الجزء 11

صحيت بصوت مصطفي...

مصطفي:( مريم.. قومي.. مريم)

رفعتا راسي لقيتو واقف جمبي و انا نايمه في الكنبه..

مصطفي:(ليه نمتي هنا?)

قلتا:( نمتا بدون م احس بنفسي)

و قمتا شفتا الشنطه..

مصطفي:( دي شنطتك فيها حاجاتك)

قلتا:( شكرا)

قمتا فتحتها و بقيت بفتش علي حاجه البسها.. شلتا جلابيه .. مصطفي كان قعد في الكرسي و ماسك تلفونو..

مصطفي:( ده الحمام )

اشر لي عليهو.. شلتا الجلابيه و دخلتا استحميت و جيت طالعه.. لقيت مصطفي قاعد في مكانو..

مصطفي عاين لي و ضحك..

قلتا:(مالك?)

مصطفي:( لابسه طرحه ليه?)

ابتسمتا قلتا:( م عارفه)

مصطفي:( انا راجلك.. عشان كده طلعيها ساي)

طلعتا طرحتي ختيتها و صلحتا شعري.. و مصطفي قام شال غيار و دخل غير لبس ليهو تريننق و تيشيرت و جا طالع باب الغرفه دقي فتح لقاها ام رجب الشغاله مدت ليهو صينيه اكل شالها و قفل الباب ختي الاكل علي الطربيزه..

مصطفي:(تعالي اكلي)

قلتا:(م جيعانه)

مصطفي بحسم:( مريم تعالي اقعدي هنا)

مشيت قعدتا في الكنبه..

مصطفي:( اكلي)

و بدا ياكل.. انا م كنت جيعانه او نفسياتي م خلتني احس اصلا اني جيعانه.. اكلتا معاهو شويه و شربتا عصير..

مصطفي شال الصينيه طلعها و جا رقد علي الكنبه.. انا كنت قاعده في السرير.. في ثواني مصطفي نام.. و انا كمان نمت..

الصباح صحيت بصوت مصطفي..

مصطفي:( صباح الخير)

قلتا:( صباح النور)

مصطفي:( نمتي كويس?)

قلتا:( م شديد قلقتا شويه)

مصطفي:( معليش بتتعودي.. انا طالع عايزه حاجه?)

قلتا:( لا انا كمان حامشي الشغل)

مصطفي:(كويس.. استناك اوصلك?)

قلتا:( لا م اإخرك)

مصطفي:( طيب اجهزي و انزلي اشربي الشاي او حاكلم ام رجب تجيبا ليك هنا?)

قلتا:( هنا احسن)

مصطفي:( طيب.. في قروش في الدرج هنا شيليها.. يلا سلام)

و طلع.. جهزتا و شربتا شاي و نزلتا.. لقيت الصاله فاضيه طلعتا طوالي..

مشيت المكتب حكيت ل علياء بالحصل.. علياء اتخلعت شديد..

علياء بخلعه:( يعني انتي الليله كنت بايته مع مصطفي في بيتهم?)

قلتا:( ايوا)

علياء:( م قادره اصدق.. و ليه ابوك عمل كده?)

قلتا:(م عارفه والله)

علياء:(و الحل شنو?)

قلتا:( م عارفه بس انا م مرتاحه.. دايره ارجع بيتنا ياخ..اشتقت ل بيتنا و اخواتي.. م دايره اقعد كده مشرده من بيت محمد ل بيت مصطفي)

و بقيت ببكي.. علياء حضنتني عليها و بقت بتهدي فيني..

قاعد مصطفي مع ابوهو في المكتب..

مصطفي:( دي الحصل كلو ي ابوي.. ده م قدرتا اقولو ليك قدام اميره امبارح و دايرو يكون بيني و بينك)

عزالدين عاين ل مصطفي مسااافه..

