الجزء 11

نرمين:(اول م شفتو حسيت يادوب بالراحه مع انو وشو ظاهر فيهو التعب..)

آسر:(قعد قصادي ف الكرسي و بقا بعاين لي)على فكره

انا شاطر ف قراية العيون و عيونك بتقول أنك كنتى منتظرانى..♥

نرمين:(فضلتا ساكته و م نزلتا عيوني)

آسر:ح اقول ليك شي أمكن م تفهمي حاجه بس يعني المهم أسمعيني..أمبارح أكتشفتا أنو فعلا ف قصص حب حقيقيه..يعني قصص زي حقت الروايات،،أنا عمري 29 سنه و الله م حصل حبيت تصدقي؟!..يعني عمري م أتعلقتا ببت و أمور الأفلام دي...صح دخلتا ف علاقات بس م حصل قلتا لبت بحبك و انا فعلا بحبها..بس امبارح و لأول مره احس انو انا مفروض ادخل ف علاقه حب..الحب الحقيقي داك عشان بعد أموت ألقا البحبني و بدعي لي...أمكن عايز أعيش نفس قصتك انتى و يوسف يكون كلها حب و تنتصر رغم كل الناس الوقفو ضدها..قبل كده سمعتا جمله و عجبتني شديد بتقول..

"الحب غالبا ناس صح أخترناهم..و لمن نلقا انهم غلط مفروض نبعد لانو كل م نقرب من الغلط ح نتأذى زياده"

نرمين:(عاينتا ليهو بأستغراب و انا بجد م فاهمه حاجه)

آسر:انا حتى م عارف ليه بقول ليك الكلام ده😂بس انتى انسانه كده بتحسسني براحه..عارفه انا ليه بساعدك؟!..لأنو حاسس انو لمن تتفرج ليك ح تتفرج عندي..م عارف ليه بس أمكن أنتى الدرب الصح في حياتي!..❤

نرمين:(بيني و بين نفسي قلتا.."الدروب الصح محتاجه راجل،و الحاجه الأنا مقتنعه بيها أنك فعلا راجل")

ريان وقفت قرايه و سرحت مسافه و هيا بتردد..

"الحب غالبا ناس صح أخترناهم..و لمن نلقا انهم غلط مفروض نبعد لانو كل م نقرب من الغلط ح نتأذى زياده"

ريان:أنتا ي مازن غلط و انا لازم أبعد(ف نص سرحتا دي تلفونا دقا شالتو لقت المتصل مروان..)

مروان:بقيتي كيف؟!..❤

ريان:محتاجه شويه هدوء و ح أبقا كويسه انا متأكده

مروان:و انا محتاج ليك ممكن تبقى كويسه سريع؟!..

ريان:(سكتت)

مروان:(لمن حسه نفسو م كان مفروض يقول كده صحح جملتو و قال..)قصدي يعني محتاج لجنونك لأني زهجتا😂المهم تصبحي ع خير و لو أحتجتي لشي أضربي لي❤

ريان:حاضر❤(قفلت تلفونا و طوالي رقدت نامت💕)

ف جانب تاني..

مازن:ي عبد الله عليك الله م تنق لي

عبد الله:انتا حسي عايز تعمل شنو..تضرب لغفران يعني؟!..

مازن:اي☺(و شال تلفونو ضرب ليها بعد مسافه ردت..)غفران

غفران:ايوه ي مازن

مازن:(سكت مسافه..)انا بجد محتاج إنى أشوفك

غفران:مش على اساس انك بقيت تكرهني؟!..

مازن:م قادر💔انتى عارفه أني بحبك ليه بتعملى كده؟!..ي بت الناس قلتا ليك انا عندي استعداد حسي أعقد..

غفران:(قاطعتو)ياخ م تجيب سيره العقد..انا قلتا ليك م عايزه أتقيد براجل و انتا عارف النقطه دي..انا كده مرتاحه عايزني كده اهلا و سهلا م عايزني كده لو سمحتا م تضرب لي تاني(و قفلت الخط)

عبد الله:(عاين ليهو بطرف عينو)ح تفضل تتقبل إهاناتا دي كده لمتين؟..

