الجزء 7

دخل هاني شقتو لقي الاء عمرها3 سنه و احمد عمره 5 سنه بلعبو في الصاله من شافوهو جو جارين عليهم.. و هو رفعهم الاتنين عليهو..

احمد:(جبتا لي معاك شنو ي بابا?)

هاني:( قبيل قبل م اطلع جبتا ليكم عصير و حلاوه)

الاء:( ي بابا احمد شرب من العصير حقي)

هاني:( معليش بجيب ليك تاني)

جات طالعه ناديه من الغرفه..

ناديه:( هاني اتاخرتا ليه?)

هاني:(كل يوم بتساليني كده عارفاني لمن اقعد مع اصحابي م بحس بالزمن)

ناديه:(انت عندك عيال و بيت لازم تحس)

هاني:( ان شاءالله..شربتي الشاي?)

ناديه:( لا)

هاني:( خلاص جهزيهو حاصلي و اجي)

و نزل العيال علي الارض و دخل علي الغرفه..

محمد بقي بجينا يوم الجمعه بس.. بقيت حاسه في شي م طبيعي.. بسالو قال لي الكوره و كده.. م صدقتو.. قلتا اسال سهي.. يوم جمعه محمد جا هو وسهي و تاني هو طلع يحضر كوره في النادي انتهزت الفرصه و ناديت سهي غرفتي ..

سالتها:( سهي ..محمد مالو?)

سهي:( مالو?)

قلتا:(ليه م بجينا الاسبوع كلو الا الجمعه?)

سهي:( بجي من الشغل و تاني الكوره.. )

قاطعتها..

قلتا:( لا في حاجه.. احكي لي)

سهي:( ماف شي)

قلتا:(احلفي)

سهي سكتت..

قلتا:( شفتي.. معناها في حاجه)

سهي:( مريم معليش بس انا م بقدر اقول ليك حاجه من نفسي خلي محمد يقول ليك)

قلتا:( قولي لي و اوعدك محمد م حيعرف)

سهي:( م بقدر والله)

قلتا:( عليك الله و غلاوتي عندك)

سهي:( م بقدر والله)

قلتا:( والله م بقول ليهو اني عرفتا بس وريني عشان ارتاح.. عليك الله..وريني.. عليك الله)

ضغطا علي سهي شديد...في الاخر قالت لي..

سهي:( بوريك بس عليك الله م تقولي ليهو)

قلتا:( بوعدك م بقول)

سهي:( محمد بقي شغال شغل تاني في مكتبه من العصر لحدي الساعه11.. عشان يكفي ليكم مصاريفكم هنا.. عشان كده م بقدر يجيكم خلال الاسبوع الا الجمعه)

طبعا اتصدمتا شديد و لمن دموعي نزلت.. بقيت سااكته ساااي.. سميه نادت سهي.. و دي كانت فرصه سهي طلعت ليها طوالي و انا بقيت قاعده زعلانه..محمد بتعب شديد عشانا و بشتغل شغلين عشانا.. جد حنيت عليهو.. ااي هو راجل و بتحمل.. بس في الاخر هو اخوي و انا م بتحمل فيهو حاجه.. فعلا حفظتا السر و م جبتا سيرتو ل زول ابدا...

محمد لمن جا من الكوره كنا كلنا قاعدين في الصاله حتي ابوي.. قعد شويه كنت بعاين ليهو بعين الفخر.. كان نفسي اقوم احب علي راسو و يدو.. شويه كده...

محمد:(يلا ي سهي)

سهي:( يلا)

و قامو...

عبدالرحمن بطريقه بايخه:( محمد...دايرين لحمه و خضار لبكرا م عندنا ااي شي و حتي حبوبي انتهت)

اتخلعتا شديد من طريقه كلام ابوي مع محمد..

محمد:( حاضر ي ابوي.. الصباح بكون عندكم اي حاجه عايزنها.. تامر بحاجه تاني?)

عبدالرحمن ببياخه:( لا)

محمد:( تصبحو علي خير)

سهي:(تصبحو علي خير)

و طلعو... زعلتا شديد من ابوي و تصرفو...اصلا هو كان زعلان من محمد و داير يزعلو وله يتعبو م عارفه.. مشيت علي غرفتي بسرعه دخلتا و قفلتا الباب.. بقيت ببكي.. نفسي ابوي يقدر تعب محمد و يشكرو م يتعامل معاهو كده و يآمرو.. زمان لمن ابوي كان بصرف علينا و مرات م بكون عندو م كنا بنسالو بالعكس بنسكت عشان م يحس انو احنا محتاجين حاجه و هو م قادر يجيبا م بنحسسو بالنقص ابدا.. بس هو بقي صعب و غريب ذياده عن اللازم.. بحس انو بكرهنا و بعاملنا كاننا اعداءو.. فعلا الصباح لمن صحيت لقيت محمد جاب حاجات للبيت و جاب الحبوب و ابوي لسه بنقنق و م عاجبو شي.. سكتا خليتو م دايره ادخل معاهو في مشاكل و كلام كفايا موضوع صلاح..

