الجزء 20

يلا انا ح اقول ليكم احنا ح نعمل شنو

احنا ح نخلي خطه صدام ماشه زي ما هو عاوز ، ح تقولوا لي كيف ؟؟ ح اقول ليكم نخلي صدام ومحمود اتابعوك يا باسل حتي باب الجامعه،وهنا ح ادوا اشاره لي جماعتهم الاصلا هم منتظرنك في الباركن ، هيثم ح اكون مبركن عربيتو جمب عربيتك يا باسل واللحظه الح تركبوا فيها العربيه ح تنزلوا بي سرعه من الباب التاني وتركبوا عربيه هيثم ، وما ح تتحركوا، انا وهيثم ح نسبقكم و ح نكون اصلا في عربيتك يا باسل في المقعد الخلفي ، و ح نتحرك ونمشي بالطريق الانت دائما بترجع بيه ،وبعد ما نتحرك بي مسافه انتوا اتحركو، جماعتهم ح اتحركوا ورانا و ح اعرقونا في الطريق

ولمن القوني انا وهيثم الفي العربيه ح اتراجعوا و ح اعتقدوا انو صدام اداهم المعلومات غلط او هم لخبطوا لانهم ما بعرفوا الا باسل بس، المهم ما ح اقدروا اعملوا شئ

هيثم وباسل ومحمد بسمعوا في كلام صابر ومندهشين ومنططين عيونهم 😳 ، هيثم قال لي صابر انت بتجيب الافكار دي من وين والله انت طلعت ما هين 😁

محمد : صحي القصير يا حكمه يا فتنه

صابر : قول يا حكمه يا حكمه 😌

باسل : والله يا صابر ما عارف اقول ليك شنو ، بس كان خليتني امشي اكسر ليه راسو هسي وانتهي من الفلم الهندي دا هسي قبل ما ابدا تكون ما قصرتا

محمد وصابر بصوت واحد وزهج :😤 بااااسل

باسل : خلاص خلاص مادام انتوا شايفين كدا احسن خلاص انا معاكم المهم ما تنقوا لي 😅

محمد : بس يا صابر الحكايه دي ما فيها خطوره عليك انت وهيثم

هيثم : لا يا اخوي ما تخاف ، وزي ما قال ليك صابر الجماعه ديل جاين لي هدف معين وهو باسل ، لمن ما القوا هدفهم ح تراجعوا، ودا انسب حل لي المشكله الان وديا

محمد : ربنا استر 😔

باسل : هووووي كان فيها خطر اكسروا الحنك وخلوني اعمل الفي راسي 😡

صابر : باسل روق المنقه ياخ 😁 خطر شنو ما فيها اي خطر ، ياخي دي لعبه حرامي وبوليس اصعب منها

وبي كدا الجامعه اتفقوا علي علي تنفيذ خططهم ، واتحركوا علي القاعه ، دخل باسل ومحمد سوا، وهيثم بعديهم وقعد جمب محمود الكان بعاين لي باسل و مبسوط ‏( صحي زي ما بقولوا البتفوالحلك اتبوهملو 😂 في زول قدر اقرا المثل دا ولا افهموا (😅

اما عن صاحبنا صابر باع الجهتين بي الرخيص 😂😂 الرخيص 😂😂 وقعد جمب حب حياتو ‏( روان الحب(😍

ومن شده فرحتو بي انو صلح سوء الفهم بينو وبين محمد وباسل ، وكمان باسل اقتنع بي كلامو وخطتو والاهم انو قاعد جمب حب حياتو😍 ، التوتر الزمان كان بجيهو نساهو ، وقال لي روان معليش قبيل استاءذنت منك وتاني ما رجعت ليك، روان قالت ليه عادي ما مشكله يا صابر ، وبدت المحاضره وكل واحد من ناسنا كان سارح بي تفكيروا ، باسل ومحمد وهيثم كان تفكيرهم في خطه صابر، اما محمود كان مبسوط وبتخيل في شكل باسل الح اصعب علي الكافر و ح اكون منظروا مسخره بعد ما عمليه تنجح ، اما صابر كان في عالم تاني ‏( عارفنوا بفكر في شنو اخونا العاشق دا (😅 وكان داقي الونسه مع روان

في بيت صابر

لا حول ولا قوه الا بالله ، لا الله الا الله

هنا رغد جاءت جاريه من السرير الكانت بتزاكر فيه لي امها الخاله سعاد الصحت من النوم وهي بتصرخ، وقالت ليها بي خلعه وخوف 😵 ماما ماما ما لك بي بتكوركي ، الخاله سعاد بعد ما سمت الله ، قالت لي رغد والله ما عارفه بس حلمت بي اخوك صابر زي اني فقدتو ، كدي يا رغد جيبي لي رصيد من الدكان ادق لي اخوك اطمن عليه ، والله هسي قلبي مقبوض عليه

في الجامعة

بعد ما المحاضره انتهت ، صابر قال لي روان كنت داير ارجع معاك بس الليله سامحيني عندي مشوار ضروري لازم امشي ولو ما كان ضروري ما كان خليتك ترجعي براك ، روان قالت ليه عارفاك ما بتقصر ولو ما مشوارك الضروري كان رجعت معاي ‏( ملاحظين هنا من كلامهم ، صابر يا اخوي شكلها امورك وضحت وسلكت 😅😁 ‏) و ودع روان ، وطلع تلفونو رسل رساله لي محمد وباسل و هيثم قال ليكم فيها ‏( بسم الله نبدا ‏) كل اصحابنا بعد ما استلموا الرساله اي زول اخد موقعو

