الجزء 30

قاعد ابوي في الصاله و نادي علي ريم جات ريم طالعه من المطبخ..

ريم:( ايوا ي ابوي)

عبدالرحمن:( تعالي اقعدي)

قعدت..

عبدالرحمن:( ريم انتي بقيتي كبيره و انا داير اعرس ليك)

ريم اتخلعت..

ريم:( تعرس لي?? )

عبدالرحمن:(ايوا)

ريم:(ي ابوي انا دايره اقرا و ادخل الجامعه و لسه)

عبدالرحمن:( العرس م برفض القرايه...انتي عرسي و اقري)

ريم:(جاني عريس يعني?)

عبدالرحمن:(ايوا)

ريم:(منو?)

عبدالرحمن:( صلاح اخو سميه)

ريم اتخلعت شديد..

ريم:( صلاح?لالا ي ابوي)

عبدالرحمن:(لا في عينك انتي جنيتي? كيف تقولي لابوك? عايزه تبقي ذي مريم صح?)

ريم:( ي ابوي)

قاطعها..

عبدالرحمن:(اسكتي م داير اسمع صوتك ده امشي ادخلي غرفتك سرعه م داير اشوف وشك)

ريم جرت الغرفه و قعدت تبكي..

قاعد متوكل في الصاله بحضر في التليفزيون جات نور شايله صحن كبير فيهو فواكه و قدامهم كان في شاي.. نور عايزه تقعد في الكرسي...

متوكل:(تعالي اقعدي جمبي هنا)

نور بفرح جات قعدت جمبو..

متوكل:( شكلك مبسوطه?)

نور:(طبعا...مبسوطه جدا انو بقي عندك وقت لي)

متوكل:( انا كل حياتي ليك م بس يوم واحد)

نور:(ربنا يخليك لي)

و بقت تقطع في الفواكه و تديهو ياكل..

متوكل:( اها الليله دايره تعملي شنو وله تمشي وين?)

نور بقت تفكر بمرح..

نور:(نقضي الظهر في البيت و المسا۽ نطلع نتعشا برا و نسهر و ميمي تقعد مع ميرنا الفلبينيه)

متوكل:( حتضمنيها?)

نور:(طبعا مضمونين جدا جوازها معايا م بتقدر تمشي حته)

متوكل:( طيب عيوني ليك انا)

نور:( ربنا يخليك لي ي رب)

قاعده عليا۽ في الشقه البتلاقو فيها هي و هاني و مقلقه..

شويه هاني فتح الباب و دخل و كان مكشر..

هاني:(نعم?)

عليا۽:( الزول بسلم في الاول)

هاني:( انتي عارفه انا شغال في داعي تضربي و تقولي لي تعال اسي? اها في شنو?شنو الموضوع المهم?)

عليا۽:( انتي ليه بتتعامل معاي كده?)

هاني:( عليا۽ اختصري قولي في شنو عشان انا راجع شغلي)

عليا۽ وقفت قدامو:(انا حامل ي هاني)

هاني اتخلع:( شنو?? )

عليا۽:( ايوا...شايف ده موضوع ساهل وله بتاجل?)

هاني من الصدمه قعد في الكرسي..

هاني:( مشيتي دكتور?)

عليا۽:(لا كشف الحمل حق الصيدليه)

هاني:( يمكن م صح)

عليا۽:( لا صح.. متاكده)

هاني سكت مساافه..

هاني:( نزلي الولد ده بس)

عليا۽ اتخلعت شديد و جات قعدت قصادو..

عليا۽:( شنو?)

هاني:( تنزلي الولد ماف حل غير كده)

عليا۽:( اقتل ولدنا? ليه? م حتقدر تكلم مرتك?)

هاني بحسم:( م حاقدر.. نزليهو بس)

و قام مشي بسرعه و طلع و قفل الباب وراهو...عليا۽ قعدت مخلوعه.. و دموعها نازله...

دقي لي محمد نهايه الدوام..

محمد:( مريم خلصتي?)

قلتا:(ايوا)

محمد:( انا جاي عليك اطلعي لي برا)

طلعتا استنيتو جاني..سلمتا عليهو...محمد كان مقلق ..

سالتو:( في شنو?)

محمد:( تعالي نقعد في الكافتيريا دي)

و مشينا علي كافتيريا قعدنا..

سالتو بخوف:( محمد في شنو?)

محمد:( ابوك قرر يعرس ل ريم)

اتخلعتا شديد:( ريم? كيف?)

محمد:( داير يعرسا ل صلاح)

اتخلعتا اكتر...

قلتا:( صلاح? احنا م خلصنا منو? الله يلعنك ي سميه.. الله يلعنك)

محمد:( مريم اهدي شويه.. و خلينا نفكر براحه نعمل شنو.. و نحل الموضوع كيف)

قلتا:( م عارفه حل انا.. م عارفه شي.. الله يلعنك ي سميه) و دموعي نازله... اللحظه ديك مصطفي دقي لي مديت التلفون ل محمد يرد..

