الجزء 19

عزالدين:( كيف يعني?)

مصطفي كمان م كان قادر يقيف.. قعد في الكرسي قصاد ابوهو..

مصطفي:( جاني خالي طلال في المكتب و قال جا هو و مجدي للعلاج هنا.. و قال لي انو امي ليها 5 سنه مختفيه م عارفين مكانا وين.. و عملنا بلاغ هنا و كلمتا الصادق صحبي يفتش عليها و انا سوقتا عربيتي و بقيت بفتش عليها.. مشيت دار المسنات و مشيت المستشفيات و الشارع و ااي مكان ممكن تكون فيهو)

عزالدين اخد نفس و حاول يستوعب الكلام البقول فيهو مصطفي..

عزالدين:( و ليه م كلمتني?)

مصطفي:( وريتك موضوع خاص بي انا بس)

عزالدين كورك:( كيف يعني خاص بيك? انا مش ابوك و الكبير هنا? وله انت شايف نفسك بقيت كبير و اتزوجتا و انا بقيت م مهم بالنسبه ليك)

مصطفي:(لا ي ابوي العفو بس وريتك انا جوطا بالموضوع شديد و م قدرتا اكلمك قلتا لمن ارجع بكلمك متين بدس منك حاجه)

عزالدين:(ايوا.. و اسي انت جيت تكلمني? انا بقلع منك الكلام بعد تعب)

مصطفي:( معليش ي ابوي ..بس انا تعبان شديد و من الصباح م اكلتا و داير ارتاح.. بكرا بنتفاهم ان شاءالله)

عزالدين سكت عاين ليهو بزعل..

عزالدين:( خير ي مصطفي عندي معاك الصباح تفاهم تاني)

مصطفي:( تصبحو علي خير)

و قام و انا مشيت وراهو دخلنا البيت..

اميره:( ادخلي ي ساره نومي)

ساره دخلت البيت.. و اميره مشت قعدت قصاد عزالدين..

اميره بخوف:( عزالدين.. انت عارف المصيبه الاحنا وقعنا فيها? امنه لو ظهرت تاني حتبقي مصيبه بالجد)

عزالدين:(م اظن يلقاها ليها 5 سنه مافيشه يلقاها كيف )

اميره:( لو لقاها?)

عزالدين كورك:( م عارف ي اميره ياخ م عارف كدي خليني افكر براحه نقدر نعمل شنو)

مشيت المطبخ جهزتا اكل و عصير ل مصطفي و جيت طالعه لقيتو راقد في السرير و مغمض.. ختيت الصينيه علي الطربيزه جمب الكنبه ..

قلتا:( مصطفي.. مصطفي تعال اكل)

مصطفي فتح عيونو:( م داير)

مشيت عليهو قلتا:( مصطفي حرام عليك البتعملو في نفسك ده ..انت من الصباح صايم م اكلتا حاجه.. قوم اكل عليك الله)

مصطفي:( تعبان داير انوم بس)

قلتا:( اسي اامك لو في كانت حترضي تعمل في نفسك كده? قوم اكل عشان لمن تلقاها تلقاك كويس)

مصطفي سكت شويه و قام قعد علي الكنبه بقي ياكل.. اكل شويه و شرب العصير و ختا راسو علي السرير نام في ثواني..

الصباح قاعده في المكتب و مهمومه بسبب مصطفي و الحاصل ليهو.. مصطفي طلع الصباح مشي الشغل و كلمتو م يمشي يفتش علي امو بس م عارفه حيسمع كلامي وله لا.. علياء ركزت لي مهمومه جات قعدت جمبي..

علياء:( مالك? )

قلتا:( ماف شي)

علياء:( مريم احنا صحبات و اكتر من صحبات كمان احنا اخوات.. عشان كده لو سمحتي خلي زعلك مني في جهه و وريني مالك مهمومه كده)

قلتا:( ماف شي ي علياء)

علياء:( والله حازعل منك ي مريم.. احكي يلا في شنو?)

اخدتا نفس و بقيت بحكي ليها بالحصل..

قاعدين محمد و سهي بتغدو..سهي كان عندها كلام دايره تقولو ل محمد بس م قادره.. شويه اتشجعت..

سهي:( محمد)

محمد:( ايوا)

سهي:( محمد احنا لينا كم من اتزوجنا?)

محمد:( سنه و ذياده)

سهي:( و طيب مفروض اكون حملتا.. صح?)

محمد:( كلو بيد ربنا)

سهي:(و نعمه بالله.. بس برضو دايره اتطمن.. ارح نمشي دكتور اشوف لو عندي مشكله)

محمد:(حاضر ي سهي.. اخر الشهر بوديك ل دكتور)

سهي ابتسمت:( طيب)

علياء:( يحليلو مصطفي والله الموضوع صعب شديد)

قلتا:(اي والله جد واجع لي قلبي.. يعني لو امو عايشه في مكان تاني او حتي متوفيه بكون مرتاح.. بس ضايعه و م معروفه وين و عيانه كمان)

علياء:( صح والله.. شاف دار المسنات?)

قلتا:( ايوا شافهم)

علياء:(لازم تقيفي جمبو ي مريم.. مصطفي ده م قصر معاك)

قلتا:( اكيد طبعا واقفه معاهو.. حاقيف معاهو لحدي م يلقي امو)

علياء:(ربنا يسهل ليهو ان شاءالله)

جا داخل متوكل البيت علي المغرب.. نور عاينت ليهو باستغراب..

نور:( مالك جاي بدري?)

متوكل:( م ارجع بيتي يعني?)

نور:( اكيد طالع تاني)

متوكل:( بالضبط كده)

متوكل مشي علي الغرفه استحما و غير و واقف بلبس قدام المرايا.. جات نور وقفت..

نور:(انت بالجد طالع?)

متوكل:( ايوا)

نور:( لمن ترجع حتلاقيني نمتا)

متوكل:( وين المشكله.. نومي ارتاحي)

نور:( متوكل ممكن تقعد انا دايره اتكلم معاك)

متوكل:( لمن ارجع ي نور)

نور بتصميم:( لا اسي ي متوكل)

متوكل قبل عليها:( في شنو?)

نور:( تعال نقعد برا عشان ميمي نايمه)

و طلعت.. متوكل مشي وراها..قعدو في الصاله..

نور:( انت م حاسي انك مقصر معانا?)

متوكل باستغراب:( كيف مقصر? حصل يوم طلبتي حاجه و م جبتها ليك? نفسك في اكله و م جبتها ليك? نفسك في لبسه و م جبتها ليك? دايره تغيري عفش البيت رفضتا ليك? دايره تغيري عربيتك رفضتا ليك?)

نور:( لا ي متوكل.. انا م قصدي القروش.. عارفاك م مقصر معانا في حاجه.. بس ي متوكل انا محتاجه ليك انت كده.. تقعـد معاي في البيت.. تاكل تتونس تضحك.. احس بيك قاعد معانا م طول اليوم جري و شغل.. انا جد محتاجه الحاجه دي.. الرجال ديل كلهم بشتغلو بس برجعو الب