الجزء 27

متوكل راكب مع حسن في العربيه راجع علي البيت..تلفونو دقي عاين لقاهو عزالدين.. ردا..

متوكل:(الو...اهلا ي عزالدين كيفك? .... تمام الحمدلله...... ايوا...... م قالت لي والله....... تمام.....اسي بجي... تمام..... مع السلامه) و قفل...و بان علي وشو القلق... حسن كان سامع الكلام و عارف بالحاصل كلو..

متوكل:(حسن ارجع وديني بيت نسابتي)

حسن:(حاضر)

مصطفي طلع من الحمام و شالو تلفونو لقي المكالمه ضرب ليها..

مصطفي:( الو...ايوا ي نهي كيفك?)

اللحظه ديك زعلتا ذياده كيف يتجرا و بتكلم معاها قدامي..

مصطفي:(ايوا مواعيدنا بكرا... المطعم البعجبك حدديو..... خلاص ظريف...ااي اكيد حاجي اسوقك معقوله اخليك تجي براك... خلاص تمام بديك تلفون بكرا... يلا سلام) و قفل..

مصطفي عاين لي لقاني مكشره و بعاين في تلفوني..

مصطفي:( مريم مالك مكشره?)

م رديت ليهو..

مصطفي:( مريم بتكلم معاك انا)

عاينتا ليهو بطرف عيني و سكتا..

مصطفي جا وقف جمبي و مدا يدو مررا علي راسي زحيت ليهو يدو بعصبيه و قلت:(اوعي تلمسني)

مصطفي اتخلع من كلامي...اللحظه ديك سمع ابوهو بكورك ليهو فطلع طوالي م اتكلم معاي...

قاعدين ابوي و سميه في غرفتهم بتونسو..

سميه:(رايك شنو في كلامي ده?)

عبدالرحمن سكت شويه:(والله م عارف بس م صغيره عليهو)

سميه:(الفرق في العمر بين المرا و الراجل مهم و كل م يكون اكبر بكونو متفاهمين.. اسي احنا الفرق البينا كبير بس متفاهمين صح?)

عبدالرحمن ابتسم:( صح)

سميه:( في النهايه البت م ليها الا بيت راجلها)

عبدالرحمن:( صح)

سميه:(خلاص خليهم يخلصو امتحانات و نظبط الموضوع.. م تجيب سيره قدام محمد و مريم)

عبدالرحمن:(طيب)

قاعده سهي في الصاله و باين عليها الهم...من يوم الدكتور قال ليها محتاجه عمليه و هي مهمومه.. بتصلي و بتدعي ربنا طول الليل انو يسهل ليهم القروش عشان العمليه.. جا داخل محمد الشقه و هي م ركزت ليهو ...

محمد:( السلام عليكم)

سهي برضو م سمعتو... محمد استغرب و جا عليها هبشها من كتفها سهي اتخلعت..

محمد:(سرحانه وين?)

سهي:(محمد خلعتني)

محمد:(معليش.. بس دخلتا و سلمتا و انتي م رديتي)

سهي:(معليش.. ليه اتاخرتا?) و وقفت قدامو..

محمد:( الشغل.. جيعان شديد الاكل جاهز?)

سهي:( ايوا جاهز)

محمد:( خلاص جهزي و استحما سرعه و اجي)

سهي:(حاضر)

محمد داير يمشي كده ركز ل سهي و تاني رجع ليها..

محمد بكل حنيه:( م تشيلي هم كده.. ربنا حيسهلا.. و حتعملي العمليه و حتملي البيت ده عيال)

سهي:( ان شا۽الله)

محمد:(خلي ثقتك في ربنا كبيره)

سهي ابتسمت:(و نعمه بالله)

محمد:( ايوا كده.. يلا جهزي الاكل سرعه)

سهي:( من عيوني)

و مشت علي المطبخ ب نفسيات احسن كتير من قبل م يجي محمد.. محمد ابتسم و مشي علي الغرفه...

قاعدين مصطفي و عزالدين و متوكل و نور و اميره..

متوكل:( والله ي عزالدين انا م زعلتها في حاجه.. صح انا م بقعد معاها في البيت كتير بسبب الشغل و بعتزر ليها و مرات بفضي روحي مخصوص عشانها.. اسي يوم الجمعه فضيت روحي و جيت هنا معاها و تاني بليل رجعتا البيت بدري و اتعشيت معاها...يعني ي عمي البقدر عليهو والله بعملو)

عزالدين:(عارفك والله ي متوكل و مقدر شغلك)

مصطفي:( هي في حاجه مزعلاها بس م عارف شنو)

متوكل:( اتكلمي ي نور انا مزعلك في حاجه?اهو قدام اهلك انا زعلتك في حاجه?)

