الجزء 10

قاعدين انا و محمد و سهي و ابوي في الصاله ساكتين و مقلقين و م عارفين ابوي عايز شنو.. شويه الباب دقي محمد قام فتح لقاهو مصطفي.. دخل..

مصطفي:( السلام عليكم)

ابوي قام طوالي:( و عليكم السلام ي عريس.. نورتا... ممكن افهم ي استاذ انت خالي مرتك قاعده هنا ليه?)

مصطفي:( كيف يعني?)

عبدالرحمن:( مش عقدتو...خاليها قاعده هنا ليه? م سوقتها معاك ليه?? )

مصطفي:( محتاج زمن شويه )

عبدالرحمن:( مافي زمن اما تسوقها معاك اسي اما تطلقها اسي)

كلنا اتخلعنا..

محمد:( ي ابوي مصطفي م جاهز اسي.. محتاج شهرين كده)

عبدالرحمن كورك:( محمد لو سمحت انا م داير اسمع صوتك دده كفايا كل البلاوي دي كلها من تحت راسك ده...اسمع ي مصطفي.. اما تسوق مرتك معاك ااسي..اما تطلقها اسي...قلتا شنو?)

كلنا بقينا متوترين و بنعاين ل مصطفي.. مصطفي سكت مسااافه..

مصطفي:( مريم اجهزي حاسوقك معاي اسي)

اتخلعتا شديد و هزيت راسي ب لا...

عبدالرحمن:( تمام.. يلا سوقها و امشو قدامي اسي.. و انا كل يوم بجي هنا كدي القاها جات هنا تاني)

محمد و مصطفي عاينو لبعض و سكتو..

محمد:( يلا ي مريم.. قومي اجهزي)

مشيت علي الغرفه و سهي وراي دخلنا و قفلنا الباب.. ختيت يديني في راسي..

قلتا:( امشي وين? كيف امشي مع مصطفي بيتهم? يقول لاهلو شنو? يقولو علي شنو? دي لعبه لعبناها علي ابوي م كل الناس م علي اهل مصطفي)

سهي:( م عارفه ابوك ليه اصرا كده?)

قلتا:( بكون حسي انو احنا بنلعب عليهو و العقد ده ورق بس عشان كده جا يتحدانا)

محمد جا داخل.. قلتا:( اعمل شنو ي محمد اسي انا?)

محمد:( م عارف والله..بس لازم تطلعي اسي قدام ابوي مع مصطفي و بعدين نشوف البحصل)

سهي:( ايوا يلا اجهزي سرعه)

سهي و محمد طلعو خلوني براي.. غيرتا و شلتا شنطتي و طلعتا..

مصطفي:( يلا ي مريم)

ابوي بعاين لينا سااي.. ساقني و طلعنا.. ركبنا العربيه و اتحركنا..

كنا ساكتين الاتنين م عارفين نقول شنو.. بعد مساافه مصطفي وقف قدام بيت..

قلتاليهو:( وقفتا ليه?)

مصطفي:(ده بيتنا)

اتخلعتا قلتا:( مصطفي انت جنيت? شنو البدخلني بيتكم و اهلك يقولو علي شنو?)

مصطفي:( ماف حل غير كده.. انا بكلم ابوي و هو حيتفاهم الموقف)

قلتا:( و باقي ناس بيتكم?)

مصطفي:( في مرت ابوي و م شغال بيها)

قلتا:( و انت كمان عندك مرت ابو?)

مصطفي:( الحمدلله بس...يلا انزلي)

مصطفي نزل و انا م قادره انزل.. مصطفي جا فتح لي الباب.. نزلتا و دخلنا.. عندهم حديقه برا حلوه مليانه شجر و زهور.. مشينا علي باب الصاله فتحو و دخلنا..

مصطفي:( اقعدي هنا دقيقه اشوف ابوي)

قلتا:( طيب)

مصطفي طلع السلم و انا قاعده بعاين في البيت كان حلو و نضيف و انيق..

مصطفي دقي باب غرفه ابوهو.. جات اميره فتحت..

مصطفي:( ابوي في?)

اميره:( لسه م جا)

مصطفي:( طيب)

و مشي طوالي جا نازل قعد جمبي في الصاله و شال تلفونو دقي..

