الجزء 21

مصطفي:( هااا.. م عارف)

نهي بقت تعاين في الارض بتفتش فيها و فعلا لقتها جمب الكنبه..

نهي شالتها و هي مبتسمه:( اهو الحمدلله.. يلا شكرا)

و طلعت بسرعه.. مصطفي بقي ساكت و م عاين لي..

وقفتا و قلتا:( عن اذنك)

و انا دموعي كانت نازله..مصطفي لفا جا علي مسكني من يدي..

مصطفي:( ماشه وين?)

قلتا:( مصطفي فك يدي بسرعه)

مصطفي:( انتي فهمتي غلط)

قلتا:( والله? اكتر من كده شنو? دايرني افهم صح شنو?)

مصطفي:( والله م عندي حاجه معاها)

قلتا:(حبها ذي م داير لاني انا م بحبك ولا دايراك.. بس في حاجه اسمها احترام.. خليها بينا لو سمحت لحدي م نطلق و كل زول يمشي لحالو)

مصطفي:( مريم م تفهمي غلط ..نهي جات هنا شالت قروش بس...عندها قروش ختتا عندي في الخزنه و اسي جات شالتها ماف شي تاني)

قلتا:(م يخصني كل البتقول فيهو ده)

الوقت داك تلفون مصطفي دقي.. ساقني معاهو علي التلفون عشان م امشي..

مصطفي:( ايوا ي خال..... ايوا جايين اسي.. خليكم جاهزين.. طيب) و قفل..

مصطفي:( يلا خيلاني مستنيننا)

قلتا:( م ماشه)

مصطفي:( قلتا ليهم انتي معاي و هم اصلا قالو انتي تجي دايرين يتعرفو عليك.. م تخجليني قدامهم)

سكتا م رديت..

مصطفي:( نمشي نتغدا و بعد نرجع نتفاهم)

قلتا:(حامشي عشان خيلانك بس م عشانك انت)

مصطفي:( طيب يلا)

فكا يدي شال مفاتيح العربيه و التلفون و طلعنا.. طول السكه كنت مكشره.. مصطفي كل شويه كان بعاين لي.. انا غيرتا شديد من نهي و خوفتا يكون في حاجه بينها و بين مصطفي.. حسيت نفسي بحب مصطفي.. بحبو شديد.. بس من متين و كيف م عارفه.. م حسيت باحساس الغيره نحيتو الا لمن اتونس مع نهي يوم الجمعه و الليله.. بس م بقدر اقول ليهو و في نفس الوقت كنت زعلانه منو.. و علاقتنا انا و هو اصلا جايطه و م مفهومه..

وصلنا بيت ناس طلال مصطفي دقي ليهم جو نازلين طلال و مجدي .. سلمو و ركبو و اتحركنا...بقيت بتونس معاهم كانو ظريفين شديد .. مشينا هوتيل كبير و دخلنا المطعم كان كبير و حلو شديد و البوفي مفتوح فيهو كل انواع الاكل ... مصطفي كان حاجز لينا طربيزه .. طول القعده م اتكلمتا مع مصطفي الا مرتين.. هو كم مره وجه لي كلام و رديت بابتسامه م كنت دايره احسس خيلانو انو احنا مختلفين.. خلصنا الغدا و التحليه و الشاي كان العشاء جات طلعنا مشينا وصلنا طلال و مجدي و مشينا علي البيت دخلنا لقينا عزالدين في الصاله سلمنا.. مصطفي وقف يتكلم معاهو و انا طلعتا الغرفه..غيرتا و صليت و رقدتا زعلانه.. نمتا م حسيت ب مصطفي لمن جا..

واقف محمد في الصاله بنادي ل سهي..

محمد:( يلا ي سهي)

سهي جات طالعه بتصلح في طرحتها..

محمد:( يلا بسرعه عشان الدكتور م يبقي زحمه)

سهي:( خلاص خلصتا يلا) و طلعو مشو الدكتور..

قاعدين محمد و سهي مع الدكتور..

الدكتور:(الظاهر المدام عندها انسداد محتاجه عمليه صغيره حتي تقدر تحمل)

سهي اتخلعت ..

محمد:( و الحاجه دي خطره ي دكتور?)

الدكتور:( لا مافي خطوره)

محمد:( و نسبه النجاح?)

الدكتور:( والله ان شاءالله.. كلو بيد ربنا احنا بنعمل العلينا)

محمد:( داير تفاصيل عن العمليه طيب..ياتو مستشفي و التكلفه و كده)

الدكتور مدا ل محمد ورقه..

