الجزء 24

صحيت ب تلفوني بضرب عاينتا لقيتو مصطفي لقيت الساعه7 صباحا رديت..

مصطفي:( صباح الخير)

قلتا:( صباح النور)

مصطفي:(لسه نايمه?)

قلتا:( ايوا)

مصطفي:( صوتك حلو شديد و انتي صاحيه من النوم)

قلتا:(ضارب لي عشان تقول لي كده?)

مصطفي:(لا عشان اسمع صوتك)

قلتا:( مصطفي اقفل انا عندي نص ساعه دايره انومها حتي اصحي للشغل)

مصطفي:(ليه بتقصري في حقي كده?)

قلتا:( كيف يعني?)

مصطفي:(يعني كل الرجال القاعدين هنا في المستشفي نسوانهم جوهم الصباح جابو ليهم الشاي و بسكويت و سندوتشات)

قلتا:( و انا دخلي شنو?)

مصطفس سكت مساافه..

مصطفي:(ولا شي.. يلا باي)

و قفل.. ابتسما و قمتا طوالي استحميت و صليت و نزلتا احضر شاي و حلويات و بعمل في سندوتشات لقيت اميره صاحيه قاعده في الصاله بتشرب في شاي و ام رجب بتنظف في الارض..قلتا:( صباح الخير)

اميره بمساخه:( صباح النور)

و دخلتا المطبخ م عبرتها.. سمعتها بتتكلم مع ام رجب..

اميره:( صحي ي ام رجب امبارح لقيتيني ماف و اتفسحتي في البيت ذي م دايره ..شي اكل و شي ونسات و شي ضيوف.. ليه بتعملي من وراي? لو شايفاهو صح اعملي قدامي م من وراي.. تمام?) فهمتا انو اميره قاصداني انا... اتضايقتا من كلامها و كتمتو فيني.. شلتا الحاجات العملتها و طلعتا ركبتا تاكسي و مشيت المستشفي دخلتا سالتا من غرفه مجدي و مشيت عليها وصلتا لقيت مصطفي راقد في الكرسي ذي النايم وصلتو..

قلتا:( مصطفي)

فتح عينو عاين لي استغرب و كشر لي..

مصطفي:( شنو الجابك?)

ابتسمتا قلتا:(جبتا الشاي و السندوتشات ل خالو طلال و مجدي اكيد جيعانين)

مصطفي ابتسم و قال لي:( اقعـدي)

قعدتا جمبو جرا كرسي تاني ختي فيهو الحاجات كبي الشاي ومدا لي كبايه و شال كبايه و شال سندوتش و بقي بياكل.. عاينتا ليهو بفرح و رضا...اليوم ده اكتشفتي انو مصطفي ده ليهو مكانه كبيره جدا جواي..سالتو من مجدي قال لي كويس بدخل العمليه الساعه10.. قلتااليهو:( العمليه خطيره?)

مصطفي:( لو خطيره انا بكون باكل كده?)

ضحكتا .. جا طلال من هناك سلم و قعد طوالي اديتو شاي و سندوتشات بقي بشرب و بياكل.. استاذنتا من الشغل و قعدتا معاهم.. دخلنا ل مجدي قبل العمليه سلمنا عليهو و طمناهو.. مجدي دخل العمليه بقينا قاعدين برا.. طلال كان مقلق شويه عشان مجدي عندو سكري..طلال ماشي و جاي م قادر يقعد..

قلتال مصطفي هدي خالك شويه..

مصطفي:( ي خال اقعد شويه)

مجدي:(خايفه عليهو.. عندو سكري)

مصطفي:( العمليه م صعبه ي خال)

مجدي:(ربنا يستر)

جا راجع ابوي البيت بدري برضو م لقي سميه قعد استناها ساعتين حتي جات.. لمن شافتو اتخلعت..

عبدالرحمن كورك:(كنتي وين ي سميه?)

سميه:( بسم الله ليه بتكورك ي راجل?)

عبدالرحمن:( بتكلم معاك كنتي وين?)

سميه:(مشيت مع جارتنا هنا السوق و اتاخرنا شويه بس)

عبدالرحمن:( جارتك منو? كل مره تطلعي و تتاخري كده و تقعدي تتحججي لي)

سميه:(يعني حامشي وين ي راجل?)

و دخلت علي المطبخ.. و عبدالرحمن مشي وراها..

