الجزء 22

خلصنا فطور قعدنا في الجلوس ام رجب جابت شاي و قهوه و حلويات.. متوكل تلفونو بضرب كتير شديد و مرات يرد و مرات لا.. متوكل خلص كبايه الشاي و قام طوالي..

متوكل:( معليش ي جماعه ..استاذن من القعده الحلوه دي بس والله لازم امشي عندي اجتماع حيبدا بعد نص ساعه)

عزالدين:( كنت تصلي الجمعه معانا)

متوكل:( بصليها قدام.. يلا عن اذنكم)

نور طلعت قدمتو علي الباب..

متوكل:( وقت دايره ترجعي اضربي ل حسن يرجعك)

نور:(حاضر)

متوكل:( بحاول ارجع بدري)

نور:( طيب)

متوكل:(يلا سلام)

و طلع مشي..

مصطفي و عزالدين قامو يجهزو للصلاه ..ساره طلعت غرفتها قالت عندها قرايه.. فضلنا انا و نور..

قلتا:(ساره م بتحب تقعد معاي)

نور باستغراب:( ليه?)

قلتا:( م بتحبني)

نور:(لالا م اظن بس هي صعبه شويه في التعامل م بتاخد علي الناس بسهوله)

قلتا:( م مشكله.. عادي)

نور حاولت تغير الموضوع..

نور:( انتي و مصطفي عاملين شنو?)

قلتاليها:( تمام كويسين)

نور:( متفاهمين?)

قلتاليها:( ايوا الحمدلله)

نور:(الحمدلله)

كنت دايره اتعرف عليها هي و متوكل و اشوف فرق السن البينهم مؤثر في علاقتهم وله لا..

قلتا:( متوكل شكلو طيب شديد)

نور:(ايوا طيب و كويس شديد م بقصر معاي في حاجه)

قلتا:(ماشاءالله بس شكلو مشغول شديد حتي هنا م بجي)

نور:( انا في البيت م بشوفو.. طول الوقت شغل و بس م عندو زمن لاي حاجه حتي انا و بتو م عندو لينا زمن)

قلتا:( ربنا يعينو)

نور:( انا و هو طوالي بنتشاكل.. اوقات كتير بكون بحتاج ليهو م بلقاهو..برسل لي السواق و قروش..هو فاهم انو القروش و الطلبات البطلبها بتتجاب لي في ثواني خلاص كده انا حاكون راضيه و مبسوطه و م محتاجه لحاجه تاني.. بس القروش م كل حاجه)

قلتا:( طيب عرستيهو ليه? )

نور:( نصيبي بس...و الحمدلله)

قلتا:( الحمدلله)

جو نازلين عزالدين و مصطفي لابسين جلاليب ماشين الصلاه.. مصطفي بالجلابيه كان حاجه م بتتوصف كنت بعاين ليهو و عزالدين بتكلم مع نور.. مصطفي انتبه اني بعاين ليهو ابتسم لي و انا دنقرتا راسي و عملتا م مركزه معاهم.. طلعو مشو..

انا و نور بقينا بنتونس ..جد اكتر يوم انبسطا فيهو من جيت البيت ده.. مصطفي من الصلاه مشي ل خيلانو و عزالدين مشي ل اميره العرس..

نور بتتكلم مع ناديه بالتلفون..

نور:(ايوا ي ناديه اها مشيتي?)

ناديه:( ايوا جبتو ليك بس م عارفه حيطلع قدرك وله لا)

نور:( كدي جيبيهو لي انا بقيسو و بشوف)

ناديه:( انتي في بيتك?)

نور:( لا عن ناس ابوي هنا.. تعالي)

ناديه:( طيب شويه و بجي)

الوقت داك لبستا و جيت نازله لقيت نور قاعده في الصاله..

نور:( ماشه وين?)

قلتا:( دايره اجيب حلويات عندي صحبتي جاياني)

نور:( تمشي براك? رسلي ابو رجب)

قلتا:( م بحب ارسلو راجل كبير بمشي براي)

نور:( كدي انا بشوف ليك حسن وين يجيب ليك)

قلتا:( حسن منو?)

نور:( السواق)

و شالت التلفون دقت..

نور:( ايوا ي حسن كيفك? ...... الحمدلله...انت قريب? ...... ايوا عايزه حلويات ذي البتجيبا لينا ديك.....ايوا و جاتو......ايوا.... طيب م تتاخر) و قفلت..

نور:( حسن قريب اسي بجيب ليك تعالي اقعدي)

انبسطا من نور شديد و اتمنيتها تكون عايشه معاي هنا بدل ساره..

حسن جا داخل شايل كميه حلويات و جاتو..

قلتالنور:( ليه جايبه قدر ده?)

نور:(حاجه بسيطه يااخ)

حسن دخلهم المطبخ و جا طالع انا دخلتا المطبخ دايره احضر عشان علياء طلعت جايه..

نور وقفت مع حسن قدام من المطبخ شويه و اتكلمت بصوت واطي شديد بس انا سمعتها ..

نور مدت ل حسن القروش..

نور:( دي القروش...مالك مكشر كده?)

حسن:( ماف شي)

نور:( زعلان من كلام متوكل?)

حسن:( لا)

نور:( حسن...اعمل شنو انا...هو الاتكلم انا م ذنبي شي...عارفه الكلام كان عليك صعب)

حسن:( و عامل ليك الليله سهره.. عايز يراضيك)

نور:( لو عايزني اتحجج و ابيت هنا و م امشي ليهو انا بعمل كده بشوف ااي سبب...)

