الجزء 4

قاعد محمد معاي و انا كنت مكشره..

محمد:( مالك ي مريم?)

قلتاليهو:( ماف شي)

محمد:( من طلعتي من المستشفي انتي زعلانه كده و مكشره.. المشكله شنو?)

قلتاليهو:( عارفني م بحب قعاد البيت ولا الرقاد ده)

محمد:( معليش ي مريوم.. كلها شهرين و تبقي كويسه و تتحركي عادي)

قلتاليهو:( و البيت و المصاريف?)

محمد:( انا مشيت وين ي مريم?)

قلتاليهو:( ي محمد انت عندك بيتك و مرتك م حتقدر علينا و عليهم)

محمد:( لا حاقدر ان شا۽الله...ربنا بسهلا والله م تشيلي هم كدي ياخ)

ابتسمتا و سكتا.. محمد بقي بتونس معاي عادي و يحكي لي ..

جا داخل مصطفي البيت مع ابوهو عزالدين..سلمو علي عواطف و نهي و قعدو..

عزالدين:( الاخبار شنو ?)

عواطف:( تمام والله انت عامل شنو مع الشغل?)

عزالدين:( والله تمام الحمدلله)

عواطف:( الحمدلله)

عزالدين:( اها نويتو تستغرو هنا?)

عواطف:( ان شا۽الله .. لو لقيت عرس ل نهي دي بخليها هنا مع راجلها و برجع البحرين ل فيصل)

اميره:( هههه عايزه تهربي من هنا?)

عواطف:( البحرين حلوه انا قاعده بس عشان نهي)

اميره( ربنا يسهل ليهم و بفرح بيها هي و ساره مع بعض ي رب)

عواطف:( آمين ي رب)

نهي كل القعده كانت بتعاين ل مصطفي بس مصطفي ساكت و م اتكلم معاها ابدا..

ساره تلفونها دقي شالتهو و طلعت فوق دخلت غرفتها..

ساره:( الو.. ايوا ي امجد الاخبار شنو?)

امجد:( تمام والله يدوب طلعتا من المستشفي ماشي البيت اغير و حاشوف الشباب ديل وين?)

ساره:( تمام طيب م تتاخر ارجع بدري عشان ترتاح)

امجد:( عشان ارتاح وله عشان اتونس معاك?)

ساره تضحك:( الاتنين)

امجد:( ان شا۽الله م بتاخر...يلا سلام)

و قفلت...

مصطفي دخل غرفتو استحما و غير...و جا طالع من الحمام لقي الباب بدق..

مصطفي:( ادخل)

الباب فتح لقاها نهي..

نهي ابتسمت..

نهي:(كيفك ي مصطفي?)

مصطفي:( اهلا ي نهي.. الحمدلله.. انتي كيفك?)

نهي:( الحمدلله)

مصطفي سكت و هي سكتت..نهي اتوترت..

نهي:( خالتو قالت ليك الغدا جاهز)

مصطفي:( حاضر اسي بجي)

و فتح الدولاب بقي بفتش فيهو...نهي م لقت سبب لوقفتها تاني.. طلعت و قفلت الباب..

مصطفي نزل اكل مع ابوهو و ماشي للباب.. وقفتو اميره..

اميره:( مصطفي ماشي وين?)

مصطفي:( العب كوره)

و طلع قبل م يسمع الرد...

محمد قاعد في الصاله في بيتو و شكلو مهموم.. جات طالعه سهي من المطبخ لقتو قاعد سرحان ..مشت عليهو.. قعد جمبو..

سهي:( مالك ي محمد?)

محمد :( ماف شي)

سهي:( مهموم كده ليه?)

محمد:( م عارف ادبر مصاريف بيتنا هناك كيف.. مرتبي يدوب بمشينا انا و انتي بعد تعب.. اجيب مصاريف البيت هناك و مصاريف ريم و مي من وين?)

سهي:(خليني ارجع الشغل انا ي محمد)

محمد:( لالا انتي م بتشتغلي.. خليني انا بدبرها)

سهي:( كيف بس?)

محمد:( م عارف.. ربنا بسهلا...يلا انا حادخل انوم)

و مشي علي الغرفه..

