الجزء 20

راقد مصطفي في السرير و سرحان في السقف و انا قاعـده في الكنبه مشغوله ب تلفوني.. فجاه مصطفي قال لي:( تفتكري ممكن القي امي بعد السنين دي كلها?)

عاينتا ليهو و ابتسمتا:( اكيد حتلاقيها)

مصطفي:( انتي بتجامليني وله بالجد حاسه اني حالقاها?)

قلتا:(بالجد حاسه انك حتلقاها.. لانو ربنا بخلق الاسباب ماف حاجه بتحصل سااي.. ربنا هدي خيلانك ل مكانك و لاقوك و كلموك باكك عشان تفتش عليها و تلقاها و ان شااءالله بتلقاها)

قمتا قعدتا قريبه ليهو..

قلتاليهو:( خلي عندك ايمان بربنا كبير.. و انت عملتا كل العليك و ان شاءالله حتلاقيها)

مصطفي:( ادعي لي عليك الله.. ادعي لي الاقي امي و اشم ريحتها و احس بحضنها و اسمع صوتها)

مديت يدي مسكتا يدو:( ان شاءالله بتلقاها.. ان شاءالله.. و بدعي ليك في كل صلاه والله.. ربنا يجمعك بيها ي رب)

مصطفي:( ان شاءالله)

يوم الجمعه من الصباح جو عواطف و نهي.. و اميره نادتنا انا و مصطفي نقعد معاهم و نفطر و كده.. فعلا لبسنا و نزلنا.. انا قعدتا في كرسي براي و مصطفي قعد في كنبه بقي بتونس مع عواطف و نهي.. ونسات عامه و عاديه.. عواطف وناسه جدا و نهي كمان انا كنت ساكته و م طايقه القعده بس مجبوره م بقدر اقوم بالذات انو مصطفي و عمو عزالدين قاعدين.. نهي فجاه قامت قعدت جمب مصطفي و بقت تتونس معاهو بصوت واطي م مسموع لينا.. و شويه بقت تضحك.. انا اللحظه ديك اتضايقتا شديد.. انا م بحب مصطفي.. بس م عارفه اتضايقتا ليه.. استمرت قعدتهم دي قريب نص ساعه ونسه مع بعض و عواطف و ساره و اميره بتونسو مع بعض.. و انا راسمه ابتسامه علي وشي بس من جواي متضايقه شديد م فهمتا سبب الضيق ده.. جا الفطور و قمنا نفطر.. نهي برضو قعدت جمب مصطفي و انا قعدتا قصادهم بقينا ناكل عيني عليهم.. بس مصطفي من الاول م عاين لي.. الا اخر الاكل رفع راسو عاين لي و من نظرتي فهم احساسي.. بس م قال حاجه.. نهي و مصطفي قضو طول اليوم ونسه.. و انا ابيت ابين ليهو اني زعلتا ابدا كتمتها جواي بس..

بليل راقده في السرير مشغوله بتلفوني.. مصطفي جا داخل رقد في مكانو..

مصطفي:( اليوم كان كيف?)

قلتا ببرود:( ظريف)

مصطفي:( م اتضايقتي من القعده مع خالتو عواطف?)

قلتا:( ابدا)

مصطفي:( نهي ظريفه صح?)

قلتا:( ايوا دمها خفيف)

مصطفي سكت مسااافه و قال لي:( تصبحي علي خير)و نام..

حسيت مصطفي داير يصل ل حاجه او داير يشوف احساسي لمن كان بتونس مع نهي اني زعلتا او غيرتا.. بس ابدا ابيت اظهر ليهو..

ميمي كانت بتبكي و نور م قادره تسكتها.. خافت يكون عندها مغص وله حاجه.. شالت التلفون و دقت ل متوكل..ردا عليها..

متوكل:( الو)

نور بقلق:(متوكل.. ميمي بتبكي ليها ساعه و خايفه يكون عندها مغص وله حاجه)

متوكل:( وديها الدكتور طوالي اسي حارسل ليك حسن)

نور:( طيب طيب)و قفلت..

