الجزء 24

بعد مرور خمسه شهور

في واحده من الولايات .. وفي واحد من البيوت .. قناة سودانيه 24 ... جابت اعلان ..

ولد عمرو 10 سنه قاعد جمب باب مدرسه ومتمحن .. وبقول : زنبي شنو انطرد ¿¿ عشان ما كملته الرسوم ؟؟

وفي حته تانيه خمسه بنات ثانوي طالعين من باب الفصل والاستاذه بتبين

كانها بتطردهم بقولو بحزن : زنبنا شنو ننطرد من الأمتحان عشان ما دفعنا الرسوم !!

وطفل عمر 12 سنه راكب في واحده من بصات الوالي : خليت المدرسه واشتغلته كمساري لانو المديرة عيرتني وقالت مدرستي ما فاتحاها ‏( نذر ‏) عشان تقول لي ما عندي حق الرسوم ..

و ولد شايل صندوق مناديل وماش في الشارع وبقول : بشتغل عشانك يا صفاء وعشانك يا مروة عشان تقدرو تقرو ..

ومي بتظهر وفي وشها ابتسامه والفلجه تسوي كدي ..👋 بتقول : بي جنيه واحد انت حتساعد طالب يواصل امتحانو ..

عمار بجي وهو شايل كتاب : انت استاذ او خريج تربيه وم لقيت شغل ؟ عادي ممكن تقدم عمل خير وتشارك في تعليمهم .. رائيك شنو ؟

احمد بجي داخل : عندك قريبك او ولدك او حتي جارك طلع اولادو من المدرسه عشان ما قادر يكمل ليهم رسومهم الدراسيه خليهو بس يتواصل معانا ..

نمارق : ملابسك حقت السنه الفاتت البي حاله جيده وما محتاج ليها ممكن تجيبها ..

منذر : كتاب .. حقيبه .. جزمه م محتاجين ليهم وبحاله جيده ممكن تدعمونا بيه

نازك : يد بي يد .. حنبني المدرسه ..

مدرسه بناها الشعب .. وللشعب

عشان كل واحد عاوز يواصل تعليمو و ظروفو الماديه م سمحت ليهو يقدر يواصل تعليمو

تعال لينا بدون اي حاجه

حتلقي اللبس والأكل و المسكن

في رياض ومدارس الحنين الخيريه لمواصلة التعليم المتوقف ..

وكلهم وقفو سوا .. وقالو بصوت واحد : بنتمني من كل شخص شاهد الأعلان انو يدعو لي صاحبة الفكرة : حنين كمال الكتيابي انو تقوم بالسلامه وتصحي من غيبوبتها .. بنحبك يا حنين .

❤❤❤.

الشباب عملو شغل حلو كتير .. ساندوني بي دعواتهم الصادقه و وقفتهم معاي ما بنساها ..

خمسه شهور وانا في نفس السرير غايبه عن الوعي ..

...

دخلته المستشفي من اليوم داك .. تتذكرو ضربة العربيه الأنضربتها وقت كنت مع وليد ؟؟ بس بي سببها الرصاصه اتحركت 1 سنتمر كامل ..

وحصلت لي اضطرابات في الدماغ ..

❤❤❤

امي وخالتي مريم مسكوهم ادارة المدرسه ..

ماما مريم المديرة وامي وكيلتها ..

هي لسع ببنو فيها وخلاص قربت تنتهي ..

اتسجل عندهم حوالي 1 ،587 طالب وطالبه في فترة خمسه شهور ..

من كافة انحاء السودان ..

حيبنو جمبها طوالي سكن داخلي للطلاب المن برة الولايه .

مدارس الحنين انتشرت لدرجة وصلت برة السودان ..

وي سلام .. مصر وليبيا والسعوديه كمان انشاءو مدارس خيريه .. واحلا حاجه سموها الحنين ❤

ياخ عزوني عزه !!

عمار كان بتكلم بالتلفون وهو تحت الشجرة .. كان بي الله ويامين ماسك نفسو ..

بعد قفل المكالمه قعد ينطط ويصرخ ..

هم قايلين انا صحيت وكده بس كان خبر تاني ..

عمار : البنك البنتعامل معاهو استلم مساعدات من ولايات الشرق التلاته : بورتسودان وكسلا والقضارف بس التلاته ديل مساعداتهم بتقدر بحوالي مليار .16.

منذر : 16 مليار قصدك . قال كده وعيونو مقلعهن كبااار

مي دي قربت تنصدم .. واحمد شغال : yes! yes !

