الجزء 6

بقيت بعاين ليهو بزعل...دايره زعلي ياثر عليهو او يرجعو في كلامو بس قلبو كان حجر معاي...مي جابت طرحه ختتها لي في راسي و ابوي كورك ل صلاح جا داخل يسلم علي... صلاح راجل كبير تقريبا اكبر مني ب 12 او 15 سنه...لونو قمحي و هو سمين شديد و قصير بلبس جلابيه طوالي.. و ملامحو عاديه بلبس نظارات نظر.. صلاح وقف ابتسم و جا علي مادي يدو من بعيد..

صلاح:( مبروك ي عروسه)

مديت يدي سلمت عليهو و انا م واعيه ب حاجه.. قال لي كم كلمه كده و طلع و ابوي وراهو.. سمعتا تاني سميه قعد تزغرت... رقدتا في السرير و بقيت ببكي بحرقه..شويه دقيت ل محمد حكيت ليهو اتخلع جدا و قال لي بجيك بعد شويه...

محمد جا الساعه11 الضيوف كانو مشو و ابوي رقد في غرفتو.. دقي الباب فتحت ليهو ريم...

ريم:( محمد الحق مريم قاتله نفسها بالبكي)

محمد جا جاري لي عل غرفتي لقاني راقده و ببكي.. محمد حضني عليهو..

محمد:( م تزعلي م حصل شي احنا لسه علي البر و م بخلي ابوي يعرسك ليهو مهما حصل)

محمد كان بطمن فيني بس كنت ببكي و م قلتا كلمه.. محمد قعد معاي لمن هديت و وعدني يتصرف...طلع سال من ابوي لقاهو نام.. طلع مشي بيتهم..

من دقي الباب جات سهي جاريه..

سهي:( محمد اتاخرتا ليه?)

محمد:( مشيت بيتنا)

سهي:( قلقتا عليك ليه تلفونك مقفول?)

محمد:( قفل كهربا)

محمد قعد في الكنبه و جمبو سهي..

سهي:( حصل شنو?)

محمد:(ابوي وافق علي صلاح و جاب اهلو و جو و اداهو مريم... و مريم قاتله نفسها بالبكي)

سهي اتخلعت:( ليه عمي عمل كده?)

محمد:( م بتعرفي ابوي و قوه راسو)

سهي:( يحليلا مريم.. و قلتا لابوك شنو?)

محمد:( م لاقيتو كان نام)

سهي:(و الحل شنو?)

محمد:( بكرا الجمعه بمشي ليهو و بتفاهم معاهو)

سهي:(ان شا۽الله .. ادخل غير و حاعمل ليك اكل)

محمد عاين ل سهي في وشها و طيبتها و حنيتها الباينه في وشها..

محمد و هو مبتسم:( ربنا يخليك لي...عارف اني مقصر معاك.. معليش اعفي لي بس الليله حاقعد معاك شويه م حانوم ...حادخل استحما القاك حضرتي لي اكل)

سهي ابتسمت و قامت مشت علي المطبخ..

سامي قاعد في غرفتو بتكلم مع سحر..

سامي:(انا م فاهم كلامك ده)

سحر:( دايره انا و انت نبقي اصحاب عادي مالك!!.. عندك اعتراض?)

سامي:( لا ابدا)

سحر:( طيب مالك واجع راسي من الصباح...خلاص رايك شنو نتلاقي بكرا?)

سامي:( نتلاقي وين?)

سحر:(اي محل نتغدا مع بعض و نتونس)

سامي:( بكرا الجمعه م ينفع.. خليها السبت)

سحر:( طيب م مشكله نخليها السبت)

سامي:(طيب)

تاني يوم قعدتا في غرفتي م طلعتا ابدا.. ريم و مي جابو لي الاكل في الغرفه و فطرو معاي..ابوي و سميه م جوني الغرفه ولا جابو سيرتي كاني م موجوده.. نفسيتي كانت كعبه شديد بس عندي امل في محمد يحل الموضوع..

محمد قاعد في الصاله قدام التليفزيون جات سهي شايله صينيه الشاي الساده ختتها قدامو..و مدت ليهو كبايتو..

محمد:( عايزه تمشي ناس امك الليله?)

سهي:( انت طالع?)

محمد:( ايوا حامشي العب كوره مع ناس مصطفي و بعدها حامشي البيت اشوف ابوي و مريم و برجع م بتاخر)

سهي:( خلاص وديني اشوف امي و انت و راجع تعال سوقني)

محمد:( طيب.. خلاص نشرب الشاي و اجهزي)

سهي:(طيب)

كنت مستنيه بفارغ الصبر محمد يجي و يحل الموضوع كل شويه بعاين للساعه..