من الناحيه التانيه

محمود

كان بتصل علي صدام الكان تلفونو مشغول بي مكالمه تانيه وما برد علي محمود ، خلاص محمود اتوتر شديد ولاسما انو صدام من ما استاءذن من قبيل تاني ما جاء راجع ، حتي المحاضره ما حضرها، محمود لسه بدق علي صدام وشغال اقول الاهبل دا ما لقي الا الوقت دا عشان ما ارد ، والاحلي كمان ما برد علي وخاتني في الويتنك

باسل ومحمد طلعوا علي البوابه زي ما مخططين ، وكان محمود مراقبهم وادي اشارته لي جماعتو ، الكانو علي اهبه الاستعداد ، باسل ومحمد وصلوا الباركن وركبوا العربيه زي ما متفق عليه، و العربيه اتحركت ، والجماعه اتحركوا بي ورا العربيه

بعد مسافه ما طويله وفي شارع ميت ‏( ما فيه حركه كتيره ‏) الجماعه عرقلو عربيه باسل وقفوا قدامها في نص الشارع ونزلوا بي سرعه وفتحوا باب العربيه الكان فيها هيثم وصابر

من الناحيه التانيه

باسل ومحمد اتحركوا بعد مسافه زي ما متفقين علي المكان المحدد انهم القوا فيه هيثم وصابر ،بس في عربيه اعترضت طريقهم ونزلوا منها اربعه شباب حاولوا افتحوا باب العربيه بس باسل اتصدي ليهم ومحمد نزل من العربيه ولقي ليه اعواد شجر مقطعه علي الارض، شالها وبقي اضرب بيه الشباب مع باسل ، في اتنين كانوا شايلين صنك 🔪 ‏( سكينه كبيره فيها جزء زي المنشار بستخدموها ناس الجيش ‏) لمن طلعوا سكاكنينهم الناس الفي شارع جوا جارين عليهم واتصدوا ليهم ، الشباب حسوا انهم ما ح اقدروا عليهم قاموا جارين علي عربيتهم واتخارجوا في لمح البصر

الناس بقت تكورك فيهم وبقولوا ليهم دي ما رجاله يا صعاليق دايرين تقتلوا اولاد الناس ، وفي ناس تانين بقولوا لي باسل و محمد انتوا كويسين الصعاليق ديل ما اكونوا قدروا اقربوا عليكم بي سكاكينهم دي

في اللحظه دي باسل عاين لي محمد، ومحمد عاين لي باسل ، وبي صووت واحد بقوا اكوركو صابر صابر هيثم 😱😱

نرجع لي الناحيه التانيه

صابر و هيثم اتفاجؤ لمن الباب انفتح ولقوا صدام في وشهم وقال ليهم بي خسه 😏 انتوا دايرين تستغبوني يا شطار انتوا الليله وقعتكم سوداء معانا

فلااااااش باك

‏( لمن هيثم زعل من صدام و محمود ومشي منهم ، صدام تبعوا من غير ما احس وسمعو لمن اتصل علي صابر وقال ليه انا جائيك الكفتريا ، وتبعوا حتي الكفتريا وسمع كلام وخطه صابر وهيثم ومحمد وباسل، قام طوالي دقا لي جماعتهم وعدل في الخطه وقسم جماعتو لي فريقين ، ودا كان سبب عدم حضورو المحاضره وعدم ردو لي محمود وتلفونو الكان المشغول ‏)

وفي ثواني الشباب المع صدام ضربوا هيثم وصابر الكانو بقاموا فيهم بس ما قدروا عليهم وركبوهم معاهم عربيتهم

باسل ولي اول مره تظهر عليه اثار خوف 😖 في وشو وبقي اتمتم في الكلام م محم محمد اتصل علي صابر شوفو وين

ومحمد بطلع التلفون من جيبو وايدينو بترجف وبتصل علي صابر ، التلفون اداهو جرس لمن قطع ، هنا محمد اتوتر زياده وحاول ادق علي هيثم بس نفس الشئ في جرس بس مافي رد

محمد حس بي احساس غريب زي في مصيبه جايهم في السكه لمن وقع علي ركبو وشغال اقول انا كنت حاسي بي كدا

باسل بعاين لي محمد الراكع علي الارض وبتكلم مع نفسو ومخلوع من البحصل 😳

وخلاص التوتر بين الاتنين فات الحد

باسل مشي علي محمد ومسكو من ايدو وقومو علي حيلو ، وقال ليه احنا لازم نتحرك بي سرعه علي صابر وهيثم ، لمن وصلو الطريق المفروض امشوا بيه صابر وهيثم ، لقوا العربيه واقفه وابوابها فاتحه باسل ومحمد بقوا منططين عيونهم وطوالي جروا علي العربيه ، بس ما فيها شئ الا تلفون صابر الكان بدق وكان مكتوب علي شاشه التلفون ‏( ست الكل ❤ تتصل بك ‏)

وتلفون هيثم الكان واقع علي الارض جمب العربيه

يتبع..

"‏اللهُم صلِ وسلم على مُحمد ،

عدد ماذكره الذاكرون وعدد ماغـفل عن ذكره الغافلون💜 "