مازن:بحبها

عبد الله:الحب م زله على فكره،،و بعدين شنو بحبها بحبها ياخ قرفتنا معاك..هيا م بتحبك و انتا عارف النقطه دي كويس😡ياخ انا تعبتا منك زاتو بطريقتك(و شال مفاتيح سيارتو و مشا)

مازن:(سرح مسافه بعدين ضرب لريان جاهو تلفونا مغلق)

"من اسوء الحاجات الممكن الإنسان يعملا أنو يلجاء لزول وقت حاجتو و يسيبو وقت عايز..ريان كانت الملجئ لمازن كل م حسه أنو الدنيا أتقفلت ف وشو"💔

مروان فضل مستني مازن ف الحديقه بتاعت بيتم لمن جا..

مازن:بسم الله واقف هنا بتعمل شنو

مروان:انتا العايز تصل لشنو؟!..

مازن:كيف يعني!..

مروان:عايز شنو من ريان

مازن:دقيقه..انتا بتسأل على ايه أساس؟!..

مروان:مازن انا ماسك اعصابي بالجلاله و الله..انتا م عارف حاله البت كانت عامله كيف قبيل؟!..بعدين أنتا عمرك اصلا م أهتميت بيها حسي الأتغير شنو

مازن:الأتغير انو غيرتا رأي و قررتا أديها فرصه😊

مروان:مازن!..ريان دي بتقرب لينا..كلنا عارفين انها بتحبك طول السنين الفاتت و انتا و لا منتبهه و حسي جاي تخرب عليها حياتا يعني

مازن:ليه بتقول كده أمكن انا جادي ف موضوعا

مروان:انتا بتحب غفران

مازن:عادي رجال كتار بحبو بنات و ف النهايه بتزوج غير البت الحبوها

مروان:😡ي مازن

الضي:هي ي اولاد صوتكم ده مالو عالي كده😳

مازن:ماف شي ي ابوي بس مروان سألني من حاجه و وصلتا ليهو المعلومه😊(و دخل)

الضي:ي مروان ف شنو

مروان:ماف حاجه ي ابوي😡(و طلع)

الضي:ي ود ماشي وين نص الليل ده😳..

مروان:(طلع من البيت و اخلاقو قافله قفله..)

مازن:(طلع غرفتو و برضو زهجان شديد..)

"و قصص الحب الفيها أكثر من شخصين عمرها م ح تنجح او ممكن نقول غالبا م بتنجح"

ريان صحت تاني يوم بدري مشت صلت و عملت الشاي لأمها و ابوها و دخلت تاني الغرفه فتحت تلفونا لقت كميه من المكالمات من عائشه و مازن..طوالي ضربت لعائشه و قررت انو م تضرب لي مروان..

عائشه:ي زفته ي وسخه قلبي كان ح يقيف..يعني عشان الزفت داك تنسي تطمنيني

ريان:اعصابك!..

عائشه:صوتك مالو كده

ريان:(حكت ليها الحصل)

عائشه:انا قلتا ليك مازن ده حيوان😡ياخ..

ريان:(قاطعتا..)خلاص عارف

ه م تنقي

عائشه:طيب عايني انا حسي بجي عليك

ريان:تمام(و قفلت..بقت ماسكه تلفونا و بتعاين لي رقم مازن و فجأه رسل ليها رساله..)

مازن:"عارف نفسي غلطا ف حقك و بجد أسف بس جاني شغل ضروري شديد و تلفوني قفل شحن..عليك الله ردي💕"

ريان:(كانت متوتره شديد و ماسكه تلفونا و م عارفه تعمل ايه..)

مازن:(ضرب ليها)

ريان:(سرحت مسافه بعدين ردت..)ايوه ي مازن

مازن:صباح الخير ي أحلى ريان❤

ريان:(سكتت)

مازن:انا أسف..طيب م ممكن قلبك الجميل يتقبل اعتذاري المره دي؟!..

