الجزء 14

قاعده سميه في الصاله بتتونس في التلفون..

سميه بدلع:(حتجيب لي هديه شنو? ...... ههههه... لا بالجد... انا عايزه توب جديد...... الله يخليك لي...... لالا بجيك الصباح اول من الراجل يطلع..... طيب تمام...يلا اقفل خلاص دايره اتم شغل البيت اسي البنات بجو.....يلا سلام)

و قفلت..

قاعده علياء جمب هاني و ماسكه يدينو بيدينها و متكله علي كتفو و كانت مبسوطه و الخوف كلو راح..

علياء:( هاني اوعدني انو نعيش حياتنا كده مبسوطين دايما)

هاني:( اوعدك حبيبتي انو م حاخليك تزعلي او تضايقي و كل البقدر اعملو في سبيل سعادتك حاعملو)

علياء:( الله يخليك لي ي رب)

عاينت للساعه..

علياء:( الساعه 8 لازم ارجع)

هاني:( اقعدي معاي شويه بس)

علياء:( م ينفع لي يومين برجع متاخره و كل يوم بفتش حجه اقولها ل سامي و خايفه يشك فيني.. عشان كده الليله دايره لمن يرجع يلاقيني قاعده)

هاني:( حاشوفك بكرا?)

علياء:( اكيد طبعا)

هاني:( طيب.. محتاحه حاجه?)

علياء وقفت علي حيلها:( لا شكرا....حاغير و اجي)

و مشت علي الغرفه..

قاعدين انا و مصطفي كالعاده في الصاله كنا بنشرب في شاي و يحكي ليهو ب ابوي و مرتو...

قلتا:( من قمنا ابوي صعب.. بشاكل و بجوط علي اتفهه سبب و اتعودنا علي كده.. امي كانت طيبه و مسكينه و بتتحملو كتيير عمرها م اشتكت منو.. امي الله يرحمها اتوفت قبل5 سنه.. ريم و مي كانو لسه صغار محتاجين ليها و محمد كان شغال و انا لسه م اتخرجتا... ماتت فجاه اتصدمنا شديد و مرت علينا ايام كعبه شديد.. فجاه بقيت مسئوله عن البيت و الاكل و مي و ريم و قرايتي و جامعتي.. كنت بصحي بدري بنضف البيت و بمشي الجامعه و بجي من الجامعه جاريه عشان اجهز الغدا ل ابوي و اخواني.. لو يوم اتاخرتا دقيقه ابوي بقلب الدنيا.. انا ومحمد كنا ماسكين و مهتمين ب اخواتي جدا.. كنا بنحاول نعوضهم عن فقد امي.. فجاه يوم جانا قال داير يعرس اتصدمنا شديد و زعلنا كيف يقدر يعرس بعد امي.. طبعا م في يدنا نعترض.. و جات سميه م قدرتا احبها و هي اصلا لا تطاق .. بقت تحرش ابوي علينا و تحقر بينا.. لمن انا اشتغلتا قالت لابوي م تشتغل كفايا خليهم هم يمسكو البيت و فعلا ابوي خلي الشغل و بقينا انا و محمد بنصرف علي البيت.. و هي طلباتها م بتخلص و الحاجه بنجيبها الليله بكرا نلقاها ماف م بنعرف بتودي الحاجات وين.. كتير كانت بتشاكل اخواتي و انا ماف.. لو انا في م بتقدر تسالهم عشان عارفه م برضي فيهم.. يوم حرشت ابوي الا اعرس صلاح اخوها.. و ابوي طبعا سمع كلامها و جا كلمني و قلتا ليهو لا م دايره قال لي فكري و كده.. اداني مهله اسبوع و تاني جا سالني لمن رفصتا شاكلني و كورك و قال لي قايله نفسك صغيره انتي قربتي ل ال30 و كلام جارح كتير و م راعي ل مشاعري ابدا.. و اصرا انو يعرس لي صلاح و الباقي انت عارفو)

مصطفي:( ليه كل زوجات الاب بكونو كعبات كده?)

