الجزء 17

ساره قاعده في الجامعه جو ناس دفعتها ماشين وحده قالت ليها:(ساره المحاضره بدت)

ساره:( طيب بجي)

و مشو.. ساره شالت تلفونها دقت ل امجد..

ساره:( ايوا ي امجد وين انت? خلاص جاياك اسي)

و قامت مشت لقتو بلعب بلياردو مع اصحابو وقفت ليهو بعيد جا عليها و سلم..

امجد:( الاخبار شنو?)

ساره:( تمام.. اها البرنامج شنو?)

امجد:( ماف شي قاعدين هنا بس)

ساره:( انا عندي محاضره اسي بس م عندي مزاج ليها.. الاستاذ كلامو كتير و م دايره ادخلا)

امجد:( خلاص ارح نطلع)

ساره:(نفسي احضر فيلم)

امجد:( عيوني ليك.. يلا ارح)

و طلعو مع بعض..

مصطفي طلع مع طلال من المكتب و قال ل السكرتيره:( انا م راجع تاني القي ااي مواعيد)

و طلعو ركبو العربيه و مشو..

مجدي كان راقد في السرير بحضر في التليفزيون.. الباب دقي..

قام فتح لقي طلال و معاهو مصطفي..

مجدي عاين ل مصطفي ب خلعه و فرح..

طلال:( ده مصطفي)

مصطفي:( اذيك ي خال)

مجدي فتح يدينو و دموعو نازله:( بالحضن ي ولدي)

مجدي حضن مصطفي و دموعهم الاتنين نازله..

ماشه عليا۽ في الشارع و بتتكلم بالتلفون..

عليا۽:( ايوا ي هاني ..خلاص جيت تحت العماره انا)

هاني:( يلا بسرعه الاكل حيبرد)

هاني كان واقف قدام الصفره و مليانه اكل..

قاعد مصطفي مع خيلانو و قدامهم شاي..

مصطفي:( خلي موضوع الدكتور ده علي ي خال.. انا حاشوف ليك احسن دكتور في السودان)

مجدي:( الدكتور ده كويس)

مصطفي:( لالا م كويس بشوف ليك دكتور احسن منو)

مجدي:( م دايرين نكلفك ي ولدي)

مصطفي:( عيوني ليكم ي خال.. المهم اسي انا داير اعرف الحصل شنو قبل م امي تطلع الايام ديك بالها كان وين و بتقول شنو او بتفكر في شنو?)

طلال:( اخر كم شهر قبل م تطلع كانت بتجيي سيرتك كتير.. بتحكي بيك و قالت نفسها تشوفك)

مصطفي غمض عيونو من االالم الحسا بيهو..

مجدي:( انا حاسي انها هنا في الخرطوم)

مصطفي:( ادوني صوره من البلاغ و انا بعرف واحد في القسم هنا بخليهو يتابع الحاصل)

طلال:( طيب)

طلعتا من الشغل كنت مشتاقه ل بيتنا.. مريت علي مطعم شلتا اكل ل اخواتي..مشيت دقيت الباب سمعتا سميه بتكورك..

سميه:( ريم.. مي.. شوفو الباب)

مي:( حاضر)

و جات علي الباب فتحت لقتني واقفه..

مي صرخت بفرح:( مريم)

و حضنتني.. ريم جات جاريه بعد سمعت اسمي..

سميه عاينت باستغراب من المطبخ لينا..

دخلتا عاينت ليها قلت ليها:( السلام عليكم)

سميه:( اهلا ي مريم)

و ختيت الاكياس..

مي :( ليه م قلتي لينا جاياكم?)

قلتا:( دايره اعملا ليكم مفاجاه)

ريم:( احلي مفاجاه والله)

اللحظه ديك ابوي جا داخل من الصلاه عاين لي باستغراب..

قلتا:( كيفك ي ابوي)

عبدالرحمن:( اهلا )

و مشي دخل غرفتو.. اتضايقتا من تعاملو معاي..

قلتا:( ريم.. ده المندي البتحبوهو..اكلو طيب.. انا ماشه)

مي:( لالا م تمشي اقعدي اتغدي)

قلتا:( لالا مصطفي دقي لي م بقدر اتاخر.. اكلو انتو حبيباتي انا اكلتا) و وقفتا..

ريم:( حتجينا متين?)

قلتا:( اي وقت دايرين بجيكم.. اخر الاسبوع بنجي نطلع مع بعص)

مي:( ايوا)

قلتا:( يلا حبيباتي)

حضنتهم و عاينتا ل سميه لقيتها مكشره..

طلعتا مشيت البيت..

قاعدين عليا۽ و هاني علي الصفره بياكلو..

