الجزء 23

قعدتا جمب علياء و انا م مصدقه القالتو..

قلتا:(عرفتي كيف?)

علياء:( ضرب اسي في تلفونها لقيت صورتو و رقمو)

الوقت داك جو طالعين نور و ناديه.. نور لابسه فستان ملون حلو كده..

نور:( رايكم شنو في الفستان ده?)

انا و علياء حاولنا نبقي كويسين..

قلتا:( حلو جدا)

علياء:( راقي)

نور:( خلاص حابقي عليهو)

و دخلت الغرفه تغير.. ناديه قعدت و انا و علياء بنعاين فيها م مصدقين دي مره هاني..

ناديه:( دي وحده بتجيب بضاعه من دبي..حلو جدا م ذي بضاعه التاجرات العاديه)

قلتا:( الفساتين ظريفه)

ناديه:( ايوا انا بالذات م بلبس تياب كتير الا في المناسبات او كده.. مرقاتي العاديه ذي م شايفين اغلبها طلعاتي ب فساتين)

قلتا:( التوب مقيد شديد بالذات مع العيال.. مش عندك عيال?)

ناديه:( ايوا عندي بت و ولد اسي مشو مع ابوهم يفسحهم م بحب اجيبهم معاي لصحباتي م بخلو الزول يقعد ب مزاج)

ضحكتا قلتا:( صح)

جات نور قعدت و بقو بتونسو.. انا و عليا۽ م كنا قادرين نركز.. انا قدرتا اتونس شويه بس عليا۽ م قدرت ابدا.. شويه عليا۽ وقفت..

عليا۽:( يلا ي جماعه قعدتكم حلوه شديد بس الوقت اتاخر و لازم امشي)

نور:( دقيقه اشوف ليك حسن يوصلك)

عليا۽:( لالا م مشكله بمشي)

ناديه:( استني هاني بجي بنوصلك معانا)

عليا۽:( اخوي براهو والله و لازم امشي.. نتلاقي وقت تاني)

سلمت عليهم و طلعتا معاها وقفنا في الحوش..

قلتا:( عليا۽ حاولي ركزي شويه شكلك متوتره شديد كنتي حتفضحينا)

عليا۽:( اعمل شنو مسكتا روحي بعد تعب.. الحمدلله ربنا ستر.. انا م قادره اصدق انو انا ضره دي)

ضحكتا علي كلمه ضره دي..

قلتا:( ظريفه شديد)

عليا۽:( بالنسبه لي كانت ظريفه قبل م اعرف انها ضرتي.. بعد عرفتا غيرتا منها شديد)

قلتا:( حتقولي ل هاني?)

عليا۽:( م عارفه والله.. انتي رايك شنو?)

قلتا:(قولي ليهو عادي لانو هو ل قدام حيعرف)

عليا۽:( طيب.. ربنا يستر)

اللحظه ديك جو طالعين نور و ناديه..

ناديه:( عليا۽ انتي لسه هنا.. بت حلال.. هاني جا يلا نوصلك معانا)

عليا۽ اللحظه ديك اتوترت شديد و م عرفت تجاوب..

عليا۽:( م دايره اتعبكم والله)

ناديه جات عليها مسكتها من يدها..

ناديه:( يلا قدامي ..شكلك خجوله.. هاني ظريف شديد م تخجلي يلا)

و ساقتها قدامنا و احنا وراها.. لمن وصلو الشارع هاني كان واقف برا العربيه و بغسل ل بتو الصغيره يدينها الوسختها ب الايسكريم..

ناديه:( هاني ليه اكلتهم ايسكريم?)

هاني قبل م يرفع راسو و يشوفنا قال:( عيالك شباكين اعمل ليهم شنو)

و رفع راسو لقي قدامو ناديه و جمبها عليا۽ و وراها انا و نور..

هاني اتخلع شديد لمن رجع ل ورا بس ثبت في العربيه..

ناديه بخلعه:( بسم الله مالك?)

هاني:( شكلها لفه راس...معليش ي جماعه.. نور اذيك?) و مدا يدو سلم..

نور:( تمام والله ي هاني انت كيفك?)

هاني:( الحمدلله)

ناديه:( دي مريم مرت مصطفي)

هاني:( اهلا ي عروس كيفك?) مدا يدو سلم علي..

قلتا:(الحمدلله)

ناديه:( و دي علياا۽ صحبت مريم)

هاني:( اهلا و سهلا) و مدا يدو سلم عليها..

