الجزء 1

واقفه قدام المرايا بجهز في نفسي عشان طالعه الشغل جات مره ابوي داخله الغرفه..

سميه:( صباح الخير ي مريم)

ابتسمتا و قلتا:( صباح النور)

سميه:(ابوك بليل سال منك و كان دايرك)

عاينتا ليها مساافه..

قلتا:( انتي قلتي ليهو شنو?)

سميه:( ابدا ولا حاجه)

قلتا:( طيب...لو في حاجه مهمه خليهو يتصل بي او يستنا لمن ارجع بعدين)

و شلتا شنطتي و دايره اطلع..

سميه:( جيبي مصاريف للبيت)

فتحتا شنطتي و طلعتا قروش مديتها ليها..

سميه عاينت للقروش..

سميه:( دي بسيطه م بتجيب حاجه)

قلتا:( و انا م عندي غيرها.. اعملي اكل كويس)

و طلعتا مشيت بسرعه.. شوفه سميه من الصباح و كلامها معاي كان كافي انو يقلب مزاجي.. و مع زحمه المواصلات و لمن وصلتا الشغل كان مزاجي كلو خرب..قعدتا علي مكتبي و طلبتا فنجان قهوه و بقيت شغاله علي الكمبيوتر.. جاتني علياء صحبتي و زميلتي في الشغل قعدت في الكرسي قصادي..

علياء:( مالك زهجانه من الصباح?)

قلتا:( سميه بتزهج الزول من الصباح)

علياء:( انتي براك حساسه ذياده علي اللازم.. م تعبريها اصلا ليه تخليها تزهجك كده? قالت شنو?)

قلتا:( قالت لي ابوي سال مني.. لانو المده الاداني ليها عشان افكر في اخو سميه المعفن ده انتهت.. و مفروض ارد و اقول موافقه.. عشان هو اصلا دايرني اوافق)

علياء:( توافقي علي منو? علي صلاح? حرام عليهو ابوك ده والله.. كيف يرضي ليك تعرسي واحد ذي ده?)

قلتا:( هو داير رضا مرتو بس.. احنا م مهمين)

علياء:( و الحل شنو?)

قلتا:( م عارفه والله.. لو قلتاليهو لا حيزعل و يقلب الدنيا)

علياء:(و الحل شنو?)

قلتا:( م عارفه والله.. ربنا يسهلا من عندو)

عليااء:( اللهم آمين)

دخلتا البيت لقيت ابوي قاعد في الصاله( ابوي راجل كبير و ليهو ذي سنه قاعد في البيت م شغال هو شخصيتو صعبه شويه و سميه بتحرشو علينا ذياده)

قاعدين جمبو اخواتي الاتنين مي و ريم.. بقرو في الثانوي..

قلتا:( السلام عليكم)

ردو:( و عليكم السلام)

عبدالرحمن:( اتاخرتي ليه?)

قلتا:( المواصلات ي ابوي)

اخواتي جو علي حضنتهم و بوستهم..

قلتا:( كيفكم?)

ريم:( الحمدلله تمام)

مي:( احضر ليك الغدا?)

قلتا:( ايوا جيعانه جدددا)

مي:( حاضر)

و جرت هي و ريم علي المطبخ.. ابوي عاين لي..

عبدالرحمن:( خلصي و تعالي لي عايزك)

قلتا:( حاضر)

و مشيت علي الغرفه غيرتا و استحميت و صليت المغرب و جيت طالعه لقيت اخواتي مجهزين لي الاكل في الصينيه قعدتا اكل.. و هم قاعدين جمبي بونسوني ب المدرسه و صحباتهم ..

بعد شويه سالت ريم..

قلتا:( وين سميه?)

ريم:( مشت عن اختها)

قلتا:( كويس)

خلصتا اكل و مشيت قعدتا جمب ابوي..

عبدالرحمن:( ريم و مي ادخلو شوفو قرايتكم)

ريم و مي دخلو الغرفه...

ابوي قبل عاين لي..

عبدالرحمن:( اها قلتي شنو في موضوع صلاح?)

قلتا:( ي ابوي انا م دايره اعرس اسي)

عبدالرحمن:( ليه?)

قلتا:( ي ابوي لمن اتطمن علي اخواتي و يدخلو الجامعه بعدين بشوف موضوع العرس)

عبدالرحمن بزعل:( انتي شايفه روحك صغيره?)

قلتا:( لا ي ابوي.. بس م اسي ي ابوي)

ابوي بقي بكورك:( انتي شايفه روحك صغيره? انتي القدرك بعيالهم.. انتي فضل ليك سنه و يبقي عمرك 30 منو التاني بعاين ليك)

قلتا:( ي ابوي الموضوع م كده..منو القال ليك البتصل ال30 تاني ماف زول بعاين ليها)

حاولتا اتكلم مع ابوي براحه و بدون جوطه و احاول اهديهو بس هو كان منفعل و بكورك شديد لحدي م ريم و مي جو طالعين من الغرفه بعاينو لينا بخوف..

عبدالرحمن:( اسمعي هنا بكرا صلاح حيجي و حنتم الموضوع ولو رفضتي تمشي تشوفي ليك حته تانيه تعيشي فيها)

اتخلعتا من كلام ابوي و طردتو لي من البيت...

قلتاليهو بزعل:( بتطردني من البيت ي ابوي?)

عبدالرحمن:( ايوا بطردك مش م بتسمعي كلامي? تقعدي معاي ليه?)

مسحتا دموعي و مشيت علي غرفتي.. جو لاحقيني ريم و مي لقوني قاعده علي السرير و ببكي..بقو بهدو فيني..