عليا۽:( تسلم يدك حبيبي.. الاكل حلو شديد)

هاني:( بالهنا)

عليا۽:( عرفتا من وين كان نفسي في مشاوي?)

هاني:( انا بعرف ااي حاجه بدون م تقوليها)

عليا۽ ضحكت:( طيب)

تلفون هاني دقي عاين لقاها ناديه..

عليا۽:( منو?)

هاني:( ناديه)

عليا۽ كشرت..ناديه اتصلت تاني..

هاني:( حارد)

و شال التلفون ردا..

هاني:( الو)

ناديه:( ايوا ي هاني.. وين انت?)

هاني:( عندي شغل برا.. في حاجه?)

ناديه:( انا كنت مستنياك بالغدا)

هاني:( م اظن اقدر اجي اسي.. اكلو انتو م تستنوني)

ناديه:( ليك كم م اتغديت معانا?)

هاني:( بعدين ي ناديه بعدين.. يلا)

و قفل...ناديه كشرت و رمت التلفون في الكنبه بزعل..

جيت داخله البيت لقيت عزالدين و اميره بتغدو..

قلتا:( السلام عليكم)

عزالدين:( و عليكم السلام.. تعالي ي مريم اتغدي)

قلتا:( بستني مصطفي)

عزالدين:( مصطفي بتاخر تعالي اكلي م تخجلي)

كنت فعلا جيعانه ختيت شتطتي و مشيت غسلتا يديني و جيت بقيت باكل.. عمو عزالدين بقي بتونس معاي شويه.. بس اميره م اتكلمت معاي كاني م موجوده.. خلصتا اكل و طلعتا الغرفه غيرتا و صليت و رقدتا ارتاح شويه..نمتا بدون م احس صحيت بحركه مصطفي في الغرفه عاينتا لقيتو واقف في الدولاب..

قلتا:( حمدلله علي السلامه)

مصطفي:( الله يسلمك)

صوتو كان متغير شديد..

قلتا:(مصطفي.. مالك?)

مصطفي قبل علي و شايل غيارو في يدو.. عاينتا لقيت دموعو نازله...اتخلعتا شديد و قمتا من السرير..

قلتا:( في شنو? حصل شنو)

مصطفي مسح دموعو:( مافي شي م تخافي كده)

قلتال:( انت بتبكي?)

مصطفي قعد في السرير قعدتا جمبو..

قلتا:( مصطفي في شنو احكي قلبي وقف من الخلعه انا)

مصطفي اخد نفس:( لقيت خيلاني)

اتخلعتا شديد..

قلتا:( وين?)

مصطفي:( سالو مني و جاني طلال في الشركه)

قلتا بخوف شديد:( اها? لقيت

امك?)

مصطفي:( قالو مختفيه.. 5 سنه م بعرفو عنها حاجه)

قلتا:( ليه حصل شنو?)

مصطفي بقي بيحكي لي.. مصطفي كان متالم شديد و دموعو م وقفت لحظه.. حكي لي ب الحصل كلو مع خيلانو و انو بكرا حيمشي ل واحد ظابط بعرفو يتابع ليهم الحاصل.. حاله مصطفي كانت كعبه شديد و حنيت عليهو..

قلتا بتفائل:( بتتلقي ان شا۽الله.. لو في الخرطوم بتتلقي.. و ذي م قال خالك لو حصل ليها حاجه كنتو عرفتو)

مصطفي:( م عارف بس انا م قادر.. م قادر اتخيل امي ليها 5 سنه ماف زول عارف عنها حاجه.. عايشه وين? و هي عيانه اصلا.. مفروض تكون مرتاحه و تحت مراقبه.. اسي م معروف هي وين وله الحاصل ليها.. كويسه تعبانه.. م معروف)

بقيت بهدي في مصطفي كتيير و اتكلمتا كتيير قعدنا انا و هو ساعه بنتكلم ..هدا شويه دخل استحما و جا رقد جبتا ليهو اكل رفض ياكل شرب حبه عصير و رقد قال ينوم بس م نام و انا كنت قاعده جمبو .. شويه بنتكلم و شويه بنسكت.. لمن نعس نام و انا كمان نمتا..

هاني جا داخل بيتو الساعه9 لقي البيت هادي مشي علي الغرفه لقي ناديه قاعده جوه ..

هادي:(السلام عليكم)

ناديه م ردت..

هاني عاين ليها باستغراب:( مالك م بتردي)

ناديه برضو ابت ترد كانت بتعاين علي مكان بعيد في الغرفه..

هاني جا قعد جمبها عاين ليها لقاها زعلانه شديد لمن دموعها نازله..