عبدالرحمن:( شنو العرفني بتمشي وين)

سميه شربت مويا و جات عليهو بدلع..

سميه:( انت لسه بتغير علي ي عبودي? ي راجل احنا كبرنا علي الكلام ده خلاص زمنا فات حناخد زمنا و زمن غيرنا?)

عبدالرحمن:( ايوا بغير عليك ليه م اغير.. في زول يكون عندو مرا سمحه كده و م يغير عليها?)

سميه:( هههه سمحه...كان زمان ي عبودي)

عبدالرحمن:(لسه والله عندنا زمن.. نفسي في كبايه شاي من يدك الحلوه دي)

سميه:(حاضر من عيوني دقايق و حتكون عندك احلي كبايه شاي)

عبدالرحمن:( طيب مستنيك)

و مشي قعد في الصاله.. سميه اخدت نفس و قالت في نفسها:( الحمدلله مره علي خير)

قاعده ساره في نص الجامعه و ماسكه راسها من الصداع..

دقت ل امجد..

ساره:(امجد وين انت?)

امجد:( انا مع ابوي في مشوار)

ساره:( امجد انا مصدعه شديد)

امجد:( ابلعي بندول)

ساره:( بلعتا م عمل لي حاجه)

امجد:( اقعدي في االكافتيريا م تطلعي االشمس)

ساره:( الكافتيريا جوطه و انا م متحمله صوت حاجه.. دايره من الحبوب البتديني ليها هي الوحيده البتسكت لي راسي)

امجد:(انا بعيد لكن.. استني لمن اجي)

ساره:(طيب اديني اسمها بجيبا من الصيدليه)

امجد:(ماف م بتلقيها هنا انا بجييا من مصر)

ساره بزهج:( طيب انا اعمل شنو?)

امجد:(استني بس لمن اجي)

ساره:( سرعه ي امجد..سرعه)

و قفلت شالت شنطتها و ماشه علي الباب..لقت وحده من دفعتها وقفتها..

البت:( ساره ماشه وين? المحاضره اسي حتبدا)

ساره:(تعبانه ماشه البيت)

و طلعت بسرعه.. وقفت اقرب ركشه ركبت و مشت البيت..

واقفين مع الدكتور بطمنا علي عمليه مجدي..

الدكتور:(الحمدلله العمليه نجحت و ان شاءالله ببقي كويس حيرتاح يومين و بطلع يرتاح في السرير 10 يوم م يتحرك بعد داك بنشوف الحاصل)

مجدي:( يعني هو اسي كويس ي دكتور?)

الدكتور:( كويس الحمدلله.. شويه و بفوق من البنج و بقدر يتكلم معاكم)

مصطفي:( الحمدلله طيب)

الدكتور مشي و قعدنا مستنيين مجدي يفوق..

مصطفي:( ارجعي البيت ي مريم كفايا)

قلتا:( اتطمن عليه

وبس)

مصطفي:(اهو الدكتور طمنا)

قلتا:( مصطفي انا م تعبانه..انا كويسه حاقعد بس)

مصطفي سكت خلاني.. مجدي فاق و دخلنا سلمنا عليهو و اتطمنا..

راقده ساره في السرير و رابطه راسها و بتصرخ من الصداع.. واقفه جمبها اميره و ام رجب..

اميره:( بسم الله ي بتي من متين بجيك صداع قدر ده?)

ام رجب:(عين و اصابتك والله ي ساره)

ساره بالم:( اه ي ماما راسي حيطرشق ي امي)

اميره:(اضرب ل ابوك يجي يوديك الدكتور?)

ساره:(لا ببقي كويسه بس ادوني بندول تاني)

اميره:( لا بلعتي مرتين ي ساره م ينفع تاني)

ساره بزهج:( لا حابلع و حانوم.. عليكم الله خلوني انوم)

ام رجب:(ارح نطلع ي اميره خليها تنوم)

اميره كانت قلقانه علي بتها م كان دايره تخليها بس ام رجب جبرتها و طلعت معاها.. ساره شالت التلفون دقت ل امجد..

ساره:( امجد وينك?)

امجد:(ساعه كده و بكون معاك اصبري)

ساره بخوف:( تاني ساعه? حرام عليك ي امجد)

امجد:( معليش بجي بجي)

و قفلو..

جانا محمد في المستشفي سلم علينا وقعد شويه و لمن جا طالع وصلتو لحدي الباب..