الصباح قاعده في غرفتي بقرا في كتاب بملل.. سمعتا الباب دقي.. سمعتا سميه بتتكلم مع راجل.. م عرفتو ده منو.. سميه جات فتحت باب الغرفه و دخلت..

سميه:(مريم.. مصطفي برا...جايب معاهو كميه من الحاجات)

استغربتا..

قلتاليها:( حاجات ذي شنو?)

سميه بفرح:( حضار و فواكه و كل حاجه)

كشرتا وشي..

سميه:( يلا تعالي اساعدك اطلعي ليهو)

م كنت طايقاهو م عارفه ليه.. مع اني عارفه الحادث قضا۽ و قدر و هو م ليهو ذنب.. بس برضو م طايقاهو... سميه ساعدتني اقعد علي الكرسي و طلعتني برا.. لقيتو قاعد علي الكنبه من شافني وقف مبتسم..

مصطفي:( صباح الخير)

قلتاليهو:( صباح النور)

سميه:( تقعدي هنا وله علي الكرسي?)

قلتاليها:( خليني هنا)

سميه:( طيب.. حاعمل ليكم قهوه)

و مشت..

مصطفي:( بقيتي كيف?)

قلتاليهو:( كويسه الحمدلله...ممكن اعرف دي شنو الحاجات الجبتها دي?)

مصطفي اتحرج..

مصطفي:( حاجه بسيطه)

قلتاليهو:( برضو ماف داعي ليها.. م محتاجين ليهم)

مصطفي:( العغو م قلتا محتاجين.. بس ي مريم انتي الكنتي ماسكه البيت و انا ضربتك و انتي م حتقدري تشتغلي عشان كده انا حاعوضك لمن تبقي كويسه و ترجعي شغلك)

قلتاليهو:( الحادث قضا۽ و قدر و انتهينا)

مصطفي:( انتي متحسسه ذياده عن اللازم.. محمد ده صحبي من سنين و الحاجه دي جايبها عشان محمد لو انتي م دايراها عشانك)

قلتاليهو:( محمد عندو بيت)

مصطفي:( بس ده بيتو الاول و انتو اهلو)

عاينتا ليهو مساافه و سكتا..

مصطفي بهظار:( جبتا ليك ترمس كويس شديد للكسر)

م قدرتا امسك نفسي و ضحكتا..

مصطفي:( اخيرا ضحكتني.. كنت قايلك م بتضحكي دي باقي الناس)

كشرتا و سكتا...جات سميه شايله صينيه القهوه ختتها قدام مصطفي و كبت القهوه و ادتو فنجان و ادتني فنجان و قعدت تتونس معانا.. مصطفي قعد شويه و مشي..

دقيت ل محمد كلمتو بالحاجات الجابها مصطفي.. محمد ضحك قال لي عارف هو كلمني .. مصطفي حاسي بالذنب و قال بديك مرتبك كل شهر لمن تبقي كويسه.. بس قلتا ليهو م ينفع و كده في الاخر قال الا يجيب حاجات للبيت و اصرا شديد قلتا ليهو طيب جيبها.. اقتنعتا ب كلام محمد شويه و مشيت الموضوع..

ج

ا مصطفي داخل بيتهم لقي ابوهو و اميره قاعدين في الصاله..

عزالدين:( مصطفي تعال)

مشي عليهم و قعد..

عزالدين:( ليه م قعدتا امباوح مع الضيوف?)

مصطفي:( انت بتحاسب فيني ذي العيال ليه?)

عزالدين:( م بحاسبك انا بس سالتك)

مصطفي:( انت عارف عندي كوره م بخليها مهما حصل.. تاني حاجه خالتو عواطف و نهي بجو كل اسبوع يعني م حاجه جديده)

اميره:( عشان ديل اهلي صح?)

مصطفي:( اهلك و اهلي واحد ي خالتو..بس انا وريتكم نهي و امها عايزني و انا م دايرها.. و انتو بالغصب دايرين تعرسوها لي)

اميره:( بس انت عيبا لي مالا نهي?)