هاني:( مالك ي ناديه)

ناديه بزعل:( البيت ده فندق? بتجي للنوم بس? انا هنا جايبني خدامه? انضف و اعمل الاكل و امسك العيال و خلاص? و انت ولا علي بالك طول اليوم مافيش و بتجري اخر الليل تنوم في الفندق ده صح? )

هاني بعاين ل ناديه باستغراب..

هاني:(ي ناديه انا شغال)

ناديه:( شغل شنو? انت شغال في بنك و البنك عندو زمن محدد بقفل...شغل شنو لحدي الساعه9 بليل?...انت م داير تقعد معاي صح? اوكي حاريحك مني)

و قامت بسرعه طلعت شنطه و فتحت دولابها بقت تخت هدومها في الشنطه..هاني جا مسكها ..

هاني:( ناديه اعقلي ده شنو البتعملي فيهو ده?)

ناديه و هي بتبكي:(م قاعده ليك هنا ماشه بيت ابوي بس اقعد في الفندق ده براحتك)

هاني مسكها ب يدينو الاتنين..

هاني:( ناديه روقي روقي)

ناديه اتفكت منو و قعدت في السرير و بقت تبكي..

هاني قعد جمبها مسكها عليهو..

هاني:( معليش حبيبتي انا اسف اني قصرتا في حقك.. اعفي لي م تبكي م بتحمل دموعك دي)

هاني بقي بحنس في ناديه كتير و يعتزو ليها لمن هدت..

هاني:( خلاص هديتي?)

ناديه هزت راسها ب ايوا..

هاني:( يلا ارح نتعشا برا)

ناديه:( و العيال?)

هاني:( نايمين خلي سوسن تجي تشوفهم كل شويه)

ناديه:( بالجد?)

هاني بحماس:( ايوا يلا يلا سرعه اجهزي)

ناديه و هاني جهزو و طلعو يتعشو برا..

عليا۽ قاعده في غرفتها و بتضرب ل هاني بس هاني عامل تلفونو صامت و بنتونس مع ناديه و بتعشو.. قضو ليله حلوه جدا..

صحيت لقيت مصطفي بصلي الصبح.. قمتا صليت انا كمان و قعد بسبح و يقرا في قران.. مصطفي حالتو كانت كعبه شديد و قررتا اقيف جمبو و م اسيبو لحدي م يلقي امو ذي م هو وقف جمبي ..

الساعه8 مصطفي بدا يجهز..

قلتاليهو:(ماشي وين?)

مصطفي:( ماشي ل الصادق الضابط يشوف لي الموضوع ده)

قلتاليهو:( استني امشي معاك)

مصطفي:( ماف داعي خالي طلال حيجيني)

قلتاليهو:( برضو حامشي دقايق)

جهزتا سرعه و نزلنا لقينا عمو عزالدين في الصاله.. مصطفي قال لي براحه في اضاني:( م تجيبي سيره الموضوع لابوي)

هزيت راسي و مشينا علي عمو..

قلنا:( صباح الخير)

عزالدين:( صباح النور)

قعدنا و كبيت الشاي لي و ل مصطفي..

عزالدين:( مصطفي.. عليك دايرك تشوف الشحنه حقت الصين حتصل متين عشان نجهز ليها المخزن و طلع لي قائمه ب المحلات العايزه منها و اساميها و الكميه)

مصطفي:( حاضر ي ابوي حاعمل كل حاجه بس اسي احنا ماشين مشوار اخلص منو و اجي الشركه اعمل ليك الدايرو)

عزالدين:(ماشي وين من الصباح?)

مصطفي:( مشوار مع مريم)

عزالدين:( تمام)

خلصنا و طلعنا مشينا دقيت ل ناس الشغل استاذنتا اني حاتاخر شويه.. مصطفي دقي ل طلال يستنانا جمب القسم.. وصلنا و دخلنا للضابط سلمنا و قعدنا..

الصادق:( وين البلاغ القديم? و صوره ل الحجه)

مصطفي:( مع خالي اسي بجي)

فعلا طلال جا داخل سلم علينا و قعد..

الصادق:( عندك صوره من البلاغ و صوره للحجه)

طلال:( ايوا.. دي صوره من البلاغ)

مداها ل الضابط و طلع صوره صغيره ل حجه امنه..

طلال:( دي اخر صوره ليها)

طلال مداها للضابط مصطفي بسرعه خطفها من يد طلال و بقي بعاين في ملامح امو و هو مخلوع شديد.. ذي الزول الكان عميان و فجاه بقي بشوف.. ذي الزول الكان عايش في ظلام و فجاه جاهو نور.. ذي الزول الكان عايش في كوابيس و فجاه صحي علي واقع جميل..

نتلاقي♥