مصطفي:(الو..ايوا ي ابوي...الحمدلله.. وين انت? ..... دايرك ضروري...... لالا ي ابوي م ساره...موضوع يخصني....ايوا ضروري والله......اوكي...سلام)

و قفل...

مصطفي:( شويه و ابوي حيجي)

جات نازله اميره و جات علينا باستغراب..

لمن وصلت جمبنا قمتا علي حيلي..

اميره:( اهلين)

مصطفي:( دي خالتو اميره مرت ابوي...و دي....مريم.....مرتي)

اميره اتخلعت:( شنو?)

مصطفي:( ذي م سمعتي)

اميره:( كيف يعني?)

اتحرجتا شديد و سكتا..

مصطفي:( عادي ي خالتو.. مش كل الناس بتعرس.. انا عرستا)

اميره عاينت لي من فوق ل تحت و لوت خشمها..

اميره:( شكلك جنيت)

و مشت طوالي...قعدتا و دموعي في عيوني..

مصطفي:( مريم...اميره صعبه شويه بس م تشتغلي بيها)

سكتا م رديت.. البت الشغاله جابت لينا مويا و عصير.. شربتا حبه مويا ابل فيها ريقي و خلاص...بعد شويه جا داخل عزالدين و جا علينا طوالي و مخلوع شكلو اميره ضربت كلمتو...

عزالدين:( السلام عليكم)

وقفنا انا و مصطفي :( و عليكم السلام)

مصطفي:( ابوي ممكن تجي دقيقه)

و ساقو و مشو فوق.. قعدو في الصاله.. جات طالعه اميره مكشره قعدت معاهم..

مصطفي:( ابوي مريم دي انا بحبها.. و دايرها.. و عقدتا عليها)

عزالدين عاين ليها باستغراب:( بكل بساطه كده? ليه?)

مصطفي:( لا م ببساطه بس ده الحصل)

عزالدين:( ليه م جيت كلمتنا كنا مشينا خطبناها ليك)

مصطفي:( والله ي ابوي دخلتا مع ابوها في حتات ضيقه و اضطريت اعقد عليها طوالي)

عزالدين:( كيف يعني م فاهم.. حصل شنو?)

مصطفي:( دي مريم اخت محمد صحبي.. عارفهم انت.. ناس كويسين شديد)

اميره لوت خشمها:( صح باين عليهم كويسين جدا)

مصطفي عاين ليها بزعل..

مصطفي:( قلتا شنو ي ابوي?)

عزالدين:( اقول شنو و انا م فاهم شي و حاسي بيك بتهظر)

مصطفي:( والله ي ابوي دي مرتي.. و دي القسيمه)

طلعها من جيبو اداها ل ابوهو..

عزالدين قراها..

عزالدين:( اوكي قول عقدتا عليها..يعني حتعرس كده بدون حفله بدون ااي شي?)

مصطفي:( م كان في وقت ل حاجه)

عزالدين:(كدي خلي الموضوع ده علي)

مصطفي:( طيب...احنا حندخل غرفتي.. يلا)

و نزل..

اميره و عزالدين

دخلو غرفتهم..

اميره:( انت صدقتا كلام ولدك ده?)

عزالدين:( والله م عارف)

اميره:( كيف يعقد كده? موضوع م بدخل الراس.. الا يكون حصل بينهم شي و اهلها غصبوهو يعرسا)

عزالدين:( لالا مصطفي م بعمل كده)

اميره:(طيب وريني سبب واحد يخليهو يعقد علي البت دي?)

عزالدين:( كدي الصباح انا بقعد معاهو و بحاول افهم الحاصل)

اميره:( صدقني ولدك ده جنا او البت دي عامله ليهو حاجه.. اصلا بت م مستواهو و شكلها كيف كيف)

عزالدين:( احنا م بنحسبها بالشكل.. احنا بنحسب الاخلاق)

اميره:(لو عندها اخلاق كان عرستو كده بدون اي شي??)

عزالدين سكت سرحان بفكر و راسو جايط ب كلام مصطفي..

دخلنا انا و مصطفي غرفه مصطفي..كانت حلوه كبيره.. فيها سرير كبير و دولاب كبير و تسريحه و شاشه و كنبه و كرسي و حمام داخلي..

مصطفي:( دي غرفتي)

عاينتا ليهو باستغراب:( انا حانوم معاك هنا?)