نور جهزت سرعه ..و حسن جا دقي ليها.. نزلت بسرعه و هي حاضنه بتها.. وصلو ل الدكتور لقو قدامهم ناس بقو مستنيين.. ميمي بتبكي.. حسن شالها بقي بسكت فيها.. شويه هدت.. حسن جاب ل نور عصير و مويا.. و بقي بخفف من قلقها.. متوكل م ضرب الا لمن طلعو من الدكتور .. نور زعلت منو شديد..حسن وداها الصيدليه اشترت الادويه و مشو البيت.. نور فتحت باب الشقه..

نور:( ادخل ي حسن)

نور دخلت و حسن وراها شايل الادويه.. مداها ليها شالتها..

نور:( دقيقه اديها الدوا و اجي)

نور دخلت ادت ميمي الدوا و رقدتها علي السرير ميمي في دقايق نامت.. و جات طالعه لقت حسن لسه واقف..

نور:( ليه واقف?)

حسن:( عايزه حاجه?)

نور:( دايره اتكلم معاك شويه)

حسن:( م ينفع ي نور اقعد معاك برانا هنا.. بنتكلم في التلفون)

نور قعدت في الكرسي و كانت زعلانه شديد..

نور:( شايف متوكل? م عندو اهتمام حتي ببتو..ليه يرسلك انت? مش مفروض يجي براهو ..عندو بت وحده.. ليه يهملها كده?)

حسن:( متوكل شغلو كتير شديد)

نور:( لو بقي رئيس برضو مفروض يخلي اي شي و يجي ل بتو)

حسن:(صح بس انتي اعزريهو..اهو رسلني انا معاك.. انا قصرتا معاك في شي?)

نور:(لالا بلعكس.. انت المهون علي ااي شي)

حسن:( الحمدلله طيب.. يلا استاذن عندي مشاوير مرسلني ليها متوكل)

نور:( طيب دقيقه)

و فتحت شنطتها شالت قروش مدتها ل حسن..

حسن كشر:( ده شنو ي نور?)

نور:(عشان تعبك معاي بس)

حسن كشر:(م داير ازعل منك ي نور)

نور:(م فيها حاجه ي حسن)

حسن:(لا ي نور.. عايزه حاجه?)

نور باستسلام:( سلامتك)

حسن:( يلا سلام)

و طلع مشي.. نور ابتسمت من تصرفات حسن معااها..

دخلتا الغرفه لقيت مصطفي لابس لبس الكوره..

قلتا:( اخيرا?)

مصطفي:( ايوا)

قلتا:( الحمدلله)

مصطفي:( عايزه حاجه?)

قلتا:( لا شكرا)

مصطفي:( يلا سلام)

و طلع.. شلتا كتاب و نزلتا اقرا تحت في الحوش..اميره كانت مافيشه.. قعدتا اقرا جات داخله ساره عاينت لي..

ساره:( السلام عليكم)

قلتا:( و عليكم السلام)

ساره عايزه تمشي علي البيت جوه وقفتها..

قلتا:( ساره تعاالي)

ساره جات علي..

قلتا و انا مبتسمه:( ممكن تقعدي شويه)

ساره باستغراب

:( لشنو?)

قلتا:( اقعدي)

ساره قعدت:( ايوا)

قلتا:( انا مفروض اتكلم معاك من يوم شفتك هنا و عرفتا انك اخت مصطفي.. بس انشغلتا شديد و م لقيت طريقه اتكلم معاك )

ساره:( نتكلم في شنو?)

قلتا:( فيك انتي)

ساره:( انا مالي?)

قلتا:( ساره.. عادي بت في سنك تكون بتشرب سيجائر ?)

ساره:( ايوا عادي)

قلتا:( لا م تكذبي علي روحك م عادي.. يعني انا لمن شفتك اتخلعتا.. بت صغيره بتشرب سيجاير في حمامات مطعم عادي.. اي زول لو شافك حيقول عليك شنو? اقل شي انتي م مربيه و اهلك م ربوك بس حتجيبي الكلام ليك و ل اهلك.. اسي لو عمو او مصطفي عرفو حيحصل ليك شنو?)

ساره بزعل:( انتي بتهدديني?)

و وقفت علي حيلها..