قاطعها حسن:( لا ي نور ده راجلك و امشي ليهو.. انا هين .. هين شديد)

و مشي بسرعه.. نور وقفت متضايقه شديد...

انا جوه اتصدمتا بالكلام شديد.. بقيت بسال في روحي:( معقوله.. نور عندها شنو مع السواق...لالا م قادره اصدق.. مستحيل.. ي الله)

سرحتا م وعيت الا بتلفون علياء.. رديت..

علياء:( انا قدام البيت)

قلتا:(تمام ادخلي)

و طلعتا طوالي لاقيتها قدام الباب سلمتا عليها و دخلنا..

قلتا بفرح:( نورتي والله)

علياء:(بنورك حبيبتي.. بيتكم حلو جدا)

قلتا:( عقبال بينك)

علياء:( آمين ي رب)

قعدنا..قلتا:( الاخبار شنو?)

علياء:( تمام الحمدلله انتي كيفك?)

قلتا:( تمام الحمدلله)

بقينت بنتونس جات نور سلمت و قالت هي حتعمل الشاي و دخلت المطبخ..ام رجب كان طلعت مشوار..

علياء:( نور ظريفه شديد)

قلتا:( جدا.. م ذي القاعدين معاي هنا)

علياء:( ههه ربنا يسهل ليك)

قلتاليها:( هاني اخبارو شنو?)

علياء:( كويس الحمدلله)

قلتاليها:( ماف جديد?)

علياء:( لا ماف شي)

بقينا نتونس.. نور جابت الشاي و الحلويات.. الوقت داك جات ناديه داخله.. سلمت علينا و عرفتنا ببعض

وقعدنا.. بقينا بنتونس.. شويه جا داخل مصطفي سلم علينا و ناداني..

مصطفي:( مريم ممكن تجي دقايق)

قمتا طوالي قلتا:( عن اذنكم دقيقه)

و مشيت طلعتا مع مصطفي فوق..

مصطفي:( شايفك مبسوطه?)

قلتا:( معاي علياء كيف م انبسط.. و نور ظريفه جدا جدا)

مصطفي ابتسم:( ماشاءالله ان شاءالله دائما.. خالو مجدي حيعمل العمليه بكرا من الصباح اسي اانا كنت معاهم.. و اسي داير ارجع ليهو اوديهو المستشفي و حيبيت هناك.. و انا داير ابيت معاهو.. رايك شنو?)

قلتا:( اوكي)

مصطفي بدلع:( م حتزعلي لو بيتا برا?)

قلتا بجفا:( لا ابدا)

مصطفي قرب لي و مرر يدو علي شعري..

مصطفي:( م تبقي قاسيه علي كده.. جامليني شويه قولي لي ااي حافتقدك اي حاجه)

سكتا...

مصطفي:( يلا)

قلتا:( لا م بقول)

مصطفي ضحك:(كويس)

ساره قاعده مع امجد و اصحابهم في محل يتونسو و بضحكو و قدامهم اكل و في فنان بغني ب جيتار.. تلفونها دقي عاينت لقتها امها شالت التلفون و طلعت برا المطعم بسرعه..

ساره:( ايوا ي ماما)

اميره:( كيفك ي ساره?)

ساره:( الحمدلله)

اميره:( لسه مع صحبتك بقرو?)

ساره:( ايوا شويه و برجع)

اميره:(طيب ركزي كويس)

ساره:(حاضر..انتي رجعتي?)

اميره:(لسه ابوك معاي بنرجع مع بعض.. الحفله لسه شغاله)

ساره:( طيب.. يلا)

و قفل.. لقت امجد واقف جمبها..

امجد:( مالك?)

ساره:( دي امي بتطمن علي)

امجد:(كويس...اها البرنامج عجبك?)

ساره:( ظريف جدا)

امجد:( كويس طيب يلا ندخل)

و دخلو المطعم تاني..

علياء عملت نفسها مشغوله بالتلفون و نور و ناديه استاذنو يدخلو الغرفه يقيسو االفستان.. شنطه ناديه و تلفونها كانو قاعدين في الكنبه جمب علياء.. فجاه تلفون ناديه دقي علياء م ركزت ليهو.. تاني التلفون دقي.. علياء وقفت و مدت يدها شالت التلفون عشان توديهو ل ناديه لقت صوره هاني كبيره علي الرقم و الاسم مسجل حبيبي و رقمو.. علياء اتخلعت شديد لمن قعدت في الكنبه.. بقت بتعاين للصوره و م مصدقه.. انو ناديه المعاهم دي ..ناديه مرت هاني.. علياء لمده دقيقه هي م قادره تستوعب الحاصل..جات ناديه طالعه من الغرفه..

ناديه:( ده تلفوني?)

عليا۽ عاينت ليها بخلعه:( اي)

وناديه جات بسرعه شالتو من يد عليا۽ و ردت و عليا۽ لسه مخلوعه شديد...

بعدتا من مصطفي و قلتا:( م تلمسني)

مصطفس بابتسامه:( ليه? مش انا راجلك?)

قلتا:( لا)

مصطفي:( اجيب ليك القسيمه اسي?)

قلتا باختصار:( مصطفي انت اسي داير شنو? عليا۽ مستنياني)

مصطفي:(م داير اسي ..بعد ارجع)

و مشي دخل الحمام..

نزلتا الصاله لقيت عليا۽ قاعده مدنقره و ماسكه راسها..

جيت عاينتا ليها باستغراي:( مالك?)

عليا۽ رفعت راسها عاينت لي..

عليا۽:( ناديه)

قلتا بخوف:( مالا?)

عليا۽:( مرت هاني)

اتخلعتا شديد قلتا:( شنو?? ????)

نتلاقي♥