الجزء 10

المهم بعد داك زي ما قلت لابتسام بديت اتبع مع مستر طارق نفس سياسته في التعامل معاي..وعملتها ظاااهرة ...الباقين لو لاحظوا لي ولا لا ما عارفة...السلام في تلتلة ومن غير ابتسامة...كلام برة الشغل مافي ..الباقين بتونس معاهم عادي و بضحك وبسلم بابتسامة وضحكة ياها دي عادتي مع كل الناس ...لو لقيت ناس الوحدة قاعدين في المكتب وهو مافي عادي بقعد اتونس معاهم لكن لو هوموجود بس بسلم وبمشي وبتجنب اقعد معاهم...وحتى مرات لو كان مافيش وجاء لقاني قاعدة في المكتب مع الباقين طوالي بعد شوية بقوم استأذن و امشي.

طبعا ابتسام عارفة ..ومستر امير شعرت بيه فهم الحكاية لكن ما علق...الباقين ما عارفاهم لاحظوا ولا لا...

يوم كان عندنا عمليات ...وانا متعودة اني اي حالة من حالات العيانين تبعي بمشي اقرأ اقرأ عنها كتير واعرف عنها اي شئ ما اخلي ليها حاجة...واحدة من العيانات تبعي عندها عملية ازالة الغدة الدرقية الفي الرقبة دي...قريت انه بعد العملية لازم المريض يراقبوه شديد عشان مرات بحصل نزيف ويضغط على القصبة الهوائية ويعمل اختناق ...عشان كدة من الصباح شلت غياري وقلت لامي ( الليلة بايت في المستشفى ....)

امي طوالي قالت لي ( الليلة ما يوم نبطشيتك...سادة لزول ولا شنو؟؟) امي طبعا مفتحة حافظة ايام النبطشية حقتي ..متابعانا تمام ربنا يديها العافية...وريتها حكاية عملية الغدة دي ..وزي عادتها قامت تدعي للعيانة الداخلة العملية دي كانها بتعرفها...

انا بعد وصلت المستشفى مشيت راسي عديل على غرفة العمليات و مشيت على العيانين في غرفة الانتظار و بديت اعمل ليهم في تهدئة ما قبل العملية...خلاص المستر خلا لي الموضوع دة من اول يوم داك!!!!

بعد خلصنا العمليات طوالي ومن غير ما اشاور زول مشيت جريت لي كرسي و قعدت جنب العيانة بتاعة الغدة... جبت معاي كتاب قلت اقرأ فيه اقضي بيه الوقت وانا براقب في العيانة.. فتحت الكتاب وعين فيه والتانية في العيانة...

بعد نص ساعة كدة حسيت بزول جاء داخل الغرفة وقف جنبي ...رفعت راسي القى ليك دة مستر طارق ...سريع ختيت الكتاب ووقفت ...شكله استغرب لما لقاني قاعدة...

سألني (عبد اللطيف وين؟؟؟؟)

طبعا انا ما عارفة لاني طوالي جيت جارية هنا من غرفة العمليات ...قلت ليه ( والله ما عارفة...اخر مرة شفته في غرفة العمليات....)

سكت ما قال لي حاجة وطلع ...بعد شوية عبد اللطيف جاء يضحك قال لي ( والله يا امل كل يوم انتي عاملة لينا مفاجأة.....المستر جاء سألني قايلني انا قلت ليك تراقبي العيانة.. عادة ناس عملية الغدة ديل عندنا براقبهم نائب الاخصائي....قلت ليه انا ما وصيتها تكون براها مشت...ناس الامتياز الاشتغلوا معانا ديل كلهم ما في زول فيهم كان عارف انه عملية الغدة عايزة مراقبة ...)

انا قلت ليه ( ما اكون كمان عملت ليك مشكلة..)

قال لي ( لا ابدا ...اصلو ما قاعد اجي طوالي ..في البداية كدة بكونوا في ناس كتار جنب المريضة ...بمشي اشرب لي كباية قهوة اعدل راسي حتى اجي...اها خلاص يا دكتورة انتي لو عايزة ممكن بعد دة تمشي ...)

قلت ليه ( ح تقعد انت براك تراقبها؟؟؟ انا ما عندي مشكلة اصلا كلمت ناس البيت اني بايتة في المستشفى ..ممكن نتناوب عليها نحن الاتنين ...)

قال لي ( انا ما عندي مشكلة متعود ..مافي داعي تتعبي انتي كمان)

قلت ليه ( انا برضه ما عندي مشكلة و بالعكس انا شايفة انه فيها فايدة لي...ح اتعلم كيف ؟؟)

عبد اللطيف سكت دور الكلام في راسه شوية وقال لي ( لو كدة خلاص ...)

