربتو قلت ليهو حيوان قال لي بالمناسبه ح نرجع العربيه اتزكرت بصلحها كيف قلت ليهو يا سلااام امشي انت جيبها وتعال قال لي لااا ح نرجع سوا قلت ليهو وائل قال لي ح ترجعي معاي ولأ امسكك قلت ليهو خلاااص زح يدك رجعت معاهو قلت ليهو الله ح يسألني ولن اغفر ودموعي نزلت قال لي ابكي ابكي خلي الماشي والجايي يتفرج فيك مسحتها وفضلنا ماشين وانا حسيت بنفسي اتقطع مره نمشي ومره نقيف اخيرا وصلنا العربيه وانا نفسي قام اول ما شغلها دورت قلت ليهو وائل انت بتكضب علي ما خسرانه صاااح قال لي شبهه كده وصلنا البيت وانا منتهيه من الباب للسرير وائل جاب لي عصير شربت ونمت ...
وعدا شهر وبكره مواعيدي للولاده المسا وانا نايمه في صدر وائل وبلعب بي لحيتو قلت ليهو وائل قال لي حياتو قلت ليهو عليك الله لو الدكتور خيرك المره دي بيني وبين الطفل اختار الطفل قال لي بحده شجن انتي جربتي يدي وهي بتطبطب عليك بس ما جربتي يدي البتدي كف صاااح وحمر لي قلت ليهو وائل ما تعاين لي كده ياااخ قال لي يلاا خليك شطوووره واس
معي الكلام ونومي وفضل يخلخل لي في شعري لحدي ما نمت بس هو كان صاحي وشايل هم بكره ح يكون كيف وكان طول الوقت شغال يطمن فيني ويحسسني بالامان وهو في نفس اللحظه خايف ومهموم اول ما نام صحيتو وائل بطني بتألمني قال لي طيب و واصل نومو قلت ليهو وائل والله عندي وجع بطن قال لي خلاااص بنمشي الصباح لم كوركت فيهو باعلي صوت انا اقول ليك عندي وجع بطن وتقول لي نمشي الصباح صحي مخلوع يا دوووب صحصح واستوعب قال لي شجن انتي جااااده قلت ليهو يعني ح اصحي من النوم الساعه 3 صباحا عشان اهظر معاك ودموعي جاريه هو زاتو ما عرف يعمل شنو من الخلعه قال لي طيب في اللحظه دي اعمل شنو قلت ليهو بصوت عالي كيف يعني تعمل شنو وديني الدكتور واضرب لـ ماما ركبت العربيه وانا حاسه بروحي عايزه اموت وقبل ما العربيه تتحرك وائل شابكني استحملني قربنا نصل وهو لسه ما دور العربيه 😅
⏪⏪⏪⏪
More