ريان:(هيا زاتا م عارفه كيف بس فجأه قلبها لان و م قدرت تقسى زياده)م مشكله

مازن:طيب ينفع اعوضك الليله؟!..

ريان:م بقدر و الله

مازن:ده يعني لسه زعلانه؟!..

ريان:لا بس جاياني عائشه

مازن:طيب بكره؟!..

ريان:(سكته مسافه)طيب

مازن:طيب حلو❤حسي عندي شغل يلا باي

ريان:معسلامه(و قفلت الخط..)ده شنو الغباء ده..كيف اقول ليهو طيب..ي ربي انا شكلى ح أجن و الله😭ي بتي مش امبارح قلتي ح تنسيهو..طيب طيب دقيقه أهدي(و وقفت قدام المريه و بقت تتكلم مع نفسها)عايني ي ريان مازن بحب وحده تانيه..هو كسر قلبك اكتر من مره،م لازم تخليهو يكسرك أكتر انتى اكبر من كده..بعدين آسر قال انو الناس الغلط بأذونا معناتا احسن شي عشان م نتأذى م نمشي مع الناس الغلط!..ي ربي😢(و قعدت ف السرير)

ف جانب تاني..

الضي:ي اخوي ده كلام شنو ده

عوض:انتا عارف الحياه دي اصلا لعبه كبيره..و كلنا هنا عندنا قصتنا المكتوبه اصلا..و كلو بحصل لخير

الضي:لا حول و لا قوه الا بالله..طيب متين قالو ليك الكلام ده💔

عوض:قبل أسبوعين كده

الضي:و ريان عرفت؟!..

عوض:لا ريان لازم م تعرف حاجه

الضي:ي عوض ده سرطان يعني لازم بتك تعرف

عوض:ريان حساسه لو عرفت ح تتعب شديد عشان كده م ح أوريها بعدين قلتا ليك م بحصل الا المكتوب..لو الله كاتب لي عمر بعيش و لو..

الضي:(قاطعو..)م تقول كده ان شاء لله ربنا معاك و عمرك أطول من عمري ي رب😢و انا أخوك ح افضل جمبك لمن تتعالج..

ريان شربت الشاي و دخلت الغرفه مسكت الروايه و قالت تقره لممن م عائشه تجي..

نرمين:(بيني و بين نفسي قلتا.."الدروب الصح محتاجه راجل،و الحاجه الأنا مقتنعه بيها أنك فعلا راجل")

آسر:حسي أنا ح أستأذن منك و ان شااء لله بجي بعدين عندي شغل😉

نرمين:..

آسر:(جا قرب مني)خلي بالك من نفسك شديد💕(و طلع)

نرمين:(طبعا قلبي كان ح يقيف و حاسه بلخبطه م عاديه💔)

آسر مشا ركب سيارتو و بعد ساعه كده وصل مطعم ظريف شديد..دخل و لقا صحبو عمر..

آسر:عمر ياخ💕

عمر:اوووه الدكتور😍(و سلم عليو)

آسر:(قعد)وين ي ولد انتا أختفيت كده

عمر:انا الأختفيت و لا انتا سافرتا و بقيت سمح و جيت😂

آسر:😂ي زول انتا عايزني ابقا زيك عشان ألبس هدوم الشرطه دي و أقعد أحرس البلد الخربانه دي

عمر:و الله فعلا خربانه بس الحمد لله💔المهم أدخل ف الموضوع سريع م فاضي ليك😂

آسر:يعني عارفني عايزك ف حاجه😂

عمر:ضارب لي بعد الزمن ده كلو ساي يعني

آسر:طيب عاين عايزك ف خدمه مهمه بالنسبه لي شديد

عمر:احكي و لو بقدر اعمل شي بساعدك

آسر:(حكه ليهو كل شي بخصوص نرمين)

عمر:و الله م عارف أقول ليك ايه..طبعا قصه بت محمد الختم كان ماسكه صحبي قبل كم سنه بس نهائ م ده الطلع ف التقرير

آسر:عشان كده انا هنا..