بعد داك عبد اللطيف قعد معاي اتأكد اني عارفة الحاجات المفروض نراقبها شنو في العيانة و لو حصل نزيف مفروض يتعمل شنو....بعد داك قسمنا الوقت بيننا ...عبد اللطيف يقعد لغاية قريب المغرب و انا بعده اجي اقعد لغاية الساعة 9 ...بعد داك عبد اللطيف لغاية 3 صباحا و انا اجي امسك لغاية الصباح... ...

صفاء كانت نبطشية اليوم دة..مشيت عليها في الحوادث شوية ...تاني مشيت الاستراحة نمت شوية لغاية قريب المغرب ومشيت استلمت من عبد اللطيف ...الامور مشت كويسة من غير مشاكل و العيانة بخير والحمدلله ...زي الساعة 9 حسيت بزول جاء داخل الغرفة ..اتلفت عليه بابتسامة على اساس انه عبد اللطيف جاي يستلم مناوبته ..القى ليك منو ؟..مستر طارق ...والابتسامة ماتت على شفتي!!!!!ٍ

هو ذاته شكله اتخلع لما شافني...بعد سلم تاني سألني نفس سؤال قبيل (عبد اللطيف وينه؟؟؟)

قبل ما احتاج ارد ليه عبد اللطيف جاء داخل...سلم على مستر طارق وقال ليه ( امل اصرت تشاركني في المراقبة ...كدة والله قدرت اشوف باقي العيانين الدخلوا عمليات الليلة ...)

مستر طارق عاين لي ساكت ما علق واتلفت تاني لعبد اللطيف (اها كيف العيانة؟..)

عبد اللطيف وراه انها كويسة وانه مافي حاجة ...مستر طارق اتلفت علي وسألني ( لما تكوني بتراقبي في العيانة شنو هي العلامات البتوريك انه ممكن يكون حصل نزيف؟؟؟)

انا طوالي سمعت ليه..حافظة صم طبعا... قال لي ( كويس يا دكتورة..) لما انا ذاتي اتخلعت....زغردي يا محاسن؟ طبعا اول مرة يشكرني...ماله الحصل عليه شنو يا ربي؟؟...

بعد داك انا استأذنت منهم ومشيت لصفاء سقتها ومشينا الكافيتيريا واتعشينا...طبعا انا ما كلمت صفاء بطريقة معاملة مستر طارق لي ..مع اني بكلمها باي شئ ..لاني عارفة الكلام ح يجر للسبب البخليه يعاملني كدة ليه؟ وليه هو ما عايز بنات في الوحدة...

بعد خلصنا عشاء و نحن ماشين على الاستراحة مستر طارق لاقانا ..لما شافنا رفع لي يده من بعيد ..لا لا دي تطورات هائلة دي..قلت ليكم عايزة زغرودة كبيرة...بعد مر مننا صفاء اتلفت عاينت ليه و قالت لي ( بوصك حلااااته...)

انا قلت ليها ( اااي ..) اقول شنو يعني؟...

لكزتني بكوعها وقالت ( اااي شنو؟....شدي حيلك يا بت لا معرس لا خاطب لا شايفة ليه جكس...)

في سري ضحكت بسخرية قلا ليها انتي ما عارفة حاجة ساكت...قلت ليها( لسة لسة ...انا ماشة بقوانين نهى اختي بعد اخلص الامتياز حتى اشوف حكاية العلاقات الرومانسية دي...)

صفاء عارفة قوانين نهى اختى ضحكت وقالت لي ( كمان الرومانسية و امور القلب دي فيها قوانين؟ دي الحاجة الوحييييدة الما فيها قانون ...)

قلت ليها ( سيبي الفلسفة ..انتي عمارك وينه ؟؟) طبعا صفاء زيي لسة حرة ما عندها ارتباط مع اي زول ..

قالت لي (على الاقل انا قاعدة احاول وما قافلة الطريق ..لكن لسة النصيب ما جاء...)

وصلنا الاستراحة وظبطت المنبه على الساعة 3 الا ربع و رقدنا انا صفاء اتونسنا مسافة حتى نمنا..المنبه صحاني مشيت بدلت عبد اللطيف و قعدت راقبت العيانة و الحمد لله ما حصل اي شي لغاية الساعة 7 صباحا مواعيد جية عبد اللطيف... ..

الباب اتفتح وانا اتلفت بابتسامة عشان اسلم على عبد اللطيف القاه دة مستر طارق...للمرة التالتة !!!!!

يتبـــــــــــــــــــــــــــع