اميره:(من جات م قالت شي غير م مرتاحه و خلاص)

متوكل:(اتكلمي ي نور قولي لي قدام اهلك.. انتي زعلانه من شنو?)

نور:( انا م مرتاحه ..بس)

عزالدين:(ده م سبب كافي ي نور.. دايرين سبب مقنع)

نور سكتت..

مصطفي:(اها احكي)

نور برضو ساكته..

عزالدين:( ارح ي جماعه نخليها براها مع متوكل يمكن يفهم حاجه منها)

اميره:( طيب)

و قامو التلاته خلوها براها معاهو..

متوكل قام جا قعد جمبها و هو مبتسم و مدا يدو مسك يدها..

متوكل بكل حنيه:( مالك حبيبتي?)

نور ساكته و مكشره..

متوكل:(احكي لي في شنو? ليه خليتي البيت و جيتي هنا?)

نور برضو ساكته..

متوكل:(نور صح انا بقصر معاك بس والله غصب عني و البقدر اعملو قعد اعملو..اسي يوم الجمعه م فضيت روحي عشانك و قضينا وقت ظريف?)

نور بزهج:( يوم واحد بس حتمسكو لي سنه كامله?)

متوكل:(لا والله م قصدي.. بس بوريك اني م بحب اقصر معاك و بعمل البقدر عليهو...انتي عايزه شنو? طلباتك شنو? الدايراهو علي راسي)

نور:( انا حاسه اني م عندي لازمه في حياتك.. انت حياتك كلها شغل بس.. انا م مهمه ابدا)

متوكل:( م تقولي كده.. انا عندي منو غيركم.. انتي و ميمي كل حياتي.. انا بعمل كل ده عشانكم عشان تعيشو مرتاحين م تحتاجو ل حاجه لو يوم ربنا اخد امانتو اكون امنتا ليكم مستقبلك.. ليك و ل ميمي و ل اولادنا الحيجو ان شا۽الله.. يلا عشان ترضي انا حافصي روحي..تاني كل جمعه حاقعدا في البيت و م حاطلع ابدا.. نقصيهو في بيتنا او هنا.. ذي م عايزه... و بحاول باقي الاسبوع م اتاخر شديد...اها تاني طلياتك شنو?)

نور:(ده كلام ساي م بتنفذ منو ولا حرف)

متوكل:(لو لقيتيهو كلام سااي

تعالي راجعه بيتكم هنا و م ترجعي لي تاني...كويس?)

نور سكتت..

متوكل:(يلا اتفقنا ?يلا قومي جيبي ميمي و ارح البيت.. يلا)

نور سكتت..

متوكل حبي علي يدها..

متوكل:(يلا ي نور عيني)

نور حججها كانت بسيطه و م قدر تقنع اهلها ولا متوكل و متوكل قدر يقنعها.. قامت جابت ميمي و سلمت علي اهلها و انبسطو جدا..

اميره:(ربنا يهدي سركم ي رب)

عزالدين:( ربنا يسعدكم ي رب)

مصطفي:( ربنا يبعد عنكم كل شر)

نور طلعت مع متوكل و هي شايله ميمي.. لقت حسن مستنيهم في العربيه.. حسن من شاف نور جايه مع متوكل.. عرف خطتها فشلت ...قلبو وجعو.. نور خجلت من حسن و م قدرت ترفع عينها عليهو.. ركبو العربيه و مشو..

مصطفي جا طالع لقاني نمتا.. رقد نام هو كمان..

تاني يوم من الصباح مقلقه من شوفه مصطفي ل نهي.. اتكلمتا شويه مع عليا۽ لقيتها زعلانه من هاني و بتشتكي و م عبرها.. رجعتا البيت اتغديت مع عزالدين و اميره .. عزالدين قال مصطفي متغدي برا م جاي... طبعا زعلتا شديد و اتضايقتا.. و الغيره قتلتني.. كيف يطلع مع نهي عادي.. في شنو? بينهم شنو? خلصتا اكل و طلعتا غرفتي قعدتا مستنيه مصطفي يجي.. مصطفي جا بعد المغرب سلم عادي و نزل قعد مع ابوهو عندهم شغل مع بعض..

سحر قاعده مع عليا۽ ..

عليا۽:(انتي شايفه كده?)

