الجزء 8

سميه كانت حاسه لو حدد العرس و كلموني انا و محمد ممكن نعمل حاجه تبوظ العرس او ممكن اهرب عديل عشان كده كانت دايره تعقد لي فجاه و بعدين نحدد العرس عشان م يبقي عندي طريقه لاي حاجه تاني.. كلامهم ده سمعتو مي برا و اتخلعت.. و مشيت علي الغرفه سرعه لقت ريم قاعده بتقرا..قفلت الباب و قعدت في السرير جمب ريم ..

ريم:(مالك?)

مي:(ابوي و سميه اتفقو يعقدو ل مريم علي صلاح بعدين المساء و بدون م هي او محمد يعرفو)

ريم اتخلعت:(كذابه?)

مي:( والله ده الكلام السمعتو ب اضاني)

ريم:( احنا لازم نكلم مريم سرعه عشان تتصرف)

مي:( صح.. جيبي التلفون)

ريم شالت التلفون و دقو لي انا كنت في المواصلات و م سمعتا التلفون.. دقو كم مره م سمعتا.. بقو مقلقين..

مي:( حنعمل شنو?)

ريم:( لازم تعرف عشان م تجي هنا و تكلم محمد و يتصرفو)

مي:( نضرب نكلم محمد)

ريم:( ايوا اضربي ليهو)

ضربو ل محمد.. محمد كان في الشارع..

محمد:( الو)

مي:( محمد كيفك?)

محمد:( اهلا ي مي كيفكم?)

مي:( احنا تمام.. محمد احنا دايرين مريم و مريم م بترد)

محمد بخوف:( في شنو?)

مي:(انا سمعتا ابوي و سميه بتفكو انو بعدين يعقدو ل مريم علي صلاح و بدون م انت و مريم تعرفو)

محمد اتخلع شديد..

محمد:( انتي متاكده من الكلام ده ي مي?)

مي:(اي والله ي محمد عشان كده دايره اكلم مريم م تجي البيت و تتصرفو )

محمد:( خلاص تمام ي مي انا بتصرف و بضرب ل مريم اشوفها وين)

مي:( طيب)

و قفلو..

محمد خاف شديد و بقي بضرب لي الوقت داك انا لسه في المواصلات و م سامعه التلفون..بعد شويه نزلتا قدام البيت طلعتا التلفون عشان اشوف الساعه كم لقيت كميه مكالمات من مي و محمد خوفتا قلتا حصل شنو و دقيت ل محمد ..

محمد:( مريم وين انتي?)

قلتا:( انا داخله علي البيت في شنو?)

محمد:( لا م تمشي البيت)

قلتا بخوف:( في شنو?)

محمد:( ابوي حيعقد ليك علي صلاح اسي المساء)

اتخلعتا شديد و قلتا:( الليله?)

محمد:(ايوا.. تعالي لي.. انا ماشي علي شقتي.. تعالي لي سرعه)

قلتا:( طيب طيب)

و قفلتا و وقفتا اول تاكسي و مشيت علي شقه محمد..

في بيت محمد قاعد محمد و سهي في الصاله مقلقين و بفكرو بحلوها كيف..

محمد:(احلها كيف ي سهي? اعمل شنو عشان اوقف العرس ده?)

سهي:( خلي تعرس واحد تاني)

محمد:( واحد منو يعني? نجيبو من وين?)

سهي:( افهني ماف حاجه حتبطل العقد الا اذا مريم عقدو عليها قبل م ابوك يعقد ليها...انت شوف واحد من اصحابك بتثق فيهو خليهو يعقد علي مريم في الورق بس و نبطل عقد صلاح و ابوك بزعل يومين و برجع و بكده بنخلص من صلاح)

محمد سكت مساافه بقي بفكر.. و سهي ساكته.. فجاه محمد قام وقف و سهي معاهو..

سهي:( مالك?)

محمد:( ماشي مشوار و جاي)

سهي باستغراب:(وين?)

محمد:( قريب.. خلي مريم تستناني م تمشي مهما حصل انا اسي بجي)

و طلع بسرعه.. سهي محتاره فيهو..

