الفصل السابع

عبد الرحمن مواصل بتكلم مع فارس. قال ليهو. لكن في كلام انا عايز اقولو ليك يا فارس .. اول حاجة قصة فارق العمر دي.. مابتشكل اي اشكال.. لا دينيا ولا اجتماعيا. انت مابوروك ..

شوف فارق العمر بين امنا خديجة والمصطفى علي الصلاة والسلام .. ومن ناحية المجتمع كتير اهلنا بتزوجو بنات صغار.. ومافي زول بعترض.. ياخي يهودا ود عبدالنبي بي قدام المدرسة اتزوج بت فرق العمر بينا وبينو 30 سنة والله ..

اما مسألة استاذ وطالبتو دي برضو حكاية عادية.. لكن في المرحلة الحالية تكون العلاقة قائمة بينكم الاتنين في سرية تامة .. ومافي زول لامن الطالبات لامن اهل سارة يعرف بالحاجة دي.. حتى تتخارج سارة من المدرسة وبعدين الفيها خير ربنا بسويها ..

فارس قال ليهو.. لالالا ياعبد الرحمن انا مابقدر على الموضوع ده.. والله مابقدر اعمل لي حاجة مدسوسة .. انا من الله خلقني حاجاتي كلها في العلن ..

قال ليهو طيب نمشي انا وانت لابوها ونتكلم معاهو .. يعني نفتح ليهو اضانو.. ونقول ليهو الموضوع ده مبدأي.. لغاية ماتمتحن حتي نجي رسميا ..

فارس قال ليهو عبد الرحمن ليه بس انت بتعمل كدا؟ .. ودافعك شنو؟ عايز تلم الموضوع ده باي طريقة ؟..

قال ليهو صراحة انا من زمان ماشفت حب زي ده.. وحرام يضيع ..

البت دي لو جا واحد من اهلها وخطفها بخلي خشمك ملح ملح..

وهي زاتها بتكون حياتها تعيسة .. اسمع كلامي يافارس واستعجل الموضوع بعدين بتندم صدقني ..

والحاجة التانية البت دي بالطريقة دي ممكن تسقط في الامتحانات ..

تسقط شنو دي ممكن تجن عديل ..

يعني طيب انت على الاقل اتكلم معاها.. انك قبلت حبها وقول ليها لو ربنا هون والقسمة قالت خير انا بكون سعيد ..

فارس قال ليهو لالا ابدا. انا مابدخل في موضوع زي ده.. انا حبي ده ماعبرت عنو الا ليك انت .. انت عارف انا بستحي اعاين في وشها البت دي شدت ما متعلق بيها .. بمشي ليهم بعمل الحصة كلها مابقدر املا عيني فيها .. ربنا يحفظها ياخي .. عليك سيب الموضوع.. واعمل زي ما وصيتك.. وخلي البت تواصل دراستها.. وربنا يقسم ليها الخير كان انا .كان غيري ..

المهم عبد الرحمن مصر اصرار شديد.. انو فارس يعمل اي حركة ..

حتى لو بس ان شاء الله يحسس البت انو ببادلها الشعور ..

وفارس رافض رفض شديد.. ومصر انو يخلي حبو سجين الضلوع ..

والجلسة انتهت ومشو..

عبد الرحمن ساكن في حي من احياء بحري الطرفية..

وبرضو فارس ساكن في بحري في حي عريق كدا .. على كل يا اخوانا. القصة كلها احداثها حاصلة في بحري .. والمدرسة في بحري ..

طبعا سارة كانت اليوم داك في البيت.. طوال اليوم خايفة ومتوترة.. وبتحاول تتعامل عادي في البيت.. عشان ناس البيت مايلاحظو لاي حاجة .. لكن القصة فلتت منها .. وبقت تتكلم اكتر مما يلزم وتضحك كتير .. وظاهر انها بتضحك بالغصب.. كانها داسة حاجة وبتعاين في عيون امها وابوها و خالد اخوها الكبير ..