طلعات سميه من البيت كل يوم الصباح بقت كتيره..لو بقي في اي شي في البيت للاكل برضو بتفتش حاجه من ماف عشان تطلع تجيبا و تغيب بالساعات و تجي تتحجج لي ب اعزار غريبه.. بديت اشك اركز معاها شديد.. بتمشي وين و بتعمل شنو م عرفتا.. لو م كنت مجبصه رجلي كنت مشيت وراها و راقبتها..

اهتمام مصطفي بي قلا بقي م بسال مني طوالي.. مره مره محمد بقول لي مصطفي سال منك.. بقيت بعد الايام بسرعه عشان افك الجبص.. و فعلا خلصت الايام و جا موعد فك الحبص كنت مبسوطه جدا.. صحيت بدري دقيت ل محمد.. محمد كان لسه نايم ..بس سهي صاحيه ردت علي بخوف..

سهي:( مريم)

قلتا بحماس:( سهي صباح الخير)

سهي:( صباح النور)

قلتا:( محمد لسه م صحي?)

سهي:( والله بصحي فيهو بس هو م قام.. في حاجه?)

قلتا:( لا بس مفروض نمشي نفك الجبص الليله.. اديني ليهو)

سهي ابتسمت:( حاضر)

و صحت محمد مدت ليهو التلفون..

محمد:( منو? )

سهي:( مريم)

محمد ردا:( ايوا ي مريم)

قلتا:( محمد انت لسه نايم? يلا اصحي عشان نمشي نفك الجبص)

محمد:( حاضر ي مريم حاقوم اسي)

قلتا:( يلا سرعه)

و قفلتا..

محمد:( البت دي مجنونه)

سهي:( عامله ذي العيال اول يوم في المدرسه)

محمد:( صح)

سهي:( يلا قوم)

محمد:( حاضر)

محمد جاني لقاني لابسه..

محمد:( عامله ذي عيال المدرسه.. يلا مصطفي مستني تحت)

استغربتا.. قلتاليهو:( لشنو?)

محمد:( اصرا يجي يودينا...يلا ارح)

و نزلنا.. سلمت علي مصطفي عادي و مشينا المستشفي ف

كو لي الجبص و عملو صوره ل رجلي كانت كويسه و بكدا بقدر امشي عليها عادي.. كنت مبسوطه شديد.. محمد و مصطفي ضحكو فيني.. طلعنا مصطفي قال نفطر محمد قال م عندو طريقه و اتاخر علي الشغل..

محمد:( امشي افطري معاهو انتي ي مريم)

قلتا:( لالا خلاص برجع البيت تعبانه دايره ارتاح)

مصطفي:( خلاص نخليها مره تانيه.. يلا اوصلك)

محمد مشي علي شغلو و انا ركبتا مع مصطفي يوصلني.. انا بكون مبسوطه و نفسياتي كويسه بس اول من اشوف مصطفي بكشر ليهو.. م عارفه ليه.. مع انو ظريف جدا معاي بس م قادره اطيقو ابدا..

في العربيه ساكتين..و مصطفي مشغل اغاني بصوت هادي.. شويه مدا يدو قفل الاغاني و عاين لي...

مصطفي:( انتي ليه م طايقاني كده?)

قلتا:( ليه بتقول كده?)

مصطفي:(لاني شايف كده.. فعلا انتي م طايقاني بتتعاملي معاي بطريقه بايخه شديد)

قلتا ببرود:( ابدا ماف شي)

مصطفي:(متاكده?)

قلتا:( ايوا)

مصطفي:( طيب ليه رفضتي تمشي معاي نفطر مع انو محمد قال ليك امشي معاي)

قلتا:( ماف سبب بخليني افطر معاك)

مصطفي سكت مسافه شكلو زعل.. تاني م اتكلمنا وصلتا قدام بيتنا قلتا:( شكرا)

و نزلتا قبل اسمع ردو و مشيت.. كنت م بقدر اضغط علي رجلي شديد بضغط براحه حاسه بالم و خايفه اصلا.. دخلتا البيت لقيت سميه بتقطع في خضار عاينت لي و زغرتت..

