الجزء 17

انا متاكدة انه نهى لو ما كانت مشغولة اليومين دي وعندها قضية باين عليها معقدة كانت انتبهت لسكوتي وسرحاني..وحمدت الله لاني ما فايقة ليها ولو سألتني ما عندي ليها اجوبة...انا لنفسي ما فاهمة حاجة و ما عندي اجوبة لنفسي....

مسر طارق ما غير طريقة تعامله معاي تاني ..بالعكس انا البقيت احاول اتجنبه..اصلا كان باقي لي معاهم حوالي شهر...قررت احاول اتمه بسلام و امشي قبل ما انهار وافضح نفسي قدام الناس...

عثمان طبيب الامتياز المعانا خلص الشفت و مشى و جابوا بدله دكتور تاني اسمه زاهر ..طوالي انا استلمت زاهر دة من ما جاء وقلت ادرع فيه حكاية تهدئة المرضى لما يكونوا خاشين العملية... طبعا بعد ما شرحت ليه كويس ...واول يوم عمليات لينا بعد هو استلم خليته هو يتكلم مع العيانين وانا وقفت اسمع ساكت ..مسترطارق جاء عاين لينا من غير ما يتكلم ومشى من غير تعليق...

يوم العمليات البعده ما مشيت مع زاهر ...خليته يمشي براه للعيانين قبل العملية ...وناوية كمان اخليه يمشي تاني مع مستر طارق للعيانين التانين المحتاجين كلام ..لكن اعمل الحكاية دي كيف ما عارفة؟؟؟ دة كله عشان اقلل احتكاكي بمستر طارق...

بعد انتهينا العمليات اليوم داك واحنا طالعين من مجمع العمليات مستر طارق قال لي ( عايزك لحظة في المكتب لو ممكن...)

انا قلبي قعد يضرب و مشيت وراه ...وصلنا المكتب كان فاضي...دخلنا مكتبه جوة ..قعد وقال اقعدي..وطوالي سألني ( الليلة ليه ما جيتي للعيانين قبل العملية؟؟؟)

عقلي الباطن كان متوقع السؤال دة... طوالي قلت ليه اجابتي المجهزاها( قلت اخلي دكتور زاهر يعملها براه عشان يتعود...انا عشان خلاص قربت اخلص الشفت يا دكتور ..قلت يمسك بدلي ..) وضحكت...

هوما ضحك لكن قعد يعاين لي ساكت مسافة لغاية ما انا حسيت بارتباك..وفتشت لحاجة اقولها سريع عشان اكسر التوتر البدا يعم بيننا... قلت ليه( برضه ح اخليه يمشي للعيانين المحولين الذرة تاني...)

هو كان متكل على كرسيه لوراء ويعاين لي ..قال ( خلاص بديتي تنفضي يدك مننا؟؟؟)

قلت ليه ( عشان باقي لي زي شهر معاكم ..لو بديت معاه من حسع ح يكون اتعود على الحكاية لما انا امشي...)

قال لي ( تفتكري ح ينجح زيك؟؟؟)

قلت ليه( ان شاء الله و احسن مني كمان...)

سكت ما قال حاجة... انا ارتباكي ماشي زايد بقيت ساكتة ومدنقرة ..فجأة قال لي (راجعة البيت؟..ممكن اوصلك معاي انا طالع...)

قلت ليه سريع ( لا لا لسة ما طالعة حسع.. عندي حاجات كدة بعملها وبعدين بطلع مع صفاء صاحبتي...)

طبعا ولا عندي حاجة ولا شي لكن بس عذر ساكت...هو سكت و ما رد... يعاين لي كانه ما مصدق عذري..انا طوالي قمت على حيلي وقلت ليه ( لو مافي حاجة ..عشان ماشة العنبر عندي عيانة عايزة اشوف فحوصاتها جات ولا لا...) هز لي راسه من غير يتكلم وانا طلعت سريع و اتنفست الصعداء...جريت الاستراحة قعدت مسافة قلت لغاية ما اتاكد انه مشى حتى اطلع على المواصلات!!!!

باقي الاسبوع كله كانوا في التجهيزات بتاعة المخيم العلاجي و الحاجات المحتاجين يشيلوها معاهم....

بالنسبة لينا نحن في البيت كنا منتظرين نتيجة محمد بتاعة الاساس وكلنا خايفين..ما قرا قراية كدة يقولوا عليها ..

نهى قالت ليه (اهي دي النتيجة قالوا الاسبوع الجاي ..ح تندم على عدم قرايتك...)

قال ليها (..قرايتي القريتها كفاية ...)

طبعا انا بديت ليه في اسطوانة انه لازم يقرأ ويتفوق عشان بعدين يدخل كلية كويسة وجامعة كويسة ويشتغل كويس ..

قال لي (انا الحاجة العايز اشتغلها ما عايزة جامعة ..)

قلت ليه ( وعايز تبقى شنو ان شاء الله ؟؟؟)

قال لي (لاعب كورة ...لاعبين الكورة بكسبوا قروش كتيرة)

قلت ليه ( دة ما هنا في السودان ..بعدين انت عشان قصير وضعيف ما بتنفع في الكورة ..بضربوك..)