ابوها كان بتغدي وبعاين ليها .. قال لي عايدة ..

عايدة انتي الليلة سارة دي حاسة بشنو فرحانة كدا؟ ..

عايدة قالت ليهو حليلك انت ياود امي.. فرحانة شنو؟ دي متوترة لدرجة الجنون .. لكن انت مابتعرف البنات ..

قام حسن قال لي بنتو .. اسمعي ياسارة اولا.. الامتحانات هسي باقي ليها خمسة شهور .. وانت ماشاء الله عليك زولة شاطرة.. وانا كلي ثقة انك حاتكوني من المتفوقين ..

وهي من جواها تقول ليهو.. لوكنت يابابا عارف الحاصل كان ضبحتني عديل ..

ياربي ماتخيب ظن ابوي فيني ..

وطبعا ياجماعة سارة كانت خايفة من انو.. استاذ عبدالرحمن يوري فارس الدفتر وفارس يزعل .. ويقوم يضرب لابوها وابو اريج ويعمل فضايح.. وخايفة من انو تحصل مشكلة لاريج بسبب الكلام المكتوب ..

المهم الليل داك كلو مانامتو .. وكانت بس راقدة ومفنقلة عيونا في السقف ومتوترة ..

وقالت باكر بقوم امشي لاستاذ عبد الرحمن.. واتكلم معاهو وابكي ليهو ..

وعبدالرحمن زاتو بالليل كلو مانام من قصة سارة وفارس .. وكل مرة يقوم من سريرو.. ياخد ليهو حومة بالحوش.. ويجي يرقد ويفكر ..

المهم يازول اخيرا استقرا على راي غريب وخطر.. وراي متهور جدا .. والراي ده قد يورط المدير فارس في مشكلة كبيرة ..

المهم عبد الرحمن جاب ورقة فلسكاب كبيرة وبدأ يكتب ..

(y) (y)

الى العزيزة الغالية سارة لك التحية والاحترام ..

لقد سلمني الاستاذ عبد الرحمن دفتر خواطرك الوجدانية .. وانا لم اوافقه الراي بالاطلاع عليه رغما" عن انفك .. ولكني لما رايت الكلام موجها الي شخصيا" ..

واصلت وقرات كل كلمة فيه بانتباه شديد ..

ورايت كم من الود والحب تكنيه الي .. وهذا من حسن حظي.. حيث ان الطالبة الوحيدة التي اعجبت بها .. وتمنيتها في حياتي تبادلني نفس الشعور ..

وهذا الموضوع زرع في قلبي كثيرا من الامل والتفاؤل .. والفرحة التي في قلبي الان لاتساويها فرحة ..

كان عبد الرحمن يريد ان يحرق الدفتر.. فمنعته لان الدفتر قد يكون لنا ذكرى طيبة في حياتنا ..

ولكن ارجوك ثم ارجوك .. ان تخفي هذا الكنز في مكان امن حتى لاتصل اليه الايدي .. ولاتضيفي عليه اي شي ..

وانا والله لم اقل لاريج اي من الكلام الذي ذكرته .. وانما وجهتها الى ان الذي فعلته خطأ جسيم .. وتكلمت معها وحدها .. حتى لا احرجها امام احد ..

فصدقيني انتي فقط من يهمني .. ولن أسالها عن ما قالت ..

سارة .. اعلمي ان مابداخلي لك من الحب.. لا يقل عن هذا الذي كتبتي..

ولكن ظروفنا الان.. لاتسمح لنا بكل هذا.. فارجوك اصبري ولاتكتبي زيادة .. ولا اريد منك الا التفوق .. وبعد ذلك لن اتخلى عنك .. كلها اشهر قليلة ونلتقي الى الابد ..

ولك مني الف تحية ياناصعة البياض ..