محمد و مصطفي خلصو الكوره.. مصطفي وقف بتونس مع اصحابو و محمد قعد علي الارض سرحان.. بموضوعي.. مصطفي لمن خلص جا قعد جمبو..

مصطفي:(مالك سرحان?)

محمد:( ماف شي)

مصطفي:(لا الليله شكلك م طبيعي.. في شنو?)

محمد:( مشاكل عاديه)

مصطفي بهظار:( متشاكل مع مرتك وله شنو?)

محمد:( لالا ياخ.. بعد الشر..سهي دي ماف منها..و م بتزعلني ابدا.. بشكر ربنا ليل نهار عليها)

مصطفي:(ماشا۽ الله..ربنا يسعدكم اكتر و اكتر ..طيب مالك?)

محمد:(ابوي)

مصطفي:( مالو?)

محمد:( خطب ل مريم واحد غصب عنها)

مصطفي:( كيف يعني م فاهم)

محمد:( في واحد اسمو صلاح.. اخو سميه مرت ابوي..قال داير مريم و مريم م دايراهو.. ابوي اتشاكل مع مريم و اصرا يخطبو ليها و كلم صلاح قال ليهو موافق و صلاح جاب اهلو و وافق ليهم انو يعرس ليهو مريم.. مريم زعلانه شديد و قاتله نفسها بالبكي و دقت لي مشيت ليها و قلتا ليها بحل الموضوع و اسي مفروض امشي اتكلم مع ابوي...بس ابوي صعب م بتفاهم و كلمتو وحده و انا و هو طوالي بنتشاكل.. و انا م بحب اتشاكل معاهو لانو ده ابوي في الاخر...بس اعمل شنو.. مستحيل اخليهو يعرس ل مريم غصب عنها)

مصطفي:( يعني صلاح ده م زول كويس?)

محمد:( لالا زول ااي كلام.. م لايق علي مريم ابدا...و انا ذاتي م عاجبني ولا دايرو)

مصطفي:( خلاص اتكلم مع ابوك براحه و حل الموضوع)

محمد ابتسم بتريقه:( ابوي م بتفاهم انت م بتعرفو)

مصطفي:(ممكن انا اساعدك بشنو?)

محمد:( ولا حاجه.. كدي انا بحاول اتكلم معاهو و نلقي حل)

مصطفي:( ربنا يسهل ليك)

كنت نايمه صحيت بصوت ابوي و محمد بجوطو.. قعدتا علي حيلي بقيت بسمع فيهم..

عبدالرحمن:(دي بتي اانا ي محمد م بتك و انا حر فيها اعرس ليها

م اعرس ليها انا حر)

محمد:( ابوي ممكن م تكورك.. ابوي مريم م راضيه ليه تغصبها? )

عبدالرحمن:( انا ابوها انا البعرف مصلحتها اكتر منك و منها)

محمد:( ي ابوي انت ليه مصر علي صلاح ده ليه يعني? عاجبك فيهو شنو? الحاجه الفيهو و م في باقي الناس?)

عبدالرحمن:( اتكلم معاي باحترام احسن ليك.. صلاح زول كويس و انا دايرو ل مريم و الموضوع ده منتهي تكتر كلام والله الليله دي اعقد ليها علي صلاح و اخلص منها)

محمد:( تخلص منها كيف يعني? انت متضايق منها يعني?)

عبدالرحمن:(البت تمت30 سنه و م عرست.. تقعد لحدي متين.. امك زمان عرست و هي عمرها 15 سنه.. لمن بقت قدر اختك دي كانت ولدتكم كلكم)

محمد:( ي ابوي في فرق بين زمان و اسي.. اسي مريم ماشا۽الله عليها قرت و اشتغلت.. زمان ناس امي لا عندكم قرايه لا شغل بعرسو طوالي)

عبدالرحمن:(دي م حصه تاريخ بلا زمان بلا اسي.. الموضوع ده منتهي و خلاص م داير كلام معاك فيهو ابدا)

و مشي علي الغرفه و دخل و قفل وراهو الباب.. محمد قعد في الكرسي زعلان و م قادر يعمل حاجه...في الاخر ده ابوهو وهو م بقدر يشاكلو وله يكورك فيهو.. جا داخل لي الغرفه طمني و قال حيلقي حل ان شا۽الله..

قاعدين سامي و سحر في مطعم بياكلو و بتونسو.. بمعني اصح سحر هي البتونس في سامي.. سامي م كان قادر يتونس معاها.. سامي بعرف بنات في الجامعه و بتونس معاهم و بتعامل عادي بس سحر طريقه و تصرفاتها و جراءتها خلتو م قادر يتعامل معاها..