سميه:( حمدلله علي السلامه)

قلتا:( الله يسلمك)

سميه:( لازم نضبح ليك)

قلتا:( لا ماف داعي.. حامشي ارتاح شويه)

و دخلتا غرفتي...سميه م كنت طايقاها.. وقفتا بعاين لنفسي في المرايا بدون العجله و بدون الجبص كنت مبسوطه شديد.. بس ابيت ابين ل سميه اني مبسوطه.. رقدتا شويه و نمتا صحيت ب ريم و مي بصحو فيني و هم مبسوطين اني فكيت الجبص حضنتهم علي و انا مبسوطه اكتر منهم..

تاني يوم مشيت الشغل طوالي م قدرتا اقعد.. كنت دايره اريح محمد من مصاريفنا.. قاعدين انا و علياء نتونس..

قلتا:( اخبار هاني شنو?)

علياء:( كويس)

قلتا:( بتتلاقو?)

علياء:( ايوا.. مره في الاسبوع بنتغدا مع بعض)

قلتا:( و عرسكم?)

علياء:( م جاب سيره)

قلتا:( عليااء....لازم تتكلمو في الموضوع ده م ينفع تستمري كده لو م حيعرسك تخليهو طوالي)

علياء بخوف:( اخليهو? والله بموت)

قلتا:( بطلي حركات المراهقين دي كيف يعني تموتي.. عايني خلي قلبك بعيد و احسبيها بعقلك.. اسي ليكم كم مع بعض?)

علياء:( سنه و 3 شهور)

قلتا:( و هو متزوج و عندو عيال.. يعني م فارق معاهو لو عرس تاني لو لا.. لو جاب عيال لو لا.. بس انتي بت حيفرق معاك...لازم تعرسي و تجيبي عيال.. م ممكن تقعدي كده.. كلميهو او يعرسك او كل زول فيكم يمشي لحالو)

علياء سكتت مساافه..

علياء بصوت حزين:( كلامك صح ي مريم.. بس انا بحبو م بقدر استغني عنو او اقدر اعرس غيرو.. مستعده اضحي بآي شي عشان خاطرو)

قلتا:( ليه? عشان شنو?)

علياء:( عشان بحبو)

قلتا:( علياء الحب م كل حاجه.. م ممكن عشان بتحبيهو تضحي ب عمرك و سنينك سااي كده ليهو.. اما يتزوجك اما يسيبك تعرسي.. ابقي قويه و افتحي معاهو الموضوع و شوفي رايو شنو و تعالي قولي لي و انا بعرف لو هو جادي و حيعرسك وله لا)

علياء:( م عارفه)

قلتا:( لازم ي علياء.. قولي ليهو انا جاني عريس و كده.. و شوفي رايو انو عايزك و حيعرسك وله ح يقول ليك عرسي)

علياء:( بخاف يزعل)

عاينتا ليها مسااافه و قلتا بزعل:( انا الحازعل منك و حاقطع علاقتي بيك لو بقيتي تفكري كده.. ياخ م يزعل يعني شنو? حيحصل شنو لو زعل? علياء خليك كبيره و عاقله)

علياء:(حاضر ي مريم.. بسالو و بوريك)

كنت مقلقه علي علياء و علاقتها مع هاني.. صح هاني زول كويس بس هو متزوج و عندو عيال م ينفع تقعد تستناهو كده.. و علياء حنينه شديد و بتفكر ب قلبها عشان كده خايفه عليها..

قاعده سميه مع ابوي في الغرفه..

سميه:( اهو مريم فكت الجبص و بقت كويسه.. و صلاح كل شويه بضرب يسال انو عايز يحدد العرس في اقرب وقت)

عبدالرحمن:( م عندي مشكله خليهو يحدد و احنا جاهزبن)

سميه:( عاين احنا نعقد الاول بعدين نحدد العرس)

عبدالرحمن:( ليه يعني?)

سميه:( صلاح داير كده)

عبدالرحمن:( حاضر بنعقد طوالي)

سميه:( خلاص انا بكلمو يجي بعدين المساء و يجيب مازون و نعقد و نحدد العرس بعد اسبوعين..رايك شنو?)

عبدالرحمن:( حاضر عيوني ليك انتي و صلاح)

سميه:( تسلم لي ي رب..خلاص م تكلم مريم او محمد لحدي م نعقد عشان محمد م يعمل لينا جوطه تاني)

عبدالرحمن:( ايوا صح)

نتلاقي♥