عليا۽:( اهلين)

عليا۽ كانت متوتره شديد و ماسكه نفسها بصعوبه.. هاني انا م لاقيتو كتير...لاقيتو مره وحده مع عليا۽.. و بس بسمع ب اسمي كتير عن عليا۽ و انا كمان بسمع اسمو كتير جدا..

ناديه سلمت علي عيالها و ركبت قدام و مسكت بتها و الولد ركب ورا مع عليا۽.. هاني لفه عشان يركب...هاني كان مستعجل شديد و داير يمشي بسرعه بس استا۽ جدا لمن ناديه قالت:( يلا اركبي ي عليا۽)

عليا۽ سلمت علينا انا و نور و هي ساكته و ركبت .. و اتحركو بالعربيه..

شلتا هم عليا۽ شديد و راسي جاط.. طلعتا ل مصطفي لقيتو جهز و طالع..

مصطفي:( دايره حاجه?)

قلتا:(لا شكرا)

مصطفي قرب مني:( متاكده?)

كشرتا:( مالك الليله انت?)

مصطفي:( م عارف.. بس عاجباني.. الليله عملتي جو حلو شديد في البيت و الفطور.. و انتي كمان كنتي حلوه شديد.. الجلابيه حتشيل منك حته)

كلام مصطفي ورتني.. اول مره اتكلم معاي كده..

قلتا:( شكرا)

مصطفي:( شكرا? حسستيني اني زول غريب)

قلتاليهو:( لا بس..)

مصطفي:( بس شنو?)

زحيت منو قعدتا في السرير..

قلتا:( ماف شي بس تعبانه دايره انوم اليوم كان طويل شديد)

مصطفي بزعل:(صح.. ارتاحي.. و انا ماشي.. يلا تصبحي علي خير)

و طلع طوالي.. كنت متوتره من موضوع عليا۽ و مصطفي ورتني ذياده... بقيت ماشه و جايه في الغرفه مستنيه عليا۽ توصل و تضرب لي..

هاني مركز علي السواقه شديد و م قادر يعاين في المرايا عشان م يشوف عليا۽ وراهو...ناديه بتتونس مع عليا۽ و عليا۽ بترد بعد تعب..

ناديه:(والله ي عليا۽ انبسطنا شديد الليله..ان شا۽الله نتلما تاني طوالي مع بعض)

عليا۽:( ايوا والله.. ان شا۽الله)

ناديه:(خلاص اللمه الجايه علي في بيتي.. بحددها و بكلم نور تكلمك انتي و مريم.. لازم تجو)

عليا۽:( اكيد ان شا۽الله)

ناديه:( احنا كلنا متزوجات.. فضل انتي بس..عقبالك كده)

لمن ناديه جابت سيره العرس علياء اتوترت و عاين ل هاني بس هاني عمل نفسو م سامع حاجه..

نادي

ه:(بس انتي لسه صغيره اتفسحي شويه و عيشي حياتك بعدين عرسي.. لمن تعرسي حتتمني تطلعي براك براحه بال كده بدون م زول يزعجك و يكون معاك)

عليا۽:( صح)

ناديه:( انتي م مخطوبه?)

عليا۽ اتوترتا من السؤال:( لا)

ناديه:( ربنا يديك نصيبك)

عليا۽:( ان شا۽الله)

هاني اتوتر من كلام ناديه شديد.. و كان داير يصل بسرعه يخلص من عليا۽.. عليا۽ بقت توصف ل هاني في البيت الهو حافظو حفظ.. لمن وصلت البيت سلمت عليهم و جرت دخلت العماره.. و هاني اتحرك..

عليا۽ دخلت شقتهم و مشت علي غرفتها طوالي رمت شنطتها و قعدت في السرير و مسكت راسها و دموعها نزلت.. دقيت ليها ردت لي..

قلتا:(عليا۽ وصلتي? ليه م دقيتي لي?)

عليا۽ و هي بتبكي:( ايوا يدوب وصلتا)

قلتا:( ليه بتبكي حصل شنو?)

عليا۽:( ولا شي)

قلتاليها:( طيب مالك?)

عليا۽:( م عارفه بس الموقف كلو كان كعب شديد)

قلتا في نفسي عليا۽ معاها حق الموقف كعب شديد.. داير ليهو زول قوي.. اتكلمتا مع عليا۽ و خففت عنها شويه .. دقي ليها هاني و انا بتكلم معاها..