سحر:( انت مسكين م ذي علياء اختك)

سامي:( علياء شرانيه يعني?)

سحر:(لا طبعا معقوله بس.. دي صحبتي و حبيبتي)

سامر:( اها كويس)

سحر:( اها احكي لي عن قرايتك و جامعتك و كده...بالمناسبه انا خريجه محاسبه انت عارف?)

سامر:( ايوا)

سحر:( يلا احكي لي م تقعد ساكت كده)

سامي بدا يحكي ليها عن جامعتو و اصحابو..

قاعده علياء في مطعم مستنيه هاني يجي.. بقت تعاين في الساعه كل شويه و هي مقلقه خايفاهو م يجي.. بعد شويه جا داخل هاني من باب المطعم و بفتش عليها اشرت ليهو بفرح و جا عليها..

هاني و هو بسلم عليها:(اسف علي التاخير)

علياء بابتسامه:( ماف مشكله.. بس قلقتني حصل شنو?)

هاني قعد:( الاء بتي كانت زعلانه عايزه تمشي البقاله تجيب حاجات .. و امها قالت اوديها انا.. فبعد لبستا سوقتها البقاله و اشتريت ليها الحاجات في العربيه احنا و راجعين كانت بتشرب في عصير و اتدفق فيني.. اضطريت اطلع البيت تاني اغير و اجي)

علياء ابتسمت:( العيال كلهم كده)

هاني:( بالضبط كده.. الاخبار شنو?)

علياء:( كلو تمام الحمدلله.. انت كيفك?)

هاني:( تمام الحمدلله.. اها نطلب الاكل انا جيعان جدا)

علياء:(ممكن)

نظرات علياء ل هاني كانت تفسر كميه الحب الداخلها ليهو.. حتي وهو متزوج.. حتي وهو عندو عيال..مشاعرها نحيتو م كانت قادره تتحكم فيها ابدا.. بصراحه هاني كان وجيه جدا و راقي و فاهم و مدير بنك و ليهو مركزو.. علياء اتعرفت عليهو في البنك .. ناس شركتهم رسلوها البنك تخلص شغل و اتعاملت معاهو و اعجبت بيهو عرفت انو متزوج و عندو بت و ولد صغار بس برضو اتواصلت معاهو.. و هو كمان كان معجب بيها جدا..

بقيت مستنيه بفارغ الصبر افك الجبص عشان اقدر اتصرف و ابوي م بتحكم فيني كده و يسمع كلام سميه..

تلفوني دقي عاينتا لقيتو رقم غريب.. رديت..

قلتا:( الو)

جاني صوت راجل:( الو.. كيفك ي مريم?)

حسيت الصوت م غريب علي..

قلتا:( مرحب.. منو? )

قال لي:( انا صلاح ي مريم)

كنت دايره اقول ليهو صلاح منو بس عرفتا طوالي انو ده صلاح خطيبي.. زعلتا شديد..

قلتاليهو بزعل:( اسمع هنا اوعي تضرب لي تاني انت فاهم)

و قفلتا الخط في وشو..

شغال مصطفي في مكتبو جا داخل عزالدين..

عزالدين:( السلام عليكم)

مصطفي:( و عليكم السلام.. اتفضل ي ابوي)

مصطفي قام من الكرسي لابوهو..

عزالدين:( لالا خليك.. انا دايرك في كلمتين و ماشي)

مصطفي قعد و عز الدين قعد في الكرسي القصادو..

عزالدين:( ليك كم يوم م بتاكل معانا في البيت..ليه? )

مصطفي:( بكون مشغول ي ابوي)

عزالدين:(انت زعلان من اميره?)

مصطفي:( لالا)

عزالدين:(لا زعلان بعرفك انا.. مصطفي عاين.. انت بتعرف اميره و كلامها م جديد عليك.. بس كلامها غلط و ساره انت ليك حق عليها انت اخوها الكبير و تسمع كلامك.. و اميره انا لي تصرف معاها)

مصطفي:( ي ابوي الموضوع ده خلاص انتهي..انا خايفه علي ساره بس.. هي اختي و انا م برضي فيها..خايف عليها يمكن ناس يغشوها او تقع مع ناس كعبين.. الدنيا بقت م معروفه)

عزالدين:( انا عارف و كلامك صح..المهم لو لقيتها اتاخرت شاكلها م تخليها و م تشتغل ب اميره ولا كلامها)

مصطفي:(انا م داير مشاكل مع اميره.. بس خايف علي اختي)

عزالدين:(انا بكلم ساره.. تاني قرايه برا ماف.. و قبل المغرب تكون في البيت)

نتلاقي♥