الدكتور:(تكلفتها 20 الف.. و الورقه دي فيها كل التفاصيل البتحتاجو ليها.. شوفو و وروني عشان احجز ليكم)

محمد:( تمام ي دكتور شكرا ليك)

و طلعو من المستشفي.. سهي بقت تبكي..

محمد:( اسي انتي زعلانه ليه?)

سهي:( م شايف كلام الدكتور ده بزعل)

محمد:( ي سهي قولي الحمدلله.. عمليه بسيطه و خلاص ليه بتبكي و تكبري الموضوع)

سهي:( اسي احنا حنجيب تكلفه العمليه دي من وين?)

محمد سرح مساافه:( ربنا بسهلا)

محمد هدا سهي و شال الهم هو.. يجيب 20 مليون للعمليه كيف و من وين? سهي نامت و هو فضل صاحي بفكر يعمل شنو..

قاعده ساره مع امجد في مكان جمب البحر..و قدامهم شاي و سندوتشات..

ساره:( امجد انا مصدعه)

امجد:( اديك من الحبوب حقت امبارح?)

ساره:( ايوا ديك ريحتني جدا)

امجد ابتسم و مشا جاب الحبوب من العربيه اداها ليها و بلعتها.

امجد:( انتي م ناويه تتخرجي السنه دي?)

ساره:(بقرا بس مليت م عندي طوله بال للقرايه بس ان شاءالله بتخرج)

امجد:( طيب.. يلا اكلي الاكل ده برد)

و بقو بياكلو...

ساره:( م حكيت ليك ب مرت مصطفي قالت لي شنو)

امجد:( اها)

ساره:( لاقتني براي و بقت تتكلم معاي.. كيف تشربي سيجائر و في مكان عام ولو زول شافك حيقول اهلك م ربوك و كلام كتتير شاكلتها و قلتاليها م ليك اي دعوه بي)

امجد:( احسن اوعي تديها فرصه دي من النوع البتحكم و بفرض سيطرتو علي الناس.. قولي ليها م ليك دعوه بي ولا تدخلي و لو كترتها كلمي ليها امك)

ساره:( لا م بقدر ممكن تكلم ماما اني بشرب سيجائر)

امجد:( م بتقدر.. هي لو كانت دايره تكلمهم كانت كلمتهم من اول يوم. بس اسي م اظن)

ساره:( دمها تقيل م حبيتها.. ان شاءالله تغور و نرتاح منها)

امجد ضحك..

سحر و علياء بسلمو علي بعض في بيت علياء..

سحر:( بقيتي كعبه م بتسالي عني)

علياء:( والل

ه في بالي بس انا ذاتي بقيت مشغوله شديد.. اقعدي) قعدو جمب بعض..

علياء:( اخبارك شنو?)

سحر:( تمام والله.. الجديد شنو?)

علياء:( كلو تمام)

سامي في الغرفه سامع صوت سحر و اصلا كان عارف انها جايه اتاكد من شكلو قدام المرايا و جا طالع سلم عليها و قعد معاهم..

علياء:( دقيقه ي سحر)

و قامت دخلت المطبخ..

سامي بهمس:( وحشتيني)

سحر:( و انت كمان)

سامي:( البيت نور)

سحر:( منور بيك انت)

علياء جابت عصير و شويه سامي مشي و بقت قاعده هي و سحر براهم..

سحر:( هاني لسه م ناوي يجي?)

علياء:(عايزه اقول ليك علي سر.. بس اوعي تحكي قدام زول)

سحر:( احكي)

علياء:(انا و هاني عرسنا بس في السر ماف زول عارف)

سحر اتخلعت شديد و ختت كبابه العصير من يدها..

سحر:( كيف?)

علياء:(عادي في المحكمه بس.. ماف زول عارف لمن يلقي طريقه يقدر يجي البيت)

سحر:(لو م جا?)

علياء:(انا مرتو شرعا و لي حق عليهو)

سحر:( م جاده ي علياء م كان تعملي كده)

علياء:( م كان في حل غير كده)

علياء و سحر اتناقشو كتير في الموضوع...

دقت لي سهي اتكلمتا معاها و اتونستا حسيتها متضايقه..

قلتاليها:(مالك ي سهي? حاسه بيك ذي المتضايقه)

سهي:( امبارح مشينا الدكتور عشان موضوع الحمل و كده)

قلتا:( اها?)

سهي:(قال اني محتاجه عمليه.. و العمليه ب20 الف)

قلتا:( ي الله...كتيره)

سهي:(شديد والله.. م عارفه نجيبها من وين.. محمد م عندو)

قلتا:( ربنا بسهلا م تشيلي هم.. ان شاءالله ربنا بفرجها)

سهي:( ان شاءالله ي رب)

بقيت بتجاهل مصطفي شديد.. لو اتكلم معاي برد ب اختصار و بس.. و حسسني اصلو زعلي م فارق معاهو ولا اثر فيهو..

