الجزء 2
نهلة صاحبتي من تندلتي في ولاية النيل الابيض ... و لفرحتي الشديدة اكتشفت انها ساكنة معاي في نفس داخليتي ...
نهلة عندها اخوها مهندس متزوج وساكن بزوجته في اركويت ... هي برضه بتمشي ليهم مرات في اجازة نهاية الاسبوع ... قالت لي
( هم قالوا لي اجي اقعد معاهم ... لكن هي كلها شقة صغيرة وهم عرسان جداد ... مافي داعي لتقل الدم ... كدة احسن لي في الداخلية ... )
في الداخلية انا نهلة مشينا للمشرفة وحنسناها حولتنا في غرفة واحدة مع بعض ... طبعا معانا بنات تانيات لكن ما كنا شغالين بيهم كتير ...
ومن اللحظة ديك نهلة احتوتني .. وبقت لي دعم وسند في الداخلية وفي الجامعة ... بالذات في الجامعة ... هي طبعا عكسي تمام .. النوع الشخصيتها قوية و اجتماعية ....
و هي جات اتعرفت بي عشان حرقتها حقارة البنات الفقريات ديك بي ... وقفتهم في حدهم .. بقت طوالي حايمة معاي .. ولما نجي بجنبهم طوالي تعاين ليهم في عيونهم و تحمر ليهم ....
وبرضه عن طريقها اتعرفت ببنات تانيات في الدفعة ... وبقى عندنا قروب زينا وزي غيرنا ... والبنات ديك خلوني و شافوا ليهم موضوع غيري ....
انا طبعا كنت هادئة ومسكينة في البداية .. وبسبب صحبتي بنهلة بقيت شوية كدة منفتحة واجتماعية .. ادتني شوية ثقة في نفسي ...
من ناحية الجكس نهلة برضوا كانت عاملة لي حماية ... قالت لي ( جكس الجامعة ديل ما فيهم فايدة ... عايزين يقضوا وقت ساكت ... شايفنك شهادة عربية وطمعانين ) ... والله اظن كان في كم ولد معجبين بي لكن خوفة من نهلة ساي ما وصلوني ..
وبالذات كانت بتحذرني من نوع الاولاد البكونوا اجتماعيين وبتاعين ضحك و هظار وكدة .. قالت لي ( ديل بالذات تبعدي منهم ... ديل عايزين يلعبوا ببنات الناس و يقضوا بيهم وقت .. ) .. المهم اننا لغاية ما وصلنا اخر سنة كنا سناقل درجة اولى ....
طبعا عيشتي في السعودية عودتني على حاجات تعبتني شديد في السودان ... في السعودية ورغم اننا زي ما قلت كنا من الطبقة المتوسطة لكن كنا عايشين في بيئة مختلفة ... لا في ذبابة لا غيره حايم ... الموية ياها موية الصحة وكدة ...
كنا لما نجي السودان في الاجازة امي تقفلنا زي قفلة السعودية وواحد ... اكل من برة مافي ... الطلعة محدودة جدا .. حتى لما هي تمشي تزور اهلنا مع ماما سعاد ما قاعدة تسوقنا معاها ... اما برة الخرطوم دة طبعا ولا نحلم بيه حلم ....
ماما سعاد قالت ليها ( يعني يا منال طيب فايدة جيتهم من السعودية شنو ما دام مقفولين في البيت ... ؟؟؟ما كنتي تخليهم قبلهم ؟؟؟ )
ماما قالت ليها ( احسن لي كدة .. امرقهم يقوموا يعدوا لي الاجازة كلها مرض ... ما عندهم مناعة لامراض السودان بعذبوني ساي )
وواصلنا على كدة ... ما بين قفلة السعودية وقفلة السودان ...
انا لما جيت اول شهر في الداخلية طوالي كانت عندي نزلة معوية ... ما عارفة من الموية ولا الاكل ... ولا شنو ... والحكاية دي عقدتني من الموية و الاكل ... بقيت ما بشرب الا موية الصحة و الاكل دة بس بقيت اكل في الطحنية و المربى و الحاجات دي ...
نهلة قالت لي ( اها يعني بطنك ح تتعود كيف؟؟؟ ... السودان دة اصله مافي مفر منه ... عشان كدة لازم تخشوشني ... )
لكن برضه ما قدرت ... غايتو سنة اولى دي عديتها كلها كدة .. رغم مجهودات نهلة في الداخلية وماما سعاد في البيت .... لما مشيت الاجازة للسعودية مشيت ليهم ضعيفة وحالتي بالبلاء ...
عشان كدة تاني سنة لي في الجامعة ابوي ضغط نفسه و تم تشطيب البيت حقنا ... فرشوه سريع سريع ... البيت طبعا في جبرة ما بعيد من الجامعة ... واجروا لي امجاد توديني وتجيبني ... قروشها ما كتيرة ... وسيدها ساكن قريب لينا .. و جات ماما سعاد وخالي عصمت قعدوا معاي في البيت ... وخلوا بيت الحاج يوسف لخالتو ايمان ... ووانا ارتحت من ناحية الاكل والشراب ... ماما سعاد طبعا طباخة ما حصلت ...
