الفصل الثاني عشر

نهى وكت طلعت من عند سماهر .. قالت لسواق الركشة عليك الله امشي بالشارع القدامي .. عايزة

تمر بي شارع البيت القديم .. جاها شوق تعاين لي بيتهم من برة بس ان شاء الله ..

احساس الحنين الى الديار ..

طبعا كدا وضعية الخريطة وضحت .. الحي بتاع ناس سماهر في نهاية الشارع من الناحية الشمالية ..

والبيت الجديد حق ناس نهى من الناحية الجنوبية .. وبيتهم القديم .. في نص المسافة بين ده وده ..

اها يازول جات ماشة بي قدام البيت .. شافت في كمية من الحريم داخلين ومارقين ..

قالت لبتاع الركشة اقيف دقيقة .. نزلت سريع بدون ماتحس.. ولا اترددت .. سألت قالت في شنو

ياجماعة ..

قالو ليها البت الصغيرة بت المراة دي .. لدغتها عقرب .. وامها قاعدة جوة منهارة .. ومتدسية

وهسي البت تعبانة تقطع في الزبد .. نحن يادوب سمعنا بيها ..

طبعا ياجماعة دي المراة المطلقة .. الاخوها اشترى ليها البيت ..

نهى دخلت بي سرعة التقول البت بتها هي. ومالقت امها جمبها

قالت لاخوها امك وينها؟ .. قاليها امي متدسية في المطبخ. نهى جرت دفرت باب المطبخ بي قوة

لقتها منهارة وتبكي قالت ليها ..

قالت ليها السلام عليكم .. كيفك .. سلامتها البت .عملتو ليها شنو؟

قالت ليها ولاشي .. انا ماعندي حق الركشة البوصلا بيهو الدكتور ..

اخوي عيان في السعودية .. وتلفونو مقفول .. وابوها ماقعد يرسل لينا اي شي .. انتي منو؟

قالت ليها انا اسمي نهى. البيت ده كان بيتنا نحن بعناهو لاخوك .. بنحن بنعرف صالح اخوك شديد ..

انا جيت مارة لقيت الحريم ملمومات .. ومالاقنك ..

قالت ليها ديل نسوان فارغات ساي.. ماعندهن شغلة غير الخبارات ..

نهى قالت ليها طيب قومي سريع.. في ركشة وافقة برة نوديها اقرب مستوصف ..

قالت ليها لالا بتبقى كويسة براها .. وكان ايامها كملت انا مافي يدي حاجة .. سقيتها ليمون وشاي

مر ..

نهى قالت ليها يا اما بتقومي معاي او بشيلا براي وامشي ..

قومي سرعة مافي وكت البت تعبانة .. انتي من متين ماشفتيها ..

قامت المراة مشت لقت في حريم قاعدات جمب البت يقطرو ليها في الموية في خشمها .. شالت البت

من جمبهن .. زي التقول مابتعرفهن .. نهى استغربت في تصرفات المراة دي. زي الماطبيعية ..

المهم المراة لفحت توبها وشالت البت .. البت عمرها مافايت السبع سنوات ..

نهى قامت جارية قدامها لبتاع الركشة قالت ليهو دور سريع عايزنك تودينا المستوصف .. والبت

جسمها سايح. زي الدلقان. (قطعة قماش).

نهى بعد الركشة اتحركت .. اتصلت على سعد قالت ليهو سعد عليك الله سريع تعال لينا في

المستوصف الفلاني ..

سعد قال ليها مالك في شنو؟ قالت ليهو لالا مع واحده صاحبتي. بس

جيب لي معاك قريشات ..

قال ليها حاضر عشرة دقايق وانا معاك ..

وصلو المستوصف كدا. ودخلو البت اسعفوها.

وسعد وصل.

وبقى يدفع في الفواتير زي المطلوب دين بي كل رضا وهمة. او انو المريضة امه .. والمراة تعاين

ليهم الاتنين .. مستغربة.

بعد ماخلص كل العليهو من حق الدكتور .. والحقن والدربات والاوية ..