عمر:القصه العارفه انو بتها اتوفت بعد وقعت من السلم ف بيتم و بعدها راجلا أتوفى ف حادث و نرمين انتحرت..

آسر:ي عمر نرمين عايشه

عمر:بس انتا ذكرتا لي لمن اتكلمتا معاهو انو قال ليك انا اتفاهمتا مع د/أبتهال

آسر:ايوه حتى انا م فهمتا النقطه دي

عمر:عاين ي آسر انا كشرطي مهنتي بتخليني أشك ف أي زول..أمك قبلت ف المستشفي وحده على اساس انها مجنونه ف حين انو عندنا نرمين متوفيه و ماف ليها وجود و دي جريمه ف حق أمك

آسر:(سكت)

عمر:القصه دي متورط فيها أكتر من زول بس لازم تعرف أنو محمد الختم ده أكبر مني و منك..انا شخصيا عارف انو بهرب ممنوعات بره البلد و م قادر أعمل حاجه💔الزمن ده اي شي بتشتري بالقروش و تقريبا هو مشتري رجاال الشرطه كلهم..

آسر:انا م بقدر أسكت ي عمر

عمر:انا ح أساعدك بس أولا م بنقدر نفتح القضيه دي الا نرمين بذات نفسها تجي تتكلم

آسر:بس ده مستحيل هيا م بتقدر تتكلم

عمر:ده القانون ي آسر م بقدر اعمل شي بس لأنك قلتا لي شويه كلام..

آسر:طيب غير نرمين تاني ممكن أعمل شنو عشان افتح القضيه

عمر:لو م نرمين معناتو زول من عيلتا

آسر:(سكت شويه)اختها!دي الوحيده الزارتا قبل كده و أظن انو ممكن تتكلم

عمر:حلو طيب جيب أختها و حاول أقنعا..

آسر:اصل ليها كيف؟..

عمر:خليها علي بضرب ليك يوم و أقول ليك هيا قاعده وين و احسن طبعا تقابلا وش لوش لانو لو ضربتا ليها أحتمال ترفض و تخاف

آسر:طيب حلو❤❤بجد تسلم شديد ي عمر مستحيل انسا ليك الخدمه دي

عمر:م بيناتنا و م دام نرم

ين مظلومه يبقا أكيد ربنا ح ينصرا♥

آسر:إن شااء لله..

ف جانب تاني:

سوسن:(دخلت غرفه نرمين)ي حلوه

نرمين:(عاينتا ليها بطرف عيني و قبلتا)

سوسن:غشيتي الولد و قلتي ليهو بتك ماتت و م بعرف يوسف و بطيخ..عشان كده هو حانى عليك و الله لكن طلعتي ممثله شاطره..

نرمين:(عاينتا ليها بخلعه💔)

سوسن:و يعني لمن تتخاففى مع اولاد الناس بتك ح ترجع؟!..بتك ماتت و اندفنت تحت التراب و لو نططي تاني م ح تشوفيها..

نرمين:(بقيت خاته يدي ف اضاني و ببكي..)

سوسن:لو بتحبي يوسف بتاعك ده امشي ألحقيهو بس..مالك جاريه وره آسر اهه م تكوني بس غيرتي رأيك لانو حبيبك أتعفن و مات زمان؟!..

نرمين:(كل م تقول كلمه انا بزيد ف البكه😭😭)

سوسن:وسخه بس..لو قصتك دي حقيقيه كان زمان اخترتي الموت بس كذابه تفو عليك😏(و طلعت)

نرمين:(بقيت ابكي بس و حاسه روحي بتطلع😭😭😭كلاما هزه فيني حاجه عمرها م أتهزت الا حسي..)

آسر كان يادوب جا المستشفي..سلم على الممرضات تحت و اول م طلع م سمع ليك الا بحاجه بتتكسر من غرفتي...

"نسيت نفسي و ألمي معك،و ف ذات لحظه تذكرت من أكون ف أخترت ان لا أكون.."♥

Previous chapter Next chapter