قلتا:( م كلهم في الكويسات.. بس سميه حاسه انو موضوع عدم ولادتها ده هو الخلاها تتعامل معانا كده)

مصطفي:( اسي اميره عندها بتين و برضو م بتحبني)

قلتا:(صح ..كل وحده ب عزرها)

مصطفي:(صح.. الحمدلله علي كل حال)

قلتا:( الحمدلله)

مصطفي:( جهزتي هدومك? الصباح حنرجع)

قلتا:( ايوا اسي بجهز الباقي)

مصطفي:( و انا حاجهز شنطتي)

قلتا:( لا انا حاجهزا ليك)

مصطفي:( م داير اتعبك)

قلتا بايتسامه:( ماف تعب)

رجعنا البيت الظهر كان عمو عزالدين طلع و ساره ماف.. لقينا اميره بس استقبلتنا في الصاله و هي مبتسمه..

اميره:( حمدلله علي السلامه ي عرسان)

ردينا:( الله يسلمك)

اميره:( نورتو البيت...اها فطرتو وله نجهز ليكم الفطور?)

مصطفي:( لا فطرنا شكرا ي خالتو)

اميره:( العفو حبيب خالتو لو م خدمتك و انت عريس حاخدمك متين? انا جايني صحباتي علي الغدا.. و اكيد حتقعدي معاهم ي عروس صح?)

ابتسمتا قلتا:( اكيد)

اميره:( تمام.. اتفضلو ارتاحو)

طلعنا علي الغرفه و عين اميره علينا..دخلنا الغرفه عاينتا ل مصطفي قلتا:( عزومه شنو دي?)

مصطفي:( بتلم صحباتها هنا كل فتره.. و معاهم عواطف اختها.. المهم خليك صاحيه)

قلتا:( صحباتها نفس فصيلتها دي?)

مصطفي ضحك:( ايوا.. بتعرفي تردي علي الناس كويس? وله حتقعدي تبكي?)

اتخلعتا قلتا:( كيف?)

مصطفي:( يعني حيسالوك اسئله كتيره جدا و حيضايقوك بالكلام)

كلام مصطفي خوفني..

قلتا:( انت جادي?)

مصطفي:( ايوا جادي..حاولي م تقعدي معاهم كتير)

قلتا:( طيب)

مصطفي:( البسي كانك ماشه حفله)

ضحكتا قلتا:( كويس)

مصطفي:( يلا انا ماشي الشركه اشوف الحاصل بجي بعدين)

قلتا:( طيب)

مصطفي مشي.. لمن يكون قاعد بحس بآمان .. لسه م اتعودتا علي بيتهم ده..

دقيت ل سهي وريتها انو رجعنا و حكيت ليها ب كلام اميره..

سهي:( ي بت اعملي شعرك و البسي احلي حاجه عندك و ختي رجل علي رجل و ردي ليهم علي كل كلمه.. اوعي تتمسكني ليهم.. اميره دي م هينه.. و جايبه صحباتها ديل مخصوص عشانك)

قلتا:(م تخوفيني ي سهي)

سهي:( م بخوفك بس بوريك الحاصل.. اسمعي كلامي ده كويس و نفذي

هو بالحرف)

سهي ورتني اعمل شنو... فعلا قمتا عملتا شعري و عملتا ميكب و جهزتا جلابيه فخمه البسها.. شويه سمعتا صحبات اميره جو السلام و الجوطه.. شويه جاتني ام رجب قالت لي مدام اميره قالت ليك تعالي.. عاينتا ل شكلي في المرايا و نزلتا لقيت في ذي 6 نسوان و معاهم عواطف و اميره.. كانو لابسين افخم التياب و الدهب ..

قلتا :(السلام عليكم)

اميره:( دي مريم.. مرت مصطفي.. العروس)

كلهم رحبو بي (اهلا اهلا ي عروس.. ماشاءالله منوره)

سلمتا عليهم و قعدتا..

وحده اسمها الهام:( اها العرس كيف?)

قلتا:( حلو)

الهام:( مصطفي يستاهل ست الناس والله)

عواطف بزعل:( ست الناس اللي هي نهي بتي.. م اي وحده تاني)

استغربتا من رد عواطف و سكتا م رديت..

الهام:(انتي شغاله شنو?)

قلتا:( في شركه بتاعت كمبيوتر)

الهام:( و اهلك من وين?)