عزالدين باستعجاب:( يعني انا بعرف الواحد بجامل صحبو في قروش في وقفه في شكله في كده...بس يجامل صحبو و يعرس اختو ده صعبه شويه)

مصطفي:( اصلا انا حاسي نحيتها اني بوظت ليها حياتها لمن ضربتها و كسرت رجلها)

عزالدين:( لكن انت وقفتا معاها و عالجتها و م قصرتا معاها)

مصطفي:( م عارف والله لقيت نفسي م قادر اخزل محمد فيني و وافقتا قلتا م خسران شي و ماف زول حيعرف.. بس م كنت قايل ابوها حيعمل كده و اضطرا اسوقها معاي)

عزالدين:( يمكن الناس دي متفقه عليك و عامله الخطه دي كلها عشان تعرس بتهم و يمكن هي فيها حاجه و جايين يدبسوها فيك)

مصطفي:( لالا ي ابوي ديل ناس كويسين جداج م بعملو كده)

عزالدين:( م تضمن زول الزمن ده)

مصطفي:(انا بضمن محمد ب رقبتي)

عزالدين:( ربنا يستر...المهم انت م ينفع تقعد معاك البت دي كده و الناس يجو يلقوها في البيت.. بالذات اهل اميره م حتسلم منهم.. عشان كده انا بقترح نعمل حفله صغيره و نعزم الناس عشان الموضوع يبقي علني و م يجيبو سيره مرتك دي في حاجه كعبه)

مصطفي:( معاك حق م حنسلم منهم)

عزالدين:(خلاص خلي لي الموضوع ده...حاكلم مهدي يهتما بالموضوع و يحجز صاله صغيره و نعزم الناس القراب و خلاص.. بعد بكرا كويس معاك?)

مصطفي:( ايوا كويس)

عزالدين:( تمام.. كلم مرتك)

مصطفي:( حاضر)

عزالدين طلع..

محمد بتكلم في التلفون و بضحك..

محمد:( انت جادي ي مصطفي?)

مصطفي ضحك:( تقول شنو بس.. احرجتا ذاتي اني اقول ليك داير رقم مريم و هي بقت مرتي و قاعده معاي في البيت.. بس م حصل ضربتا ليها او جا سبب اشيل رقم تلفونها)

محمد:( لالا عادي م مشكله اسي بديك ليهو)

مصطفي:( يلا قول)

محمد اداهو رقمي..

قاعده ساره مع امجد في مطعم بتونسو و بياكلو..

امجد:( اها المشروع ماشي كيف?)

ساره:( يعني ماشي حالو.. نص نص..صعب ياخ)

امجد:(صح في الاول صعب بس تاني بمشي معاك كويس)

ساره:(ان شاءالله... اصحابك وين م ظاهرين اشتقت ل لمتهم)

امجد:(قاعدين والله بس م مشيت عليهم قريب.. الايام الجايه بمشي و بسوقك معاي)

و شال سيجاره ولعها و بقي بشرب..

ساره:( طيب)و شالت كبايه المويا شربت..

ساره:( انا كمان خرمتا سيجاره.. حادخل الحمام اشرب و اجي)

امجد:( طيب م تتاخري)

ساره:(طيب)

و شالت شنطتها و دخلت الحمام..

طلعتا من المكتب مشيت مطعم دايره اشتري سندوتشات ل ريم و مي.. طلبتا السندوتشات.. في واحد جا ماشي شايل بيبسي اتضربتا

معاهو و البيبسي اتدفق جزء فيني..

الولد:( انا اسف جدا)

قلتا:( عاين قدامك تاني)

الولد:( انا مره تانيه...في حمام فوق ممكن تدخلي تغسلي البيبسي)

قلتا:( اكيد م حامشي بيهو كده في الشارع)

طلعتا فوق الحمام لقيت الحمام فاضي الا بت واحده واقفه بتشرب في سيجاره البت دي كانت ساره اخت مصطفي... بس انا م كنت بعرفها.. عاينتا ليها باستغراب...كيف بت تشرب سيجائر في حمام مطعم عادي كده.. ساره ركزت اني عاينتا ليها باستغراب شديد عاينت لي من فوق ل تحت و بقت تشرب م عبرتني...بقيت بغسل في الاسكيرت و بعاين ليها كل شويه.. زعلتا انها بت صغيره و عندها كل الجرا۽ه دي و تشرب سيجائر كده..

ساره ركزت اني بعاين ليها..

ساره بكل مساخه:( في حاجه?)

قلتا:( م شايفه نفسك صغيره علي البتعملي فيهو ده?)

ساره:( و انتي دخلك شنو?)

