الجزء 35

بليل راقده في غرفتي و ابوي و اخواتي نايمين.. سمعتا باب الشقه بدق بس بصوت خفيف.. قمتا طلعتا مشيت علي الباب..

قلتا:( منو?)

جاني صوت مصطفي:( انا مصطفي)

فتحتا الباب لقيتو واقف مبتسم.. ابتسمتا ليهو..

قلتا:( ليه م كلمتني انك جاي?)

مصطفي:( حبيت اعملها ليك مفاجاه.. عمو كيف? ماف تحسن?)

قلتا:( لالا نايم بس م بقوم)

مصطفي:( ربنا يشفيهو...و انتي كيف?)

قلتا:( كويسه)

قرب علي و مشي يدو علي شعري..

مصطفي:( البيت كعب من غيرك م قدرتا اقعد بدونك)

ابتسمتا:( كلها يومين و بجي)

مصطفي:( يومين كتيره.. انا الليله بس م قدرتا اقعد بدونك)

قلتا:( خلاص تعال اقعد معاي هنا)

مصطفي:( اهو جيتك)

قلتا:(خلاص ادخل)

دخلنا و قفلنا الباب..

مصطفي:( اخواتك نامو? )

قلتا:( ايوا انت عارف الساعه كم)

مصطفي:( كده طيب ماشي)

و قبل داير يمشي مسكتو رجعتو..

قلتا:( بهظر معاك.. اقعد.. انا محتاجه ليك شديد)

مصطفي قرب مني و مسح ب يدو شعري..

مصطفي:(اهو انا جمبك و م حاسيبك ابدا)

وجود مصطفي جمبي هون علي ااي حاجه...بس قلقي علي علياء م وقف.. شويه دقيت ليها ردت و كانت بتبكي قالت لي امي عرفت و ضربتي و نبذتني و طلعت خلتني..

قلتا:( رد فعلها حاجه طبيعيه بس لمن تلقي العرس و هاني يعترف بيك حتبقي ااحسن)

بقيت بهدي فيها شويه و مصطفي قاعد جمبي و مستغرب دي منو.. لمن خلصتا و قفلتا..

مصطفي:( دي منو ي مريم? كدي احكي القصه دي)

بعد ليلي عرفت الموضوع حيتعرف عادي و كل الناس حيعرفو و بعدين هم زواجهم صح.. و م فيهو مشكله..

قلتا:(حاقول ليك بس م تحكي ل زول لمن تسمع الموضوع براك)

مصطفي اتصلح في قعدتو:( قلقتي بي اها احكي سرعه)

قلتا:( علياء متزوجه واحد ب المحكمه.. زواج شرعي و اسي هي حامل و هو رافض يعلن الزواج)

مصطفي استغرب:( و ليه رافض? )

قلتا:( عشان هو اصلا متزوج و عندو عيال)

مصطفي:( هي اصلا تعاين ل واحد متزوج ليه? دي غلطتها هي)

سكتا مساافه..

قلتا:( انت بتعرف راجلها)

مصطفي اتخلع:( انا بعرفو? ده منو?)

قلتا:( هاني.. راجل ناديه صحبت نور)

مصطفي اتخلع شديد:( هاني?معقوله? و بتعرفو من وين?)

ليلي لبست و جات وقفت ل علياء..

ليلي:( اديني عنوان الراجل ده سرعه)

علياء:( ي ماما خليها الصباح)

ليلي صرخت:( يلا سرعه اديني اسي)

علياء خافت من شكل امها و كوراكها و شكلها كانت بتبكي..

علياء ادت امها العنوان شالتو و مشت..

قلتا ل مصطفي:( شركتنا بتتعامل مع البنك حقهم و ب كده عرفتو)

مصطفي راسو جاط شديد..

مصطفي:( هاني? معقوله يعمل كده م قادر اصدق)

قلتا:(اسي ام علياء جات و عرفت و م معروف بحصل شنو)

مصطفي:( انتي ليه م كلمتيني?)

قلتا:( كنت مستنيه الموضوع يتحلا بدون م الناس تعرف)

مصطفي:( و اسي امها حتعمل شنو?)

قلتا:( ضربتها و لمن دقيت ليها كانت بتبكي.. خايفه عليها شديد)

مصطفي:( هو الزواج شرعي مفروض م تزعل لانو صح.. بس عشان عرستو في الدس و هو اسي م داير يعترف بيها.. ده الزعلها اكتر)

قطع كلامنا تلفون علياء رديت عليها..

علياء:( مريم امي طلعت ماشه ل هاني في بيتهم...امشي الحقيها خايفاها تجوط الدنيا ذياده)

وقفتا علي حيلي مخلوعه:( مشت ليهو البيت?)

علياء:( الحقيها ي مريم ممكن تسمع كلامك و ترجع م دايره مشاكل و فضايح انا)

قلتا:(حاضر حاضر)

مصطفي وقف معاي..

مصطفي:( في شنو?)

قلتا:(خالتو ليلي طلعت مشت ل هاني في البيت.. ارح نلحقها)

مشت لبستا لي عبايه سرعه و طلعنا انا و مصطفي مشينا ل بيت هاني استنينا جمب العماره تحت مستنيين ليلي تجي.. احنا وصلنا قبلها لانو بيتنا اقرب ليهم.. بعد شويه وقف تاكسي و نزلت منو ليلي ..

قلتا:(اهو وصلت)

و نزلتا طوالي و مصطفي وراي.. ليلي لمن لقتني قدامها اتخلعت..

قلتا:( خالتو كيفك?)

ليلي:( مريم كيفك?)

و سلمت علي..