الهام سالتني كل الاسئله عن حياتي و بيتنا و شغلي و اسرتي.. م خلت حاجه حتي مرتبي سالتني منو زهجتا من اسئلتها بالجد بس استحمل اعمل شنو..

اميره:(مريم ممكن تشوفي الشاي)

قلتا:( حاضر)

قمتا مشيت علي المطبخ سالتا ام رجب من الشاي..

ام رجب:(اهو جاهز شيليهو.. انا بجهز في الغدا)

شلتا صينيه الشاي ختيتها قدامهم..

اميره:( كبي الشاي)

طوالي كبيت ليهم الشاي.. وحده قالت شاي خفيف ..تقلتو ليها و وحده قالت شاي تقيل خففتو ليها و شي سكر كتير و شي سكر بسيط.. كل وحده فيهم لقت ميه غلط في الشاي و رجعتني تاني.. عواطف قالت م دايره.. لمن شلت كبايتي و قعدتا وقفت براها كبت شاي ليها.. فهمتا انو م دايره اني اديها شاي.. و حصل نفس القصه في القهوه و الحلويات.. بقيت بخدم فيهم بس و هم بتونسو مع بعض..

و نفس القصه للغدا جهزتا الصفره مع ام رجب و لمن ناديتهم و جو قعدو كل وحده رسلتني مرسال.. ( جيبي شطه حمرا.. جيبس شطه خضرا.. جيبي ليمون...جيبي ملح.. ختي لي لحمه هنا.. شيلي الفراخ ده م بحبو.. قربي لي الشوربه دي.. م ضوقتا المكرونه م لاحقاها قربيها لي)

ونستهم كانت علي العرس و العروس و كل وحده فيهم حكت كيف اهل العروس قيموهم لمن مشو اتقدمو ليها و عملو و سوو ليهم.. وحده قالت انا لو م عرفتا الراجل كويس و عرفتا اهلو م بديهم بتي..

عواطف:( في ناس بدو سااي من طرف و في عروسات خفيفات بجو بيت الراجل في دقيقه بس)

حسيتها بتتكلم عني سكتا عملتا نفسي م سامعه..

اميره:( ذي دي بتكون عامله عمله وله حاجه.. ماف بت بتتخفف كده غير الفيها مصيبه)

الكلمه دي طعنتني في قلبي...و قلبي وجعني جدا.. بس استحملتا و سكتا م عرفتا ارد و اصلا م بعرف ارد علي الناس كده..

م اكلتا ولا لقمه معاهم و اصلا خلاص زعلتا و م كان عندي نفس اكل بس كنت مبتسمه عشان م احسسهم انو زعلوني.. م عندي مشكله في الخدمه انا بس حسيت بيهم بحقرو بي.. حتي ام رجب تعاملها معاي بايخ و من طرف نخرتها.. و طعنوني بالكلام لمن زهجو..م عبرتهم اصلا...خلصو الغدا بدينا في التحليه و العصير و الحلويات وووووو... لمن خلصنا كان المغرب مشي.. لمن جو ماشين حتي مع السلامه م قالوها لي كاني م موجوده.. وصلناهم لحدي الباب و سلمو علي اميره و عواطف و شكروهم و مشو.. زعلتا شديد من الحركه و دايره ابكي.. اول مره زول يحقر بي كده.. طلعتا مشيت علي غرفتي سمعتا ضحكه اميره و عواطف من وراي.. دي الزعلتي ذياده و خلتني ابكي بحرقه..

قعدتا في الغرفه م طلعتا منها ابدا.. مصطفي جا الساعه 9 بليل لقاني راقده و مطفيه النور.. كان مفتكرني نايمه لمن ولع النور لقاني بعاين ليهو..

مصطفي:( انتي صاحيه ليه طافيه النور?)

قلتا:( ماف شي)

مصطفي عاين ل شكلي و استغرب..

مصطفي:( في شنو?)

كشرتا و سكتا..

مصطفي:( اها...فهمتا.. اميره و صحباتها صح?)

قلتا:( كويس انك عارف.. مصطفي انا دايره ارجع بيتنا و اليحصل يحصل)

مصطفي استغرب و جا علي قعد علي السرير..

مصطفي:(حصل شنو?)

م قدرتا احكي بس دموعي نزلت..

نتلاقي♥