محمد:( الو)

مصطفي باستغراب:( منو معاي? )

محمد:( انا محمد ي مصطفي)

مصطفي:( محمد م عرفتا صوتك والله...كيفك?)

محمد:( تمام الحمدلله)

مصطفي:( انت مع مريم?)

محمد:(ايوا في كافتيريا هنا جمب شغلها)

مصطفي:( خلاص انا جمبكم اسي بجي)

مصطفي دقيقتين و جانا..لمن شاف شكلي اتخلع..

مصطفي:( في شنو ي مريم?)

محمد:( اقعد ي مصطفي م تقلق)

قعد جمبي..

مصطفي:( في شنو ي محمد?)

محمد:(ابوي داير يعرس ريم ل صلاح)

مصطفي اتخلع:( شنو?)

خوفي و حبي لاخواتي كان اكبر من ااي شي...كنت مستعده اعمل ااي شي عشان يبقو كويسين و ابوي م ياذيهم.. قررنا نمشي البيت نتفاهم مع ابوي.. ركبنا مع مصطفي و مشينا..

ساره قاعده في غرفتها و بتتكلم مع امجد في التلفون..

ساره:(طالع المطار متين?)

امجد:( انا جاهز بس ابوي معاهو ناس اسي بطلعو و بنطلع طوالي)

ساره:( حتقعدو كم هناك?)

امجد:( حسب العلاج بس م بنتاخر)

ساره:( طيب ربنا يسهل ليكم اول م تصل طمني و اول من تعمل رقم رسلو لي عشان اضرب ليك)

امجد:( حااضر)

ساره:( امجد الحبوب?)

امجد:( اتطمني وصيت الولد يجيب ليك)

ساره:(كنت تخليني اشتري كميه كبيره)

امجد:(لالا صحبي بجيب ليك اتطمني)

ساره:( طيب)

امجد:( يلا بضرب ليك و انا طالع الطياره)

ساره:( طيب)

امجد:( مع السلامه)

ساره:( مع السلامه)

و قفلو...

دقينا باب بيتنا فتحت لينا مي.. كانت مكشره و لا فرحت ب شوفتنا.. سلمت علينا..

مي:(ادخلو)

دخلنا ..

سالتها:( وين ريم?)

مي:( في الغرفه)

مشيت عليها طوالي لقيتها راقده و بتبكي من شافتني قامت جات جاريه علي حضنتني و بتبكي..

قلتا:( ريم.. ليه كده حبيبتي...م تبكي م حيحص

ل شي.. ماف زول حيغصبك علي حاجه)

ريم:( ابوي م حيرضي)

قلتا:( اتطمني حبيبتي.. اتطمني)

سمعتا صوت ابوي جا من الصلاه و بسلم علي محمد و مصطفي ..

قلتا:( ريم خليكم هنا انتي و مي و م تطلعو ابدا الا اناديكم)

ريم هزت راسها ب طيب.. ريم شكلها كان زعلان شديد و ذكرتني نفسي لمن ابوي كان داير يعرسني ل صلاح.. عرفتا انو ريم حاسه بنفس الوجع الكنت حاسه بيهو.. طلعتا سلمتا علي ابوي سلم علي بمساخه.. و قعدتا..

عبدالرحمن:( خير? شنو الجايبكم الليله كلكم كده بربطه المعلم? ريم لحقت توصل ليكم الكلام?)

محمد بكل هدو۽:(ي ابوي انت صحي داير تعرس ريم ل صلاح?)

عبدالرحمن:( ايوا...في زول فيكم عندو اعتراض?)

محمد:(كيف ي ابوي م نعترض? ريم لسه صغيره و يدوب دايره تدخل الجامعه)

عبدالرحمن:( هي بتي و انا حر فيها)

محمد:( ي ابوي انت عايز تحسبها بالعقل وله مكاواه?)

عبدالرحمن:( عاين ي محمد م داير كلام كتير.. انا حر في بتي و بكرا دي داير اعرس ليها بس صلاح مسافر يومين و حيرجع و حاعرسها ليهو و اعلي م في خيلكم اركبوهو)

قلتا:( ابوي ..انت مشكلتك معاي انا م مع ريم...خلي ريم في حالها و تكمل قرايتها.. و انا اصلا م حاستمر مع مصطفي و حنطلق و حاعرس صلاح)

مصطفي اللحظه ديك اتخلع شديد و عاين لي بس ابيت اعاين ليهو..

عبدالرحمن:( لا انا حاعرس ليهو ريم و خلاص)

قلتا:( ي ابوي حرام عليك ريم صغيره...مش من الاول داير تعرس لي صلاح اسي انا بعرسو)

عبدالرحمن وقف و كورك:(لا يعني لا والله اعرس ليها صلاح و رب الكعبه اعرسو ليها)

وقفنا معاهو كلنا..