قلتا:( ده مصطفي راجلي)

ليلي:( اهلا ي مصطفي الف مبروك...ربنا يسعدكم ي رب)

مصطفي:( الله يخليك ي خاله)

قلتا:( خالتو تعالي دقيقه)

و مشينا خطوتين بعيد من مصطفي.

قلتا:( خالتو م ينفع تطلعي ل هاني اسي ماف داعي ل المشاكل و في مرتو و عيالو)

ليلي:( لالا والله حاطلع و م حاسيبو)

قلتا:( خالتو والله الصباح بوديك ليهو لحدي مكان شغلو و تتفاهمي معاهو بس بيتو لا)

ليلي باصرار:( لالا والله م بسيبو م برجع ساي.. اطلع اوريهو انو بنات الناس م لعبه و اعراض الناس م لعبه)

قلتا:(ي خالتو والله بوديك ليهو بس اصبري لحدي الصباح)

ليلي:( لا م حارجع والله م حارجع)

قلتا:( خالتو المواضيع الذي دي م بتتحلا كده.. بالهداوه ااي شي بتحلا)

ليلي:( مريم انا م حارجع لو م شفتا الزول ده زحي من قدامي لو سمحتي)

زحتني و ماشه علي العماره جاها مصطفي..

مصطفي:( عايني ي خاله انتي خلاص اقعدي هنا في العربيه و انا حاطلع اناديهو ليك نمشي بالعربيه قدام و نتفاهم .. تمام?)

قلتا:( ااي ي خالتو ده حل كويس شديد اطلع ناديهو ي مصطفي و احنا حنستنا في العربيه)

ليلي:( طيب امشي ناديهو و انا مستنياهو هنا)

مشينا انا و ليلي علي العربيه و مصطفي طلع البيت..

دقي الباب و هو خجلان و محرج شديد و بدعي انو ناديه م تفتح الباب..

هاني كان راقد في الغرفه و ناديه في المطبخ سمعت الباب مشت فتحت لقتو مصطفي استغربت بي حاولت تخفي استغرابها..

ناديه:( مصطفي اهلا وسهلا اتفضل)

مصطفي:( كيفك ي مدام ناديه)

ناديه:(تمام الحمدلله.. اتفضل ادخل)

مصطفي:( اسف علي الازعاج بس عايز هاني ضروري )

ناديه:( بناديهو ليك اتفضل ادخل)

مصطفي:(لالا خليهو يجيني هنا بس)

ناديه مع اصرار مصطفي واقفت و دخلت لقت هاني نايم..

ناديه:( هاني هاني اصحي)

هاني:(امممم)

ناديه:(.مصطفي عايزك برا.. اصحي)

هاني فتح عينو ب خلعه:( مصطفي منو?)

ناديه:( مصطفي عزالدين)

هاني:( مصطفي مالو بليل ده?)

ناديه:( م عارفه مستنيك في باب الشقه و رفض يدخل امشي شوفو)

هاني قام طوالي مشي..طلع جمب الباب لقي مصطفي سلم عليهو..

هاني:( اتفصل ادخل)

مصطفي:(لا تعال معاي دقيقه و اقفل الباب)

هاني حسي في شي .. قفل الباب و مشي مع مصطفي.. مصطفي وراهو انو ام علياء تحت و دايراهو.. هاني اتوتر شديد و وقف مساافه بس نزل معاهو..

جا هاني و مصطفي علي العربيه و احنا واقفين عليها..اول من وصلونا ..

ليلي:( انت هاني?)

هاني:( اهلا ي خاله اذيك)

ليلي بقت تكورك فيهو:( انت م بتخاف من الله? م عندك اخوات? م بتخاف علي عرضهم? تلعب ببنات الناس?)

مصطفي:( ي خاله دقيقه نتفاهم)

ليلي:( م بتفاهم انا عندي حل واحد بس...يعلن عرسو من بتي و ينسب الولد ليهو غير كده ماف ااي حل)

هاني:( ي خاله انا عندي ظروف و بتك كانت موافقه عليها انا اسي م عندي ليها ااي حل)

ليلي:( ظروف? ظروف شنو? ظروفك دي كانت وين لمن عرستها? ليه بقيت فالح تغشها و تعرسها و اسي تجي تنكرها و تقول ظروف? انا م بعرف ااي ظروف...انا بعرف تعلن زواجك منها بس او والله البتشوفو مني م حيرضيك)

ناديه وقفت في الشباك لقتنا كلنا واقفين تحت.. عاينت باستغراب شديد عرفتني انا بس م عرفت ليلي...

ناديه في نفسها:(ي ربي في شنو? و مصطفي و مريم مالهم مع هاني بليل ده?? و دي منو المرا المعاهم دي)

قاعدين سحر و سامي في بيت سحر..

سحر:( اهو امك جات م عندك ااي سبب تاني للتاجيل)

سامي:( خلي النتيجه تطلع و القي لي شغل.. يعني اسي امشي لاهلك اقول ليهم يدوب متخرج و م شغال)

سحر:(م عندك شغله باهلي اانا بتصرف معاهم)

سامي:( انتي ليه مستعجله?)

سحر:( ي سامي علي الاقل كلم امك تبقي عارفه م ممكن كده نكون م عارفين راسنا وين)

سامي:(سحر...حبيبتي اتطمني.. حاعرسك.. والله حاعرسك)

سحر:( انا م متطمنه والله.. دايراهم يعرفو حتي لو عرسنا بعد كم سنه)

سامي:( لالا كم شهر بس)

سحر باصرار:( لا ي سامي.. تكلم امك بس.. و لمن توافق انا بسكت تاني)

سامي:(حاضر حاضر حاكلمها)

سامي بينو و بين نفسو كان خايف شديد من رد فعل امو..

نتلاقي♥