سحر:( ايوا طبعا.. اسمعي كلامي اديني رقم مرتو)

عليا۽:( طيب.. دقيقه)

و شالت التلفون ادت سحر الرقم.. سحر سجلتو عندها و رسلت رساله ل ناديه.. بتقول فيها( راجلك بخونك)

اللحظه ديك ناديه بتاكل في عيالها و هاني نايم في الغرفه جوه.. المسج جات قرتها استغربت.. بس ابتسمت و قالت في نفسها( ناس فارغه بحبو يخربو بيت الناس...كيف بيخوني و هو نايم جوه) رمت التلفون كانو م حصل حاجه...

بهناك سحر و عليا۽ مستنيين رد فعلها لمن مرت نص ساعه و حصل شي..

عليا۽:(اها نعمل شنو?)

سحر:( م حتصدق من اول مره.. بس بعد كم مره حتصدق.. خلي عندك صبر...بكرا تاني برسل ليها)

عليا۽:( طيب)

مصطفي جا داخل الغرفه شايل ورق بقرا فيهو.. قعد في الكنبه و انا كنت راقده علي السرير.. تلفونو في الشاحن جمبي.. مصطفي دخل الحمام... شلتا التلفون دايره افتحو م عرفتا الرمز...كنت دايره اشوف الكلام البينهم هو و نهي.. فجاه التلفون دقي و هو في يدي.. اتخلعتا شديد عاينتا لقيتو الصادق حق الشرطه.. قمتا سرعه مشيت دقيت ليهو الباب...

قلتا:( مصطفي تلفونك)

مصطفي:( دقايق)

قلتا:( ده الصادق الضابط)

في ثواني مصطفي فتح الباب و شال مني التلفون و بخوف ردا..

مصطفي:( الو?..... ايوا....... امي?? ............. طيب طيب جاي) و قفل بسرعه و هو برجف..

قلتا:( في شنو?)

مصطفي:(الصادق قال لقو وحده بتشبه امي في االمستشفي مجهوله... ماشي اشوفها)

قلتا:( دقيقه امشي معاك)

مصطفي م ردا شال مفتاح عربيتو بسرعه و جرا و انا دايره الحقو بس هو كان اسرع مني و طلع من البيت بسرعه..

عزالدين و اميره كانو قاعدين في الصاله شافوهو جاري سالو م ردا ليهم..

عزالدين:( في شنو ي مريم?)

قلتاليهو:( الضابط ضرب ليهو قال انو في وحده بتشبه امو في المستشفي و انو يجو يتعرفو عليها)

طلع متوكل من مكتبو و حسن مستنيهو قدام العربيه فتح ليهو الباب ركب و اتحركو..

متوكل:( حسن لو سمحت امشي لي محل الدهب الفي الرياض ده)

حسن:(حاضر)

مشي حسن محل الدهب و نزل متوكل..

متوكل:(ادخل معاي اعزل معاي طقم م بعرف انا)

حسن:( يمكن زوقي م يعجبك)

متوكل:( معقوله بس.. يلا)

و دخلو المحل..حسن كان متضايق بس م بقدر يقول ل متوكل لا.. اختارو طقم حلو و رقيق ل نور و طلعو مشو..

متوكل دخل البيت لقي نور بتحضر في فيلم في التليفزيون و ميمي نايمه في الكنبه جمبها..

متوكل بابتسامه:( مسا۽ الخير)

نور:( مسا۽ النور.. مالك جاي بدري?)

متوكل:( الساعه 8 .. كلو عشان رضاك)

و قرب عليها و قعد جمبها فتح الكيس طلع الطقم..

متوكل و هو مبتسم:( و ده برضو عشان رضاك) و فتح العلبه..

نور عاينت لطقم بفرح..

نور:( الله.. حلو شديد)

متوكل:( بالجد عجبك? لو م عجبك بنمشي اسي نغيرو)

نور:( لا عجبني.. شكرا)

متوكل:( العفو.. ده واجبي..انا جيعان ممكن تحضري الاكل و ناكل مع بعض)

نور:( حاضر)

و قامت مشت علي المطبخ...

مصطفي دقي ل خالو طلال يلحقو علي المستشفي عشان طلال بعرفها اكتر... مصطفي وصل قبل طلال و دخل ل الصادق..

مصطفي بخوف:( وينا? )

الصادق:( مصطفي اهدا يمكن م تكون هي)

مصطفي:( طلال اسي حيجي هو بعرفا اكتر)

الصادق:(ايوا احسن)

في ثواني طلال جا جاري..

طلال:( هي وين?)

الصادق:( في المشرحه جوه)

مصطفي اتخلع شديد و صرخ:( ميته?? )

الصادق:( ايوا)

مصطفي ختي يدينو في راسو و جسمو كلو برجف و بقي بدعي بصوت عالي:( ي رب م تكون هي.. م تكون هي.. ي رب م تكون امي.. ي رب)

نتلاقي♥