حتن بعد داك سأل نهى .. قال ليها صاحبتك دي انا أول مرة اشوفها .. عندك صاحبة كبيرة كدا لمن

متزوجة وبي اولادها؟

قالت ليهو لالا ماصحبتي .. وطي صوتك ماتسمعنا .. دي المرة اخت الراجل الاشترى مننا البيت ..

انا جيت مارة بي البيت لقيت البت تعبانة غلبني افوتها ..

سعد قال ليها تسلمي انتي يا الاصيلة انتي فعلا بت فضل الله.

قالت ليهو المراة دي مظلومة ظلم شديد يا سعد .. والله انا قلبي مقطوع عليها ..

كدي دقيقة بس ياسعد ..

مشت ليها. المراة قاعدة برة والبت مركبين ليها درب في العنبر بتاع المستوصف ..

قالت ليها .. قلتي لي اسمك مريم؟ قالت ليها نعم.

قالت ليها ممكن تديني رقم ابو البت دي.؟ قالت ليها دايرة بيهو شنو ده راجل مامنو اي فائدة ..

قاعد في مدني عندو قروش النار ماتاكلا .. ونحن مستخسر فينا المصروف.

قالت ليها بس انتي اديني رقمو .. قالت ليها أكتبي ملتها الرقم من راسها حافظاهو صم طبعا ..

طوالي نهى اتصلت عليهو ..

السلام عليكم ..

قاليها عليكم السلام ..

قالت ليهو محجوب معاي؟

قالها مرحب منو معاي. قالت ليهو انا نهى جارة مريم ..

يامحجوب انت راجل. والراجل مابجدع عرضو .. يامحجوب بتك شذى في سكرات الموت وانت بعيد

منها؟ حرام عليك ياخي .. يامحجوب شذى متل الملاك .. حرام تموت كدا. بي سبب انو ابوها مهملا

ومطلق امها ..

الراجل قال ليها مالا شذى ؟؟ وشكلو فعلا انزعج واتخلع ..

قالت ليهو شذى بتك ضربتها عقرب .. وهسي بتصارع في الموت ..

وانت احتمال تحصلا واحتمال ماتحصلا .. اسرع تعال شوف بتك

وشوف الحال الحاصل على اولادك.

يامججوب لو البت ماتت والناس كلهم عارفين انو انت مابتصرف عليها .. وبي سبب عدم العلاج ماتت ..

المجتمع مابرحمك. وانت مابتسامح نفسك .. وقبل كل شي ربنا بنصف المظاليم ..

محجوب الله يرضى عليك ارجع لي اولادك ..

قال ليها خلاص حلاص انا هسي طالع على السوق الشعبي .. وجاي .. طبعا الواطة بقت قريب

الغيبة ..

قالت ليهو الله يوفقك يامحجوب ماخيبت ظني. ان شاء الله اولادك ينفعوك ..

وانهت المكالمة معاهو .. والممرضة قالت البت الحمد لله فتحت وقالت عايزة. ايسكريم .. مادام دايرة

اسكريم معناها الأجهزة بتاعتها ظبطت ان شاء الله ..

اها نهى جات لي مريم قالت ليها يا مريومة .. ابو اولادك جاي وعايزاك توعديني بي حاجة .. قبل ما

نحن نمشي ..

حاولي قابليهو بي كل حب واحترام .. خليهو ينجبر ويرجع لي اولادو .. ولاتتكلمي ليهو عن تقصيرو

الفات ..

قالت ليها كويس .. ان شاء الله .. انا والله يانهى انا عايزة اقول ليك شكرن لكن ماعارفة اقولا كيف؟

نهى ضحكت وقالت ليها قولي لي شكرن يا نهى ههههه ..

مريم شكلها عندها حبة مسكنة. لدرجة كبيرة .. يعني تقرب تكون من ذوي الاحتياجات الخاصة ..

تتصرف كتير زي تصرفات الاطفال وطريقة كلامها. قبيل بتها مركبين ليها الدرب وهي بتمص في

حلاوة كوجاك بي تحت التوب. غايتو حرام تكون هي راعية الاطفال ديل براها .. والتصرف بتاع انها

تخلي البت تعبانة وتمشي المطبخ تقعد تبكي .. ده براهو دليل على انها .. ماطبيعية ..