طلعت ساره اخت مصطفي من المحاضره و كانت مكشره مشت علي اق.رب بينش قعدت..شالت تلفونها دقت:( الو ايوا ي امجد انا طلعتا....قدام القاعه..طيب) و قفلت ..

جا امجد.. امجد كان اتخرج ليهو سنه..

امجد:( ساره اذيك) سلم و قعد..

ساره :(الحمدلله..و انت كيفك?)

امجد:( تمام والله.. مالك مكشره?)

ساره:(مشروع التخريج لسه م عملتا فيهو شي و محتاره اعمل شنو و ابدا كيف)

امجد ابتسم:( ده المزعلك يعني? طيب ليه م كلمتيني? )

ساره:( ماف زول فاضي ل زول حتي صحباتي م فاضين لبعض)

امجد:(م تزعلي نفسك تعالي انا بوربك تشتغلي شنو و تبدي كيف.. يلا)

ساره:( طيب)

و قامت معاهو..

سميه كلمت صلاح ب موضوع العقد و صلاح فرح جدا..

صلاح:(الله يخليك لي ي اختي يااخ م عارف بلاك كنت حاعمل شنو?)

سميه:( عشان تعرف انك بدوني م تسوي شي.. المهم يلا اجهز و كلم خيلانك و اعمامك و جيب الحاجات القلتها ليك و المازون و بعد العشاء حتكون هنا)

صلاح:( حاضر ي سميه اذان العشاء حاكون معاكم)

دخلتا شقه محمد لقيت سهي بس سلمتا و قعدتا..

قلتا:( وين محمد?)

سهي:( طلع مشوار و قال تستنيهو)

قلتا باستغراب و خوف:( مشي وين? اوعي يمشي ل صلاح)

سهي:( م عارفه بس م اظن.. كدي انتي روقي اسي بجي.. حاعمل ليك شاي)

و قامت مشت.. كنت مقلقه شديد و خايفه محمد يعمل حاجه..

محمد دخل مكتب مصطفي و سلم عليهو..

مصطفي:( والله الليله المكتب نور بيك)

محمد:( منور ب اصحابو)

مصطفي عاين في وش محمد حس في حاجه مضايقاهو..

مصطفي:( في حاجه ي محمد?)

محمد اخد نفس:( مصطفي.. انت اخوي و صحبي و انا بثق فيك جدا.. انا جاي اطلب منك طلب بس م عارف كيف)

مصطفي:( محتاج حاجه? داير قروش?)

محمد:( لالا الحمدلله مستوره.. طلب غريب شويه بس هو حل مؤقت لمشكله)

مصطفي:( محمد في شنو? قلقتني)

محمد:( بتقدر تعقد علي مريم اختي اسي?)

مصطفي اتخلع شديد:( شنو?)

محمد:( تقعد عليها بس لمده شهر لحدي م نشوف حل ل صلاح ده و اهلي بس الحيعرفو بيهو.. اهلك م حيعرفو.. و قول لابوي العرس بعد سنه.. و خلال شهر بس حاكون لقيت طريقه ل صلاح ده و قفلنا موضوعو و بعدها بتطلقو عادي)

مص

طفي سكت م ردا..

محمد:( انا عارف الطلب غريب شديد بس والله م لقيت زول اثق فيهو غيرك.. و انا داير مريم تضيع مع صلاح ده.. صلاح ده عندو بلاوي انا عارفها بس ابوي م مصدق حاجه.. اها قلتا شنو?)

بقيت ماشه و جايه في الصاله و متوتره شديد.. و سهي قاعده بتعاين لي..

سهي:( مريم اهدي شويه)

قلتا:( محمد اتاخر شديد)

سهي:( اسي بجي اقعدي اشربي الشاي ده و هو بكون جا)

قلتا:( مشي وين و بعمل في شنو?)

سهي:( مريم م توتريني ذياده.. اقعدي ياخ)

المغرب مشي و محمد م ظهر... و تلفونو كان ناسيهو في البيت.. انا و سهي الاتنين متوترين.. بعد شويه جا فتح الباب..

محمد:( سهي)

و اشر ليها انو معاهو زول.. سهي دخلت سرعه الغرفه..

قلتا:( محمد مشيت وين انت?)

محمد:( ادخل ي مصطفي)

مصطفي جا داخل ..

مصطفي:(مريم كيفك?)