قال لي (انتي ما شفتي ميسي؟؟؟)

قلت ليه (ميسي دة شنو كمان ..؟)

قال لي ( ما بتعرفي ميسي ؟؟..لاعب برشلونة ..اشهر لاعب في العالم ..وقصير زي كدة ..ما بتعرفيه؟ ...عاملة نفسك دكتورة على شنو؟؟؟.)

قلت ليه (واعرفه كيف؟؟ الدكاترة بعرفوا الدكاترة ..ما بعرفوا لاعبين الكورة ...بعدين ميسي دة ح تلقاه قاري الجامعة هو ذاته ...)

قال لي (القال ليك منو؟؟)

قلت ليه (الخواجات ديل اصلهم بحبوا يطوروا نفسهم...) ..بعد شوية امي سكتتنا قالت خلوه لسة صغير...ما طبعا ولدها الوحيد المدلع !!!!!....

يوم الاربعاء عملنا الراوند الكبير عشان تاني يوم ناس مستر طارق مسافرين الجزيرة للمخيم العلاجي...بعد رجعت البيت.. بعد المغرب موبايلي ضرب..لما شلته ولقيت المتصل مستر طارق..قلبي قعد يضرب ..يا ربي في شنو؟ اصلا اول مرة يتصل بي ..وكمان في الوقت دة...اوعى يكون واحد من العيانين تبعي كتس!!!

فتحت سريع رديت بعد سلم علي قال لي ( معليش متصل عليك في وقت زي دة لكن حصلت حاجة طارئة...ابتسام ولدها عيان وشاكين انها حصبة و ما ح تقدر تسافر معانا المخيم العلاجي..ومحتاجين لدكتورة ضروري معانا ...قلت اشوف لو ظروفك بتسمح تمشي معانا...)

قلت ليه ( انا من ناحية المبدأ ما عندي مشكلة ...بس اكلم ناس البيت و ما اظن يكون في مشكلة...) انا عارفة انه ابوي وامي ما ح يكون عندهم مانع لانه دي ما اول مرة اسافر...في الجامعة كنا عادي بنمشي قوافل علاجية ...

مستر طارق قال لي ( ممكن تديني رقم الوالد عشان عايز اتكلم معاه ؟؟)

قلت ليه سريع ( ما بحتاج يا مستر ...)

قاطعني ( عارف لكن برضه عايز استأذن منه ...)

طبعا انا في اللحظات ديك كبر في نظري شديد كونه خت اعتبار لابوي كدة..مليته رقم ابوي و قفلت منه..قعدت لحظات كدة افكر..لو ح امشي معاهم مفروض اقوم اجهز حاجاتي من حسع لانه ح يتحركوا بكرة من المستشفى بدري...لكن اول لازم موافقة الوالد و الوالدة!!!

قمت سريع عشان اكسب الوقت ..مشيت لامي كلمتها بموضوع المخيم العلاجي ..طبعا قامت تحقق معاي..الحتة الماشنها وين؟؟؟ كم يوم؟؟ الماشي منو؟؟ماشين بشنو؟؟؟ بعد داك قالت لي ( كلمي ابوك...)

عرفت انها ما عندها مانع او اعتراض او بالاصح ما لقت حاجة تعترض عليها حولتني لابوي عشان تطلع الموضوع من يدها...

مشيت على ابوي لقيته بتكلم في التلفون...كان في الحقيقة بسمع وتاني قال ( مافي مشكلة يا دكتور ..ما في مشكلة ...ربنا يسهل عليكم...شكرا يا كتور..بارك الله فيك...)

طوالي عرفت انه بتكلم مع مستر طارق...واول ما قفل منه طوالي كلمني انه دة مستر طارق كلمه بالمخيم و استاذن منه انه انا امشي معاهم ..ابوي قال لي ( قلت ليه مافي مانع ...باين عليه زول محترم ود ناس...)

بعد داك مشيت جهزت لي غيارات لليومين حقات المخيم و شحدت امي توب برضه شلته..

الجو لسة كان بارد في نص الشتاء نحن..امي عملت لينا سخينة حاارة للعشاء ..قعدنا نتعشى و الونسة معظمها عن المخيم العلاجي ..ابوي طبعا حكى ليهم بمكالمة مستر طارق ليه ...متكيف منه شديد ..قال المستر قال ليه في تاني دكتورتين غيري ح يمشوا معاهم ...

سالت ابوي لو بعرف القرية الماشين ليها ..قال لي (كيف ما بعرفها؟...في بلد في السودان دة انا ما شفتها ولا درست فيها؟..)

طبعا ابوي لف معظم مناطق السودان قبل ما يتزوج وحتى بعد ما اتزوج برضه لف... و امي طوالي كانت بتحكي لينا بالمحلات الاشتغل فيها ابوي وعاشوا فيها..لكن للاسف بعد ولدونا استقروا في الخرطوم ...

ابوي قال لي ( الحلة الماشين ليها دي منطقة زراعية في نص مشروع الجزيرة و اهلها ناس فاهمين وبحبوا التعليم..من اول المناطق العملوا فيها مدارس..ودة ذاته شجعني انه اخليك تمشي... اهلها ناس تمام...)...

بعد داك قلت اقوم امسي انوم بدري عشان السفر الراجيني دة...

لكن نهى بتريحني؟؟؟؟

يتبـــــــــــــــــــــــــــع