طيب ..

نهى قالت لي سعد عليك الله ياسعد تصبر شوية .. لغاية ماشذى تبقى كويسة والدكتور يقول امشو

نوصلها البيت ونمشي ..

الدكتور قال بعد نص ساعة بس ..

سعد قال ليها ان شاء الله يانهى انا منتظر ماوراي حاجة .. بعدين دا واجب يانهى وسعد اخوك ما

بفوت منه ..

جات قعدت جمبو .. وقالت ليهو عندي ليك بشارة كبيرة تديني فيها فيها قروش ..

قال ليها احكي .. وطوالي دخلي يدك في جيبي شيلي العاوزاهو ..

قالت ليهو تسلم لي انت .. ما محوجني لي حاجة ..

المهم ياسيدي .. طبعا هسي انت ماسألتني جاية من وين. انا جاية من ناس سماهر .. انا طبعا"

عرفت من امي انك انت ماقدرت تحكي لي سماهر الحاصل .. انا مشيت وضحت ليها الصورة

الكاملة ..

وهي والله ماقصرت اتفهمت الحاصل واتفهمت ظرفك وات ...

قبل ماتكمل كلامها .. قال ليها قلتي شنو؟؟؟

مشيتي كلمتي سماهر؟؟؟ .. حكيتي ليها موضوع بت عمتي؟ وكلام ابوي ؟؟

قالت ليهو ايوه في شنو؟

قال ليها وجاية تسعفي البت القرصانة؟ .. انتي دمرتي زول ولنقذتني زول .. انا ماعندي شك انها

هي هسي محتاجة لانقاذ زي شذى دي .. حتكون تعبانة .. حتكون محطمة .. انا كل يوم بأجل في

الموضوع ده .. انتي ليه استعجلتي؟ ومشيتي دمرتيها يانهى؟

كان تصبري شوية يمكن ربنا يفرجا .. علي بين عشية وضحاها ..

لاحول ولاقوة الا بالله .. يارب .. هسي تكون سماهر عاملة كيف؟ ..

لاحول ولاقوة الا بالله .. حسبي الله ونعم الوكيل ..

وقام على حيلو وبقى لافي بي حوش المستوصف .. ويفرك في يديهو .. نهى قالت ليهو .. سعد ..

اهدأ شوية ياسعد اخوي الله يخليك ..

تعال اقعد اقول ليك حاجة ..

انت عارف الحالة الحاصلة عليك دي .. ماحصلت علي سماهر .. لانها زولة مؤمنة بقضاء الله .. وقالت

ليك نفذ وصية ابوك انا عافية ليك ..

قال ليها انا واثق ومتأكد انها بتقول كدا .. دي سماهر وانا بعرفها ..

قال ليها ..

حسرة قلبي راسيات الجبال ماتشيلا.

شاعر روحي تحرق في نهارا وليلا.

اخوك يا الغالية. المحن العليهو تقيله..

فكرك كيف تكون. شبه الزهور الليله ..

انا حالتي كدي يانهى .. انا الراجل اب قلبا قوي .. كيف تكون سماهر الحنينة الرقيقة الحساسة ..

لازم تكون هسي مودنها على الحوادث. انا ماببالغ .. صدقيني زي مابقول لك ..

ماتصدقيها هي .. لو قالت ليك انا كويسة .. بتكون قالت كدا عشان ما أتالم انا بي المها .. لكن بتكون

محروقة حريق والله.

نهي عاينت ليهو كدي وعيونا اتملن .. وقالت والله ده شي غريب ..

انا غايتو جنس ده ماسمعت بيهو ..

فجأة كدا في جرس ضرب .. في تلفون سعد عاين ليهو لقاهو ده تلفون اخوه هاشم.

سعد قال ده كمان داير شنو؟

وابا يفتح ليهو الخط .. نهى قالت ليهو ده منو؟

قال ليها هاشم ..

قالت ليهو يحليلو .. طيب مالك مارديت ليهو ..

قال ليها برجع ليهو بعد نطلع شذى يهديك مرقوها قومي ارح ..