الجزء 14

مستر طارق جاء وقف قدامي وانا طبعا مدنقرة عارفة وشي مورم و عيوني محمرة...وساكتة.. صوتي ذاته عارفاه بكون مبحوح ما بتسمع...مستر طارق وقف لحظات يعاين لي ساكت .

.تاني قال لي (امل....)

طبعا اول مرة يناديني باسمي...وكانت حاجة غريبة اسمعه بقول اسمي كدة حاف...

رفعت عيوني المورمات اعاين..شكله اتفاجأ من منظري لانه اخد ليه نفس كدة وهز راسه و قال لي (تعالي...)

في كراسي كدة لجوة في الاوضة... قعدنا في كرسيين متقابلين...طبعا ح يقول دي شنو العويـــــرة دي ...ودي شنو حركات الهبـــالة دي؟ وح اكون خلاص اثبت ليه وجهة نظره انه النساء ناقصات عقل وليه حق ما يجيبهم في وحدته... واستعديت للردم!!!

لكن كلام مستر طارق القاله لي كان مفاجأة (يا امل انتي من جيتي معانا هنا لاحظت فيك حاجة نادر الاحظها في الدكاترة.....انك العيانين ديل بتعايني ليهم على انهم ناس ما حالات زي ما بعملوا كتير من الدكاترة.. ما بس الصغار حتى الكبار كمان ..انتي بتحسي بيهم بالجد وتحاولي تتكلمي معاهم وتخففي عنهم ودة هو المفروض يكون عليه الدكتور... انسان قبل اي شي تاني...)

سكت شوية وانا برضه ساكتة ما قلت شي تاني واصل( لكن نجي كمان لارتباطك وتفاعلك الشديد مع العيانين ديل..دي ما حاجة غريبة ولا انتي اول دكتورة تكون كدة ...في كتيرين في بداية شغلهم بكونوا كدة و الحكاية بتخف شوية شوية مع الشغل الكتير..لكن والله انا شايفها عندك اكتر من اللازم يا امل...الحكاية دي ح تتعبك شديد و ح ترهقك نفسيا ..برضه ممكن تأثر على العيانين لما يشوفوك كدة..)

قلت ليه (كيف يعني تأثر عليهم؟؟)

قال لي (يعني اذا انتي ظهرتي قدام العيان متأثرة و مدبرسة اكيد ح يفكر انه في مشكلة و انه الامل في شفاه ضعيف مثلا ...) سكت شوية وواصل ( العيان يا امل عايزة يشوفك قوية عشانه..عايز يستمد من قوتك دي عشان تساعد في شفاه سريع...)

مستر طارق سكت مسافة منتظر ردي على كلامه ..قلت ليه ( والله الحاجة دي رغما عني يا مستر ..قدر ما اقول اسيطر على نفسي ما بقدر ...ما عارفة والله اعمل شنو...)

مستر طارق قال لي ( عايني انا عندي كتب عن علاقات الطبيب بالمريض و فيها نصائح عن كيف تتخلصي من الحكاية دي.....)

قلت ليه ( ان شاء الله ..ربنا يقدرني..) صوتي كان واطي و مبحوح بسبب البكاء ...

عاين لي كدة شوية وابتسم وقال لي ( بس كمان انا ما عايز افقد امل الدكتورة الانسانة الطيبة الحنينة ...انا عارف انها موزانة صعبة... انا ما عايزك تفقدي تعاطفك و احساسك بالمريض لكن بس تحاولي تسيطري على الحكاية دي عشان ما تتعبي انتي و لا العيانين..)

انا لما وصفني باني طيبة وحنينة شعرت كدة بشعور جميل دافي غمرني و وسكت و دنقرت..هو فضل ساكت مسافة كدة حاسة بيه يعاين لي تاني قال لي( خالد زوج ابتسام ح يجي يسوقها بعد دة ..لو عايزة ح اخليهم يوصلوك معاهم البيت ...) امشي البيت؟

رفعت ليه رأسي وقلت ( لا ..مافي داعي انا كويسة ح اواصل معاهم النبطشية ..)