لومتا عليااء انها م جاتني في البيت قالت لي بجيك يوم الجمعه ان شاءالله.. يوم الجمعه اميره مشت عرس اهلها من الصباح.. طبعا بكون مبسوطه و باخد راحتي علي الاخر لمن اميره تكون ماف.. لبستا من الصباح جلابيه سمحه و نزلتا المطبخ لقيت ام رجب شغاله ..

قلتا:( صباح الخير)

ام رجب:( صباح النور)

قلتا:( الفطور شنو?)

ام رجب:(ختيت لحمه في النار لانو عزالدين لازم ياكل لحمه يوم الجمعه..و بفكر اعمل ملاح و عصيده)

قلتا:( بياكلو الويكه و القراصه?)

ام رجب:( عزالدين و مصطفي بياكلو بس ساره لا)

قلتا:(خلاص حنعمل ويكه و قراصه مع اللحمه.. انا الحاعملهم)

ام رجب استغربت:( طيب)

بقيت بعمل في الملاح.. مصطفي كان طلع لمن جا داخل لمحني في المطبخ جا عاين لي باستغراب..

مصطفي:( بتعملي في شنو?)

قلتا:( الفطور) رديت ببياخه..

مصطفي:( غريبه مالك الليله?)

قلتا:(مزاج بس)

مصطفي:( تمام نشوف الليله اكلك كيف)

و طلع مشي..

راكبين نور و متوكل مع حسن في العربيه...طبعا راكبين الاتنين ورا..

متوكل:( اهو ماشي معاك عن ناس ابوك عشان م تزعلي و تقولي م مهتمي بيك)

نور:(يعني يهمك رضاي?)

متوكل:( جدا...كل ده عشان خاطرك حبيبتي)

حسن كان سامع كلامهم..

متوكل:( نور والله انا داير ابقي جمبك و اعمل ليك كل حاجه عايزاها..بس والله مشغول.. عليك الله اعزريني و م تزعلي مني)

نور اتوترت شديد من كلامو قدام حسن.. و حسن كمان اتضايق.. متوكل مسك يد نور و حبي عليها..

متوكل:( اتفقنا حبيبتي?)

نور بتوتر:( اوكي)

متوكل:( المساء حارجع بدري و نعمل سهره حلوه)

نور:( طيب)

جهزتا الفطور و بخت فيهو علي الصفره جات داخله نور و متوكل.. نور انا م اتعاملتا معاها ابدا.. بلاقيها سلام بس و خلاص.. م ذي ساره..

نور بابتسامه:( صباح الخير) و سلمت علي..

ابتسمتا:( صباح النور)

نور:(ماشاءالله الفطور يشهي)

متوكل:( كيفك ي مدام مريم)

قلتا:( الحمدلله)مديت يدي سلمتا عليهو..

نور:( ده متوكل راجلي م اظن لاقيتيهو لانو م بجي هنا كتير)

قلتا:( فعلا اول مره الاقيهو)

فرق العمر بين متوكل و نور كان كبير و ظاهر..

قلتا:( يلا اقعدو للفطور.. ام رجب نادي عمو عزالدين و مصطفي و ساره)

نور و متوكل قعدو طوالي.. جو نازلين مصطفي و عزالدين عاينو ل نور..

عزالدين:( ناس البيت م قعدو يجو الضيوف يقعدو قدامنا)

ضحكنا علي كلام عزالدين..

عزالدين:( متوكل كيفك وينك م ظاهر?)

متوكل:( والله مع الجري بس .. مصطفي كيفك?)

مصطفي:( تمام الحمدلله)

قلتا:( يلا اقعدو ي جماعه)

قعدو و بقينا ناكل .. ساره جات نازله سلمت و قعدت تاكل.. متوكل و عزالدين و مصطفي بقو بتونسو بالشغل و السوق و الحاصل.. انا و نور اتونسنا عادي.. نور ظريفه شديد فرق كبير بينها و بين ساره.. ساره شايلا طباع امها بس نور شايله طباع ابوها..

عزالدين:( تسلم ايدك ي مريم.. الملاح حلو شديد)

قلتا:( بالهنا ي عمي)

مصطفي:( ماشاءالله فرق كبير بينو و بين ملاح ام رجب)

ضحكنا..

نور و هي بتضحك:( لو سمعتك م بتسيبك.. تسلم يدك ي نور جدا الاكل حلو شديد.. حظك ي مصطفي بيها)

مصطفي:( امي داعيه لي)

نور:( ايوا والله)

نتلاقي♥