قلتا:( الحمدلله ي مصطفي)

قعدو الاتنين علي الكنبه جمب بعض..

سهي جات لابسه توب سلمت علي مصطفي و قعدو..

قلتا:( محمد حصل شنو?)

محمد:( عايني انا عقدتا ليك علي مصطفي)

سهي اتخلعت.. و انا من الصدمه م فهمتا حاجه سكتا بقيت بعاين ليهم..

محمد:( مالك?)

قلتا:( يعني شنو?)

محمد:( يعني عشان اوقف ابوي و صلاح.. عقدتا ليك و كلها شهر نلقي حل ل صلاح و تطلقي من مصطفي...لاني م لقيت زول بقدر اثق فيهو غيرو..و هو الحمدلله وافق)

قلتا بزعل:( يعني انت شايف ده حل? و كيف تعمل كده بدون م تكلمني)

و دموعي نزلت..

محمد جا قعد جمبي..و مسك يديني..

محمد:( ماف حل غير ده.. ابوك م بتفاهم و انتي بتستنجدي بي و انا م راضي انك تعرسي صلاح.. م لقيت حل غير ده.. انت شايفه ممكن يكون في حل تاني غير ده?... خلاص بطلي بكا و م حصل شي...بس اقدر اتفاهم مع ابوي و صلاح.. و اصلا انتي حتقعدي في البيت م حتمشي معاهو لانو اهلو م عارفين)

مصطفي:( مريم الموضوع بسيط م محتاج ده كلو.. وقت عايزه الطلاق انا مستعد ليهو)

احتجتا نص ساعه حتي استوعبتا الموضوع.. مي دقت قالت صلاح و اهلو جو..

محمد:( يلا نمشي)

قلتا:( انا خايفه)

محمد:( م تخافي انا معاك)

سهي:( دقيقه ماشه معاكم)

و دخلت جوه..

محمد عاين ل مصطفي..

محمد:( مصطفي ذي م اتفقنا)

مصطفي:( تمام)

مصطفي برضو كان جايط و م فاهم شي بس م كان داير يخيب ظن صحبو فيهو بعد م استنجد بيهو و جا لحدي عندو..

طلعنا انا و محمد و مصطفي و سهي من البيت و مشينا علي بيتنا كلنا كنا خايفين من الحيحصل.. ابوي صعب و م بسكت و بقلب الدنيا..

وصلنا البيت وقفتا خايفه و جسمي برجف و ماسكه في يد محمد.. دقينا الباب.. جات ريم فتحت عاينا في الصاله لقينا صلاح و معاهو خيلانو اتنين و عمتو و عمو و راجل لابس جلابيه و عمه شكلو المازون و ابوي و سميه..

دخلنا الاربعه قلنا:( السلام عليكم)

ردو:( و عليكم السلام)

عبدالرحمن:(تعال ي محمد حتبقي شاهد ل اختك)

محمد:( عايز تعقد لمنو?)

عبدالرحمن:(ل مريم بتي.. يلا تعالو اقعدو)

ابوي كان مبسوط.. قلبي وجعني عليهو..

محمد:( ابوي تعال دقيقه دايرنك)

عبدالرحمن:(بعدين ي محمد يلا دايرين نقعد.. يلا ي مولانا)

محمد:( ابوي دقيقه بس)

عبدالرحمن عاين ل محمد بزعل و وقف علي حيلو..و جا علينا..

محمد:(تعال معاي ي ابوي في الغرفه جوه)

و مشو مع بعض انا جسمي بقي م شايلني و قعدتا في الكرسي و سهي و مصطفي جمبي.. و الضيوف بعاينو لينا باستغراب و سميه تتبسم ساي و صلاح عينو م شالا مني من ساعه م دخلنا.. كلها دقيقتين و سمعنا جوطه ابوي..

عبدالرحمن:( شنو? عقدتا ليها? انت بتكسر كلامي ي محمد? مريم دي بتي وله بتك? كيف تعمل كده? كيف تكسر كلامي)

بجوطتو كلنا جرينا دخلنا الغرفه..لقيناهو ماسك محمد من هدومو و بكورك فيهو...

سميه:( خير ي عبدالرحمن في شنو?)

نتلاقي♥