مصطفي:( طبعا م ينفع تنومي في مكان تاني)

قلتا:( بس ي مصطفي م اظن ينفع...انا حارجع بيت ابوي و اليحصل يحصل)

مصطفي:( انتي حتضيعي العملو محمد كلو في ثواني? مساله وقت و حنطلق و كل زول يشوف حالو)

قعدتا في الكنبه و راسي جايط..

مصطفي:( مريم عارف المواضيع اتطورت شديد و م عملنا ليها حساب لا انتي لا انا لا حتي محمد...بس ده الحصل و لازم نتقبلو.. انتي مضطره تقعدي معاي هنا علي الاقل شهر او شهر و ذياده بعدين نشوف حل.. ابوي كويس شديد...بس اميره صعبه و ساره عندها حركات...حاولي م تتعاملي معاهم كتير)

هزيت راسي ب طيب..

مصطفي:( انا طالع و جاي.. اخدي راحتك و ارقدي نومي.. انا حانوم علي الكنبه)

قلتا:( لا خليك علي سريرك انا بنوم علي الكنبه)

مصطفي:( لالا انا اصلا بنوم في الكنبه عادي..عايزه حاجه?)

قلتا:( انا م عندي هدوم البسها)

مصطفي:( خلاص بمشي بيتكم بجيب ليك هدومك)

قلتا:( حاتعبك معاي)

مصطفي:( ماف تعب..عايزه حاجه تاني?)

قلتا:(لا شكرا)

و طلع..

فكيت طرحتي و رقدتا علي الكنبه و بقيت بفكر محتاره.. حياتي اتغيرت خلال يومين 360 درجه.. ده كلو من تحت راس سميه دي.. اسي انا اعيش هنا كيف? اقعد مع الناس ديل كيف?? حتي مصطفي انا م بعرفو كده.. و مرت ابوهو دي صعبه شديد.. اشتقت ل بيتنا و غرفتي و مي و ريم.. لقيت دموعي نزلت بدون م احس..

مصطفي قاعد في الصاله في بيتنا و مي و ريم بيلمو في هدومي ختوها لي في شنطه و هم زعلانين شديد.. ابوي و سميه ساكتين م قالو اي حاجه..

ريم:( مصطفي احنا انتهينا)

مصطفي دخل الغرفه شال الشنطه لقي ريم و مي دموعهم نازله..

مصطفي:( ليه زعلانين?)

ريم:( اشتقنا ل مريم)

مي:( جيبا لينا ي مصطفي.. عليك الله)

مصطفي:( كده بس? من عيوني)

ريم:( بالجد?)

مصطفي:( ايوا والله بجيبا ليكم)

مي بفرح:( طيب)

مصطفي شال الشنطه و طلع..

محمد راقد في الكنبه م قادر ينوم.. سهي كانت نايمه في الغرفه صحت لقت محمد مافيش جمبها قامت طلعت برا لقتو راقد في الكنبه لمن قربت ليهو لقتو صاحي..

سهي:( محمد شنو المصحيك?)

محمد:( م قادر انوم)

سهي:(ليه?)

محمد:(مريم.. حاسي نفسي بوظتا ليها حياتها.. حاسي الحاجات العملتها دي كلها غلط)

سهي:( م تقول كده.. انت م كان في يدك حاجه تاني تعملها)

محمد:(لو حصل ليها حاجه م حاسامح نفسي)

سهي:( حيحصل ليها شنو? مصطفي زول كويس شديد و انت بتعرفو كويس.. اتطمن عليها)

محمد:( م قادر والله)

سهي:(اتطمن والله مريم كويسه و انت بنفسك اتصلتا علي مصطفي و اتطمنتا انو اهلو م قالو حاجه)

محمد:( كيف م يقولو? هو جايبها براها كده و قال ليهم عقدتا عليها بدون عرس بدون اي شي.. حيختو عليها الف حاجه كعبه)

سهي:(لالا م بقولو شي.. انا متاكده.. لو دايرين تعملو عرس بكرا كلم مصطفي و اعملو حفله صغيره)

محمد:(بعد شنو بس)

سهي:(محمد انت شغال الصباح.. قوم نوم و الصباح ربنا بحلها.. يلا)

و مدت ليهو يدها.. محمد مسك يدها و قام مشي معاها..

نتلاقي♥