نمارق ونازك شغالات : الحمدلله .. الحمدلله ..

عمار قال : يا رب حنين تصحي عشان تشاركنا الفرحه ..

كلهم قالو : آميييين يا رب

❤❤❤

وليد كان نااايم في الكرسي الجمبي .. جات امو صحتو بالراحه : قوم يا ولدي امشي البيت ارتاح شويه انا بقعد معاها

وليد : ما بقدر ي امي خليني معاها 💔😐💔

طبعآ سكن معاي من الزمن داك .. اغلب زمنو بكون ف المستشفي .. وم بطلع الا للصلاة

كن شوفتوهو :😍 شعرو طال أكتر ودقنو ذاد ..

وسيم في محلو م اتغير نهائي ..

قال ودموعو عشرة عشرة : انا السبب .. لو م خليتها اليوم داك رجعت براها ما كان اتعرضت لي دا كلوو

لا وفوق دا انا بهدلتها وذليتها !!

مريم : ما تقول كده ي وليد دا قدر ربنا كاتبو .. وامتحان من الله نحن لازم نرضي بيهو 😐💔

وليد : ونعم بالله ..

وعاين لي وقال : تصدقي انا حبيتها من متين ؟؟

مريم ضحكت وقالت من متين؟

قال : اووول مرة وقت شوفتها والولد شاغلها .. قامت صرت لي وشها وقت عاينت ليها .. صرتها بتبقيها سمحه ياخ

بس انا الزمن داك كان عندي هدف ف راسي وم كنت بفكر احب ولا اتزوج .. وبي امور الاجرام حقتي خوفته تتبهدل معاي ساي ..

لكن شوفي القدر خلاني الاقيها وكمان اتزوجها 💔 سبحان الله !

مريم : فعلآ سبحان الله .. يلا ارح معاي نتوضا عشان نصلي .. انا بسبقك انت الحقني

قال ليها حاضر ..

بعد طلعت عاين لي مسسسسافه ..

وجا باسني قليل الأدب ..🙈 حيوان خلااث ..

بعديها قال بحبك انا واشتقته ليك ... وطلع وخلاني ادوب وانا في غيبوبتي ..

بس احلي حاجه اني حركته مصبعي ‏( اصبع بحب اقول ليهو مصبع (🐸 لكن ماف زوول لاحظ

تلاته شهور اضافيات وما زلت في غيبوبتي ..

خلاص عايذين يعملو افتتاح المدرسه الخيريه ... بنو جزو كبيير منها .. تلاته طوابق عندهم 30 فصل مجهزات وما ناقصهم اي حاجه ..

جونا 20 معلم طوعيآ 7.. معلمين خبرات و 13 خريجين تربيه ي داب ..

وماشاء الله يومي المساعدات بتجينا ... وحسابنا في البنك يييييييييك ...

دولارات ما تديك الدرب .. وكميه كبيرة من المغتربين ساهمو ..

💙💙💙

مي : شباب شباب شوفتو المنشورات حقت الفيس دي !!!

منذر : ياتو منشورات ؟؟

مي : منشورات القروبات كلها بتتكلم عن المدرسه وحنين .. ولقيت كم صورة لي حنين فيها ادعموها بالدعاء عشان تفتح المدرسه الأحد الجاي ..

منذر : وااو .. انتي شوفي اللايكات 🐸🐸 محصله الفين وكسر والمنشور ليهو ساعه ..

عمار : ان شاء الله حنين تقوم لينا بالسلامه ..

قبل الافتتاح بيوم :

وداد كانت بتتسرح جمب التسريحه ..

طارق : انتي لسسسع يا وداد !!! ياخ حرام عليك اتأخرنا .. !!

وداد : لحظة بس اتمكيج ..

طارق : انتي عثل بدون مكياج يلاكي أطلعي ياخ ..

وقت طلعت طارق لمن صفففر .. كانت لابسه توب اخدر غامق مطرز بي ورد برتقالي ..

وكارينا سودا واسكريت اسود .. والرسم يسوي كدي..👋 دي اوول طلعه ليهم بعد العرس ..

عرسهم كان قبل شهر .. كانو مؤجلنو عشاني وكده .. بس للأسف انا نومتي طالت ..

مشو بيتنا الكبير هناك كان عازمنهم عشاء ❤

امي وماما مريم .. ابوي حبيب قلبي و وداد وطارق واولادهم .. وجات خالتي سعاد وراجلها .. وشلتي كولهم واهلهم ..

كانت عزومه كبيرة ..

عملوها لانو تاني يوم افتتاح المدرسه ..