مصطفي:( م دخلت لي مزاجي م دايراها)

عزالدين:( ي مصطفي انت مفروض تعرس بعد ده.. لو نهي لو غيرها.. مفروض تعرس)

مصطفي:( لمن ربنا يكتبها لي بعرس ان شاءالله.. تصبحو علي خير)

و قام طلع علي غرفتو..

اميره:( شفتا ولدك و عمايلو?)

عزالدين:( كم مره ي اميره قلتا ليك م تقولي اهلي و اهلكم انتي مرتي و ديل كلهم عيالي)

اميره:( بس ولدك بفرقها.. م عايز نهي عشان من اهلي)

عزالدين:( يمكن البت بالجد م داخله ليهو في راسو)

اميره:( ليه م تدخل ليهو)

عزالدين:( م عارف بس كل انسان و زوقو...انتي خلي الموضوع ده ..لو مكتوبين لبعض حيعرسو ان شاءالله)

اميره بزعل:( طيب)

عزالدين:( ممكن تجيبي لي حبوبي مفروض ابلعها من ساعه و نسيت)

اميره:( حاضر)

قامت مشت..

قاعده في غرفتي جات داخله سميه..

سميه:( مريم انا ماشه السوق دايره حاجه?)

قلتاليها:( لا شكرا.. بتتاخري?)

سميه:( لا م اظن لو دايره حاجه اتصلي علي.. يلا سلام)

و طلعت.. بقيت بقرا في كتاب و شويه امسك تلفوني.. دقت لي علياء سلمت و كده و قالت بتجيني..

سميه اتاخرت.. قعدت 3 ساعات في السوق.. م ضربتا ليها بس استغربتا انو السوق قريب و اصلا عندنا حاجات كتيره في البيت مشت لشنو م عرفتا.. ابوي بطلع الصباح برجع الظهر مرات بمشي لاصحابو شغالين في السوق و مرات يمشي مشاوير و زيارات...المهم من الساعه 10 صباحا بطلع م برجع الا 3 ظهر كل يوم.. سميه جات داخله البيت لقتني قاعده في الصاله كانت شايله ليها حبه خضار في كيس...ختتهم علي الطربيزه و جات علي..

سميه:( الدنيا برا مولعه نار)

قلتا:( اتاخرتي)

سميه:( اعمل شنو بس السوق زحمه و لاقيت وحده جارتي هنا لفيت معاها تشتري حاجاتها.. و قعدنا شويه اتونسنا و شربنا قهوه في المطعم)

قلتا:( تمام طيب)

سميه:( حامشي الحق اطبخ قبل م ابوك يجي)

و مشت علي المطبخ...تصرفات سميه غريبه بس م قدرتا افهم في شنو..

محمد و مصطفي كانو بلعبو كوره مع بعض لمن خلصو قعدو علي الارض في الميدان شربو مويا و بياخدو نفسهم..

مصطفي:( الاخبار شنو ي محمد?)

محمد:( والله تمام ماشي الحال.. انت اخبارك شنو?)

مصطفي:( كلو تمام والله)

في ولدين جمبهم كانتو بتونسو.. واحد فيهم قال لتاني:( الكوره دي حلم حياتي.. نفسي ابقي لاعب كبيير ذي رونالدو و ميسي)

مصطفي و محمد عاينو لبعض و ابتسمو..

مصطفي رقد علي الارض و بعاين للسماء..

مصطفي:( انت حلم حياتك شنو ي محمد?)

محمد رقد علي الارض جمبو..

محمد:( نفسي اسافر اوربا و اشتغل هناك و ارتاح من التعب الانا فيهو ده)

مصطفي ضحك:( منو القال ليك لو سافرتا اوربا حترتاح?)

محمد:( بس احسن من هنا من جهه القروش)

مصطفي:( صح من جهه القروش احسن من هنا بكتير)

محمد:( و انت حلمك شنو?)

مصطفي سكت مساافه...

مصطفي:( نفسي اشوف امي)

محمد سكت..

مصطفي كان سرحان في السما۽:(نفسي اشوفها مره وحده.. و المسها و احس بنفسها.. نفسي اشوفها ماشه و بتضحك وله بتبتسم.. نفسي المسها ولو لمره وحده بس)

محمد اتاثر ب كلام صحبو..

نتلاقي♥