ريم:( م تبكي ي مريم)

مي:( انا حاضرب ل محمد اخوي يجي يتفاهم مع ابوي)

قلتا بخوف:( لا اوعي...الموضوع حيكبر و ابوي حيزعل.. خلو ابوي علي انا بتفاهم معاهو)

مي و ريم كانو زعلانين علي زعلي.. انا كنت ليهم ذي امهم.. من امي اتوفت من 4 سنه و انا بقيت ليهم الام و الاخت الكبيره.. مسكتا نفسي قدامهم و مسحتا دموعي و قلتاليهم انا كويسه عشان يرجعو لدراستهم.. و قعدتا جمبهم مشغوله علي تلفوني..

تاني وقفتا في الشباك بقيت بعاين في الشارع.. شويه جات سميه طالعه علي العماره.. جات عكس الشارع البتجي منو من ناس اختها.. استغربتا شنو الجابها بالشارع ده.. طلعت العماره و انا مشيت علي باب الغرفه فتحتو براحه و بقيت اعاين برا في الصاله م كان في زول..شويه جات داخله براحه عاينت الصاله م لقت زول.. وقفت قدام المرايا عاينت لوشها و طلعت توبها و بقت تنادي في ابوي بدلع.. انا كشرتا و قفلتا الباب ..

تاني يوم قعدتا في الشغل راسي جايط و م قادره اركز في حاجه.. قاعده معاي علياء..

علياء:( اها و الحل شنو? )

قلتاو انا سرحانه:( م عارفه)

علياء:( هو

صلاح ده كعب كده?)

قلتا:( بقول ليك شغال في السوق سااي م عندو شهاده و لا اسمو م بعرف يكتبو و همجي جدا ..لا بعرف يتكلم لا يتناقش لا ااي شي)

علياء:( طيب الحل شنو?)

قلتا:(انا حامشي ل محمد اخوي احكي ليهو و يلقي لي حل بس)

علياء:( انتي قلتي م دايره تدخلي محمد في الموضوع)

قلتا:( ايوا في الاول كنت م دايره ادخلو لانو هو و ابوي م بتفقو و حيقلبوها مشكله.. بس اسي لازم اكلمو و نشوف حل)

علياء:( طيب رينا يسهل ليك)

قاعد محمد معاهو صحبو اسمو مصطفي.. قاعدين في مطعم بتونسو..

مصطفي:( اها العرس معاك كيف ي محمد?)

محمد:( والله تمام الحمدلله.. كنت مستنيك تجيني العرس)

مصطفي:( والله ي ريت كان نفسي اجيك بس شغل في بورسوان و جده مسك زمن كتييير ده مسك زمن كتير و م قدرتا اجي للعرس )

محمد يضحك:( م مشكله في عرسك ان شاءالله)

مصطفي:( ان شاءالله لمن القي بت الحلال)

محمد:( ليه بت اهل اميره م عاجباك?)

مصطفي:( لالا م بعرس اهل اميره دي م بنفعو معاي..هي اميره لحدي اسي م نافعه معاي)

يضحكو.. محمد تلفونو دقي عاين لقي اسمي..

محمد:( دقيقه ي مصطفي)

ردا...

محمد:( الو)

قلتا:( محمد كيفك)

محمد:( مريوم.. كيف الاخبار)

قلتا:( الحمدلله.. انت وين?)

محمد قلق:( في حاجه?)

قلتا:( لا بس عايزه اشوفك دايراك في موضوع)

محمد:( والله انا في مطعم مع واحد صحبي...انتي امشي البيت و انا بجيك بعد شويه)

قلتا:( لالا دايره في الموضوع برا بيتنا و بيتك)

محمد قلق:( مريم قلقتي بي.. في شنو?)

قلتا:( ماف شي ي محمد م تقلق.. ممكن اجيك مكانك?)

محمد:( حاضر تعالي)

وصف لي المطعم و قفل..

مصطفي بقلق:( في حاجه ي محمد?)

محمد:( لالا دي مريم اختي دايراني في موضوع و قلتا ليها تجي علي هنا بس)

مصطفي:(خلاص طيب انا استاذن)

محمد:( خليك شويه لحدي م تجي)

مصطفي:( طيب)

و بقو بتونسو..

مصطفي:( بكرا عندنا لعبه كوره رهيبه.. تجي تلعب معانا?)

محمد:( طوالي وين?)

مصطفي:( في الميدان الورا بيتنا.. انت اصل بيتنا و تمشي معاي)

محمد:( خلاص ظريف 5 بكون معاك)

مصطفي:( خلاص تمام)

مصطفي جاهو تلفون ..

مصطفي:( الو.. ايوا ي ابوي....حاضر.. تمام....حاضر...اسي بجي.. يلا سلام)

و قفل..

مصطفي:( محمد معليش انا لازم امشي ..ابووي داير حاجات ضروريه)

محمد:( خلاص ماف مشكله.. لحدي بكرا)

مصطفي سلم علي محمد و طلع مشي...

مصطفي ماشي بعربيتو في الشارع و كان بتكلم بالتلفون.. انا جيت قاطعه الشارع و بطلع في تلفوني عشان اضرب ل محمد.. اللحظه ديك مصطفي جا ماشي بالعربيه بسرعه و ضربني..

محمد قاعد في المطعم مستنيني اجي لمن اتاخرتا دقي لي تلفون .. الوقت داك مصطفي كان شالني في عربيتو و مشي بي علي المستشفي.. التلفون دقي في الشنطه بس مصطفي م سمعو.. دخلني المستشفي و جرو بي علي الغرفه للفحص و يوقفو الدم النزل من راسي..

محمد طلع وقف برا جمب المطعم و بقي بضرب لي ورا بعض و هو مقلق شديد و التلفون في العربيه...

نتلاقي♥