و كمان عملو عشاء خيري في كوكتيلات فيها صورتي ..💔

وقسمو علي كل الفقراء والمساكين 💔

والله ي جماعه كمية الدعاء الاتحصلت عليها ما بتحصي ولا تعد .. الحمد علي كل حال ..

❤❤❤

يوم الأحتفال الكل كانو مشغولين بعمل الترتيبات ..

وتجهيز الضيافه وكده . كان حيتعمل العصر .

العميد انشغل بأستقبال عدد من الوفود من برة السودان ساهمو في بناء المدرسه .. ما عدا الزول الاتبرع بالأرض و معدات البناء .. وفضل انو يحجبو اسمو وبس اتعاملنا مع المندوب الرسلو ..

يوم كان موبالغه .. م معروف حأحضرو ولة لا ..

وليد بات معاي وم حضر العشاء العملوهو في البيت تاني يوم زاتو كان معاي وكان ماسك يدي ما خلاها نهائي ..

تلفونو ضرب من الصباح وكانت دي ميوشتي : الو وليد

وليد : اهليين مي .. بديتو ؟؟

مي : لالا .. بنجهز ساي لي العصر حنبدآ .. غايتو اتفقنا انو انت التقطع الشريط .. عشان كده يا ريت تجينا بدري نحن منتظرنك ..

وليد : لالالالا .. المفروض حنين التقطعو .. وبما انها مافي .. شوفي امها ولة ابوها انا ما بقدر

مي : اسمع .. حتقطعو انت يعني انت والكلام منتهي .. يلا سريع نحن راجنك .. اوعه تموسرنا ..

قفلت منو الخط .. سرح مسسافه ع ملامحي البدت تتآكل من المرض ... ضغط ع أيدي قووي وخته راسو في يدي ..

وقال : بحبك ورب الأرض يا حنين .. بحبك انااا ..

💙💙💙

عيلتي كولها كانت هناك ..

م عارفه مالهم عويرين كده يبكو سااي بالذات مي .. البت قعدت تعزي عديييل 😐😐😐

ونمارق ونازك كمان ما قصرو ..

منذر زاتو بكا .. باقي ولد رهيف خلاث ..

احمد هو بكي لكن قشه دموعو . بس واضح انو بكا لانو بجرجر في مخاطيطو ساي ..

اما حبيب قلبي عمار .. اريتو عمار السرور .. انا غايتو كن قومته من غيبوبتي بالسلامه حاجزاهو لي بتي ..

عمار ماشاء الله كان ثابت ... ونهائي ما اهتزه .. مع انو أكتر زول قلبو واجعو علي .. بس بقدر يتحكم في نفسو ..

❤❤❤

هوي م وريتكم .. يوم العملنا التصوير حق الفلم اخدنا سيلفي ..

يلا عليكو قام طلع لينا الصورة وعملوها ملصق كبيييير علقوهو في الباب ..

الناس الحضرو الاحتفال كتار لكن م شديد ..

واحلي شي انو معظمهم من الشعب ..

الصورة كانت مي ونازك ونمارق ضاحكين .. ومنذر عامل حركه الاصبع ديك .. بمعني اوكي .. عمارواحمد واقفين بهدوء .. وباقي الممثلين : البنات وحليمه و والولد الكمساري ومجاهد .. وانا كان حسيب خاتي يدو في كتفي ومبين انو خانقني ... صورة سمحه ياخ ..

والكل علق فيها

البت الحنكوشه الاسمها حلا ديك تتذكروها ؟؟ !

اي اي بس ياها زاتها القدمت البرنامج الصغير العاملنو ..

اوول زول ركب المنصه مجاهد ❤ .. حكي ليهم عن كيف انا لاقيتو .. وكيف لقطته معاهو حاجاتو الأدفقت .. وحكي ليهم كيف ساعدناهو انا و وليد من مشكله ابو ساطور وكجنكه ..

طبعآ مي ماتت من الضحك من اسم كجنكه 💔😂😂😂😂..

تاني حسيب وحليمه جو اتكلمو ..

و ..

وناس كتار ..

وبين دموع وفرح حلا اعلنت انو وقت الافتتاح خلاص جا ..

العميد جا وقف .. وباقي الشله . ومعاهم كم نفر كده ما عرفتهم .

بس حضرة جناب زوجي المحترم ما جا ...

تفتكرو حيجي ؟؟

انا زاتي م عارفه م تسألوني .

عشان كده حنعرف في # الأخيرة من حنين

ما تنسو الصلاه ع النبي