عليا۽:( هاني دخل لي في الخط)

قلتا:( خلاص اتكلمي معاهو و لمن تخلصي لو دايراني ارجعي لي)

عليا۽:( طيب.. يلا)

و قفلت و ردت علي هاني..

عليا۽:( الو)

هاني:( حبيبتي..ده شنو الحصل ده?)

عليا۽:( الموقف كان كعب شديد)

هاني:( كان صعب عليك شديد.. عارف كده.. انا اسف)

عليا۽:(م تعتزر انت م ذنبك شي)

هاني:( الدنيا دي ضيقه شديد...كلكم طلعتو بتعوفو بعض و اتلميتو في مكان واحد)

عليا۽:( ايوا قدرنا بس)

هاني:(كدي احكي لي الحصل شنو من الاول اتلاقيتو كيف?)

عليا۽ بقت تحكي ل هاني بالحصل كلووو...

متوكل كان عامل عشاء رومانسي ل نور.. و رسل حسن جاب ليهو الحاجات الهو دايراها..وااقفين حسن و متوكل في الصاله في بيت متوكل و قدامهم الصفره مليانه اكل و فيها شموع.. متوكل بعاين للصفره و هو مبسوط..

متوكل:( اها رايك شنو ي حسن? حلو كده? حتعجبها?)

حسن قلبو كان واجعو من الحاصل بس م قدامو حاجه يعملها حسن ابتسم بالم:( اكيد حتعجبها)

متوكل:( و الورد حلو?)

حسن:( ايوا حلو شديد)

متوكل:( قعد اقصر معاها كتير و طوالي هي بتشتكي لكن الليله ان شاءالله تعجبها و ترضي)

حسن:( اكيد حتنبسط)

متوكل:( خلاص يلا امشي جيبها و انا حادخل استحما سرعه)

حسن:( حاضر)

حسن طلع و دموعو في عيونو.. حسن بحبها شديد قبل م هي تبقي تحبو اصلا.. حسن دقي ل نور و جات طالعه شايله بتها نايمه.. و ركبت..

نور:( كيفك ي حسن?)

حسن:( الحمدلله)

نور:( مالك مكشر?)

حسن:( ماف شي?)

نور:( حسن انت م طبيعي في شنو?)

حسن:( نور ماف شي بس مصدع)

نور:( متوكل رجع?)

حسن:( ايوا اسي نزلتو و جيتك)

نور عاينت ليهو لقت دموعو نازله.

نور بخوف:( حسن في شنو? الله يرضي عليك اتكلم)

حسن شال نفس.

حسن:( متوكل عامل ليك ليله رومانسيه.. عشاء و شموع و ورد و ااي شي)

نور غمضت عيونها من الزعل.

نور:( ده هو المزعلك? دايرني م امشي ليهو? لو قلتا لي م تمشي م حامشي والله م حامشي اتحجج باي سبب و ارجع ابيت عن امي)

حسن:( لا امشي ليهو)

نور:( حسن والله برجع لامي.. رجعني و بلقي اي سبب و متوكل حيزعل شويه و حينسي عادي)

حسن:( لا ي نور)

بقو بتناقشو لحدي م وصلو قدام البيت..

نور:( حسن.. هو صح راجلي و ابو بتي بس انت حبيبي)

حسن بحسم:( انزلي ي نور لانو ممكن يشوفنا من فوق)

نور عاينت ليهو مسافه و فتحت الباب و نزلت طلعت بيتها...

دخلت نور البيت لقت النور مطفي و الشموع مولعه و متوكل قاعد مبتسم.. نور حاولت تدس زعلها و ابتسمت ليهو..

نور:(شنو الرومانسيات دي?)

متوكل:( عشان اراضيك شويه.. ميمي نايمه?)

نور:( ايوا)

متوكل:( نوميها جوه و تعالي)

نور دخلت علي الغرفه رقدت ميمي في السرير و صلحت شكلها و ابتسمت عشان متوكل م يلاحظ حاجه و طلعت ليهو قعدو يتعشو و يتونسو و اتذكرو ايام الخطوبه و العرس.. متوكل كان رايق و مبسوط.. و نور بتمثل انها مبسوطه بس من جواها كانت زعلانه شديد علي حسن و الحاسي بيهو.. قضو ليله حلوه شديد مع بعض.. حسن كان قاعد طول الليل في العربيه تحت البيت م قادر يمشي بيتهم..

نتلاقي♥