قلتا:( لا م بهددك.. انا دايره انصحك بس انا لو دايره اعمل ليك مشكله كان كلمتا مصطفي من اول يوم عرفتك.. بس انا م دايره اعمل ليك مشكله)

ساره:( اسمعي هنا م ليك اي دعوه بي و انا حره بعمل الدايراهو)

و مشت زعلانه.. قعدتا بفكر اتعامل معاها كيف..

دخلت علياء الشقه و كانت ضلام بقت بتنادي..

علياء:( هاني.. هاني)

و مدت يدها فتحت النور لقت هاني واقف علي الصفره و قدامو تورته كبيره و حلويات..هاني بقي بغني ليها ( هابي بيرث دي)

علياء اتخلعت شديد و بقت تضحك و جات علي الصفره و دموعها نزلت من الفرح.. هاني خلص غناء و ضماها عليهو..

هاني:( كل سنه و انتي طيبه ي مرتي)

علياء:( و انت طيب حبيبي ربنا يخليك لي احلي مفاجاه والله انا كنت ناسياهو خالص)

هاني:( معقوله بس انسي اليوم الاتولدت فيهو احلي انسانه في الدنيا)

و فتحت كيس هدايا طلع منو علبه كبيره فتحها كان فيها طقم دهب..

هاني:( رايك شنو?)

علياء عاينت ليها بفرح:( الله.. حلوه شديد.. ربنا يخليك لي ي رب)

هاني:( و يخليك لي...يلا ادخلي الغرفه حتلاقي فستان جديد غيري و تعالي عشان عندنا سهره للصباح)

علياء :( حاضر من عيوني)

و مشت علي الغرفه..

سامي قاعد في بيتهم دقت ليهو علياء قالت ليهو حتتاخر لانو مع صحبتها.. سامي دقي ل سحر..

سامي:( كيفك حبيبتي.. وينك?)

سحر:( كنت عن صحبتي و راجعه)

سامي:(م طالعه الليله?)

سحر:(طبعا بطلع شنو البقعدني في البيت)

سامي:( تعالي لي نطلع نساهر)

سحر:(سامي امتحاناتك قربت مفروض تقرا)

سامي:( بقرا بعدين)

سحر:( طيب...خلاص ساعه كده و بجيك في طرف الشارع)

سامي:( لا تعالي تحت العماره علياء م حتجي اسي)

سحر:( طيب)

و قفلو..

قاعده ساره في غرفتها قدامها كتبها بس سرحانه و بتتذكر في كلامي معاها.. جات داخله اميره..

اميره:( ساره)

ساره:( ايوا ي امي)

اميره:( سرحانه وين.. اقري ي بتي)

ساره:( حاضر ي امي)

اميره:( امتحاناتك قربت م تضيعي زمنك)

ساره:( حاضر اهو بقرا)

اميره:( حاكلم ام رجب تطلع ليك سندوتشات و عصير)

ساره:( لا انا عايزه اطلب دليفري)

اميره:( كده بس حااضر.. اطلبي و انا بدفع ليك الحساب)

ساره ابتسمت:( الله يخليك لي)

كنا انا و مصطفي عازمين طلال و مجدي غدا.. مصطفي قال لي تعالي لي المكتب و نمشي من هناك.. خلصتا شغل و مشيت ليهو الشركه انا و داخله المكتب شفتا نهي طالعه من الشركه استغربتا قلتا نهي شنو الجابها هنا? سلمت علي بسرعه و مشت.. دخلتا ل مصطفي المكتب سلمتا و قعدتا..مصطفي كان شغال علي الكمبيوتر..

مصطفي:(دقايق بس اخلص الايميل ده و نطلع... تشربي شنو?)

قلتا:(لا شكرا)

مصطفي:( ليه كده اول مره تشرفينا في الشركه.. حاطلب ليك قهوه.. عندنا قهوه حلوه جدا)

و شال التلفون طلب لي قهوه.. باب المكتب دقي...

مصطفي:( ادخل)

دخلت نهي..

نهي:( اذيكم معليش علي الازعاج...مصطفي عندي فرده حلق وقعت هنا لمن كنت معاك اسي?) نهي قالت الكلام بطريقه دلع و خجل ..

انا ذي الصبت فيني مطره.. عاينتا ليها و ليهو بخلعه شديده..

مصطفي ذاتو اتوتر..

نتلاقي♥