لكن طبعا برحولي للبيت دة فقدت نهلة شديد .. مع اننا في الجامعة طوالي مع بعض ... المهم اني بقيت اجيبها معاي البيت طوالي ... في البداية كانت بتتحسس ... لكن ترحيب ماما سعاد وخالي عصمت الشديد بيها زال منها الحساسية دي وبقت تجي عادي .. خاصة انه البيت كبير و انا وهي في اوضة برانا وعلى راحتنا
انا برضه بقيت مرات امشي معاها شقة اخوها زهير و اتعرفت بيه وبزوجته اسمها سحر ... وهي بت خالة ناس نهلة وظريفة شديد .... وبرضه اتعرفت بام نهلة حاجة الرضية ...
حاجة الرضية جات الخرطوم كم مرة من تندلتي ... وجاتنا في البيت واتعرفت بماما سعاد ... طبعا هم قريبات لبعض في العمر ... حاجة الرضية ما صغيرة ونهلة هي اصغر اولادها ........ وطبعا ناس امي برضه بقوا يعرفوا نهلة واهلها شديد .... و بلاقوها لما يجوا الاجازات ...
المهم خلال سنتين الجامعة ديل كنت اتحسنت شوية من حالة القفلة الشديدة ديك لكن لسة ما مدردحة شديد .. وماما سعاد الكانت بتشاكل امي تقول ليها قافلة اولادك شديد هي ذاتها بقت لي زي امي .. ما بتخليني اطلع براي اي مكان .. يا معاها هي ... اومع خالو عصمت .. او مع عمو الخاتم بتاع الامجاد جارنا ... او تجي نهلة تسوقني ... غير كدة مافي طلعة .... لو اتكلمت تقول لي انتي امانة ....
مهاب اخوي جاء الجامعة بعدي بسنة .... هو غايتو ملحلح اكتر مني .. وماما سعاد ما ضغطت عليه شديد زيي ..
اخر سنة لي في الجامعة ومع جري المشروع نهلة جات قعدت معاي عديل في البيت ... وعشان الجري الشديد للمشروع خالي عصمت بقى مرات يودينا بعربيته الجامعة ...
يوم كدة بعد وصلنا ونزلنا كانت في مجموعة من بنات شلتنا واقفات جنب الباب .. مشينا سلمنا عليهم طوالي واحدة منهم قالت لينا ( دة منو المز الوصلكم دة ؟؟ بقيتوا تعملوا حركات من ورانا ؟؟ )
انا ضحكت وعاينت لنهلة .. واستغربت لما لقيتها ما قاعدة تضحك ... ولا ردت رد من ردودها الحارة المعتادة ديك للبنات ... قلت للبت ( مز شنو ؟؟ دة خالي يا بت .. )
قالت لي ( ويعني عشان خالك يبقى ما مز ؟؟؟ خلاص انا من يوم الليلة صاحبتك ... ) قعدوا كلهم يضحكوا .. الا نهلة اعاين ليها ساكتة ... دي مالها دي ؟؟؟
بعد داك في الايام البعدها لما خالي عصمت يكون موصلنا بالعربية كم مرة زريته يعاين لنهلة بمراية العربية ... وبقى يعزمنا مرات في كافيهات .. ويقعدوا يتعاينوا هو نهلة .... اها يعني الحكاية كدة ...... عصمت ونهلة
..... مافي واحد منهم اتكلم قال حاجة .. لكن باين انه في موضوع بينهم ... يمكن يكون في بدايته ... قلت بس اصبر و انتظر .... وادعي ربنا يجمعهم ...
زهير اخو نهلة كان برضه بساعدنا في المشروع وايام الامتحانات النهائية دي .. طبعا هو شغال في شركة هندسية خاصة اسمها شركة البدري .. قال لينا ( شدوا حيلكم و اتخرجوا بنتيجة كويسة .. انا بكلم مديرنا انكم تجوا تتدربوا عندنا اول ما تتخرجوا .. ولو عجبتونا ح نعينكم تعيين دائم ... )
نهلة قالت ليه ( انت بس كلمه لينا وجهز لينا الوظائف .. ما عندك مشكلة ما ح نخذلك ابدا ) ...
ختينا الكلام دة طبعا في راسنا و اندعكنا دعكة شديدة في الامتحانات النهائية ... والحمدلله نتيجتنا الاتنين طلعت تمااام .. قلنا لزهير بس ادينا فرصة نروق شوية و بننزل معاكم التدريب في الشركة ...
نزلنا لينا كورس بتاع اتوكاد ... وبعد داك نهلة سافرت تندلتي تقعد اسبوعين وتجي عشان ننزل طوالي الشركة ... انا ناس ماما قالوا لي تعالي السعودية شوية لكن قلت ليهم مافي داعي اقطع تذكرة عشان اسبوعين بس ... ح اقعد انتظر نهلة لغاية ما تجي وننزل التدريب طوالي
ولكن زي ما بقولوا تاتي الرياح بما لا تشتهي السفن ..