قلتا:(محمد معليش الايام دي انشغلتا عنك شديد)

محمد:( عازرك والله.. الاخبار شنو?)

قلتا:(تمام الحمدلله.. انت و سهي كيف?)

محمد:(تمام الحمدلله)

محمد م جاب لي سيره العمليه ابدا.. اتكلمنا مسافه و دخلتا المستشفي تاني.. انا و ماشه في الممر علي الغرفه لقيت مصطفي واقف مع نهي.. و نهي بتصلح ليهو في القميص بتاعو شفتا المنظر اتخلعتا شديد و وقفتا مكاني بعاين ليهو.. نهي كانت مبتسمه ليهو و بتتكلم و مصطفي ساكت.. جيت عليهم لمن شافوني مصطفي زحا من نهي و نهي ابتسمت لي ب خبث..

مشيت طوالي علي محل كنا قاعدين لقيت مجدي قاعد.. قعدتا و انا زعلانه و دموعي نزلت.. مجدي ركز اني زعلانه و ركز ل وقفت مصطفي مع نهي بس م شاف الحركه العملتها نهي ل مصطفي.. شويه نهي مشت و مصطفي جا قعـد..قمتا طوالي قلتا:( ي خال انا ماشه لبعدين بجي تاني)

مصطفي:(ايوا امشي ارتاحي)

قلتا:( السلام عليكم)

و طلعتا طوالي.. مصطفي كانو م حصل حاجه ولا ركز ل زعلي..

ساره راقده في غرفتها امجد ضرب ليها ردت بسرعه..

ساره:( ايوا ي امجد?)

امجد:( انا وصلتا تعالي بسرعه)

ساره:( طيب)

و قامت بسرعه لبست طرحه و نزلت بسرعه.. ام رجب شافتها كوركت ليها بس م ردت ليها.. ساره طلعت لقت امجد واقف بعربيتو قدام البيت طوالي مدا ليها الحبه شالتها بلعتها طوالي و مدا ليها باقه مويا شربت منها.. انا الوقت داك نزلتا من التاكسي و شفتا الحركه و استغربتا.. ساره عاينت لقتني بعاين ليها باستغراب كشرت لي و دخلت البيت قدامي.. دخلتا م ختيت في بالي حاجه.. لقيت اميره واقفه مع ساره..

اميره:( شنو ي بت الطلعك الشارع مش مصدعه و تعبانه)

ساره:(اديت صحبتي حاجه بس)

اميره:( عايني شكلك كيف و عيونك واقعه ارح الدكتور)

قلتا:( السلام عليكم)

ردو:( و عليكم السلام) و طلعتا طوالي علي الغرفه و سامعه اميره بتتكلم مع ساره..

ساره:( انا كويسه ي امي..حانوم شويه بس) و طلعت غرفتها..

صليت و رقدتا انوم بس التفكير في مصطفي و نهي م خلاني بقيت بسال نفسي الف سؤال( هم بحبو بعض? هو دايرها? طيب ليه رفضها من الاول?? )الف سؤال في راسي م لقيت ليهم اجابه.. موضوع ساره استغربتا منو بس م ركزتا ليهو كتير الا المساء كنا واقفه في المطبخ بعمل في سندوتشات لي سمعتا اميره بتتكلم مع عزالدين..

اميره:(جات راجعه من الجامعه بدري و راسها حيطرشق من الصداع لمن بتكورك و عيونا دي م قارده تفتحا.. خوفتا عليها شديد قلتا ليها الا اوديك المستشفي بس رفضت قالت حتنوم و خليناها تنوم...بعد ساعه كده او اكتر نزلت فجاه طلعت الشارع و جات رقدت شويه بقت كويسه حتي ااكلت و اتفاهمت معانا)

عزالدين:( طلعت مشوار يعني?)

اميره:(لا دقيقتين بس و جات راجعه رقدت شويه بقت كويسه)

عزالدين:( يمكن جابت حبوب من الصيدليه بلعتها وله حاجه)

اميره:( احتمال)

كلام اميره رجعني ل الحصل مع ساره قبيل.. انا شفتها بتبلع في حبوب و استغربتا زول ببلع حبوب في الشارع كده? كلام اميره ده حسسني في حاجه.. ساره دي م ساهله معقوله بتبلع حبوب? لالا م اظن.. قلتا لازم اتاكد بس كيف م عارفه..

نتلاقي♥