الجزء 26

محمد وباسل ما صدقوا الشافوا ، والعساكر بغطوا في جثه هيثم ورجال الاسعاف البرفعوا صابر علي السرير

محمد دموعو كانت بتسلل من بين يدينو ، وشغال اقول لا الله الا الله ، ان لله وانا اليه راجعون ، اما باسل كان في حاله لا يعلم بها الا الله وقع بي ركبينو علي الارض ، وبقي اضرب في نفسو مره، ومره اضرب الحايط الجمبو وببكي بي حرقه وبكورك واقول انا السبب انا السبب في موتك يا هيثم انا السبب في الحاله الوصل ليها صابر انا السبب يا ناس

الشرطه استمرت في التحقيقات واتحولت الجريمه من جريمه خطف الي جريمه خطف وقتل مع سابق الاصرار والترصد ، وادين كل من اسعد وعادل واسامه وهاشم وشابين تانين بي الجريمه، اما محمود اتهم بالمعاونه ، وصدام وضع تحت الحكم الغيابي لعدم حضورو وعدم كفايه الادله ضدو

وفتح البلاغ علي انو جريمه تحت المواد الاتيه ‏( خطف ‏( 162 ‏) والقتل شبه العمد ‏( 131 ‏) والمعاونه ‏( 26 ‏) والشروع في قتل ‏( 19 ‏) والتحريض ‏( 25 ‏) مع كل الاصرار والترصد ‏)

وجاء تقرير الطبيب الشرعي في حاله وفاه هيثم ‏( علي ان حاله الوفاه كانت نتيجه لاخذ جرعه زائده من ماده الكوكاين مع العلم ان المتوفي كان يعني من مرض الربو ‏)

اما عن صابر جاء التقرير الطبيب المشرف علي الحاله ‏( علي ان حاله المريض كانت غير مستقره عند الوصول ، وخصوصا الجهاز العصبي الذي تاثر علي اثر اخذ جرعه زائده من ماده الكوكاين ، والحاله الان في حاله استقرار ‏)

وتم كل الاجراءت من اعلام ولي امر المجني عليه ‏( اهل هيثم ‏) والتعرف علي الجثه ومن ثم استلامها

اما عن صابر باسل ومحمد طلبوا من يس انهم هم البقوموا بي ابلاغ ابوه بي هدوء وافهموا الحاصل ، عشان اقللوا من اثر الصدمه لي ناس بيتهم

ويس وافق علي كدا

واتحركوا مع يس بي سرعه علي بيت صابر التلفونو ما وقف ابدا عن الرنين، وصلوا البيت والوقت كان مغرب ، دقوا الباب وبعد مسافه فتح ليهم الباب حاج عبدالله وسلام عليهم واداهم حق الله بق الله ودخلهم البيت جوه

محمد بدا اتكلم وقال لي حاج عبدالله انا يا حاج عبدالله محمد زميل صابر في الجامعه والكنت برد عليك في تلفون صابر ، ودا باسل برضو زميل صابر ، ودا الملازم اول يس عثمان ، هنا حاج عبدالله لمن حيلو برد وبقي افرك في اصابعينو وظهرت علي وشو ملاح خوف ممذوجه بي اسئله مرتقبه اجابه ، الحاج عبدالله بي صوت خافض اكاد ما اتسمع قال لي محمد ولدي صابر بخير ،ولدي صابرحاصل معاه شئ كعب

محمد : لا يا خال ولدك هسي تمام الحمدلله ومافيه شئ ، اطمن يا خال

الحاج عبدالله : عليك الله يا ولدي كان صابر فيه شئ كلمني ، وما دس علي

محمد : يا خال والله ولدك هسي تمام وما فيه شئ

الحاج عبدالله : اذا الحمدلله ، بس صابر وينو ليه ما جاء معاكم

محمد : ودا الجاينك ليه ، وبدا احكي لي حاج عبدالله كل الحصل ، و حاج عبدالله كان بسمع فيه من غير ما قاطعو، بعد ما محمد انتهي من كلامو يس برضو بقي احكي لي حاج عبدالله كل الاجراءت القامو بيها ،هنا حاج عبدالله بقي اقول لا الله الا الله ، لا الله الا الله وسكت علي كدا

باسل قام من محلو وقعد علي ركبيه علي الارض جمب ارجل حاج عبدالله ومسك ايدين حاج عبدالله وقال ليه انا السبب في كل دا يا خال انا السبب يا خال في كل الحصل لي صابر ولي هيثم الله ارحمو ، هم كانوا دايرين انقذوني من صدام ، وانا ما كنت دايرهم اعملوا كدا بس هم اصروا علي ، وانا يا خال عارف تاسفي وندمي ما ح اصلحوا شئ بس بطلب منك السماح ،وراضي بكل شئ داير تعملو لي بس انا دايرك تسامحني انت وصابر واهل هيثم ، والبتقولوا والدايرين تعملوا انا راضي بيه ، بس عليك الله سمحني في حق ولدك ، وبقي ابكي بي حرقه ، حتي محمد اتاثر بي باسل ومن غير ما احس الدموع بقت تنزل منو مطر مطر