" فارس "

,,,

وطبق الورقة وختاها في نص الدفتر وشال الدفتر معاهو باكر الصباح .. وداسيهو عشان فارس مايشوفو .. وطبلو في درجو ..

وبقى منتظر فرصة .. عشان فارس يطلع ليهو على حتة .. وينادي سارة ويبشرها ..

وقت لقى مافي طريقة .. وفارس كلو كلو ما طلع .. اتصل على واحد صاحبهم في السوق ..

قال ليهو اضرب لي فارس يجيك .. لاي موضوع .. لامن الاقيك احكي ليك ..

وفعلا داك ضرب لي فارس.. وقال ليهو فارس انا محتاج ليك هسي تجيني .. حوجة ماسة ..

المهم فارس قام منزعج وقال لي عبد الرحمن اسمع انا عندي مشوار ضروري وبجي .. قال ليهو احكي لي ماشي وين؟.

قال ليهو عندي حاجة في السوق .. اجيبها واجي سريع .. وطلع ..

..عبد الرحمن عاين ليهو وقعد يتبسم .. وقال والله البلد دي لو فيها عشرين زي فارس كان اتعدلت ..

كان ده واحد تاني.. كان شال حال صاحبو الفي السوق .. وقعد يتفشر .. (فلان قال محتاج لي .. وأنا ماشي الحقو اشوفو مالو) ه لكن فارس دي مابعملا ..

المهم ياجماعة .. فارس طلع ركب. طوالي عبد الرحمن رسل لي سارة ..

وجات .. قال ليها جري الكرسي ده .. احكي ليك اسعد خبر تسمعيهو في حياتك ..

طيرت عينيها من راسها .. سارة عيونها جميلة.. لمن ترمش كدا القلب بفر معاها ويزوغ من محلو .. لمن تسمع صوت دم عروقك بنفض مع رمشتها ..

وعيونها سودا شديد ومكحولة طبيعة .. بقت تعاين لي عبد الرحمن

قالت ليهو ان شاء الله خير يا استاذ؟؟ ..

عليك الله طمني والله انا خايفة موت .. قال ليها طبعا ياسارة .. استاذ فارس طلع زيك واحد .. شفتي الغريبة دي؟

قالت ليهو كيف يعني زي خواف كدا ؟؟

قال ليها لالا .. يعني برضو عندو دفتر وقاعد يكتب عن سارة ..

طبعا انا اديتو دفترك يقراهو عشان يعاقبك ..

قام قراهو كلو .. وفرح شديد.. وقال لي انا برضو بحبها شديد ..

لكن ما حقدر اعبر ليها عن حبي ابدا هسي ..

يازول سارة دي قامت من الكرسي .. كانت دايرة تجري ..

وبقت تبكي من الفرحة .. وبقول ليهو انت ماجادي يا استاذ.. اكيد بتمزح معاي ..

قال ليها لا والله ده الحاصل.. بس انا طالب منك طلب .. الموضوع ده يفضل سر بينا نحن التلاتة .. لغاية ما تمتحني ..

قالت ليهو طيب.. انا اصدق كيف انو اساتاذ فارس قال كدا ..

قال ليها اصبري ياسارة احكي ليك .. امبارح الليل كلو فارس بكتب ليك في ورقة.. اظنو كتب وشرط اكتر من خمس مرات ..

في النهاية كتب ورقة.. وطبقها وختاها ليك في نص الدفتر .. انا ماقريتها .. دي موضوع سري وامانة بس اسلمك ليها ..

بس انتي اهم حاجة تشرطيها طوالي .. بعد تقريها وتنسي الموضوع بي الكامل وتركزي في قرايتك ..

قالت ليهو حاضر يا استاذ .. بس عايزة اقراها هسي قبل ادخل الحصة .. لو سمحت لي يعني.. لاني مابقدر اركز الا اقراها ..

قال ليها جدا طوالي اقريها .. وشرطيها طوالي وامشي الفصل ..

قالت ليهو حاضر .. وطلعت ..