محمد:( ي ابوي م تحلف لانو الكلام ده م حيحصل)

عبدالرحمن:( حيحصل و نشوف كلام منو الفينا الحيمشي انا وله انت..مش كسرتا كلامي و مشيت عقدتا ل مريم من وراي شوف اسي حتعمل ل ريم شنو?)

مصطفي:( ي جماعه اهدو الموضوع بتحلا ببساطه.. ي عمي كدي نتفاهم)

عبدالرحمن:( م تقول لي عمي انا لا عمك لا بعرفك)

مصطفي اتخلع في كلام ابوي..

محمد:( ي ابوي الكلام ده م حيحصل ..عايز ترضي مرتك باي طريقه ارضيها بس بناتك لا)

عبدالرحمن:(اسمع هنا ي محمد م ليك ااي كلمه علي بناتي فاهم وله لا و بعمل الدايرو فيهم و انت م تتدخل ابدا)

محمد:( ي ابوي ديل اخواتي كيف م اخاف عليهم)

عبدالرحمن:( م بتخاف عليهم اكتر مني)

محمد و ابوي بقو بكوركو مع بعض و جايطين و انا م قدرتا اتكلم بقيت ببكي مصطفي جا مسكني عليهو .. جات داخله سميه شايله اكياس و مخلوعه..

سميه:( في شنو? صوتكم جاي اخر الشارع)

طوالي قبلتا عليها..

قلتا:( انتي السبب انتي وش المصايب و كل المصايب دي جايانا من تحت راسك...انتي دايره شنو مننا.. دايرانا نعرس اخوك المتخلف ده? م حنعرسو امشي عرسي ليهو وحده من الشارع بس وحده فينا م حتعرسو)

وقفني كف ابوي في وشي.. اتخلعتا شديد ...

عبدالرحمن بقي بكورك باعلي صوتو:( اطلعو من بيتي .. اطلعو سرعه.. اطلعو..اطلعو)

مصطفي مسكني و جر محمد بالقوه و طلعنا و ابوي قفل الباب بقوه من ورانا.. كنت ببكي شديد.. مصدومه في ابوي.. اول مره يمد يدو علي.. ركبنا العربيه و اتحركنا..

محمد:( مريم.. انتي كويسه? مريم بطلي بكي عليك الله)

قلتا:( دي اول مره ابوي يمد يدو علي .. يمد يدو علي عشان سميه.. عشانها)

محمد:( معليش ي مريم.. هو انفعل شديد و انتي عارفاهو م برضي في سميه)

قلتا:( انا بتو? انا بتو? ليه يعمل معاي)

مصطفي:( ابوكم زعلان لحدي اسي من انك كسرتا كلامو و عقدتا لينا انا و مريم)

محمد:( صح هو م بنساها لي تاني)

مصطفي:( و الضحيه حتكون ريم)

قلتا ليهم بخوف:( لا والله علي جثتي الكلام ده.. م يقدر بعقد لريم مهما حصل)

مصطفي:( لازم نهدا و نفكر براحه ي مريم)

محمد:(ان شا۽الله حنلقي حل.. ان شا۽الله)

نزلنا محمد بيتهم و مشينا بيتنا.. دخلتا قعدتا في الغرفه ببكي رفضتا اكل رفضتا الكلام بس همي في اختي.. كيف تضيع مستقبلها كده.. كيف تعرس واحد ذي صلاح ده..

مصطفي كان تحت و جا طالع لقاني لسه ببكي..

مصطفي:( مريم حرام عليك ليه عامله في روحك كده?)

قلتا بحسم:( مصطفي طلقني)

مصطفي اتصدم شديد..

قاعده سحر مع عليا۽ في غرفتها..

عليا۽ كانت بتبكي ..

عليا۽:(دايرني انزل الفي بطني? ولدنا? دايرني اقتل ولدي?)

سحر حضنتها عليها..

سحر:(لالا م حتنزلي.. حيعلن زواجكم غضب عنو حيعلن زواجكم)

عليا۽:(م حيعلنو و ممكن يطلقني.. عادي ممكن يستغني عني ذي م عايز يستغني عن ولدنا)

سحر:(هو معرسك و من حقك عليهو يعلن زواجكم)

عليا۽:(طلع معفن م يستاهل حاجه.. خساره حبي ليهو و ثقتي فيهو.. خساره فيهو ااي شي.. خليهو يعلن زواجنا و ينسب ولدو ليهو و بعدها يطلقني.. م حيفرق معاي تاني.. انا م دايراهو)

سحر:( صح اهم شي يعترف ب ولدو ده المهم اسي)

عليا۽ بقت مع سحر لمن هدت شويه و خلتها و مشت بيتهم..

نتلاقي♥