حاج عبدالله مسك باسل من كتفو وقومو علي حيلو ، وقال ليه يا ولدي مافي داعي للاسف دا يا ولدي كلو مكتوب ومقدر ، واحنا لازم نؤمن بالقضاء والقدر خيره وشره ، وان شاء الله كلو لي خير يا ولدي و المؤمن امره كله خير ، والحمدلله انو صابر بخير وربنا ارحم صاحبكم هيثم واصبر الله واعوض شبابو الجنه ، وعني انا مسامحك وعافي عنك ، والعفو لله ورسوله

باسل انفج بي البكاء زياده وبقي ببكي بي حرقه وبقول ليه عليك الله يا خال انت سامحتني، وانا والله كان عارف الامور بتصل لي الوصلت ليه دا ما كان خليتهم اتحركوا ولا خطوه ، هنا الحاج عبدالله حضن باسل وقال لي يا ولدي دا قضاء ربنا انت ح تعترض عليه استرجع يا ولدي ، باسل بقي اقول انا لله وانا اليه راجعون ،انا لله وانا اليه راجعون

الحاج عبدالله قال ليهم الكلام دا ح اكون بينا بس عشان امو كان سمعت بي الكلام دا ممكن تروح فيها ، انا ح امشي اقول ليها صابر تعب شويه بعد الامتحان وانتوا جيتوا تطمنونا عليه

محمد وباسل الكان ببكوا ما قدروا اردوا عليه ، رد عليه يس قال ليه ابشر يا خال واحنا عشان كدا جيناك

الحاج عبدالله طلع من الغرفه الهم فيها ومشي علي الخاله سعاد وفهما انو صابر من تعب الايام الفاتت تعب شويه وجاءهو هبوط واصحبوا جو هسي اطمنونا عليه وانو هسي ماشي معاهم اجيبو

الخاله سعاد بقت تبكي وتقول لي حاج عبدالله انتوا بتكذبوا علي ، صابر ما كويس وانا حاسه بي كدا واحساسي ما بخطئ

الحاج عبدالله قال ليها يا سعاد استهدي بالله ولدك بخير بس تعبان شويه من الجري البعمل فيه دا ، وانا هندا قلت ليك ماشي معاهم اجيبو ليك عشان تتطمني عليه

الخاله سعاد قالت ليه رجلي في رجلك ما بخليك تمشي براك ، انا داير اشوف ولدي يا ناس انا دايره ولدي

الحاج عبدالله قال ليها سعاد استهدي بالله قلت ليك انا ماشي اجيبو هسي ف _ مافي داعي لي مشيتك

والخاله سعاد لسه مصره انها لازم تمشي معاهو تشوف صابر ولدها

هنا الحاج عبدالله قال ليها مشي ليك مافي ودا اخر كلامي ، هنا الخاله سعاد سكتت ، ومشي منها علي ناس باسل في الغرفه التانيه وقال ليهم انا خلاص جاهز ممكن نمشي بعد دا ، وكلهم اتحركوا علي المستشفي الفيها صابر

من ناحيه تانيه

التلفون برن

صدام : الو

الجهه التانيه : يا صدام الجماعه كلهم اتقبضوا ، والتهمه لبستهم من ساسهم لي راسهم

صدام بي خلعه وخلعه :😱 انت جادي

الجهه التانيه : دا كلام كمان فيه لعب

صدام : اها والفهم شنو هسي ، انا اعمل شنو، انا اقبل وين

الجهه التانيه : انا مشيت القسم لي ناسي الفيه وبحتا تحت تحت لقيت القضيه حاليا اتحولت لي قضيه خطف وقتل ومحاوله قتل وتحريض ومعاونه مع كامل الاصرار والترصد ، والمتهمين الاساسين فيها اسعد وباقي الشباب ، بس انت ومحمود لسه ما لقوا عليكم ادله كافيه غير اقوال اسعد والشباب انك انت الكنت مؤجرهم والمحرضهم علي الخطف

صدام : والفهم شنو يا معلم

الجهه التانيه : عندك حل واحد

صدامبي لهفه : اللهو شنو

يتبع .....

‏- يا الله أجعلنى ممن قلت عنهم :

‏" ورفعناهُ مكاناً عليّا💜😞 "