قلتاليها:(انتي لسه صغيره م تعملي كده)

ساره:( ياخ م ليك دخل بي...ان شا۽الله اسكر انتي مالك ياخ.. عالم غريبه)

و طفت السيجاره و فتحت شنطتها اتريحت و عاينت لي تاني نظره تحدي و طلعت..

طلعتا بعدها ب مسافه لقيتها ماشه مع امجد.. امجد عاين لي.. شكلو حكت ليهو...شلتا السندوتشات و طلعتا..طلعو وراي ركبو العربيه و مشو.. تلفوني دقي عاينتا لقيت الرقم غريب.. رديت..

مصطفي:( مريم)

قلتا:(مرحب)

مصطفي:( انا مصطفي)

قلتا:( اهلا ي مصطفي)

مصطفي:( وين انتي?)

قلتا:( طلعتا من الشغل ماشه علي المدرسه اشوف ريم و مي)

مصطفي:( تمام انا حاجيك علي هناك م تتحركي قبل اجيك)

قلتا:( طيب)

و مشيت برجولي مساافه لقيت المدرسه.. لقيت الناس بطلعو.. وقفتا شويه لقيت ريم و مي جايين طالعين معاهم صحباتهم.. كوركتا ليهم:( ريم.. مي)

قبلو علي و جو جارين بفرح حضنوني و هم بكوركو.. المدرسه كلها بقت تعاين لينا..

ريم:( مريم والله اشتقت ليك)

مي:( البيت كعب من دونك)

قلتا:( و انا كمان اشتقت ليكم.. نفسي ارجع ليكم والله)

مي:( انا بكلم ليك ابوي)

ريم:( ايوا بنكلمو يرجعك)

قلتا:( م ينفع.. انا بجيكم هنا بس... شوفو جبتا ليكم شنو)

طلعتا السندوتشات ..

قلتا:( السندوتشات الانتو بتحبوها)

ريم:( ربنا يخليك لينا ي مريم)

شالوها بسرعه و فتحوها و بقو بياكلو...اللحظه ديك جا مصطفي..

مصطفي:( السلام عليكم)

ردينا:( و عليكم السلام)

مصطفي ضحك:( في زول بياكل في الشارع كده? ارح العربيه)

قلتا:( يلا)

مشينا علي العربيه ركبنا.. مصطفي اتحرك.. مشي علي بقاله نزل جاب لينا مويا و بيبسي و شوكلت للبنات.. وصلناهم البيت و مشينا علي البيت.. انا و مصطفي م اتكلمنا كتير مع بعض..

في البيت كانو قاعدين عزالدين و اميره بتغدو و ساره بتحضر في التليفزيون و شايله صحن فيهو باسطه بتاكل..

اميره بزعل:(يعني شنو? حترضي ب البت دي? و تقعدها وسطنا?)

عزالدين:( مالا البت دي?)

اميره:( لا عارفين اصلها لا فصلها فجاه لقيناها في نص البيت و ولدك بقول عقد عليها.. كلام ذي ده م بدخل لي راسي)

عزالدين:(اميره م تكبري الموضوع .. اسي عندنا حاجه اهم.. مفروض نعمل حفله بسيطه كده في اي صاله و نعزم الناس عشان يكونو عارفين انو مصطفي عرس)

اميره بخلعه:( سجمي? داير تعمل ليهو عرس كمان?)

عزالدين:( اميره صلي علي النبي.. ااي داير اعمل ليهو.. كلمتا مهدي يمسك الموضوع ده)

اميره:( اسمع هنا ي عزالدين انا لا لي دعوه ب ولدك لا العرس ده طلعني منو كلو كلو)

عزالدين:( اميره م اي حاجه تقيفي فيها و تعترضي.. اتفقنا علي كده و خلاص)

اميره بزعل:( راحتك راحتك ي عزالدين..البتشوفو انت و ولدك صح اعملو)

عزالدين:( تمام)

اللحظه دي جينا داخلين البيت انا و مصطفي..

قلنا:( السلام عليكم)

ردو:( و عليكم السلام)

ساره لمن رفعت راسها و شافتني اتخلعت شديد لمن اتشركت بالاكل و بقت تكح..و انا كمان اتخلعتا شديد..

اميره:( بسم الله.. اشربي مويا)

شالت المويا و بقت تشرب فيها..

نتلاقي♥