قال لي (متاكدة ؟ ..مافي مشكلة تمشي ..ما قصرتي و الباقين ح يغطوا ..)

قلت ليه ( والله يا مستر ما عندي مشكلة..) وعشان اوضح اكتر قلت ليه بضحكة ( دي ما اول مرة يعني يحصل لي كدة..عادي بعد شوية برجع لحالتي..)

عاين لي مسافة كدة بابتسامة بعدين هزراسه و قال لي ( خلاص ..لكن امشي الاستراحة ..ولو في شي بنادوك..) قلت ليه ( اوكي ...)

قمنا على حيلنا عشان نطلع من الاوضة قلت ليه ( شكرا يا مستر طارق...)

قال لي ( شكرا ليك انتي...) انا تاني سكت و لساني اتعقد

طلعنا برة الحوادث هو مشي قدامي لعبد اللطيف و عمار اتكلم معاهم و لما صلت ليهم اتلفت علي وقال لي ( خلاص انتي امشي الاستراحة ولو احتاجوا ليك بنادوك..)

شكرتهم كلهم و طلعت سريع ..يا ربي حسع عبد اللطيف و عمار ح يقولوا الحصل شنو؟؟

مشيت الاستراحة ورغم اني كنت حاسة انه راسي كابس ما قدرت انوم طوالي...قعدت افكر في الحاجة الحصلت دي وتصرف مستر طارق معاي دة..في الشفتات الفاتت لما اقوم اتااثر وابكي مع العاينين ويشوفوني ما كان في زول بشتغل بي كدة..بالعكس كان في واحدين بضحكوا علي...

تصرف مستر طارق دة خلاني اراجع راي الختيته فيه اول ما جيت انه مفتري ومتكبر وما عنده احساس...بالعكس طلع اكتر زول عنده احساس ...وعلى هذه الفكرة استغرقت في النوم الى صباح اليوم التالي!!!!

بالليل ما نادوني للحوادث تاني..ما عارفة عشان ما حصلت حاجة ولا المستر قال ليهم ما تنادوها!!!!

الصباح بعد استحميت وغيرت مشيت شفت العيانين الدخلناهم من الحوادث امس..ناس الحادث و غيرهم ...كلهم كانوا تمام...مشيت المكتب قلت اشرب لي شاي...اول ما وصلت باب المكتب القى ليك مستر طارق قاعد براه..وقفت وقلبي قال لي ارجعي لكن ما كان في طريقة لانه شافني و سلم علي بابتسامة و انا سلمت و الخجل عايز يقتلني من حالة البهدلة الشافني فيها امس...

دخلت قعدت وسألني ( اها اصبحتي كيف الليلة...)

قلت ليه (الحمد لله ...تمام...)

قال لي (جبت ليك الكتب القلتها ليك امس..في المكتب جوة ..بعدين لما تجي طالعة تعالي شيليها..)

قلت ليه ( شكرا يا بوص...)

قعدنا تاني مسافة ساكتين ..انا كنت حاسة بشعور غريب ارتباك ولا احراج ما عارفة ..وفكرت حسع لو كنا لسة في تعاملنا القديم داك كنت من جيت لقيته قاعد براه مشيت واتفكيت من الشعور الحاسة بيه حسع دة..

اها يا ربي احسن زمان لما كنا اعداء ولا حسع لما اتصالحنا؟ لا كدة عاجب لا كدة عاجب!!!

خلصني من حالتي دي باقي ناس الوحدة الاولاد... جوا كلهم داخلين سوا سلموا وقعدوا يتكلموا مع مستر طارق وانا قمت عملت ليهم شاي كلهم لغاية مستر طارق معاهم ..المرة دي من غير ما اسأله عايز ولا لا...

قمت بعداك على العيانين الجديدين عملت ليهم ملفاتهم ورتبت ليهم امورهم ..بعد خلصت مشيت على عبد اللطيف اشوف لو في حاجة قبل امشي البيت ..قال لي ( مستر طارق قال ليك تعالي ليه في المكتب بعد تخلصي)

يتبـــــــــــــــــــــــــــع